About Us
වෙරිටාස් ආසියානු ගුවන් විදුලිය සහ සිංහල සේවය
“සත්‍යය” යන අර්ථය ඇඟවීම සඳහා ලතින් බසින් යෙදෙන “වෙරිටාස්” යන්නෙන් මෙම නම ලබා ඇත. “ආසියාවේ කිතුනු හඬ” යනුවෙන් ද මෙය හැඳින් වේ. තවද මෙය කතෝලික රදගුරු බල මණ්ඩලයේ කෙටි තරංග ගුවන් විදුලි සේවාව ද වේ.
අග්නිදිග ආසියානු රාජ්‍යයන් සඳහා කිතුනු ගුවන් විදුලියක අවශ්‍ය බව සාකච්ඡාවට භාජනය වන්නේ 1958 වසරේ දෙසැම්බර් මාසයේ දී ය. ඒ පිලිපීනයේ මැනිලා නුවර දී රැස් වූ ආසියානු රදගුරු සමුළුවේ දී ය. එසේ යෝජිත ගුවන් විදුලි මධ්‍යස්ථානය ඉදිකිරීම් කටයුතු ඇරඹෙන්නේ 1963 දෙසැම්බර් මාසයේදී ය. ඒ පිලිපීනයේ කාදිනල් සාන්ටෝස් හිමිපාණන්ගේ මූලිකත්වයෙනි. වසර 1969 ජනවාරි මාසයේ දී වෙරිටාස් ගුවන් විදුලි විදේශ දෙපාර්තමේන්තුව ගරු ජෝ නෙත්තසිංහ පියතුමන් වෙත පවරාදෙනු ලැබීය. එම වසරේ අප්‍රේල් මස 11 වෙරිටාස් ආසියානු ගුවන් විදුලිය නිල වශයෙන් ආරම්භ කරන ලදී.
වර්ශ 1976 මැයි මස 15 වන දින ශ්‍රී ලංකාවේ ගරු ඇන්ටන් වීරසිංහ පියතුමන් ප්‍රථම විදේශ උපදේශකවරයා ලෙසින් පත් වීම ලැබීය. සිංහල පර්යේෂණ වැඩසටහන් මාලාව මූලිකව ආරම්භ වූයේ 1976 වසරේ ජූනි මස 12 වැනි දිනය. ජේෂ්ඨ මාධ්‍යවේදී ඇල්ෆ්‍රඩ් පෙරේරා මහතා වෙරිටාස් සිංහල සේවයේ ප්‍රථම සම්බන්ධිකාරකවරයා විය. දහස් සංඛ්‍යාත ශ්‍රාවක සිත් දිනා ගැනීමට සිංහල සේවයේ වැඩසටහන් සමත් විය. එයට හොඳම සාක්ෂිය වන්නේ, සිංහල සේවය දිනපතා ලද අති විශාල ලිපි, දුරකතන ඇමතුම් සහ ෆැක්ස්පත් සංඛ්‍යාවයි. මෙසේ අති සාර්ථක මාවතක ගමන් ගත් සිංහල සේවය 2013 දී යම් යම් හේතු කාරණා මත අත්හිටුවීමට සිදු විය.
එය වෙරිටාස් ලබැඳි ශ්‍රාවක දන හට කනගාටුදායක පුවතක් විය. එහෙත් ශ්‍රී ලංකා රදගුරු මඬුල්ලේ සාදර අනුග්‍රහය යටතේ වර්ෂ 2017 අගෝස්තු මස 24 වන දින නැවතත් වෙරිටාස් සිංහල සේවය නව මාවතක් ඔස්සේ තම කාර්යභාරය ඇරඹීය. ඒ ඩිජිටල් තාක්ෂණය හා මුසුව අන්තර්ජාල ගුවන් විදුලියක් හෙවත් “වෙබ් රේඩියෝවක්” ලෙසිනි.
වර්තමානයේ ශ්‍රී ලංකා කතෝලික ජනසන්නිවේදන ජාතික අධ්‍යක්ෂ ගරු ලාල් පුෂ්පදේව ප්‍රනාන්දු නි.ම.නි. පියතුමන් එහි සම්බන්ධීකාරක ලෙස කටයුතු කරන අතර හසිනි සේරම්, ශාන්තසිරි පතිරණ, සුදර්ශන බියන්විල සහ ජූඩ් ප්‍රමෝද් වැඩසටහන් නිෂ්පාදකවරුන් ලෙස කටයුතු කරති.
ස්වර්ගස්ථ අති උතුම් තෝමස් කුරේ නි.ම.නි. කාදිනල් හිමිපාණන් සහ විශ්‍රාමික අගරදගුරු අති උතුම් දේවධර්මාචාර්ය ඔස්වල්ඩ් ගෝමිස් හිමිපාණන් ද, හිටපු OCIC අධ්‍යක්ෂ ගරු අර්නස්ට් පෝරුතොට පියතුමන් ද වෙරිටාස් ආසියානු ගුවන්විදුලිය ඇරඹීමෙහි ලා විශාල කාර්යභාර්යක් සිදුකර ඇත.