FABC 2026: FABC මහා සමුළුවට පෙර ශ්රී ලංකාව පාලම් තැනීමේ මෙහෙවර යළි මෙනෙහි කරයි.
ජූලි 20 සිට 26 දක්වා ඉන්දුනීසියාවේ ජකාර්තා නුවරදී පැවැත්වෙන ආසියානු රදගුරු සමුළු සම්මේලනයේ (FABC) 12 වන මහා සමුළුව සඳහා ආසියාවේ කතෝලික සභාව සූදානම් වන මෙම අවස්ථාවේදී, ශ්රී ලංකාවේ කතෝලික සභාව "සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර" යන මහා සමුළුවේ තේමාව පිළිබඳ සිය සුවිශේෂී දැක්ම ඉදිරිපත් කරයි.
ආගමික වශයෙන් බහුතරය බෞද්ධ වූද හින්දු, ඉස්ලාම් භක්තිකයින් හා කිතුනුවන් ජීවත්වන බහු ආගමික රටක් වන ශ්රී ලංකාවේ කතෝලික සභාව තුළ පාලම් තැනීමේ මෙහෙවර දෙයාකාර වේ. එනම් සභාව අභ්යන්තරයේ පාලම් තැනිම හා අන්තර් සභා, අන්තර් ආගමික පාලම් තැනීමයි.
සභාව තම ප්රජාව තුළ එකමුතුකම ශක්තිමත් කරන අතරම, අනෙකුත් ක්රිස්තියානි නිකායන් සහ ආගමික සම්ප්රදායන් සමඟ සංවාදය හා සහයෝගීතාව ප්රවර්ධනය කිරීමටද කැපවී සිටියි.
ශ්රී ලංකාවේ කතෝලික සභාව තුළ අන්තර් කිතුනු සභා සහ අන්තර්ආගමික සංවාදය 1980-1990 දශකවල විකල්ප කණ්ඩායම් අතර ප්රබලව පැවැතුණි. මෑතකදී ස්වර්ගස්ථ වු ජේසු නිකායික ඇලොයි පීරිස් පියතුමා ඒ පිළිබඳ විශාල සේවාවක් ඉටු කළේය. ඒ හැරුනු විට අන්තර් සභා සංවාදය නිල මට්ටමින් සෙඩෙක් (කරිටාස් ශ්රී ලංකා - SEDEC) ආයතනය වැනි නිල ආයතන ද මරදාන සමාජීය හා සාමයීක කේන්ද්රය (CSR) වැනි ආයතන ද ක්රියාත්මක කරයි. ශ්රී ලංකා රදගුරු මණ්ඩලයේ අන්තර් ආගමික කටයුතු පිලිබඳ කොමිසම ද ඒ පිළිබඳ ක්රියාත්මක වන අතර එහි වර්තමාන සභාපති ජූඩ් නිශාන්ත සිල්වා රදගුරු තුමන් ඒ පිළිබඳ වෙසෙස් අවධානය යොමු කර ක්රියා කරයි.
බාහිර පාලම් තැනීමේදි අන්තර් ආගමික සංවාදය, ඉතා වැදගත් කාර්යභාරයකි. ශ්රී ලංකාව ව්යවස්තාමය වශයෙන් ආගමික රාජ්යයයක් ලෙස ප්රකාශයට පත් නොවූව ද රාජ්ය සමඟ ආගම තදින් බැඳි ඇත. මෙරට ක්රිස්තියානින්ව, කතෝලිකයින්ව දීර්ඝ කාලයක් තුළ දේශීය සමාජය හඳුනා ගත්තේ, වත්මනේ වූව ද ජාතිවාදි, ආගම්වාදි පිරිස් හඳුන්වන්නේ අධිරාජ්යවාදයේ නියෝජිතයින් ලෙසය. ඒ නිසා අන්තර් ආගමික සංවාදය ඉතා අභියෝගාත්මක වන අතර නිතරම වැරදියට අර්ථ කථනය වීමට ඉඩ ඇති කාර්යයකි.
