අද දින සුදුවර චරිතයෙන් අගෝස්තු 28වන දිනට මංගල්‍යය යෙදෙන හිප්පෝ හී ශුද්ධ වූ අගුස්තීනු මුනිඳුන් ගැන කතා කරමු.
ක්‍රි.ව. 354 නොවැම්බර් 13 දින ඇල්ජීරියාවේ නුමීඩියා හි තගස්තේ නගරයේ උපත ලැබීය. ඔහුගේ මව මොනිකා නම් භක්තිමත් කිතුනු කාන්තාවක් වූවාය. ඔහුගේ පියා පැට්‍රීසියස් නම් මිථ්‍යාදෘෂ්ටිකයෙකු වූ අතර ඔහු මරණ මංචකයේ ක්‍රිස්තියානි ආගමට හැරුණේය. ඔහුට නවිගියුස් නම් සහෝදරයෙක්ද පර්පෙතුවා නම් සහෝදරියක්ද සිටියේය. විද්වතුන්ගේ පොදු පිළිගැනීම එකඟ වන්නේ අගුස්තීනු සහ ඔහුගේ පවුල උතුරු අප්‍රිකාවට ආවේණික වූ බර්බර්ස් නම් ජනවාර්ගික කණ්ඩායමක් වන බවය. ඔහු ද සිය ලේඛනවල තම අප්‍රිකානු උරුමය පිළිබඳ තොරතුරු කිහිපයක් තබා ඇත.
වයස අවුරුදු 17 දී, රොමානියානුස්ගේ අනුග්‍රහය තුළින් අගුස්තීනු කාර්තේජ් වෙත ගියේ තම අධ්‍යාපනය තවදුරටත් කරගෙන යාමටය. තම මවගේ අවවාද නොතකා, අගුස්තීනු යෞවනයෙකු ලෙස ඉතා සෙල්ලක්කාර ජීවන රටාවක් ගත කළේය. ඔහු කාර්තේජ් හි ශිෂ්‍යයෙකු ලෙස සිටියදී සිසෙරෝගේ හෝර්තෙන්සියස් දෙබස් කියවා ඇති අතර එය විස්තර කළේ කල්පවතින හැඟීමක් ඇති කරවන බවත්, එමගින් තම හදවතේ ප්‍රඥාව, ආදරය සහ සත්‍යය සඳහා මහත් වූ පිපාසයක් ඇති කරන බවත්ය. එය ඔහුගේ දර්ශනය පිළිබඳ උනන්දුව ආරම්භ කළේය.
ක්‍රි.ව.386 අගෝස්තු අග භාගයේ දී, වයස අවුරුදු 31 දී, ඔහුගේ මිතුරන් කාන්තාරයේ අන්තෝනිතුමා ගේ ජීවිතය පිළිබඳ කියවීම අසා, ඔගස්ටින් කතෝලික ආගමට හැරුණි. පසුව ඔහු තම ජීවිතයේ සිත් හැරීම පිළිබඳව 'පපොච්චාරණය' නමින් කෘතියක් එළිදැක්වීය. සැබැවින්ම එය දේව ධර්ම ගුණයෙන් පොහොසත් කෘතියක් බවට පත් විය. ක්‍රි.ව. 387 අප්‍රේල් 24-25 අලේලුය්යා සෙනසුරාදා දින අම්බ්‍රෝස් මුනිඳුන් විසින් ඔහුව බෞතිස්ම කරන ලදී .
ක්‍රි.ව. 391 වසරේ දී ඔහු පූජකවරය ලබන අතර ඉතාමත් ප්‍රසිද්ධ දේශකයෙකු බවට පත්විය. ක්‍රි.ව. 395 වසරේදී එතුමාණන් හිප්පෝ හී රදගුරුතුමන් ලෙස පත් කෙරිණි. බොහෝ දෙනා කිතු දහමට හරවා ගැනීම සඳහා එතුමන් බොහෝ සෙයින් වෙහෙස වී කටයුතු කළේය. එතුමන් ක්‍රි.ව. 430 අගෝස්තු 28 වන දින අවුරුදු 75 ආයු වළඳා සගලොව දිනාගත්තේ ය.
එතුමන් මුද්‍රණ ශිල්පීන්ගේ සහ දේවධර්මවාදීන්ගේ නාම සාන්තුවරයා ලෙස හඳුන්වනු ලැබේ.
#StAugustine #Prayforus
#Saintoftheday #RVASinhala
'RVASinhala' Facebook, Instagram, X Twitter, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!
