“ඔබ නිසා මම අද ජීවතුන් අතර” — මුම්බායි ස්නේහාලයා පවුල් සේවා මධ්යස්ථානයේ 50 වසරක සේවය සැමරේ.
“ඔබ නිසා මම අද ජීවතුන් අතර” — මුම්බායි ස්නේහාලයා පවුල් සේවා මධ්යස්ථානයේ 50 වසරක සේවය සැමරේ.
“අද මම ජීවතුන් අතර සිටින්නේ ඔබ නිසාමයි.”
මුම්බායි අගරදගුරු පදවියේ ස්නේහාලයා පවුල් සේවා මධ්යස්ථානයේ හිටපු අධ්යක්ෂ ගරු කජේටන් මෙනෙසෙස් පියතුමා සිහිපත් කළ මෙම වචන, පවුල්, විවාහක යුවළ සහ තනි පුද්ගලයන් සමඟ දශක පහක් පුරා මධ්යස්ථානය සිදු කළ මානවීය සේවයේ සැබෑ බලපෑම මැනවින් පෙන්වා දෙයි.
1976 අගෝස්තු 8 වනදා ආරම්භ කළ ස්නේහාලයා මධ්යස්ථානය සිය ස්වර්ණ ජයන්තිය අගෝස්තු 8 වනදා සමරනු ලැබීය.
ගරු කජේටන් මෙනෙසෙස් පියතුමා සිහිපත් කළේ, තම සැමියා වෙනත් කාන්තාවක් සමඟ සබඳතාවක් පවත්වාගෙන යන බව දැනගත් තරුණ ගැබිනි කාන්තාවකගේ ජීවිත කතාවකි. දැඩි කලකිරීමකට පත්වූ ඇය නිවසින් පිටව ගියේ සිය ජීවිතය අවසන් කර ගැනීමේ අදහසිනි.
එම ගමනේදී කෙනෙකු ඇයට ස්නේහාලයා පිළිබඳ පවසා, උපකාර ලබා ගැනීමට එහි යන ලෙස දිරිමත් කර තිබිණි. පසුව ඇය ගරු මෙනෙසෙස් පියතුමා හමුවී, එම අර්බුදකාරී අවස්ථාවෙන් ගොඩ ඒමට අවශ්ය සහාය හා මඟපෙන්වීම ලබා ගත්තාය.
වසර ගණනාවකට පසුව ඔවුන් යළි හමුවූ අවස්ථාවේදී ඇය පියතුමාට පැවසුවේ,
“අද මම ජීවතුන් අතර සිටින්නේ ඔබ නිසාමයි.”
යනුවෙනි.
එම සාක්ෂිය තුළින් ස්නේහාලයා මධ්යස්ථානයේ වසර 50ක සේවයේ මූලික මෙහෙවර පැහැදිලි වේ. පවුල්, විවාහක යුවළ සහ පුද්ගලයන්ට තම ගැටලු නිදහසේ පැවසීමට, ඔවුන් සමඟ ගමන් කිරීමට සහ යළිත් බලාපොරොත්තුව සොයා ගැනීමට උපකාර කිරීම එම මෙහෙවරයි.
පවුල් අවශ්යතාවයකින් උපන් සේවාවක්
1976දී ආරම්භ වූ ස්නේහාලයා, මුම්බායි නගරයේ පවුල් මුහුණ දෙන ගැටලු වැඩිවීමත් සමඟ වෘත්තීය උපදේශනය සහ එඬේර සේවාව අවශ්ය වූ පවුල් හා පුද්ගලයන්ට සහාය වීමේ අරමුණින් ගොඩනැගුණි.
දෙවන වතිකානු මන්ත්රණ සභාවේ ඉගැන්වීම් සහ හයවන පාවුළු පාප් වහන්සේගේ Humanae Vitae ලේඛනයෙන් ද ආභාසය ලැබූ මෙම මධ්යස්ථානය, කාලයත් සමඟ විවාහ සූදානම් කිරීම, පවුල් උපදේශනය, ස්වභාවික පවුල් සැලසුම්කරණය, මනෝවිද්යාත්මක සහාය සහ විවිධ ආධ්යාත්මික හා මානවීය පුහුණු වැඩසටහන් ඇතුළු සේවා රැසක් වර්ධනය කළේය.
