ආසියාවේ ඩිජිටල් ධර්මදූතයන්ට ක්රිස්තුස් වහන්සේ වෙත මිනිසුන් යොමු කරන සාක්ෂිකරුවන් වන්නැයි ඉල්ලීමක්
ආසියාවේ ඩිජිටල් ධර්මදූතයන්ට ක්රිස්තුස් වහන්සේ වෙත මිනිසුන් යොමු කරන සාක්ෂිකරුවන් වන්නැයි ඉල්ලීමක්
අන්තර්ජාලය ඔස්සේ මිනිසුන්ට බලපෑම් කිරීම පමණක් නොව, ඔවුන් ක්රිස්තුස් වහන්සේ වෙත යොමු කිරීම ඩිජිටල් ධර්මදූතයන්ගේ කැඳවීම බව ගරු ෆෙල්මාර් ෆීල් SVD පියතුමා පැවසීය.
ආසියාවේ පළමු කතෝලික ඩිජිටල් ධර්මදූත සමුළුව පිලිපීනයේදී ආරම්භ වූ අවස්ථාවේ පැවැති පිළිගැනීමේ දිව්ය පූජාවේදී, ගරු ෆෙල්මාර් ෆීල් SVD පියතුමා මිනිසුන්ට මඟ පෙන්වීම සඳහා පිලිපීන ජනතාව අතර භාවිත වන සුවිශේෂී අභිනයක් වන තොල්වලින් දිශාව පෙන්වීමේ ක්රමය, ඩිජිටල් සන්නිවේදකයන්ගේ මෙහෙවර පැහැදිලි කිරීම සඳහා උපමාවක් ලෙස යොදා ගත්තේය.
“ඩිජිටල් ධර්මදූතයන් ලෙස අපගේ පළ කිරීම් තුළින්ද මිනිසුන්ට මඟ පෙන්වීමට අප කැඳවනු ලැබ සිටිනවා,” යැයි ඔහු පැවසුවේ සැප්තැම්බර් 10 වනදා ක්වෙසොන් නගරයේ රේඩියෝ වෙරිටාස් ආසියා (RVA) පරිශ්රයේ පිහිටි ත්රී සේන්ට්ස් දේවස්ථානයේදී පැවැති පිළිගැනීමේ දිව්ය පූජාවේදීය.
“බලපෑම්කරුවන්ගේ සිට සාක්ෂිකරුවන් දක්වා: ආසියාවේ ඩිජිටල් ධර්මදූත මෙහෙවර සඳහා සංගමනශීලී මාර්ගයක්” යන තේමාව යටතේ පැවැති මෙම සමුළුව සඳහා ආසියාවේ විවිධ රටවලින් කතෝලික ඩිජිටල් සන්නිවේදකයන් සහ ඩිජිටල් බලපෑම්කරුවන් 100කට අධික පිරිසක් එක්ව සිටියහ.
රේඩියෝ වෙරිටාස් ආසියා (RVA) හි මහා කළමනාකාර ගරු ෆෙල්මාර් ෆීල් SVD පියතුමා විසින් ප්රධානත්වය දැරූ මෙම දිව්ය පූජාවට, RVA වැඩසටහන් අධ්යක්ෂ සහ ආසියානු රදගුරු සමුළු සම්මේලනයේ (FABC) සමාජ සන්නිවේදන කාර්යාලයේ විධායක ලේකම් ගරු ජෝන් මි ෂෙන් පියතුමා සහ ඉන්දියානු කතෝලික රදගුරු සමුළුවේ සමාජ සන්නිවේදන කාර්යාලයේ විධායක ලේකම් ගරු සිරිල් වික්ටර් ජෝසෆ් පියතුමා ඇතුළු පූජකවරු සහභාගී වූහ.
සිය දේශනාවේදී ගරු ෆෙල්මාර් ෆීල් SVD පියතුමා, මෑතකදී ජකර්තා නුවර පැවැති ආසියානු රදගුරු සමුළු සම්මේලනයේ මහා සමුළුවේදී අවධානයට ලක් වූ “පාලම” සහ “පාලම් තනන්නන්” යන සංකල්ප ආසියාවේ සභාවේ මෙහෙවර සමඟ සම්බන්ධ කළේය.
