දෙවියන්වහන්සේගේ වචනයට “ගොඩබැසීමේ තැන” බවට පත්වන්න.

දෙවියන්වහන්සේගේ වචනයට “ගොඩබැසීමේ තැන” බවට පත්වන්න – ආසියානු ඩිජිටල් මිෂනාරිවරුන්ට අයර්ලන්ත ෆ්‍රැන්සිස්කානු පියතුමාගෙන් ඇරයුමක්

තම පෞරුෂය, දීමනා සහ ජීවිත අත්දැකීම් තුළින් දෙවියන්වහන්සේ ක්‍රියා කිරීමට ඉඩ දෙමින්, උන්වහන්සේගේ වචනය අන් අය වෙත ළඟා වන “ගොඩබැසීමේ තැනක්” බවට පත්වන්නැයි අයර්ලන්ත ෆ්‍රැන්සිස්කානු පියතුමෙක් පළමු ආසියානු කතෝලික ඩිජිටල් මිෂනාරි එකමුතුවේදී ප්‍රකාශ කළේය.

සැප්තැම්බර් 11 වනදා පිලිපීනයේ ක්වෙසොන් නගරයේ පිහිටි Radio Veritas Asia (RVA) මූලස්ථානයේ පැවති සිව්දින එකමුතුවේ පළමු සවස සැසියේදී අයර්ලන්ත ෆ්‍රැන්සිස්කානු Friars of the Renewal (CFR) සභාවේ ෆා. කොලුම්බා ජෝර්ඩන්, ආසියාව පුරා සිට පැමිණි කතෝලික ඩිජිටල් සන්නිවේදකයන් සහ මිෂනාරිවරුන් 100කට අධික පිරිසක් අමතමින් මෙම අදහස් පළ කළේය.

“From Ego to Authentic Witness” යන මැයෙන් පැවති ඔහුගේ දේශනයේ මූලික අවධානය යොමු වූයේ ස්වයං ප්‍රවර්ධනය සහ ප්‍රසිද්ධිය පිළිබඳ බිය ඉක්මවා, ජීවමාන ක්‍රිස්තුස්වහන්සේ වෙත මිනිසුන් යොමු කරන අව්‍යාජ සාක්ෂිකරුවන් බවට ඩිජිටල් මිෂනාරිවරුන් පත්විය හැකි ආකාරය පිළිබඳවය.

“Influencers to Witnesses: Synodal Way for Digital Mission in Asia” යන තේමාව යටතේ සැප්තැම්බර් 10 සිට 13 දක්වා පැවැත්වෙන මෙම එකමුතුව සංවිධානය කරනු ලබන්නේ ආසියානු රදගුරු සම්මේලනයේ සමාජ සන්නිවේදන කාර්යාලය (FABC-OSC), Radio Veritas Asia (RVA) සහ වතිකානයේ සන්නිවේදන ඩිකැස්ටරිය සමඟ එක්ව ක්‍රියාත්මක වන Fully Present Network විසිනි.

අයර්ලන්තයේ ලිමරික් නගරය කේන්ද්‍ර කරගත් ෆා. කොලුම්බා ජෝර්ඩන්, Little by Little වීඩියෝ පොඩ්කාස්ට් වැඩසටහන සහ ඩිජිටල් සුභාරංචි සේවය හා ඇදහිලි ගොඩනැගීමේ කටයුතු සඳහා ප්‍රසිද්ධය.

තම ඩිජිටල් අන්තර්ගත නිර්මාණ ගමනේ ආරම්භය සිහිපත් කරමින් ඔහු පැවසුවේ, තම සේවය තමන් ගැනම වීමට ඇති ප්‍රවණතාව සහ අහංකාරය පිළිබඳ බිය මුල් කාලයේ තිබූ ප්‍රධාන අභියෝගයක් බවයි. එය ශුද්ධ වූ යොහන් බව්තීස්තගේ “මම අඩු විය යුතුය; උන්වහන්සේ වැඩි විය යුතුය” යන වචන සමඟ සම්බන්ධ කරමින් ඔහු විග්‍රහ කළේය.

එහෙත් අහංකාරය වළක්වා ගැනීමේ උත්සාහයේදී දෙවියන්වහන්සේ ලබා දී ඇති දීමනා සැඟවීමත් තවත් අනතුරක් බව ඔහු අවධාරණය කළේය.

