රජයට පවරාගත් පාසල් පිළිබඳව ජෝසප් ස්ටාලින් මහතාගේ ප්රකාශය සාවද්යයි: ගරු ගැමුණු ඩයස් පියතුමා
රජයට පවරාගත් පාසල් පිළිබඳව ජෝසප් ස්ටාලින් මහතාගේ ප්රකාශය සාවද්යයි: ගරු ගැමුණු ඩයස් පියතුමා
ආගමික අනන්යතාවයට සහ ආගම් අතර සමගියට බාධා ප්රමුඛවන ආකාරයට ඉකුත්ව ප්රකාශයක් ඉදිරිපත් කළ ජෝසප් ස්ටාලින් නමැත්තාගේ ප්රකාශයට පැහැදිලි කිරීමක් මෙලෙස ඉදිරිපත් කරමි.
ඔහුගෙ අදහස් දක්වීමට අනුව පාසල් රජයට පවරා ගැනීමෙන් අනතුරුව ආගමික පාසල් ලෙස පාසල් වර්ගීකරණයක් සිදුකර නොමැති බවත් සියලු පාසල් රජයේ පාසල් බවත් ප්රකාශ කරයි.
රජයේ පාසල් සහ රජයට පවරා ගත් පාසල් අතර විශාල වෙනසක් ඇති බව දක්වීමට පහත සඳහන් කරුණු ඉදිරිපත් කරමි.
1939 අංක 31 දරණ අධ්යාපන ආඥා පනත රජයේ පාසල් යනු කවරේද යන්න අර්ථ කථනය කරයි. එම ආඥා පනතට අනුව රජයේ පාසල් යනු රජයේ වියදමින් ආරම්භ කර රජයේ වියදමින් පවත්වාගෙන යන රජය සතු දේපලකි.
එහෙත් රජය විසින් 1960 අංක 05 සහ 1961 අංක 08 දරණ පාර්ලිමේන්තු පනත් මගින් රජයට පවරා ගන්නා ලද සියලු ආගම් වලට අයත් පාසල් රජයේ ඉඩමක රජයේ වියදමින් ආරම්භ කළ පාසල් නොවේ.
එම දේපල වල අයිතිය මුල් හිමිකරුවන් සතුවන අතර එම පාසල් ආරම්භ කිරීමට මුදල් වියදම් කර ඇත්තේ ද ඒ ඒ ආගම විසින්ය. මේ අනුව රජයට පවරාගත් පාසල් රජයේ පාසල් නොවන බව ශ්රී ලාංකික නීති රාමුව විසින් පිළිගෙන ඇත.
පනතේ විධිවිධාන අනුව පාසල් පරිපාලනය පමණක් රජය සතු වන අතර පාසලේ මුල් හිමිකරු, ඉඩමේ සහ ගොඩනැගිලි වල නීත්යානුකූල හිමිකරු ලෙස අදටත් කටයුතු කරනු ඇත.
පාසලේ මුල් හිමිකරු, ඉඩමේ සහ ගොඩනැගිලි වල නීත්යානුකූල හිමිකරු ලෙස දිගටම කටයුතු කරන බව 1960 නොවැම්බර් 20 දින අධ්යාපන අධ්යක්ෂ එස්. එල්. ද සිල්වා මහතා නිකුත් කළ නීති රීති මාලාව 7 (ඉ) වගන්තියෙන් සනාථ කර ඇත.
රජය විසින් පාසල් පවරා ගැනීමට පෙර ගුරුවරුන්ගේ හෝ අනෙක් සේවකයන්ගේ පදිංචි නිවාස වෙනුවෙන් අයිතිකරු විසින් කුලියක් අය කර තිබුනේ නම් එය වෙනසක් නොකර අය කර ගැනීමට (නීති රීති මාලාව 7 (ඊ)) වගන්තියෙන් ඉඩදී ඇත.
1960 ඔක්තෝබර් 24 හැන්සාඩ් වාර්තාව පිටු අංක 1594 සහ 1961 අංක 08 දරණ පනතේ 7 (2) වගන්තියෙන් මුල් හිමිකරුගේ ආගමික අනන්යතාවයට හානි නොකරන බව සහතික කර, අධ්යක්ෂවරයාගේ කළමනාකරණය යටතේ පාසල්වලට අතීතයේ තිබූ ආගමික පරිසරයම දිගටම පවතිනු ඇති බව ද, කිසිදු වෙනසක් සිදු නොවන බව සහතික කර ඇත.
