අද දින සුදුවර චරිතයෙන් සැප්තැම්බර් 11වන දිනට මංගල්‍යය යෙදෙන ඇලෙක්සැන්ඩ්‍රියාවේ ශුද්ධ වූ තියඩෝරා මුනිවරිය ගැන කතා කරමු.
තියඩෝරා සහ ඇගේ සැමියා ජීවත් වූයේ ඇලෙක්සැන්ඩ්‍රියාවේ ය. ඇය තම සැමියා සමග ඉතාමත් සාමකාමී ප්‍රීතිමත් පවුල් ජීවිතයක් ගත කළ ද යක්ශයා විසින් එක්තරා ධනවත් තරුණයෙකු මාර්ගයෙන් ඇයව පාපයට හසු කර ගන්නට වෙර දැරීය. තමන්ගේ උත්සහය නිශ්ඵල බව දැනගත් එම තරුණයා වෙනත් කාන්තාවක ලවා ඇයගේ සිතුවිලි වෙනස් කොට පාපයට පොළඹවා ගත්තේ ය.
තියඩෝරා තම සැමියාට විරුද්ධව වරදක් කළ ද ඉක්මනින් තමන් කළ පාපයේ බරපතළකම ගැන වටහාගෙන තම මුහුණට පහර දෙමින් කොන්ඩය ද ඉරා දමා පසුතැවිලි වන්නට පටන් ගත්තා ය. එහෙත් ඇයගේ හෘද සාක්ෂියට සැනසීමක් නැති හේතුවෙන් තාපසාරාමයට ගොස් එහි ශ්‍රේෂ්ඨ තාපසිකාවට සියල්ල හෙළි කළාය. එවිට තාපසිකාව ඇයගේ සිත සැනසූ අතර තියඩෝරා තවදුරටත් කිසිදු පාපයක් නොකරන බවට දෙවියන් වහන්සේ ඉදිරියේ පොරොන්දු වූවාය.
එම මොහොතේම ඇය තාපසාරාමයට ගොස් තමන්ගේ පාපය ගැන පසුතැවිලි වීම සඳහා යාච්ඤාවේ ද මනථාපනයේ ද ජීවිතයක් ගත කිරීමට අධිෂ්ඨානයක් ඇති කර ගත්තාය. රහසිගතව තම නිවසින් පිටත් වී ගිය ඇය පිරිමියකු සේ වෙස් වළාගෙන තාපසාරාමයකට ගියාය. ඇය එසේ කළේ තම සැමියා කාන්තාවන් සිටින තාපසාරාමයක දී ඇයව සොයා ගනී යැයි බියෙනි.
එක්තරා ආරාමයකට ගිය ඇයව පරීක්ෂා කිරීම සඳහා නොසලකා හැරිය බැවින් ඇය එහි ගේට්ටුව අසල මුළු රාත්‍රියම යාච්ඤාවෙන් කල් ගත කළා ය. ඇය තමන්ගේ ඇත්ත තත්ත්වය ප්‍රකාශ කළ බැවින් අවංක අභිප්‍රාය දුටු ශ්‍රේෂ්ඨ තාපසකතුමා ඇයට තාපසාරාමය රැඳී සිටීමට අවසර දුන්නේය. රාත්‍රිය පුරා යාච්ඤාවේ යෙදීම ද නිහතමානීකම ද දුටු සියලු තාපසවරු ඇය පිළිබඳව මවිත වූහ. වරක් කාමමිත්‍යාචාරයෙන් දූෂිත වූ ඇගේ ශරීරය දැන් දෙවියන් වහන්සේගේ වරප්‍රසාදයන් පිරුණු භාජනයක් බවට පත්වී ඇත.