“ඔබට එවැනි හැකියාවක් තිබෙනවා නම්, කැමරාවක් ඉදිරියේ සිටින විට ඔබ ජීවමාන වෙනවා නම්, ඒක දුර්ලභ දීමනාවක්.”

ඒ සඳහා පිළිතුර තම පෞරුෂය මකා දැමීම නොව, දෙවියන්වහන්සේට ඒ තුළින් ක්‍රියා කිරීමට ඉඩ දීම බව ඔහු පැවසීය.

ෆා. ජෝර්ඩන් ක්‍රිස්තියානි සන්නිවේදකයා හැඳින්වූයේ දෙවියන්වහන්සේගේ වචනයට “ගොඩබැසීමේ තැනක්” ලෙසය. කන්‍ය මරිය තුමියගේ උදාහරණය පෙන්වා දෙමින්, අවතාරගත වීමේදී දෙවියන්වහන්සේ මනුෂ්‍යත්වය තුළින් ක්‍රියා කිරීමට තෝරාගත් බවත්, ඒ ආකාරයෙන්ම සෑම මිෂනාරිවරයෙකුම තමන්ගේම අත්දැකීම්, දීමනා සහ පෞරුෂය තුළින් සුභාරංචිය ප්‍රකාශ කරන බවත් ඔහු පැවසීය.

“සුභාරංචිය හැමවිටම යම් කෙනෙකු තුළින් කතා කරනවා.”

කෙසේ වෙතත්, අව්‍යාජ සාක්ෂිය ආරම්භ වන්නේ අන් අයට කුමක් කිව යුතුදැයි සිතීමෙන් නොව, සුභාරංචිය තමන්ගේ ජීවිතය වෙනස් කිරීමට ඉඩ දීමෙන් බවද ඔහු අවධාරණය කළේය.

තම දේශනා වරෙක අන් අය වෙනස් විය යුතු ආකාරය පමණක් පෙන්වා දෙන තැනකට පත්ව තිබූ බව සිහිපත් කළ ඔහු, තවත් ෆ්‍රැන්සිස්කානු පියතුමෙක් තමන්ගෙන් “දෙවියනි, මට ඔවුන්ට මොනවා කියන්නද?” යන ප්‍රශ්නය වෙනුවට “ඔබ මට කියන්නේ කුමක්ද?” යන්න ඇසීමට උපදෙස් දුන් බව පැවසීය.

එම වෙනස තමන්ට උපදෙස් දීමකට වඩා පෞද්ගලික හමුවීමකින් කතා කිරීමට මඟ පෑදුණු බවද ඔහු සඳහන් කළේය.

ඒ නිසාම යම් අන්තර්ගතයක් පළ කිරීමට හෝ නිෂ්පාදනය කිරීමට පෙර තමන්ගෙන්ම මෙසේ අසා බලන ලෙස ඔහු ඩිජිටල් මිෂනාරිවරුන්ට ආරාධනා කළේය.

“මෙය මාව වෙනස් කළේ කොහොමද? සුභාරංචිය ඇත්තටම මගේ ජීවිතයේ මාංසවත් වී තිබෙනවාද?”

තරුණයන් සමඟ සන්නිවේදනය කිරීමේදී අවංක විවෘතභාවයේ වැදගත්කමද ඔහු පෙන්වා දුන්නේය. ඔවුන්ට කෙනෙකු හුදෙක් තමන්ට කතා කරනවාද, නැතිනම් සැබෑ අත්දැකීමක් බෙදාගන්නවාද යන්න ඉක්මනින් හඳුනාගත හැකි බව ඔහු පැවසීය.

ශුද්ධ වූ යොහාන් පාවුලු දෙවන පියතුමාගේ Theology of the Body ඉගැන්වීම් සඳහන් කරමින්, මනුෂ්‍යයා “තමාම දෙන ත්‍යාගයක්” බව පැහැදිලි කළ ඔහු, ඩිජිටල් මිෂනාරිවරුන්ගේ කැඳවීම අන්තර්ගතයක් නිෂ්පාදනය කිරීම පමණක් නොව, අන් අයට ක්‍රිස්තුස්වහන්සේ හමුවිය හැකි වන ලෙස තමන්ගෙන් යමක් පිරිනැමීම බවද අවධාරණය කළේය.

