අන්තර්ගතයට වඩා අව්යාජ සාක්ෂිකරුවෙකු වීම වැදගත් – RVA වැඩසටහන් අධ්යක්ෂ
ආසියාවේ සභාව ඩිජිටල් අන්තර්ගතයන් වැඩි වැඩියෙන් නිර්මාණය කිරීමෙන් ඔබ්බට ගොස්, අර්ථවත් බවක්, සම්බන්ධතාවක් සහ විශ්වාසයක් සොයන ජනතාව වෙනුවෙන් අව්යාජ සහභාගීත්වයක් බවට පත්වීම කෙරෙහි අවධානය යොමු කළ යුතු බව ආසියානු රදගුරු සමුළු සම්මේලනයේ සමාජ සන්නිවේදන කාර්යාලයේ (FABC-OSC) විධායක ලේකම් සහ රේඩියෝ වෙරිටාස් ආසියා (RVA) වැඩසටහන් අධ්යක්ෂ ගරු ජෝන් මි ෂෙන් පියතුමා පවසයි.
2026 පළමු ආසියානු කතෝලික ඩිජිටල් මිෂනාරි සමුළුවට පෙර අදහස් දක්වමින් ගරු මි ෂෙන් පියතුමා පැවසුවේ, ඵලදායී ඩිජිටල් සුභාරංචි ප්රචාරය කළ යුත්තේ අන්තර්ජාලයට ඉදිරිපත් කළ යුතු පණිවිඩය තීරණය කිරීමෙන් නොව, ජනතාවට සවන් දීමෙන් සහ ඔවුන් සමඟ සහයෝගයෙන් ගමන් කිරීමෙන් ආරම්භ විය යුතු බවයි.
“‘අප සන්නිවේදනය කළ යුත්තේ කුමක්ද?’ යනුවෙන් විමසීමට පෙර, ‘ජනතාව අත්විඳින්නේ කුමක්ද? ඔවුන් සොයන්නේ කුමක්ද?’ යනුවෙන් අප විමසිය යුතුයි” යැයි එතුමා පැවසීය.
“බලපෑම්කරුවන්ගෙන් සාක්ෂිකරුවන් වෙත: ආසියාවේ ඩිජිටල් මෙහෙවර සඳහා සංගමනශීලී මාර්ගයක්” යන තේමාව යටතේ පැවැත්වෙන මෙම සමුළුව සැප්තැම්බර් 10 සිට 13 දක්වා පිලිපීනයේ රේඩියෝ වෙරිටාස් ආසියා මූලස්ථානයේදී පැවැත්වෙන අතර, ආසියාව පුරා සිටින කතෝලික ඩිජිටල් සන්නිවේදකයන් සහ ඩිජිටල් බලපෑම්කරුවන් ඊට එක්වෙති.
සවන් දීම, සහයෝගයෙන් ගමන් කිරීම සහ සාක්ෂි දැරීම
ඩිජිටල් මෙහෙවර සඳහා අත්යවශ්ය මූලික පියවර තුනක් ලෙස සවන් දීම, සහයෝගයෙන් ගමන් කිරීම සහ සාක්ෂි දැරීම හඳුනාගත හැකි බව ගරු මි ෂෙන් පියතුමා පැවසීය.
වීඩියෝවක්, පොඩ්කාස්ට් වැඩසටහනක්, බයිබල් මෙනෙහි කිරීමක් හෝ සමාජ මාධ්ය සටහනක් මගින් ජනතාව අතර හමුවීමකට මඟ විවෘත කළ හැකි නමුත්, එහි අරමුණ විය යුත්තේ අන්තර්ගතයන්, නැරඹීම් හෝ ප්රතිචාර සංඛ්යාව වැඩි කිරීම පමණක් නොව, සබඳතා ගොඩනැගීම බව එතුමා පෙන්වා දුන්නේය.
“සෑම තිරයක් පිටුපසම අර්ථයක් සහ සම්බන්ධතාවක් සොයන, ඇතැම් විට තමන්ට සවන් දෙන කෙනෙකු පමණක් සොයන පුද්ගලයෙක් සිටිනවා” යැයි එතුමා පැවසීය.
