ඉන්දුනීසියානු කතෝලික රදගුරු සමුළුවේ සභාපති: පොදු මෙහෙවර සඳහා සම්පත් බෙදාගැනීමට ආසියානු සභාව සූදානම් විය යුතුයි

ඉන්දුනීසියානු කතෝලික රදගුරු සමුළුවේ සභාපති: පොදු මෙහෙවර සඳහා සම්පත් බෙදාගැනීමට ආසියානු සභාව සූදානම් විය යුතුයි

ජකාර්තා, ඉන්දුනීසියාව – ආසියාවේ සභාව සම්පත් බෙදාගැනීම පිළිබඳ කතා කිරීමෙන් පමණක් නොනැවතී, පොදු මෙහෙවර වෙනුවෙන් තම සම්පත්, දක්ෂතා, කාලය සහ මූල්‍යමය සහයෝගයද ත්‍යාගශීලීව බෙදාගැනීමට සූදානම් විය යුතු බව ඉන්දුනීසියානු කතෝලික රදගුරු සමුළුවේ (KWI) සභාපති ඇන්ටෝනියස් සුබියාන්ටෝ බුන්ජමින් රදගුරු හිමිපාණන් අවධාරණය කළහ.

උන්වහන්සේ මෙම අදහස් පළ කළේ ආසියානු රදගුරු සමුළු සම්මේලනයේ (FABC) 12 වැනි මහා සමුළුව අවසානයෙන් පසු ජූලි 26 දින ජකාර්තා ආසන දෙව්මැදුරු පරිශ්‍රයේ පිහිටි Karya Pastoral ගොඩනැගිල්ලේ පැවති අවසන් මාධ්‍ය හමුවේදීය.

සංගමනශීලී සභාවක් යනු එකට ගමන් කිරීම ගැන පමණක් නොව, එකිනෙකාට සහයෝගය ලබාදෙමින් ජීවත් වීම බවත්, එය සැබෑ ලෙස ක්‍රියාත්මක වීමට නම් බෙදාගැනීමේ ආකල්පය තවදුරටත් ගැඹුරු විය යුතු බවත් රදගුරු හිමිපාණන් පැවසූහ.

“අපි ආධ්‍යාත්මික දේවල් බෙදාගැනීම ගැන පහසුවෙන් කතා කරනවා. නමුත් අපගේ සම්පත්, දක්ෂතා, අපම, එසේම අපගේ මූල්‍යමය හැකියාවන් බෙදාගැනීමටත් අප සූදානම්ද?” යනුවෙන් උන්වහන්සේ ප්‍රශ්න කළහ.

සතියක් පුරා පැවති මෙම මහා සමුළුව අවසන් වීමෙන් අනතුරුව පැවති මාධ්‍ය හමුවේදී, ආසියාව සඳහා සංගමනශීලී සභාව පිළිබඳ මාර්ගෝපදේශය (Vademecum) සඳහා වූ රාමුව සහ සමුළුවේ අවසන් පණිවිඩය ඇතුළු ප්‍රධාන ප්‍රතිඵල පිළිබඳද නායකයෝ අදහස් හුවමාරු කරගත්හ.

එහෙත් ඇන්ටෝනියස් සුබියාන්ටෝ බුන්ජමින් රදගුරු හිමිපාණන්ගේ අදහස වූයේ, මෙම මහා සමුළුවේ වටිනාම ප්‍රතිඵලය ලේඛන නොව, ආසියාවේ සභාවන් අතර ඇති වූ සහෝදරත්වය සහ ජීවිත අත්දැකීම් බෙදාගැනීම බවයි.

“අප මෙම සමුළුවේදී සාකච්ඡා කළ ලේඛනවලට වඩා වැදගත් වූයේ, අපගේ ජීවිත එකිනෙකා සමඟ බෙදාගැනීමයි,” යැයි උන්වහන්සේ පැවසූහ.

ආසියාව පුරා සිට පැමිණි රදගුරුවරුන්, පූජකවරුන්, ආගමිකවරුන් සහ ගිහි නියෝජිතයන් තම තමන්ගේ එඬේරික අත්දැකීම්, අභියෝග සහ බලාපොරොත්තු හුවමාරු කරගැනීම තුළින් සමස්ත සභාවම පොහොසත් වූ බවද උන්වහන්සේ සඳහන් කළහ.

1990 වසරේ බන්ඩුං නගරයේ පැවති පස්වැනි FABC මහා සමුළුවෙන් වසර 36කට පසු ඉන්දුනීසියාවට නැවතත් මෙම මහා සමුළුවේ සත්කාරකත්වය හිමිවීම විශාල ආශීර්වාදයක් බව රදගුරු හිමිපාණන් පැවසූහ.

“අපට විශාල දුෂ්කරතා කිසිවක් ඇති වුණේ නැහැ. ඊට පටහැනිව, අපි ඉතා ප්‍රීතියෙන් සියලුම නියෝජිතයන් පිළිගත්තා. අපගේ ආගන්තුක සත්කාරය ඔවුන්ට ලබාදීමට අපි සතුටු වුණා,” යැයි උන්වහන්සේ සඳහන් කළහ.

