පිහිටක් නැති සරණක් නැති
සතුටක් ඇති මුහුණක් නැති
මේ සසර දනව්වේ....
නිවන් දකින්නට පින් අත් වේවා අපෙ හාමුදුරුවනේ...
අපවත් වී වදාළ පූජ්යපාද රඹුකන ශ්රී සිද්ධාර්ථ ස්වාමින් වහන්සේ වෙනුවෙන් වෙරිටාස් සිංහල සේවයේ අපගේ සාතිශය සංවේගය !
දයාන් විතාරනගේ ෆේස්බූක් සටහන ඇසුරිනි.
බුදුදහමට මෙන්ම සිංහල සංගීත ක්ෂේත්රයට ඉමහත් සේවයක් කළ සම්මානනීය ගේය පද රචක, පූජ්යපාද රඹුකන ශ්රී සිද්ධාර්ථ ස්වාමින් වහන්සේ අපවත් වනවිට 76වැනි වියේ පසුවූහ.
මාතර දිස්ත්රික්කයේ මොරවක් කෝරළයට අයිති රඹුකන ගමෙහි අදින් දශක හතකට පෙර වෙසක් පුන් පොහෝ දිනක උපන් සෝබනහාමි ලියනගේ සහ ලියනගේ සයිමන් යුවළට දාව, සහෝදර සහෝදරියන් සය දෙනෙකුට වැඩිමහල්ව උපන් ආනන්ද ලියනගේ කුල කුමරුවන්, කුඩා කල සිටම බුදු දහමට සහ ශාසනයට තිබූ ලැදියාව මත 1963 ජූලි 22 වැලිව ගංගාතිලක විහාරස්ථානයේ දී "රඹුකන සිද්ධාර්ථ" යන නමින් පැවිදි බිමට අවතීර්ණ වූවේය. ගාල්ල හෙට්ටචල පිරිවනෙන් සහ පැපිලියාන සුනේත්රාදේවි පිරිවෙනින් අධ්යාපනය ලද එහිමියෝ අනතුරුව කැළණිය විශ්ව විද්යාලයෙන් බෞද්ධ දර්ශනය පිළිබඳ විශේෂ උපාධියක් ලබා 1972 වසරේ මහනුවර මල්වතු විහාර උපෝසථාගාරයේදී උපසම්පදා වූ සේක.
ශ්රී ජිනරතන කාර්මික විද්යාලයේ ඉංග්රීසි හා ජන සන්නිවේදන අධ්යන අංශය භාර ලේඛනාධිකාරි හිමියන් ලෙසින් කටයුතු කළ එහිමියෝ, සිය ධර්ම ප්රචාර කටයුත්ත සඳහා ගීතය මාධ්ය කොට ගනිමින් හෙළ ගී කලාවේ කහ එළිය සම්භාවනාවට පාත්ර වූ සේක. 1976 වසරේ ආචාර්ය දයාරත්න රණතුංගයන් වෙනුවෙන් ලියූ "කල්ප කාල ගත වන තුරු..............." ගීතය උන්වහන්සේ විසින් විරචිත පළමු ගුවන්විදුලි සරල ගීතයයි. රඹුකන හිමියන් 1986 සිය "සංසාරේ අපි" නම් පළමු ගී සංග්රහය ප්රකාශනයට පත් කරන ලද සේක. මෙරට අර්ථපූර්ණ සුභාවිත ගීතය වෙනුවෙන් රඹුක්කන හිමිපාණෝ කළ මෙහෙය අපමණය. උන්වහන්සේ ප්රබන්ධ කළ සුභාවිත ගීත අතර විශාරද ගුණදාස කපුගේ ගයන "සද්ධර්ම මකරන්ද පද රශ්මි ජාලා.........." සහ "පිහිටක් නැති සරණක් නැති.........", ආචාර්ය වික්ටර් රත්නායකයන් ගායනා කරන " බුදු හාමුදුරුවෝ අපිත් දකින්නැති........." සහ "කඳුළු පැන් කෙණ්ඩියේ...........", විශාරද