භාෂාව, සංස්කෘතිය, ඉතිහාසය, දේශපාලන යථාර්ථයන්, ආගමික සම්ප්රදායන් සහ සභාවක් ලෙස අත්විඳින අත්දැකීම් ආදී බොහෝ කරුණු සම්බන්ධයෙන් ආසියාව විවිධත්වයෙන් පිරී පවතින බව ඔහු පෙන්වා දුන්නේය. එහෙත් එම වෙනස්කම් ක්රිස්තුස් වහන්සේ තුළ එක් ප්රජාවක් ලෙස එකට එක්වීමට බාධාවක් නොවන බවද ඔහු පැවසීය.
“අපි ක්රිස්තුස් වහන්සේට අයත්. අපි එකිනෙකාට අයත්. අපි සමස්ත මනුෂ්යත්වයට අයත්,” යැයි ගරු ෆීල් පියතුමා පැවසුවේ එම යථාර්ථය ඩිජිටල් ධර්මදූතයන්ගේ කැඳවීම සමඟ සම්බන්ධ කරමිනි.
සභාවට භෞතිකව ළඟා විය නොහැකි ස්ථාන වෙත ඩිජිටල් වේදිකා පාලම් බවට පත්විය හැකි බවද ඔහු පෙන්වා දුන්නේය. සමාජ මාධ්ය පළ කිරීමක්, සජීවී විකාශනයක් හෝ ඩිජිටල් කතාවක්, පුද්ගලයෙකුට සුභාරංචිය සහ ක්රිස්තුස් වහන්සේ හමුවීමට මඟ සලසන අවස්ථාවක් බවට පත්විය හැකි බව ඔහු පැවසීය.
“සමහරවිට ඔබගේ එක් පළ කිරීමක්, යම් පුද්ගලයෙකුට ක්රිස්තුස් වහන්සේ හමුවීමට ගමන් කරන පාලම බවට පත්විය හැකියි,” යැයි ඔහු පැවසීය.
ගරු ෆීල් පියතුමා ශුද්ධ වූ පාවුලු අපෝස්තුළුතුමාගේ කොරින්තිවරුන්ට ලියූ පළමු ලිපියේ සඳහන් පාඨ පිළිබඳවද අවධානය යොමු කළේය. මුල් ක්රිස්තියානි ප්රජාව මුහුණ දුන් සදාචාරය, සබඳතා, සංස්කෘතිය, ආගමික පිළිවෙත්, ආහාර සහ ධර්මදූත මෙහෙවර සම්බන්ධ ප්රායෝගික අභියෝග එම ලිපිය තුළින් සාකච්ඡා කෙරෙන බව ඔහු පෙන්වා දුන්නේය.
එම වෙනස්කම් සහ මතභේද මධ්යයේ වුවද, ශුද්ධ වූ පාවුලු අපෝස්තුළුතුමා ප්රජාව නැවත නැවතත් ඔවුන්ගේ මූලික අනන්යතාවය වෙත ගෙන ආ බව ඔහු පැවසීය. එනම් ක්රිස්තුස් වහන්සේටත් එකිනෙකාටත් අයත් වීම යන්නයි.
වර්තමාන ඩිජිටල් ධර්මදූත මෙහෙවර තුළද මෙම මූලධර්මය අත්යවශ්ය බව ගරු ෆීල් පියතුමා අවධාරණය කළේය. ඩිජිටල් සන්නිවේදකයන්ගේ මෙහෙවර මෙහෙයවිය යුත්තේ දැනුමෙන් හෝ අවධානය දිනා ගැනීමේ අරමුණින් පමණක් නොව, ප්රේමය සහ ක්රිස්තියානි අයත්භාවය පිළිබඳ ගැඹුරු හැඟීමකින් බව ඔහු පැවසීය.
තම දේශනය ආරම්භ කළ පිලිපීන අභිනය වෙත යළි පැමිණෙමින් ගරු ෆීල් පියතුමා ඩිජිටල් ධර්මදූතයන්ගෙන් වැදගත් ප්රශ්නයක් ඉදිරිපත් කළේය.
