‘සත්යය කුමක්දැයි විමසා හඳුනා ගැනීමයි අපගේ අභියෝගය’ – FABC සංගමනශීලී කාර්යාලයේ ගරු ක්ලැරන්ස් දෙවදාස් පියතුමා AI පිළිබඳ පවසයි
‘සත්යය කුමක්දැයි විමසා හඳුනා ගැනීමයි අපගේ අභියෝගය’ – FABC සංගමනශීලී කාර්යාලයේ ගරු ක්ලැරන්ස් දෙවදාස් පියතුමා AI පිළිබඳ පවසයි
ජකාර්තා, ඉන්දුනීසියාව – කෘත්රිම බුද්ධිය (AI) හමුවේ අද සභාවට සහ සමාජයට ඇති විශාලතම අභියෝගය වන්නේ සත්යය සහ අසත්යය අතර වෙනස විමසා හඳුනා ගැනීම බව ආසියානු රදගුරු සමුළු සම්මේලනයේ (FABC) සහකාර මහලේකම් සහ FABC සංගමනශීලී කාර්යාලයේ විධායක ලේකම් ගරු ක්ලැරන්ස් දෙවදාස් පියතුමා අවධාරණය කළහ.
උන්වහන්සේ මෙම අදහස් පළ කළේ ජූලි 26 දින ජකාර්තා ආසන දෙව්මැදුරු පරිශ්රයේ පිහිටි Pastoral Center හි පැවති FABC 12 වැනි මහා සමුළුවේ අවසන් මාධ්ය හමුවේදීය.
මෙම මාධ්ය හමුව පැවැත්වුණේ, මහා සමුළුවේ නියෝජිතයන් ජකාර්තාවේ මිත්රත්ව උමං මාර්ගය හරහා ඉස්තික්ලාල් මුස්ලිම් දේවස්ථානය වෙත සිදු කළ සංකේතාත්මක වන්දනා ගමනෙන් අනතුරුවය. එහිදී කාදිනල් පැබ්ලෝ වර්ජිලියෝ ඩේවිඩ් හිමිපාණන් සහ ඇන්ටෝනියස් සුබියාන්ටෝ බුන්ජමින් රදගුරු හිමිපාණන් ද අදහස් පළ කළහ.
මාධ්යවේදීන් කෘත්රිම බුද්ධියේ වැඩිවෙමින් පවතින භූමිකාව පිළිබඳ විමසූ අවස්ථාවේදී, ගරු ක්ලැරන්ස් දෙවදාස් පියතුමා අවධාරණය කළේ සභාව තාක්ෂණික දියුණුවට විරුද්ධ නොවන බවයි.
“කෘත්රිම බුද්ධිය යනු මෙවලමක් පමණයි,” යැයි උන්වහන්සේ පැවසූහ.
එහි යහපත හෝ අයහපත තීරණය වන්නේ මිනිසා එය භාවිත කරන ආකාරය අනුව බවද උන්වහන්සේ පැහැදිලි කළහ.
කොවිඩ්-19 වසංගත සමය සිහිපත් කළ ගරු ක්ලැරන්ස් දෙවදාස් පියතුමා, තාක්ෂණය සභාවේ මෙහෙවරට සේවය කළ ආකාරය පිළිබඳ උදාහරණයක්ද ඉදිරිපත් කළහ. එම කාලයේ සජීවීව විකාශය කළ දිව්ය පූජාවන් නිසා, දෙව්මැදුරට පැමිණීමට නොහැකි වූ වැඩිහිටියන්ට, රෝගීන්ට සහ නිවෙස්වල සිටි විශ්වාසිකයන්ට දිව්ය පූජාවට හා තම විශ්වාස ප්රජාවට සම්බන්ධ වී සිටීමට හැකි වූ බව උන්වහන්සේ පැවසූහ.
ආසියාව විවිධ භාෂා සහ සංස්කෘතික සම්ප්රදායන්ගෙන් පොහොසත් මහාද්වීපයක් වන බැවින්, කෘත්රිම බුද්ධිය සභාවේ සන්නිවේදන මෙහෙවර තවදුරටත් ශක්තිමත් කළ හැකි බවද උන්වහන්සේ සඳහන් කළහ.
සභාවේ ලේඛන සහ ඉගැන්වීම් ආසියාවේ විවිධ භාෂාවන්ට පරිවර්තනය කිරීම තුළින්, එඬේරික සම්පත් සහ නිල ඉගැන්වීම් ප්රාදේශීය සභාවන්ට වඩාත් පහසුවෙන් ළඟා කරදීමට AI තාක්ෂණයට හැකි බවද උන්වහන්සේ පෙන්වා දුන්හ.