මෙම අභියෝග මධ්යයේ වුවද, කතෝලික සභාවේ චරිත කිහිපයක් සංවාදයේ සදාකාලික සංකේත බවට පත්ව ඇත.1980 දශකයේදී බෞද්ධයින් ජීවත්වන දකුණු ලංකාවේ බුත්තල ප්රදේශයේ බොදුනු-කිතුනු සංවාදය ඉතා ප්රායෝගිකව ක්රියාත්ම කළ ආචාර්ය මයිකල් රුදිගු (නි.ම.නි) පියතුමා අන්තර් ආගමික සංවාදයේ නියම අරුත ජීවත් කළ ආදර්ශයකි. එතුමාව දිව්ය පූජාව පවත්වන අතරතුර නාදුනන තුවක්කුකරුවෙකු විසින් 1987 දී ඝාතනය කරන ලදී. සාහිත්ය ක්ෂේත්රය තුළ සගසැපත් මර්සර්ලිනු ජයකොඩි (නි.ම.නි) පියතුමා ලංකාව තුළ පාලම් තැනැන්නෙකු ලෙස විශාල ගෞරවයක් දිනා සිටියෙකි. ඒ මෙහෙවර සඳහා එතුමාට රොමොන් මැග්සෙයිසේ සම්මානයද හිමි විය.
කතෝලික සභාව ප්රායෝගිකව ආගමිකයින් අතර සබඳතා ශක්තිමත් කරන ප්රධාන මාර්ගයක් වන්නේ කතෝලික සභාවේ අධ්යාපන ආයතන සියලු ආගමිකයින්ට විවෘත වීම මගින් යැයි පැවැසිය හැකිය. විශාල ක්ෂේත්ර ගණනාවක අන්ය ආගමික, සහජීවනයට කැප වූ ජාතික නායකයින් රැසක් කතෝලික පාසල් අධ්යාපනය ඇසුරින් බිහි වී ඇත.
2019 අප්රේල් 21 පාස්කු ඉරුදින ඉස්ලාම් අන්තවාදි කණ්ඩායමක් විසින් කිතුනු දේවස්ථාන හා සංචාරක හෝටල් කීපයක් ඉලක්ක කරගෙන සිදු කළ මරාගෙන මැරෙන බෝම්බ ප්රහාරයෙන් පසු රට තුළ වෙසෙන ක්රිස්තියානි හෝ මුස්ලිම් ජනයා අතර ගැටුම් තත්ත්වයක් ඇති වීම වළක්වා ගැනීම සඳහා එම ප්රහාරයෙන් දැඩි හානි හා වැඩි මරණ සිදුවු අගරදරගුරු පදවියේ එඩේරාණන් වන කාදිනල් මැල්කම් රංජිත් හිමිපාණන් හා ගිහි පැවිදි කතෝලික පිරිස් දැරූ ප්රයත්නය මෑත ඉතිහාසයේ සුවිශේෂි සාක්ෂි දැරීමකි. එමගින් ලේ වැගිරිම් නවත්වා ගැනීමටත් මුස්ලිම් ප්රජාව සමඟ සබඳතා ශක්තිමත් කර ගැනීමටත් ඉවහල් විය.
බහුතරය අන්යාගමිකයින් වන, කිතුනුවන් ඉතා සුළුතරයන් වන බදුල්ල, ගාල්ල, අනුරාධපුරය, නුවර වැනි පදවි වල පදවි එඬේරුන් නිතරම අන්ය ආගමික පූජ්ය පූජක පිරිස් සමඟ සබඳතා පවත්වාගෙන යාම දිගුකලක සිට දැකිය හැකි ය. කෙසේ වෙතත්, මෙම සබඳතා ගම් මට්ටමේ පුළුල් සහයෝගීතාවක් බවට පරිවර්තනය කිරීම තවමත් අභියෝගයක් බව සභා නායකයෝ පිළිගනිති. සැබෑ පාලම් ගොඩනැඟීම දේශපාලනික අවශ්යතා හෝ සංකේතාත්මක ක්රියාවන් මත නොව, පොදු ආධ්යාත්මික වටිනාකම් මත පදනම් විය යුතු බවද ඔවුහු අවධාරණය කරති.
