'AI' ගැන බිය නොවන්නැයි FABC උප සභාපති කාදිනල් පැබ්ලෝ හිමිපාණන්ගේ ආරාධනය
ජකාර්තා, ඉන්දුනීසියාව – කෘත්රිම බුද්ධිය (AI) සභාවට තර්ජනයක් ලෙස නොව, ධර්මදූත මෙහෙවරට උපකාරී වන මෙවලමක් ලෙස භාවිත කළ යුතු බව ආසියානු රදගුරු සමුළු සම්මේලනයේ (FABC) උප සභාපති කාදිනල් පැබ්ලෝ වර්ජිලියෝ ඩේවිඩ් හිමිපාණන් අවධාරණය කළහ.
මෙම අදහස් උන්වහන්සේ ප්රකාශ කළේ, ආසියානු රදගුරු සමුළු සම්මේලනයේ (FABC) 12 වැනි මහා සමුළුව අවසානයෙන් පසු ජූලි 26 දින ජකාර්තාහි ජකාර්තා ආසන දෙව්මැදුරේ එඬේරික මධ්යස්ථානයේ පැවති අවසන් මාධ්ය හමුවේදීය.
මෙම මාධ්ය හමුවට ගරු ක්ලැරන්ස් දෙවදාස් පියතුමා, FABC මහලේකම්වරයාගේ සහකාර සහ සංගමනශීලී සභාව සඳහා වූ FABC කාර්යාලයේ විධායක ලේකම්වරයා ලෙසත්, ඇන්ටෝනියස් සුබියාන්ටෝ බුන්ජමින් රදගුරු හිමිපාණන්, ඉන්දුනීසියානු කතෝලික රදගුරු සමුළුවේ සභාපතිවරයා ලෙසත් එක්ව සිටියහ.
මාධ්යවේදියෙකු විසින් කෘත්රිම බුද්ධිය සභාවට තර්ජනයක්ද? යනුවෙන් යොමු කළ ප්රශ්නයකට පිළිතුරු දෙමින් කාදිනල් ඩේවිඩ් හිමිපාණන් කියා සිටියේ, ආසියාව වැනි භාෂාමය විවිධත්වයෙන් පොහොසත් මහද්වීපයක සන්නිවේදනය සහ සුබ අස්න ප්රකාශ කිරීම ශක්තිමත් කිරීමට AI සතු විශාල හැකියාව හඳුනාගත යුතු බවයි.
උන්වහන්සේ සිහිපත් කළේ, ඉන්දුනීසියානු රදගුරු සමුළුවේ නවතම එඬේරික ප්රකාශය Bahasa Indonesia භාෂාවෙන් ලැබුණු විට, AI මගින් එය ආසියාව පුරා සිටින කතෝලිකයන්ට විවිධ භාෂාවලින් පහසුවෙන් ලබාදිය හැකි ආකාරය පිළිබඳ තමන් කල්පනා කළ බවයි.
එහෙත්, AI පිළිබඳ අන්ධ විශ්වාසයක් තැබීම සුදුසු නොවන බවද උන්වහන්සේ අවධාරණය කළහ.
විවිධ AI පරිවර්තන පද්ධති තමන්ම භාවිත කර පරීක්ෂා කර ඇති බව සඳහන් කළ කාදිනල් ඩේවිඩ් හිමිපාණන් පැවසුවේ, විශේෂයෙන්ම දේශීය භාෂා හෝ සංස්කෘතික පසුබිමක් අඩංගු අන්තර්ගත පරිවර්තනය කිරීමේදී AI මගින් තවමත් සැලකිය යුතු වැරදි සිදුවිය හැකි බවයි.
එබැවින්, AI මිනිස් බුද්ධියට ආදේශකයක් ලෙස නොව, මිනිසාගේ නිවැරදි මඟපෙන්වීම යටතේ වඩාත් කාර්යක්ෂම වන සහායක මෙවලමක් ලෙස දැකිය යුතු බව උන්වහන්සේ පැවසූහ.
"AI ඉතා බුද්ධිමත් ශිෂ්යයෙකු ලෙස සලකන්න. ඔබ එයට ලබාදෙන තොරතුරු සහ මඟපෙන්වීම අනුව එය තවත් දියුණු වෙනවා," යැයි කාදිනල් ඩේවිඩ් හිමිපාණන් සඳහන් කළහ.