එනම්, ඔවුන්ගේ පළ කිරීම් මඟින් අනුගාමිකයන්, ග්රාහකයන් සහ නිහඬව ඔවුන්ගේ අන්තර්ගතය නරඹන පුද්ගලයන් යොමු වන්නේ කොතැනටද? යන්නයි.
“අපි පෙන්වා දෙන්නේ අප දෙසට පමණක් නම්, අපි බලපෑම්කරුවන් ලෙසම රැඳී සිටිනවා. නමුත් අපගේ ජීවිත, අපගේ කතා, අපගේ නිර්මාණශීලීත්වය සහ අපගේ ඩිජිටල් වේදිකා මිනිසුන් ජේසුස් වහන්සේ වෙත යොමු කරන්නේ නම්, එවිට අපි සාක්ෂිකරුවන් බවට පත්වෙනවා,” යැයි ගරු ෆීල් පියතුමා අවධාරණය කළේය.
විවිධ ආසියානු රටවල් නියෝජනය කරමින් පැමිණි සහභාගිවන්නන් සිය රටවලට ආවේණික සාම්ප්රදායික ඇඳුම්වලින් සැරසී මෙම ආරම්භක දිව්ය පූජාවට එක්වීම, සමුළුව නියෝජනය කළ සංස්කෘතික විවිධත්වය දෘශ්යමාන කළ සුවිශේෂී අවස්ථාවක් විය.
සහභාගිවන්නන් පිළිගනිමින් අදහස් දැක්වූ ගරු ජෝන් මි ෂෙන් පියතුමා පැවසුවේ, ආසියානු රදගුරු සමුළු සම්මේලනයේ සමාජ සන්නිවේදන කාර්යාලය සහ රේඩියෝ වෙරිටාස් ආසියා මෙම සමුළුව සඳහා සත්කාරකත්වය දැරීමට ලැබීම පිළිබඳව සතුටු වන බවයි.
ඩිජිටල් ධර්මදූතයන් ලෙස තමන්ට පැවරී ඇති කැඳවීම පිළිබඳව ගැඹුරින් මෙනෙහි කරන ලෙසද ඔහු නියෝජිතයන්ට ආරාධනා කළේය.
ශුද්ධෝත්තම හයවන පාවුලු පාප් වහන්සේ, ශුද්ධෝත්තම දෙවන ජුවාම් පාවුලු පාප් වහන්සේ සහ ශුද්ධ වූ තෙරේසා මව්තුමිය රේඩියෝ වෙරිටාස් ආසියා පරිශ්රයට පැමිණ ඇති බව සිහිපත් කළ ගරු මි ෂෙන් පියතුමා, ඔවුන් සිය ජීවිතය සහ සාක්ෂිය තුළින් මිනිසුන්ට බලපෑම් කළ ආකාරයද පෙන්වා දුන්නේය.
ඔවුන්ගේ ආදර්ශය අද ඩිජිටල් බලපෑම්කරුවන්ට අභියෝගයක් ඉදිරිපත් කරන බවත්, එනම් හුදෙක් බලපෑම් කිරීමෙන් ඔබ්බට ගොස් සුභාරංචියේ අව්යාජ සාක්ෂිකරුවන් බවට පත්වීම බවත් ඔහු අවධාරණය කළේය.
“බලපෑම්කරුවන්ගේ සිට සාක්ෂිකරුවන් දක්වා” යන තේමාව යටතේ පැවැති ආසියාවේ පළමු කතෝලික ඩිජිටල් ධර්මදූත සමුළුව සැප්තැම්බර් 13 වනදා ක්වෙසොන් නගරයේ RVA පරිශ්රයේදී අවසන් විය.
ආසියාවේ වඩාත් සංගමනශීලී සහ ධර්මදූතශීලී සභාවක් ගොඩනැගීම සඳහා ඩිජිටල් සන්නිවේදකයන්ට පැවරෙන කාර්යභාරය පිළිබඳව සමුළුවේදී අවධානය යොමු කෙරිණි.
#RVA #RadioVeritasAsia #RVASinhala #ACDMA2026 #DigitalMission #DigitalMissionaries #CatholicMedia #CatholicCommunicators #Asia #SynodalChurch #MissionaryChurch #InfluencersToWitness #Witnesses #Christ #DigitalEvangelization
