ශුද්ධ වූ පවුලේ මංගල්‍යය දිනය අදයි.

පවුල් ජීවිත තුළ ඇතිවිය යුතු ප්‍රේමය සහ සාංඝිකත්වය ශු.සභාව ගොඩනැගීම සදහා අවශ්‍ය මූලිකම කාරණාව බව අවබෝධකරගත් "15 වන බෙනඩික් පාප් වහන්සේ" විසින් වර්ෂ 1921 දී මෙම ශු. පවුලේ මංගල්‍යය ප්‍රකාශයට පත්කරන ලද අතර එය සෑම වසරකම ක්‍රිස්තු උත්පත්ති මංගල්‍යයට පසුව එලඹෙන ඉරුදින සමරනු ලබයි.
"දෙවියන් වහන්සේගේ පවුල" වූ ශුද්ධ වූ සභාව (එපීස 2:19) අද දින" ශු.පවුලේ මංගල්‍ය මහත් හරසරින් සමරනු ලබන්නේය.ශුද්ධ වු පවුල "ත්‍රීත්වීක ප්‍රේමයේ සහ සාංඝීක භාවයේ" සංකේතයක් බදු වෙයි.
ශු. ජුසේ තුමන්ගෙන් ශු. පවුලට ලැබුණු රැකවරණය දෙවියන් වහන්සේගේ "දිව්‍ය සංරක්ෂණය" සංකේතවත් කරයි.
දේව මාතාවන් කැටුව බෙත්ලෙහෙමට පිටත්ව යාම (ලුක් 2:4-5), හෙරෝද් රජුගෙන් ජේසු බිලිදාණන් සහ මරිය තුමිය රැක ගැනීම සදහා මිසරයට පිටත්ව යාම (මතෙව් 2:13-14) හෙරෝද් රජුගේ මරණයෙන් පසුව නැවත ගලීලයට පැමිණීම. (මතෙව් 2:21-22) දොලොස් වයසේදී දේව මාලිගාවේදි ජේසු සමිදාණන් නැති වු විට සොයා යාම. (ලූක් 2:48) ජුසේ තුමන් ජේසු සමිදාණන් සහ මරියතුමිය රැකගැනීම සදහා උත්සුක වූ අවස්ථාවන් කිහිපයකි.එය ශු.ත්‍රීත්වය තුළ පියාණන් වහන්සේගේ ප්‍රේමයේ සහ සාංඝික බවේ සංකේතයකි.
ග්‍රාබියෙල් දේවදූතයා විසින් දේව මාතාවන් හට මංගලම් කී අවස්ථාවේදී" මේ මම ස්වාමින් වහන්සේගේ දාසිය වෙමි.ඔබ කී වචනය ලෙස මට ඉටු වේවා!" යයි පවසමින් තමාව හිස් කර ගත් දේව මාතාවන් (ලූක් 1:38) ශුද්ධාත්මයාණන් වහන්සේගෙන් පූර්ණ වූ වූවාය.(ලූක් 1:35) තවද එලිසබෙත් තුමිය බැහැදැකීමට ගිය අවස්ථාවේදී මරිය තුමියගේ ආචාර බස් හඩ ඇසු කල එලිසබෙත් තුමිය ශුද්ධාත්මයාණන් වහන්සේගෙන් පුර්ණ වීම තුළ මෙතුමිය ශුද්ධාත්මයාණන් වහන්සේ "ප්‍රදානය කිරීමේ ප්‍රිය කාන්තාව බවට පත් විය." (ලූක් 1: 41) සියලු කාරණාවන් "සිත් හී නිදන්" කර ගනිමින් (ලුක් 2:51)සිදු කල නිහඩ සේවය ශු.පවුල තුළ "ඇයගේ හික්මුණු ආත්මානුභාවය" (2 තිමෝති 1:7) සදහා කදිම නිදසුනකි. ශුද්ධාත්ම දීමනා වලින් පිරිපුන් වී සිටි ඇය තුළින් නිරන්තරයෙන්ම "ශුද්ධාත්ම ඵල" පිළිඹිබු විය(ගලාති 5:22-23). එතුමිය ශුද්ධාත්මයාණන් වහන්සේගෙන් පූර්ණ වී සිදු කළ නිහඩ සේවාව ජේසුස් වහන්සේගේ "ධර්මදූතික මෙහෙය" සදහා මහගු පිටුවහලක් විය.කුරුසියේ ගමනේ අවසානය දක්වාම ජේසුස් වහන්සේට එතුමිය එම සහයෝගය ලබා දුන්නාය. (ජොහන් 19:25) මරියතුමිය සැම විටම ශුද්ධ වු පවුල තුළ "ශුද්ධාත්මයාණන් වහන්සේගේ ප්‍රේමයේ සහ සාංඝික බවේ" සංකේතයක් විය.