තමන්ගේ අත්දැකීම් අනුව, නිවැරදි උපදෙස් (prompts) සහ පැහැදිලි පසුබිම් තොරතුරු ලබාදෙන විට AI පරිවර්තනවල ගුණාත්මකභාවය සැලකිය යුතු ලෙස ඉහළ යන බවද උන්වහන්සේ පැහැදිලි කළහ.
ඒ අනුව, තාක්ෂණයේ ප්රගතිය අවසානයේ රඳා පවතින්නේ මිනිසාගේ බුද්ධිය, විනිශ්චය සහ නිවැරදි භාවිතය මත බවද උන්වහන්සේ අවධාරණය කළහ.
අතීතයේ විද්යුත් ගණක යන්ත්ර (calculators) හඳුන්වා දුන් අවස්ථාවේද මිනිසුන්ට තිබූ බිය සමඟ වර්තමානයේ AI පිළිබඳ ඇති සැකසංකා උන්වහන්සේ සංසන්දනය කළහ.
"එදා මිනිසුන් හිතුවේ ගණක යන්ත්ර නිසා ගණිතය දුර්වල වෙයි කියලා. එහෙම වුණේ නැහැ. ඒ වෙනුවට ගණිතය තවත් ඉහළ මට්ටමකට ගියා," යැයි උන්වහන්සේ පැවසූහ.
එමෙන්ම AI ද මිනිසාගේ හැකියාවන් අඩු කරන තාක්ෂණයක් ලෙස නොව, වගකීමෙන් භාවිත කරන විට නිර්මාණශීලීත්වය, ඉගෙනීම සහ සහයෝගීතාව වර්ධනය කරන මෙවලමක් ලෙස දැකිය යුතු බවද කාදිනල් ඩේවිඩ් හිමිපාණන් සඳහන් කළහ.
"අපි කෘත්රිම බුද්ධිය ගැන බිය විය යුතු නැහැ. තවත් බොහෝ දේ ඉදිරියට එනවා. අප කළ යුත්තේ එය වඩාත් බුද්ධිමත්ව භාවිත කිරීමයි," යැයි උන්වහන්සේ පැවසූහ.
තාක්ෂණය සෑම විටම පොදු යහපත සඳහා සේවය කරන බවට වග බලා ගැනීමේ වගකීම ඇත්තේ යන්ත්රවලට නොව, මිනිසාට බවද උන්වහන්සේ අවධාරණය කළහ.
"අපි යන්ත්රයට වඩා බුද්ධිමත්. AI හොඳින් භාවිත කරන අය තමයි හොඳම prompts ලබාදෙන්න දන්න අය," යැයි කාදිනල් ඩේවිඩ් හිමිපාණන් පැවසූහ.
කාදිනල් ඩේවිඩ් හිමිපාණන්ගේ මෙම අදහස් ආසියානු රදගුරු සමුළු සම්මේලනයේ 12 වැනි මහා සමුළුවේ මූලික පණිවිඩයක්ද යළි අවධාරණය කළේය. එනම්, සභාව සුබ අස්නට විශ්වාසවන්තව සිටින අතරම, නූතන ලෝකයේ නව යථාර්ථයන්ට බුද්ධිමත්ව සහ විචාරශීලීව ප්රතිචාර දැක්විය යුතු බවයි.
උන්වහන්සේගේ අදහස අනුව, කෘත්රිම බුද්ධිය වැනි නව තාක්ෂණයන් ප්රඥාවෙන් හා විචාරයෙන් භාවිත කළ විට, ඒවා සන්නිවේදනය ශක්තිමත් කිරීමට, සහයෝගීතාව වර්ධනය කිරීමට සහ ආසියාව පුරා සභාවේ ධර්මදූත මෙහෙවර ඉදිරියට ගෙන යාමට ප්රබල මෙවලම් බවට පත්විය හැකිය.
කර්තෘ ගැන
ගේබ්රියෙල් අබ්ඩි සුසන්තෝ ඉන්දුනීසියාවේ ප්රවීණ කතෝලික මාධ්යවේදියෙකි. ඔහු වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සේවය කරයි.
#FABC2026 #XIIFABCPlenary #CardinalPabloVirgilioDavid #ArtificialIntelligence #AI #Synodality #ChurchInAsia #Mission #BridgeBuilders #RVASinhala #RadioVeritasAsia
