'සංගමනශීලීත්වය මෙහෙවර කරා ගෙන යා යුතුයි,' ආසියානු රදගුරු සමුළු සම්මේලනයේ මහා සමුළුවෙන් අනතුරුව FABC උප සභාපති පවසයි

'සංගමනශීලීත්වය මෙහෙවර කරා ගෙන යා යුතුයි,' ආසියානු රදගුරු සමුළු සම්මේලනයේ මහා සමුළුවෙන් අනතුරුව FABC උප සභාපති පවසයි

සංගමනශීලී පරිවර්තනයට සැබෑ අර්ථයක් ලැබෙන්නේ එය සභාව මෙහෙවර කරා ගෙන යන විට පමණක් බව ආසියානු රදගුරු සමුළු සම්මේලනයේ (FABC) උප සභාපති කාදිනල් පැබ්ලෝ වර්ජිලියෝ ඩේවිඩ් හිමිපාණන් ජකර්තාහි පැවති FABC 12 වැනි මහා සමුළුව අවසන් වීමෙන් අනතුරුව අවධාරණය කළහ.

ජූලි 26 දින ජකර්තාහි ස්වර්ගාරෝපණයේ දෙව්මෑණියන්ගේ ආසන දෙව්මැදුරේ එඬේර මධ්‍යස්ථානයේ පැවති අවසන් මාධ්‍ය හමුවේදී අදහස් දැක්වූ කාදිනල් ඩේවිඩ් හිමිපාණන් සඳහන් කළේ, මෙම මහා සමුළුව හුදෙක් සාකච්ඡාවලින් පමණක් නොව, ආසියාව පුරා ප්‍රාදේශීය සභාවන් "පාලම් හා පාලම් තනන්නන්" වීමට දිරිගැන්වූ සුවිශේෂී අවස්ථාවක් ලෙස සිහිපත් විය යුතු බවයි.

මෙම මාධ්‍ය හමුව පැවැත්වුණේ මහා සමුළුවේ නියෝජිතයන් ජකර්තාහි මිත්‍රත්වයේ උමං මාර්ගය ඔස්සේ ඉස්තික්ලාල් මුස්ලිම් දේවස්ථානය වෙත සංකේතාත්මක වන්දනා ගමනක නිරත වීමෙන් අනතුරුවය. එම අවස්ථාවට FABC සංගමනශීලීත්ව කාර්යාලයේ විධායක ලේකම් සහ FABC සහකාර මහලේකම් ගරු ක්ලැරන්ස් දෙවදාස් පියතුමා සහ ඉන්දුනීසියානු කතෝලික රදගුරු සමුළුවේ සභාපති ඇන්ටෝනියස් සුබියන්තෝ බුන්ජමින් රදගුරු හිමිපාණන් ද එක්ව සිටියහ.

මහා සමුළුවෙන් පසු රදගුරුවරුන් තම තමන්ගේ රදගුරු පදවිවලට රැගෙන යා යුතු වඩාත් ප්‍රායෝගික පණිවිඩය කුමක්දැයි මාධ්‍යවේදියෙකු නැඟූ ප්‍රශ්නයකට පිළිතුරු දෙමින් කාදිනල් ඩේවිඩ් හිමිපාණන් සඳහන් කළේ, සතිය පුරා මහා සමුළුවට මඟ පෙන්වූ "ඔබ මහත් දේ ඔබ දකින්නෙහි ය" යන තේමාව එහි සමස්ත ගමනටම ආලෝකයක් වූ බවයි.

උන්වහන්සේ පැවසුවේ, රදගුරුවරුන්ගේ මෙනෙහි කිරීම අවසානයේ එකිනෙකින් වෙන් කළ නොහැකි කැඳවීම් දෙකක් වටා කේන්ද්‍රගත වූ බවයි. ඒවා නම් සංගමනශීලී පරිවර්තනය සහ ධර්මදූත මෙහෙවර ය.

"සංගමනශීලීත්වය යනු ක්‍රමවේදයක් පමණක් නොවේ. එය ආධ්‍යාත්මිකත්වයක්. එය සභාවක් ලෙස ජීවත් වන ආකාරයයි," යැයි කාදිනල් ඩේවිඩ් හිමිපාණන් පැවසූහ.

සංගමනශීලීත්වය හුදෙක් එඬේරික සැලැස්මක් හෝ පරිපාලන ක්‍රියාවලියක් නොව, සභාවේ අනන්‍යතාවය සහ අන්‍යෝන්‍ය සබඳතා හැඩගස්වන ජීවන රටාවක් බව උන්වහන්සේ පැහැදිලි කළහ.

ඒ නිසාම, මෙම මහා සමුළුව තුළ අවධාරණය කළ පරිවර්තනය පුද්ගලික ඇදහිල්ලට පමණක් සීමා නොවී, සබඳතා, එඬේරික සේවාවන් සහ සභාවේ ව්‍යුහයන් අලුත් කිරීම ද ඇතුළත් වන බව කාදිනල් හිමිපාණන් සඳහන් කළහ.