චීන භාෂාව කතා කරන ජන ප්රජාවන් වෙනුවෙන් RVA මැන්ඩරින් සේවය සහ බයිබල් අධ්යයන වැඩසටහන් ක්රියාත්මක කරන ආකාරය පිළිබඳ අත්දැකීම් උපුටා දක්වමින් ගරු මි ෂෙන් පියතුමා පැවසුවේ, ඩිජිටල් වේදිකා මගින් භූගෝලීය සහ සමාජීය බාධක ජය ගැනීමට හැකි වන බවයි.
එමගින් මීසම් ක්රියාකාරකම්වලට සහභාගී වීමට, පූජකවරුන් හමුවීමට හෝ මුහුණට මුහුණ බයිබල් අධ්යයනවලට එක්වීමට සීමිත අවස්ථා ඇති පුද්ගලයන්ට පවා එකිනෙකා සමඟ සම්බන්ධ වීමට හැකියාව ලැබෙන බව එතුමා පෙන්වා දුන්නේය.
අන්තර්ජාලය ඔස්සේ සිදු කරන බයිබල් අධ්යයනයක් හුදෙක් බයිබලීය තොරතුරු ලබාදීමකට පමණක් සීමා නොවී, සහභාගිවන්නන් එකට ශුද්ධ ලියවිල්ල කියවමින්, තම අත්දැකීම් බෙදා ගනිමින්, ප්රශ්න විමසමින් සහ එකිනෙකාට සහයෝගය ලබා දෙමින් සිදු කරන අත්දැකීමක් බවට පත් කළ හැකි බව ද එතුමා පැවසීය.
කෙසේ වෙතත්, ඩිජිටල් මෙහෙවර මුහුණට මුහුණ සිදු කරන එඬේර සේවාව වෙනුවට ආදේශකයක් නොවිය යුතු බවත්, එය එම එඬේර සේවාවට අනුපූරකයක් සහ පාලමක් විය යුතු බවත් ගරු මි ෂෙන් පියතුමා අවධාරණය කළේය.
“ඩිජිටල් මෙහෙවර සාම්ප්රදායික එඬේර සේවාව වෙනුවට ආදේශකයක් නොවෙයි. එය එයට අනුපූරකයක් සහ පාලමක්” යැයි එතුමා පැවසීය.
ආසියාවේ විවිධත්වය තුළ සන්නිවේදනය
ආසියාවේ පවතින සංස්කෘතික සහ ආගමික විවිධත්වය ද ඩිජිටල් මෙහෙවරේදී සංවේදීව සැලකිල්ලට ගත යුතු බව ගරු මි ෂෙන් පියතුමා පෙන්වා දුන්නේය.
විවිධ භාෂා සහ සුවිශේෂී සංස්කෘතික පසුබිම් සහිත මෙම මහාද්වීපයට එකම පණිවිඩය විවිධ භාෂාවලට පරිවර්තනය කිරීමෙන් පමණක් ඵලදායී ලෙස ආමන්ත්රණය කළ නොහැකි බව එතුමා පැවසීය.
“පරිවර්තනය වැදගත්. නමුත් සංස්කෘතික අන්තර්ගතකරණය, පරිවර්තනයට වඩා ගැඹුරු දෙයක්” යැයි ගරු මි ෂෙන් පියතුමා පැවසීය.
සංගමනය යනු එකාකාරී බවක් නොවන බවත්, ඒ වෙනුවට විවිධ ප්රජාවන්ට සවන් දීම සහ ඔවුන්ගේ අත්දැකීම්වලින් ඉගෙන ගැනීම අවශ්ය බවත් එතුමා පෙන්වා දුන්නේය.
ආසියාව පුරා ක්රියාත්මක වන RVA හි බහුභාෂා සේවාවන් මගින් ආසියාවේ අනෙකුත් සභාවන්හි හඬ සහ අත්දැකීම් සමඟ කතෝලිකයන්ට සම්බන්ධ වීමට අවස්ථාව සැලසෙන බව ද එතුමා සඳහන් කළේය.