ජාකර්තා නුවර පැවැත්වෙන ආසියානු රදගුරුවරුන්ගේ සමුළුව ශ්රී ලංකාවේ සභාවට අභියෝගාත්මක වු පාලම් තැනීමේ භූමිකාවට තම ශක්තියත් ආනුභාවයක් වනු ඇති අතර ශ්රී ලංකාවේ කතාව ආසියානු සභාවටද ආලෝකයක් වනු ඇත. ජාකර්තා නුවර පැවැත්වෙන ආසියානු රදගුරුවරුන්ගේ සම්මේලනයේදී අවධානය දෙන ඊළඟ ප්රධාන කාරණය වන්නේ සංගමනශීලි සභාවක් ලෙස ආසියාතික සභාවන්ගේ කාර්ය භාරයයි. ශ්රී ලංකාවේ කතෝලික සභාව තුළ සංගමනශීලි සභාවක් ගොඩනගාගැනීමේදි අවධානය යොමු කළ යුතු මූලික කරුණු මොනවාදැයි ආචාර්ය රසිකා පීරිස් පැවිදි සොයුරියගෙන් විමසු විට එතුමිය පහත කරුණු අවධාරණය කළාය. "සංගමනශීලී සභාවක් යනු බව්තීස්ම ලත් සියලුම විශ්වාසිකයන් සභාවේ මෙහෙවර සඳහා හවුල් වගකීම දරන, සියලු දෙනාගේ සහභාගිත්වය සහතික කරන සභාවක් බවයි. විශේෂයෙන් කාන්තාවන්ගේ වැඩි සහභාගිත්වයක් සඳහා සංවාදය, සවන්දීම සහ පාලම් තැනීම අත්යවශ්ය බවද ඇය අවධාරණය කළාය. එමෙන්ම, පූජකවාදී ආකෘතියෙන් ඔබ්බට ගොස් සියලු විශ්වාසිකයන්ගේ සමාන ගරුත්වය සහ කැඳවීම පිළිගන්නා සභාවක් බවට පත්විය යුතු බව"ද ඇය සඳහන් කළාය.
කැළණි විශ්ව විද්යාලයේ ගිහි දේව ධර්මචාරවරයෙකු වන ෂර්ලි ලාල් විජේසිංහ මහතා මෙසේ අදහස් දැක්විය. ‘ශ්රී ලංකා සභාවේ සැබෑ සංගමනශීලි සභාවක් වීම සඳහා මෙම රදගුරු සමුළුව සැලකිය යුතු අභිප්රේරණයක් වන්නේ නම් එය ආශිර්වාදාත්මක කාරණයක් වනු ඇති. එවන් සභාවක් වීම සඳහා අවශ්ය ගිහි පැවිදි, පූජක මානව සම්පතින් ශ්රී ලංකාවේ සභාව පෝසත්ය. පදවි කිහිපයකම අරඹා ඇති මීසම් නවෝදයේ වැඩසටහනේ ගැඹුරු වෙනසක් දක්වා රැගෙන යාමෙන් ප්රැන්සිස් සුදතුම් පියතුමා අර්ථ ගැන්වු සංගමනශීලි සභාවක් ගොඩනගා ගත හැකි වනු ඇත. එහිදී දහම් පාසල් අධ්යාපනය නව දැක්මක් තුළ ප්රතිෂ්ඨාපනය කිරීම සිය ගණනක් වන ගිහි දේව ධර්ම උපාධිදරයන් සභා මෙහෙවරට ගැඹුරින් අනුකලනය කර ගැනීම ගොඩනැගිලිවලට වඩා ජීවමාන ගොඩනැගිලි වන ජනතාව මූලිකත්වයෙහිලා ක්රියාමාර්ග ගැනීම. ගිහි නායකක්වය වගකිම් සහගත ලෙස දායක කරගැනීම, මූල්ය විනිවිදභාවය, සාමුහික කමිටු තුලින් ශක්තිමත්ව පවත්වා ගැනීම වැනි ප්රතිසංස්කරණය වෙත ගමන් කළ යුතු බව’ ඔහු සඳහන් කළේය.
ආසියාව පුරා සිටින රදගුරුවරුන් ජකාර්තාහිදී එක්රැස් වීමට සූදානම් වන මෙම අවස්ථාවේදී, ශ්රී ලංකාවේ අත්දැකීම මඟින් පෙන්වා දෙන්නේ තමන්ගේම ප්රජාව තුළත්, ආසියාවේ විවිධ ආගමික හා සංස්කෘතික පරිසරය තුළත් පාලම් තනන සභාවක් වීමේ අවස්ථා මෙන්ම අභියෝගද පැහැදිලිව පවතින බවයි.
සටහන: මෙම ලිපිය කිතුසර විකල්ප පුවත්පතේ ආරම්භක කර්තෘවරයා, සිංහල ග්රන්ථ 16ක කතුවරයා සහ පරිසර ක්රියාකාරිකයෙකු වන මහින්ද නාමල් මහතාගේ ලිපියක් ඇසුරින් සකස් කරන ලදී.
#FABC2026 #FABC #Jakarta2026 #SriLanka #ChurchInAsia #BridgeBuilders #SynodalConversion #InterreligiousDialogue #CatholicChurch #RVASinhala #RadioVeritasAsia #CatholicNews