ස්වර්ණ ජයන්තිය සැමරුමේදී වත්මන් අධ්යක්ෂ ගරු ඇෂ්වින් කැස්ටලිනෝ පියතුමා, මධ්යස්ථානයේ සේවය හැඩගැස්වීමට දායක වූ හිටපු අධ්යක්ෂවරුන්ගේ සේවයද සිහිපත් කළේය.
වසර ගණනාවක් පුරා ස්නේහාලයා සිය සේවා පුළුල් කරමින්, මීසම් මට්ටමින් ක්රියාත්මක පවුල් සේවා වැඩසටහන් හරහා සිය මෙහෙවර තවදුරටත් ශක්තිමත් කර තිබේ.
මධ්යස්ථානයේ ආරම්භක අධ්යක්ෂ ගරු ඩෝසන් ඇම්බෝස්ටා පියතුමාගේ වීඩියෝ පණිවිඩයක්ද සැමරුමට එක් කර තිබිණි. පවුල් අර්බුදවලට මුහුණ දෙන විවාහක යුවළ සහ පුද්ගලයන්ට වෘත්තීය මෙන්ම පරිපූර්ණ එඬේර සහායක් ලබා දීම සඳහා මුම්බායි අගරදගුරු පදවිය විසින් ගත් පියවර පිළිබඳව ඔහු එහිදී සිහිපත් කළේය.
විවාහයට සූදානම් කිරීමෙන් විවාහ ජීවිතය සමඟ ගමන් කිරීම දක්වා
ස්වර්ණ ජයන්තිය සමඟ ස්නේහාලයා සිය ඉදිරි සේවාව පිළිබඳවද අවධානය යොමු කර තිබේ.
“හදවතින් සවන් දීම, ප්රේමයෙන් සහාය වීම, විශ්වාසයෙන් එකට ගමන් කිරීම” යන තේමාව යටතේ විවාහක යුවළ සමඟ දිගුකාලීනව ගමන් කිරීම අරමුණු කරගත් නව වැඩසටහන් කිහිපයක් ඉදිරිපත් කර ඇත.
ඒ යටතේ උපදේශක විවාහක යුවළ 100 දෙනෙකු පුහුණු කිරීම, අලුතින් විවාහ වූ යුවළ 500 දෙනෙකු සමඟ අඛණ්ඩව ගමන් කිරීම සහ විවිධ ආගමික පසුබිම්වල සිටින විවාහක යුවළ 100 දෙනෙකු සඳහා විශේෂ සහාය ලබා දීම ඇතුළත් වේ.
එමෙන්ම මුම්බායි අගරදගුරු පදවිය පුරා උපදේශක විවාහක යුවළ ජාලයක් ගොඩනැගීමටත්, විවිධ ආගමික පසුබිම්වලින් පැමිණෙන විවාහක යුවළට සහ ඔවුන් සමඟ ගමන් කරන පුද්ගලයන්ට උපකාර වන “Interfaith Marriage Companion Handbook” නම් මාර්ගෝපදේශ ග්රන්ථයක් ප්රකාශයට පත් කිරීමටත් සැලසුම් කර තිබේ.
මෙහිදී ස්නේහාලයාගේ සේවා දර්ශනයද වෙනස් වෙමින් පවතී. විවාහයට පෙර සූදානම් කිරීම එක් වරක් පමණක් සිදුකරන වැඩසටහනක් ලෙස නොව, විවාහ ජීවිතය පුරාම යුවළ සමඟ ගමන් කරන අඛණ්ඩ මෙහෙවරක් ලෙස එය වටහා ගැනීමට නව අවධානය යොමු කර ඇත.