බලපෑම්කරුවෙකුගෙන් සාක්ෂිකරුවෙකු වෙත
සමුළුවේ තේමාව පිළිබඳව අදහස් දක්වමින් ගරු මි ෂෙන් පියතුමා කතෝලික සන්නිවේදකයන්ගෙන් ඉල්ලා සිටියේ “බලපෑම” යන්නෙහි සැබෑ අර්ථය පිළිබඳව නැවත සිතා බලන ලෙසයි.
“සාමාන්යයෙන් බලපෑම්කරුවෙකු අසන්නේ, ‘මා අනුගමනය කරන කී දෙනෙක් සිටිනවාද?’ කියලයි. නමුත් සාක්ෂිකරුවෙකු අසන්නේ, ‘මා සේවය කරන්නේ කාටද? මා සාක්ෂි දරන්නේ කුමක් පිළිබඳවද?’ කියලයි” යැයි එතුමා පැවසීය.
අන්තර්ජාලය ඔස්සේ ගොඩනැගෙන විශ්වසනීයත්වය අවසානයේ රඳා පවතින්නේ පණිවිඩය පිටුපස ඇති ජීවිතය මත බව ද එතුමා අවධාරණය කළේය.
“අපගේ ඩිජිටල් පැවැත්ම සුන්දර වුවත්, අපගේ ජීවිතය සුභාරංචිය පිළිබිඹු නොකරන්නේ නම්, අවසානයේ අපගේ පණිවිඩයේ විශ්වසනීයත්වය නැති වී යනු ඇත” යැයි එතුමා පැවසීය.
“ක්රිස්තුන් වහන්සේ වෙනුවෙන් ප්රසිද්ධ වීමට පමණක් අප උත්සාහ නොකළ යුතුයි. අපගේ ජීවිත තුළින් ක්රිස්තුන් වහන්සේව ප්රසිද්ධ කිරීමට අප උත්සාහ කළ යුතුයි.”
ආසියාවේ සභාවන් අතර පාලමක් ලෙස FABC-OSC සහ RVA
ආසියාවේ සභාවන් එකිනෙකා සමඟ සම්බන්ධ කිරීමේදීත්, ප්රාදේශීය හඬ පුළුල් ප්රේක්ෂක පිරිසක් වෙත ගෙන යාමේදීත් FABC-OSC සහ RVA සතු වැදගත් භූමිකාව ද ගරු මි ෂෙන් පියතුමා අවධාරණය කළේය.
“වේදිකා පැමිණෙයි, අතුරුදන් වෙයි. නමුත් මෙහෙවර එලෙසම පවතිනවා. එනම්, ජනතාව ක්රිස්තුන් වහන්සේ වෙත සමීප කිරීම සහ සංගමනය ගොඩනැගීමයි” යැයි එතුමා පැවසීය.
2026 ආසියානු කතෝලික ඩිජිටල් මිෂනාරි සමුළුවේදී ඩිජිටල් අවකාශ සංගමනශීලීත්වය, හමුවීම සහ සුභාරංචි ප්රචාරය සඳහා භාවිත කළ හැකි ආකාරය පිළිබඳව සාකච්ඡා කිරීමට නියමිතය.
විශේෂයෙන්ම අනුගාමිකයන් සෙවීමෙන් සබඳතා ගොඩනැගීම වෙතත්, අන්තර්ගතයන් නිර්මාණය කිරීමෙන් අව්යාජ සාක්ෂිකරුවන් බවට පත්වීම වෙතත් ඩිජිටල් මෙහෙවර යොමු කිරීම කෙරෙහි මෙහිදී අවධානය යොමු කෙරේ.
#RVAProgramDirector #FrMiShen #FABCOSC #RadioVeritasAsia #AsianCatholicDigitalMissionaryAssembly #ACDMA2026 #AsianCatholicDigitalMissionaryAssembly2026 #RVAMandarinService