දිනක් ආහාර පාන මිලදී ගැනීම සඳහා ඇය ඇලෙක්සැන්ඩ්‍රියාවට ගිය අතර නැවත ඒම පමා වන නිසා එන මග ඇති තාපසාරාමයක නැවතිමට සිදුවිය. එම තාපසාරාමය ප්‍රධානියාගේ දියණිය තම පියාව බැලීම සඳහා පැමිණ සිටි අතර තියඩෝරා දුටු ඇය තරුණ තාපසයකු යැයි සිතා පාපයට පොළඹවා ගැනීමට උත්සාහ කළාය. තම උත්සාහය සාර්ථක නොවූ බැවින් තාපසාරාමයට පැමිණ සිටි වෙනත් ආගන්තුකයෙකු සමඟ වරදේ හැසිරුණු අතර එයින් ඇය ගැබ් ගත්තාය.
තම දියණිය ගැබ්ගෙන සිටින බව දැනගත් පියා වගකිය යුත්තා කවුරුන්ද යයි ප්‍රශ්න කරද්දී ඇය තියඩෝරාව පාවා දුන්නාය. මේ පිළිබඳව තියඩෝරා සිටි තාපසාරාමයේ ප්‍රධානියාට පැමිණිලි කළ ද ඇගේ පාරිශුද්ධභාවය සහ ශුද්ධවන්ත කම නිසා එම චෝදනාව විශ්වාස කරේ නැත. දරුවා බිහිවූ පසු තියඩෝරා සිටි තාපසාරාමයට ගෙනැවිත් එහි සිටී තාපසවරුන්ට නින්දා අපහාස කොට දරුවාව භාර දෙන ලදී. ඇය නිර්දෝෂී වූවද මෙහිදී සියලු දෙනා කෝපයට පත්ව දරුවාව ඇයට බාර දී තාපසාරාමයේන් පිටත් කරන ලදී.
මේ සියල්ල නිහතමානීව පිළිගත් ඇය දරුවා සමග තාපසාරාමයට නොදුරින් පිහිටි පැල්පතක වාසය කළාය. එහෙම ප්‍රදේශයේ ජීවත් වූ එඬේරුන් අනුකම්පාවෙන් යුක්තව දරුවාට කිරි ලබා දුන් අතර එතුමිය ආහාරයට ගනු ලැබුයේ එළවළු වර්ග පමණි. වසර හතක් එලෙස ගත කළ ඇයට නැවත තාපසාරාමයට පැමිණ ජීවත් වීමට අවසර ලැබුණු අතර ඇය විසින්ම දරුවාට වසර දෙකක කාලයක් ඉගැන්නුවා ය.
මුළු ප්‍රදේශය පුරා නියඟයක් පැමිණ සියලු ලිං වියළී ගිය අතර තියඩෝරා වතුර රැගෙන ඒමට ගිය ළිඳෙහි ජලය පැමිණ පසුව කිසි දිනෙක එය වියළී ගියේ නැත. ඇයගේ මරණයට පෙර තම කුටිය තුළට වී දරුවාට උපදෙස් ලබා දුන්නේ සියල්ලට වඩා දෙවියන් වහන්සේට ප්‍රේම කරන ලෙසය. එලෙසම තාපසාරාමයේ සියලු දෙනාට කීකරු වී සන්සුන්ව නිහතමානීව කටයුතු කරන ලෙසටත් අසභ්‍ය දෙයින් ද, මෝඩකමින් හා තණ්හාවෙන් වැළකී සිටින ලෙස ද උපදෙස් දුන්නාය.
පාපයකට වන්දි ගෙවීමට පුරුෂයෙකු සේ වෙස්වලාගෙන මුළු දිවියම දෙවිඳුන්ට කැප කළ, ඇලෙක්සැන්ඩ්‍රියාවේ ශුද්ධ වූ තියඩෝරා මුනිවරියනි, අප නිසා යාච්ඤා කළ මැනව.
#StTheodoraofAlexandria #Prayforus #Saintoftheday #RVASinhala
'RVASinhala' Facebook, Instagram, X Twitter, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!