“විවාහක යුවළ අතර ප්රේමය ඉතා වටිනා දෙයක්”
සැමරුම් උත්සවය අමතමින් මුම්බායි අගරදගුරු ජෝන් රොඩ්රිගස් හිමිපාණන්, ස්නේහාලයාගේ 50 වැනි සංවත්සරය “පිරිසිදු” සහ “වටිනා” දෙයක් සැමරීමක් ලෙස විස්තර කළේය.
විවාහක ස්වාමිපුරුෂයා සහ භාර්යාව අතර ඇති ප්රේමය එවැනි පිරිසිදු හා වටිනා දෙයක් බවත්, එම ප්රේමය තුළින් දෙවියන් වහන්සේගේ පිරිසිදු ප්රේමය අත්විඳීමට මිනිසාට හැකි වන බවත් අගරදගුරු හිමිපාණෝ පෙන්වා දුන්හ.
පවුල් සහ සභාව අද මුහුණ දෙන නව අභියෝග පිළිබඳවද අගරදගුරු හිමිපාණෝ අවධානය යොමු කළහ. වෙනස් වෙමින් පවතින සමාජ යථාර්ථයන්, තාක්ෂණය, කෘත්රිම බුද්ධිය සහ නාගරික හුදකලාව වැනි කරුණු ඒ අතර වේ.
විශේෂයෙන් තරුණ පරපුරට සවන් දෙන ලෙසත්, ඔවුන්ගෙන් ඉගෙන ගැනීමට සභාව විවෘතව සිටිය යුතු බවත් අගරදගුරු ජෝන් රොඩ්රිගස් හිමිපාණෝ අවධාරණය කළහ.
ස්නේහාලයා ආරම්භ වූයේද ජාතික මට්ටමේ අර්බුදකාරී පසුබිමක් තුළ බව සිහිපත් කළ අගරදගුරු හිමිපාණෝ, අද පවතින අභියෝග තුළින්ද නව එඬේර සේවා අවස්ථා බිහිවිය හැකි බවට බලාපොරොත්තු පළ කළහ.
“එදා එම අවස්ථාවේදී සුන්දර දෙයක් ඉදිරියට පැමිණියා. අපි මේ අභියෝග මැදින් ගමන් කරන විටත්, ස්වාමීන් වහන්සේ කෙරෙහි විශ්වාස කරමු. එයිනුත් සුන්දර දෙයක් බිහි වනු ඇතැයි අපි විශ්වාස කරමු,” යනුවෙන් අගරදගුරු හිමිපාණෝ පැවසූහ.
ස්නේහාලයා සිය 50 වසරක සේවයෙන් පසු නව පරිච්ඡේදයකට පිවිසෙන විට, එහි අවධානය වන්නේ විවාහයට පෙර සූදානම් කිරීමෙන් ඔබ්බට ගොස්, පවුල් ජීවිතයේ සතුට හා අභියෝග මධ්යයේ විවාහක යුවළ සමඟ අඛණ්ඩව ගමන් කිරීමයි.
සිය පණිවිඩය අවසන් කරමින් අගරදගුරු ජෝන් රොඩ්රිගස් හිමිපාණෝ ස්නේහාලයාට එහි මෙහෙවර අඛණ්ඩව ඉදිරියට ගෙන යන ලෙස දිරිගැන්වූහ.
“හොරණෑව පිඹින්න. හොරණෑ හඬ නංවන්න. ගී ගයමින් හඬ නඟන්න. ස්වාමීන් වහන්සේ අප වෙනුවෙන් කළ සියල්ල වෙනුවෙන් උන්වහන්සේට ස්තුති කරන්න. තවද මෙම ආලෝකය දිගටම බැබළේවා.”
#Snehalaya #GoldenJubilee #FamilyMinistry #CatholicChurch #ArchdioceseOfBombay #Mumbai #FamilyLife #Marriage #MarriageAccompaniment #CatholicFamilies #PastoralCare #FaithAndFamily #Hope #CatholicMarriage #RVAAsia #RadioVeritasAsia #RVASinhala