එහෙත් එම පරිවර්තනය සභාව තුළ පමණක් සීමා වී නොසිටිය යුතු බවද උන්වහන්සේ අවධාරණය කළහ.

"එය අනිවාර්යයෙන්ම මෙහෙවර කරා ගෙන යා යුතුයි," යැයි කාදිනල් ඩේවිඩ් හිමිපාණන් පැවසූහ.

මෙම ධර්මදූත කැඳවීම "ආසියාවේ පාලම් හා පාලම් තනන්නන් වීමේ මෙහෙවර" යන මහා සමුළුවේ දැක්ම තුළ පැහැදිලිව ප්‍රකාශ වූ බවත්, එය සංවාදය, සංහිඳියාව සහ සහෝදරත්වය වර්ධනය කිරීමට ආසියාවේ ප්‍රාදේශීය සභාවන් දිරිමත් කරන බවත් උන්වහන්සේ සඳහන් කළහ.

මහා සභාවේ අවසන් දිව්‍ය පූජාවෙන් අනතුරුව නියෝජිතයන් ඉස්තික්ලාල් මුස්ලිම් දේවස්ථානය වෙත ගිය සංචාරය එම මෙහෙවරේ ජීවමාන සංකේතයක් වූ බවද කාදිනල් ඩේවිඩ් හිමිපාණන් පැවසූහ.

ජකර්තා ආසන දෙව්මැදුර සහ ඉස්තික්ලාල් මුස්ලිම් දේවස්ථානය සම්බන්ධ කරන මිත්‍රත්වයේ උමං මාර්ගය හරහා ගමන් කිරීම හුදෙක් සංකේතාත්මක ක්‍රියාවක් නොව, විවිධ ආගම්වල ජනතාවට අන්‍යෝන්‍ය ගෞරවයෙන් හා මිත්‍රත්වයෙන් එකට ගමන් කළ හැකි බව පෙන්වා දුන් ප්‍රායෝගික සාක්ෂියක් බව උන්වහන්සේ පැවසූහ.

ඉස්තික්ලාල් මුස්ලිම් දේවස්ථානයේ ප්‍රධාන ඉමාම්වරයා හමුවීම සහ ඉන්දුනීසියාවේ අන්තර්ආගමික සංහිඳියාව සියැසින් අත්විඳීම මහා සමුළුවේ අමතක නොවන අත්දැකීමක් වූ බවද කාදිනල් හිමිපාණන් සඳහන් කළහ.

"අපි ඒ අත්දැකීම අපේ රටවල් වෙත රැගෙන යනවා," යැයි උන්වහන්සේ පැවසූහ.

එම හමුව ක්‍රිස්තියානීන් සහ මුස්ලිම්වරුන් පළමුවෙන්ම එකම මනුෂ්‍ය පවුලේ සහෝදර සහෝදරියන් බවට ඇති විශ්වාසය තවදුරටත් ශක්තිමත් කළ බවද කාදිනල් ඩේවිඩ් හිමිපාණන් සඳහන් කළහ.

"සභාවේ මෙහෙවර හුදෙක් අපගේ ආගම ප්‍රවර්ධනය කිරීම නොවේ. අප සියලු දෙනාගේ පොදු මනුෂ්‍යත්වයත්, පොදු මානව ගරුත්වයත් ප්‍රවර්ධනය කරන විටයි අප සැබෑ ලෙස එකිනෙකා හමුවන්නේ," යැයි උන්වහන්සේ පැවසූහ.

මෙවැනි හමුවීම් තුළින් සංවාදය, ගෞරවය සහ සහයෝගීතාව මඟින් බෙදීම් ජයගත හැකි ආදරයේ ශිෂ්ටාචාරයක් ගොඩනැගීම සභාවේ පුළුල් මෙහෙවර බවද කාදිනල් ඩේවිඩ් හිමිපාණන් පෙන්වා දුන්හ.

අවසානයේ උන්වහන්සේ අවධාරණය කළේ, ආසියාව පුරා තම ප්‍රාදේශීය සභාවන් වෙත ආපසු යන රදගුරුවරුන්ගේ වගකීම වන්නේ මෙම මහා සමුළුවේ ආත්මය ප්‍රායෝගික එඬේරික ක්‍රියාමාර්ග බවට පරිවර්තනය කිරීම බවයි. එවිට සංගමනශීලී පරිවර්තනය සභාව තුළත්, විවිධ සංස්කෘතීන් හා ආගම් අතරත් පාලම් තනන ජීවමාන මෙහෙවරක් බවට පත්වනු ඇති බවද උන්වහන්සේ සඳහන් කළහ.

කර්තෘ ගැන
ගේබ්‍රියෙල් අබ්ඩි සුසන්තෝ ඉන්දුනීසියාවේ ප්‍රවීණ කතෝලික මාධ්‍යවේදියෙකි. ඔහු වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සේවය කරයි.

#FABC2026 #XIIFABCPlenary #SynodalMission #Synodality #BridgeBuilders #CardinalPabloVirgilioDavid #Dialogue #Mission #ChurchInAsia #RVASinhala #RadioVeritasAsia