පාසල වැඩි ළමා අවස්ථාවේදී පනතේ 10 වන වගන්තියට අනුව පාසල පවත්වාගෙන ගිය භූමිය සහ ගොඩනැගිලි මුල් අයිතිකරුට ආපසු ලබා දීමට නියම කර ඇත.
සිසුන්ගේ ආගමික ප්රතිශතය වෙනසක් නොකර පවත්වාගෙන යාමට නීති සකස් කර ඇති අතර එය අදාල පක්ෂයෙන් පවරා ගත් පාසල්වලට පමණි. එම නීතිය එලෙසම රැකිය යුතු බව ශ්රේෂ්ඨාධිකරණයේ නඩු තීන්දූ මගින් සනාථ කර ඇත.
පවරා ගත් පාසල්වල ඉඩම් මැන ඔප්පුවක් මගින් හෝ ඉඩම් ලියා පදිංචි කරන කාර්යාලයේ, රජයට අයිති බවට ලියා පදිංචි කර නැති අතර අදටත් මෙම ඉඩම්වල අයිතිය සහ අයිතිය මුල්හිමිකරු සතුව ඇත.
1582/ඉ කෑගල්ල මහාධිකරණය නඩු තීන්දුවෙන් ප්රාදේශීය ලේකම්ට මෙම ඉඩම්වල අයිතියක් හෝ බලයක් නොමැති බවට තීන්දු කර ඇත්තේ එම දේපල පිළිබඳ කිසිදු බලයක් රජය සතු නොවන නිසාය.
භූමිය සහ දේපලවල යම් වෙනසක් සිදුවන්නේ නම් ඒ සඳහා මුල් හිමිකරුගේ අවසරය ලැබිය යුතු බව රජය විසින් පිළිගෙන ඇත.
මුස්ලිම් පාසල් වෙනුවෙන් වෙනම අංශයක් අධ්යාපන අමාත්යාංශයේ ස්ථාපිත කර ඇත්තේ ඒ ඒ ආගමික පාසල්වල ආගමික අනන්යතාවය සහ සංස්කෘතික වටිනාකම් සුරැකීමටය. ආගමික පාසල් සංකල්පය රජය විසින් පිළිගන්නා බවට එය කදිම උදාහරණයකි.
රජයට පවරා ගත් ආනන්ද, නාලන්ද, මහානාම, විශාඛා වැනි ශ්රේෂ්ඨ බෞද්ධ පාසල් බෞද්ධ ආගමික අධ්යාපනය උදෙසා අදටත් විශාල මෙහෙවරක් මේ රටේ බෞද්ධ ජනතාව උදෙසා කරනු ලබයි.
එම පාසල්වල ආගමික අනන්යතාවයට හානි කිරීම හෝ වෙනත් ආගමික විදුහල්පතිවරුන් පත් කිරීම අපි කිසිසේත් අනුමත නොකරමු.
එම පාසල්වල ජීවනාලිය බෞද්ධ සංස්කෘතික පසුබිම වන අතර හින්දු, ඉස්ලාම්, ක්රිස්තියානි ආගම්වලට අයත් රජයට පවරා ගත් පාසල් එම ආගමික සංස්කෘතික පසුබිම තුළ ක්රියාත්මක කිරීම මේ රටේ සියලුම පුරවැසියන්ගේ කැමැත්තයි.
මෙරට නීතිය විසින් ආගමික පාසල් සංකල්පය පිළිගෙන එයට ගරු කරන බැවින් නිරාගමිකයයි සිතිය හැකි පුද්ගලයින් ආගමික අනන්යතාවය පිළිබඳව සංවේදීව සාවද්ය කරුණු ඉදිරිපත් කරද්දී ඒවාට අහුමකන් දිය යුතුද නැද්ද යන්න මෙරට ජීවත් වන සුවහසක් බුද්ධිමත් ජනතාව තීරණය කරනු ඇත.
ගරු ගැමුණු ඩයස් පියතුමා
ජාතික හා අගරදගුරු පදවි කතෝලික අධ්යාපන අධ්යක්ෂ
අගරදගුරු පදවි කතෝලික අධ්යාපන පිටුව ඇසුරිනි.
#CatholicSchools #GovernementSchools #FrGemunuDias #JosephStarlin
#RVASinhala #VeritasNews