ක්‍රිස්තුන් වහන්සේ දේව පුත්‍රයාණන් වුවද එතුමන් ශු. ජුසේ තුමන්ටත් මරිය තුමියටත් කීකරුව නාසරෙතේ විසීම (ලුක් 2:51), ජුසේ තුමන්ගේ ආදර්ශයේ යමින් වඩු කර්මාන්තය නිපුණ කිරීම (මාක් 6:3) ශු. පවුල තුළ පුත්‍රයාණන් වහන්සේගේ කීකරු කමේ සංකේතයක් විය.එම කීකරුකම ශු. ත්‍රීත්වය තුළ පුත්‍රයාණන් වහන්සේ විසින් පියාණන් වහන්සෙට දැක්වු ප්‍රේමයේ සහ සාංඝික බවේ සංකේතයක් ලෙසට පෙන්වා දිය හැකිය. ක්‍රිස්තුන් වහන්සේගේ බව්තිස්ම ස්නාපනයේදී "මේ මාගේ ප්‍රියාදර පුත්‍රයාණෝය. මොහු කෙරේ මා ප්‍රසන්නව සිටිමී." යනුවෙන් අහසින් හඩක් නික්මීම තුළ (මාක් 1:11) ජේසුස් වහන්සේ පියාණන් වහන්සේගේ "කීකරු පුත්‍රයාණන්" බව සනාථ වු අවස්ථාවකි. කුරුසියේ මරණය දක්වා පියාණන් වහන්සේ හට පුත්‍රයාණන් කීකරු වීම තූළ තව දුරටත් එය තහවුරු කරනු ලබයි.
එබැවින් ශුද්ධවු පවුල තුළ ජුසේ තුමන්, මරියතුමිය සහ ජේසුස් වහන්සේ ශු. ත්‍රීත්වීක ප්‍රේමයේ සහ සාංඝික භාවය සදහා කදිම නිදසුනකි.
එමෙන්ම "ශුද්ධ වූ සභාවද" ශු. ත්‍රීත්වයේ ප්‍රේමයේ සහ සාංඝිකත්වයේ සංකේතවත් වෙයි.
මන්ද ශු. සභාව යනු දෙවියන් වහන්සේ හෙවත් "පියාණන්" වහන්සේ විසින් තෝරාගත් ජනතාවකි.
එබැවින් ඔබ තවත් විදේශිකයෝ වත්, ආගන්තුකයෝ වත් නොව, ශුද්ධ වන්තයන් සමඟ සහකාර පුරවැසියෝ ද දෙවියන් වහන්සේගේ පවුලේ දූදරුවෝ ද වෙති. (එපීස 2:19)
ශු. සභාව ස්ථාපිත කරන ලද්දේ "පුත්‍රයාණන්" වහන්සේ වන ක්‍රිස්තුන් වහන්සේ විසිනි.
මම ඔබට කියමි: ඔබ පේදුරු ය. මේ පර්වතය පිට මාගේ සභාව ගොඩනඟන්නෙමි. පාතාලයේ දොරටුවලට වුව ද, එය පරාජය නොකළ හැකි ය. (මතෙව් 16:18)
ශුද්ධ වු සභාව "ශුද්ධාත්මයාණන්" වහන්සේ විසින් මෙහෙය වන සභාව වන "ශුද්ධාත්මීක ක්‍රිස්තු දේහයයි."
මනුෂ්‍ය ශරීරයෙහි බොහෝ අවයව තිබුණත් ඒ අවයව විවිධාකාර වුවත් ඒ සියල්ල එක ම ශරීරයක් වන්නාක් මෙන් ක්‍රිස්තුන් වහන්සේත් එක ම ශරීරයක් වන සේක. (1 කොරින්ති 12:12)
එබැවින් ශු. සභාවද ශු. පවුල මෙන්ම ශුද්ධ වූ ත්‍රීත්වීක ප්‍රේමයේ සහ සාංඝිකත්වයේ සංකේතයක් බව පෙන්වා දිය හැකිය. එම දෙවියන් වහන්සේගේ පවුල වූ ශු. සභාව (එපීස 2:19) පුත්‍රයාණන් වහන්සේගේ කරුණාව තුළත් දේව මාතාවන්ගේ සහ ශු. ජුසේ තුමන්ගේ යැදුම් පිහිට තුල දහසකුත් බාධක මැද ඉදිරියටම ගමන් කරනු ලබයි. අපද ශු. පවුල මෙන් අපගේ පවුල් තුළද ප්‍රේමය සහ සාංඝිකත්වය ගොඩ නගා ගනිමින් යහපත් පවුල් ජීවිතයක් ගත කිරීමට උත්සහ කල යුතුය.
ඒ මගින් ශු. සභාව තුළද නිරායාසයෙන්ම ප්‍රේමය සහ සාංඝිකත්වය ගොඩනැගේ. ඒ මගින් දේව රාජ්‍ය ගොඩනැගීම සදහා අපටද දායක විය හැකිය.

ශුද්ධ වූ පවුලෙනි, අප නිසා යාච්ඤා කළ මැනවි.

#FeastofHolyFamily #Prayforus
#HolyFamily #RVASinhala