එහෙත්, තොරතුරු යුගය මිනිසාට ඉදිරිපත් කරන සැබෑ අභියෝගය තොරතුරු රැස් කිරීම නොව, ඒවායේ සත්යතාව විමසා බැලීම බව ගරු ක්ලැරන්ස් දෙවදාස් පියතුමා අවධාරණය කළහ.
“අද අපගේ ප්රශ්නය තොරතුරු හිඟය නොවෙයි. සත්යය කුමක්දැයි විමසා හඳුනා ගැනීමට ඇති හැකියාවයි,” යැයි උන්වහන්සේ පැවසූහ.
ඩිජිටල් තාක්ෂණය හරහා සත්ය හා අසත්ය තොරතුරු ඉතා වේගයෙන් නිර්මාණය කර බෙදාහැරිය හැකි යුගයක, විචාරශීලී විමසා බැලීම (discernment) කිතුනුවකුට අත්යවශ්ය ගුණාංගයක් බවද උන්වහන්සේ පෙන්වා දුන්හ.
කෘත්රිම බුද්ධිය මගින් නිර්මාණය කරන සෑම තොරතුරක්ම අන්ධ ලෙස පිළිගැනීම වෙනුවට, එය සත්යද, යහපතට උපකාරීද, මානව ගරුත්වයට ගරුකරනවාද යන්න විමසා බැලිය යුතු බවද උන්වහන්සේ සඳහන් කළහ.
ගරු ක්ලැරන්ස් දෙවදාස් පියතුමාගේ මෙම අදහස්, කෘත්රිම බුද්ධිය තර්ජනයක් ලෙස නොව, සදාචාරාත්මක වගකීමකින් යුතුව භාවිත කළ යුතු අවස්ථාවක් ලෙස දැකිය යුතු බව පැවසූ කාදිනල් පැබ්ලෝ වර්ජිලියෝ ඩේවිඩ් හිමිපාණන්ගේ අදහස් සමඟද ගැළපුණි.
මෙම අදහස් දෙකම FABC මහා සමුළුව පුරාම අවධාරණය වූ ප්රධාන පණිවිඩයක් නැවතත් තහවුරු කළේය. එනම්, ආසියාවේ සභාව නව තාක්ෂණයන් විශ්වාසයෙන් වැලඳගත යුතු වුවද, ඒවා සෑම විටම සුබ අස්නේ වටිනාකම්, මානව ගරුත්වය, සහ සවන් දීම, සංවාදය හා හවුල් විචාරණය මත පදනම් වූ සංගමනශීලී ජීවන රටාවට සේවය කළ යුතු බවයි.
අවසානයේ ගරු ක්ලැරන්ස් දෙවදාස් පියතුමා අවධාරණය කළේ, කෘත්රිම බුද්ධියේ අනාගතය තාක්ෂණික දියුණුව පිළිබඳ පමණක් නොව, ප්රඥාවන්ත හා සදාචාරාත්මක තීරණ ගැනීමට හැකි මිනිසුන් බිහිකිරීම පිළිබඳවද වන බවයි.
AI තාක්ෂණය එදිනෙදා ජීවිතයේ අනිවාර්ය කොටසක් වෙමින් පවතින මෙම යුගයේ, සභාවේ වගකීම වන්නේ නව තාක්ෂණයන් භාවිත කිරීම පමණක් නොව, සත්යය සහ අසත්යය වෙන්කර හඳුනා ගැනීමට ජනතාවට උපකාර කිරීමත්, මානව ගරුත්වය ආරක්ෂා කිරීමත්, තාක්ෂණය සැමවිටම පොදු යහපත සඳහා යොදා ගැනීම සහතික කිරීමත් බව උන්වහන්සේ සඳහන් කළහ.
කර්තෘ ගැන
අමාදේයා ප්රනාස්තිති සමාජ සන්නිවේදන ක්ෂේත්රයේ ක්රියාකාරිනියකි. ඇය වර්තමානයේ ඉන්දුනීසියානු රදගුරු සමුළුවේ ලේඛන හා තොරතුරු අංශයේ ස්වාධීන දායක ලේඛිකාවක් ලෙස සේවය කරයි.
#FABC2026 #XIIFABCPlenary #FrClarenceDevadass #ArtificialIntelligence #AI #Synodality #Discernment #Truth #ChurchInAsia #DigitalMission #RVASinhala #RadioVeritasAsia