ලූක් සුභාරංචියද විශේෂ මනුෂ්‍ය හඬක් තුළින් ප්‍රකාශ වූ සුභාරංචියක උදාහරණයක් බව ඔහු පැවසීය. ලූක් තමන්ට ලැබුණු සාක්ෂි එකතු කරමින් තම දෘෂ්ටිකෝණයෙන් ලියූ නමුත්, ඒ තුළ ශුද්ධාත්මයාණන්ගේ ක්‍රියාකාරිත්වය පල්ලිය හඳුනා ගන්නා බවද ඔහු සඳහන් කළේය.

එමෙන්ම, ජේසුස්වහන්සේ අතීතයේ කළ දේ පමණක් නොව, අද තම ජීවිත තුළ ක්‍රිස්තුස්වහන්සේ ජීවමානව ක්‍රියා කරන ආකාරයද ප්‍රකාශ කළ යුතු බව ඔහු අවධාරණය කළේය.

“ජේසුස්වහන්සේ අදත් ජීවමානයි. අදත් අපට උන්වහන්සේ හමුවිය හැකියි. ඒ හමුවීමෙන් අපි සාක්ෂි දරන විට, ඒ සාක්ෂිය ජීවමාන වෙනවා.”

ශුද්ධ ලියවිල්ල කියවීමේදී හෝ ඇදහිලි අත්දැකීම් තුළ තමන් සැබෑවටම ස්පර්ශ වන, අභියෝගයට ලක්වන හෝ ආකර්ෂණය වන දේවල් කෙරෙහි අවධානය යොමු කරන ලෙසද ඔහු සහභාගිවන්නන් දිරිමත් කළේය. එවැනි අවස්ථා දෙවියන්වහන්සේ ක්‍රියා කරන ස්ථාන හෙළි කරන අතර, ඒවා ඩිජිටල් සාක්ෂිය සඳහා අව්‍යාජ පදනමක් බව ඔහු පැවසීය.

ශුද්ධ වූ ලිසියුහි තෙරේසා තුමිය පිළිබඳ වීඩියෝවක් පටිගත කිරීමේදී කතා කරමින් සිටියදී තමන් සංවේදී වූ මොහොතක් අවසාන සංස්කරණයෙන් ඉවත් නොකළ බවද ඔහු සිහිපත් කළේය. එම වීඩියෝව තමන්ගේ වඩාත්ම සාර්ථක නිර්මාණවලින් එකක් බවද ඔහු සඳහන් කළේය.

ඒ අත්දැකීමෙන් තමන්ට වැටහුණේ, තමන් බෙදාගන්නා පණිවිඩයෙන් සැබෑවටම ස්පර්ශ වූ විට මිනිසුන් ඊට ප්‍රතිචාර දක්වන බවයි.

අවසානයේ ඔහු පැවසුවේ, ඩිජිටල් මිෂනාරිවරයෙකුගේ ගමන අහංකාරයෙන් හා බියෙන් දෙවියන්වහන්සේගේ සන්නිධිය පිළිබඳ අවබෝධයට, පෞද්ගලික හමුවීමට සහ අව්‍යාජ සාක්ෂියට යොමු වන ගමනක් බවයි.

ක්වෙසොන් නගරයේ සැප්තැම්බර් 13 දක්වා පැවැත්වෙන මෙම එකමුතුවේදී ආසියාව පුරා සිට පැමිණි කතෝලික ඩිජිටල් සන්නිවේදකයන්, සින්ඩෝඩීයත්වය, අව්‍යාජ සාක්ෂිය, ඩිජිටල් සුභාරංචි සේවය සහ ඩිජිටල් ලෝකයේ පල්ලියේ මෙහෙවර පිළිබඳව තවදුරටත් මෙනෙහි කරමින් සිටිති.

#AsianDigitalMissionaries #DigitalMission #FABCOSC #RadioVeritasAsia #RVA #FullyPresent #Catholic #DigitalEvangelization #AuthenticWitness #FrColumbaJordan #FaithInAction #ChurchInAsia #CatholicMedia #Synodality #Vatican