ඉන්දුනීසියාවේ ආගන්තුක සත්කාරය සංගමනශීලී සභාවේ සැබෑ අර්ථය පිළිබිඹු කරන බවත්, එය සංවාදය, මිත්‍රත්වය සහ විවෘතභාවය තුළින් සබඳතා ගොඩනැගීම බවත් උන්වහන්සේ පැහැදිලි කළහ.

මෙම ආත්මය වඩාත් පැහැදිලිව දැකගත හැකි වූයේ, මහා සමුළුවේ නියෝජිතයන් ජකාර්තා ආසන දෙව්මැදුර සහ අග්නිදිග ආසියාවේ විශාලතම මුස්ලිම් දේවස්ථානය වන ඉස්තික්ලාල් මුස්ලිම් දේවස්ථානය සම්බන්ධ කරන මිත්‍රත්ව උමං මාර්ගය හරහා ගිය අවස්ථාවේදී බව රදගුරු හිමිපාණන් සඳහන් කළහ.

එම සංචාරය සංස්කෘතික අත්දැකීමක් පමණක් නොව, “ආසියාවේ පාලම් හා පාලම් තනන්නන් වීමේ මෙහෙවර” යන මහා සමුළුවේ තේමාව ජීවමාන ලෙස අත්විඳීමක් බවද උන්වහන්සේ පැවසූහ.

උන්වහන්සේට අනුව, එම උමං මාර්ගය හරහා එකට ගමන් කිරීමෙන් පැහැදිලි වූයේ සංවාදය යනු සම්මන්ත්‍රණ ශාලාවල පමණක් සාකච්ඡා කරන අදහසක් නොව, විශ්වාසය, ගෞරවය සහ සැබෑ මානව සබඳතා තුළ ගොඩනැගෙන ජීවිතයක් බවයි.

විවිධ ආගම්වල ජනතාව අතර මිත්‍රත්වය සහ සහයෝගීතාව වර්ධනය කිරීම සඳහා කැපවී සිටින ඉස්තික්ලාල් මුස්ලිම් දේවස්ථානයේ ප්‍රධාන ඉමාම්වරයා, “මානව පාලමක්” ලෙසද උන්වහන්සේ හැඳින්වූහ.

ඉමාම්වරයාගේ පණිවිඩය සිහිපත් කළ රදගුරු හිමිපාණන් අවධාරණය කළේ, සැබෑ ආගමික විශ්වාසය මිනිසා දෙවියන් වහන්සේට පමණක් නොව, තම අසල්වැසියාටද තව තවත් සමීප කළ යුතු බවයි.

“මම විශ්වාස කරනවා, මනුෂ්‍යයෙකු දෙවියන් වහන්සේට ළං වන තරමටම, ඔහු හෝ ඇය අනෙක් මිනිසුන්ටත් ළං වෙනවා,” යැයි උන්වහන්සේ පැවසූහ.

මෙම අදහස, මහා සමුළුව අතරතුර කාදිනල් ලුයිස් අන්තෝනියෝ ටැග්ලේ හිමිපාණන් ප්‍රකාශ කළ ක්‍රිස්තුස් වහන්සේ දෙවියන් වහන්සේ සහ මනුෂ්‍යත්වය අතර පාලම වන බව පිළිබඳ මෙනෙහි කිරීම සමඟද ගැළපෙන බව උන්වහන්සේ සඳහන් කළහ.

සමුළුවට සහභාගි වූ නියෝජිතයන්ට ඉන්දුනීසියානු බාටික් ඇඳුම් ත්‍යාග කිරීම වැනි සරල ක්‍රියාවන් පවා මිත්‍රත්වය සහ බෙදාගැනීමේ ආත්මය ප්‍රකාශ කළ බව රදගුරු හිමිපාණන් පැවසූහ.

කෙසේ වෙතත්, සංගමනශීලී සභාව අවසානයේ සැබෑ ක්‍රියාමාර්ග කරා ගෙන යා යුතු බවද උන්වහන්සේ අවධාරණය කළහ.

උන්වහන්සේට අනුව, ආසියාවේ සභාව ඉදිරියේ ඇති ප්‍රධාන අභියෝගය වන්නේ, සෑම ප්‍රාදේශීය සභාවක්ම සතු දේ පොදු මෙහෙවර වෙනුවෙන් ත්‍යාගශීලීව බෙදාගනිමින්, සහභාගිකම ප්‍රායෝගික සහයෝගීතාවක් බවට පත් කිරීමයි.

කර්තෘ ගැන
ගේබ්‍රියෙල් අබ්ඩි සුසන්තෝ ඉන්දුනීසියාවේ ප්‍රවීණ කතෝලික මාධ්‍යවේදියෙකි. ඔහු වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සේවය කරයි.

#FABC2026 #XIIFABCPlenary #BishopAntoniusSubiantoBunjamin #Synodality #SharingResources #Communion #BridgeBuilders #ChurchInAsia #Mission #RVASinhala #RadioVeritasAsia