අද දින සුදුවර චරිතයෙන් සැප්තැම්බර් 07වන දිනට මංගල්‍යය යෙදෙන බෝංඤ් හී ශුද්ධ ජෙරාඩ් මුනිඳුන් ගැන කතා කරමු.
මෙතුමන් ක්‍රිස්තු වර්ෂ 895 දී ප්‍රංශයේ නම් නගරය අසල ධනවත් පවුලක උපත ලැබීය. තරුණ වියේ පටන් ඔහු සැම දෙන සමග මිත්‍රශීලීව සහ කාරුණිකව කල් ගත කළහ. කලක් ඔහු නාමුර් ප්‍රාන්ත‍යේ සොල්දාදුවකු සහ රාජ සභිකයෙකු ලෙස ද කටයුතු කළේය.
දිනක් ඔහු තම මිතුරන් සමග දඩයමට ගොස් තම නිවසට පැමිණි කල බඩගින්නේ සිටි තම මිතුරන්ට විවේක ගෙන ආහාර ගැනීමට ආරාධනා කළේය. ඒ අතර ජෙරාඩ් තම නිවසේ කුඩා යාච්ඤා කුටියට ඇතුළු වී බොහෝ වේලාවක් යාච්ඤා කිරීමට පටන් ගත්තේය. එහිදී ඔහුගේ වෙහෙසට පත් ශරීරයට මහත් වූ සැනසිල්ලක් දැනුණු අතර කුසගින්නද පහ වී ගොස් තිබුණි. එතුලින් යාච්ඤාවේ ගැඹුර අත්දුටු ඔහු ලෞකික ජීවිතයට සමු දී සාන්ත ඩෙනිස් තාපසාරාමයට ඇතුළු විය. ඔහු ගමන් ආරම්භ කළ ජීවිතයට බෙහෙවින් ඇලුම් වූ අතර එහිදී පූජාත්වරයට ද ඇතුළු විය.
වසර 11 ක පමණ කාලයක් සාන්ත ඩෙනිස් තාපසාරායේ ජීවත් වූ එතුමන් තම ශ්‍රේෂ්ඨයින්ගේ අවසරය ඇතුව බෝංඤ් හී තමන්ගේම ඉඩමක තාපසාරාමයක් ආරම්භ කළේය. එහි ආරම්භ කළ පැවිදි සංඝය ගණනින් වර්ධනය වන්නට පටන් ගත් අතර වඩාත් සාමකාමී හුදකලා ජීවිතයක් අවශ්‍ය වූ එතුමන් තමන්ටම කියා දේවස්ථානය අසල කුඩා තාපස කුටියක් ඉදිකර ගත්හ.
නමුත් එම ස්ථානයේ වැඩිකල් වාසය කිරීමට ඔහුට අවසර නොලැබුණු අතර ඔහුගේ ශ්‍රේෂ්ඨයින් විසින් ෆ්ලැන්ඩර්ස් හා නොර්මැන්දි හී පිහිටා ඇති තාපසාරාම බැහැදැක ඒවායේ ප්‍රතිසංවිධාන කටයුතු වලට සහය වන මෙන් ඔහුගෙන් ඉල්ලා සිටි අතර එම ඉල්ලීමට කීකරුව වසර විස්සකට ආසන්න කාලයක් ඔහු රට පුරා සංචාරය කොට තාපසාරාම බැහැ දැක්කේය.
තම ජීවිතයේ අවසාන කාලය ලඟා වෙන බව හැඟුණ එතුමන් නැවත සිය භාවනා කුටියට විත් හුදකලාව කල්ගත කිරීමට අවසර ලබා ගත්තේ ය. ක්‍රිස්තු වර්ෂ 959 ඔක්තෝම්බර් 03 වැනි දින එතුමන් ඉතා සැනසීමෙන් තම අවසන් හුස්ම හෙළීය.
#StGérardofBrogne #Prayforus
#Saintoftheday #RVASinhala
'RVASinhala' Facebook, Instagram, X Twitter, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!