මාලනී බුලත්සිංහල ගයන "හිමි සනරාමර........." සහ "සෙනෙහස පුදා............", විශාරද එඩ්වඩ් ජයකොඩි සමගින් විශාරද චරිතා ප්රියදර්ශනී පීරිස් ගයන "පන්සලේ පල්ලියේ............", විශාරද එඩ්වඩ් ජයකොඩි සමගින් විශාරද මාලනී බුලත්සිංහල ගයන "බුදු බණ කිව්වා...........", ටී. එම්. ජයරත්නයන් ගයන "සියක් ආයු ලැබ........." සහ "අව්වට වැස්සට හුරු මිනිසුන්නේ.........", අබේවර්ධන බාලසූරිය ගයන "මලක මෙලෙක සිතාගන්න බැරි අතකින්........", නිරංජලා සරෝජිනි ගයන "අනුරාධපුරේ අනුරාව නැගූ........" සහ "ගෙල වට බැන්දා වූ..........", කරුණාරත්න දිවුල්ගනේ ගයන "ළා දලු බෝපත්..........." සහ "වෙහෙරක් වගේ පින් දුන් කෙනෙක්.........", සීතා නානායක්කාර ගයන "මටත් හොරා මා හද සෙනෙහෙ වඩා........", විශාරද සමිතා එරන්දතී මුදුන්කොටුව ගයන "කොහේදෝ ඈතක සිට...........", අතුල අධිකාරි සහ සමිතා මුදුන්කොටුව ගයන "සඳ තරු මල් මට දන් දුන්...........", සෝමතිලක ජයමහ ගයන "බොහෝ දුකින්.........." මෙන්ම විශාරද එඩ්වඩ් ජයකොඩි ගයන "මේ ඉර හඳ යට...........", "මේ ප්රේම කතා නවතා මොහොතක්...........", "බණ කියන රටක්.........." සහ "නුඹට හිතැති නුඹ හිත නැති............" වැනි ගීත ජනතාවගේ හද සන්තානය මතම තැන්පත් වූ ගීතයන් ය.
මා විසින් ගායනා කළ "කහ ඉරි ඇඳලා........" නම් වූ ගීතය රචනා කළේ ද උන්වහන්සේ වන අතර නිරංජලා මංජරී, දිස්නා අතපත්තු සහ සිලිනි තුමාරා මට එම ගීතයේ ගායනයෙන් සහාය වෙති. බොහෝ විට ජීවිත යථාර්ථය තුළ අප අවබෝධ කරගත යුතු බෞද්ධ ඉගැන්වීම් රඹුකන හිමි දේශනා කරන්නට යෙදුණේ සුභාවිත ගීතය සම්ප්රේෂණ මාධ්යයක් කොටගමිනි.
ජපානය, කොරියාව සහ බුරුමය වැනි විදෙස් රටවල් ගණනාවක ධර්ම ප්රචාරණ කටයුතු සඳහා වැඩම කර ඇති හිමිපාණෝ "සඳකඩපහණ" චිත්රපටය වෙනුවෙන් ලියූ "පෙර සංසාරේ........" ගීතය සරසවිය සම්මානයෙන් ද, මෑතකදී තිරගත වූ චත්ර වීරමන්ගේ "අලෝකෝ උදපාදී" සඳහා විරචිත විශාරද සමන්ත පෙරේරා ගයන "සැඩ පහරක් සේ එකමුතු වූ දා......." ගීතය දෙරණ සිනමා සම්මානයෙන් ද පිදුම් ලැබිණි. වර්ෂ 1987 දී "සංසාරේ අපි" කැසට් පටය නිකුත් කරමින් ඇරඹෙන රඹුකන සිද්ධාර්ථ හිමිපාණන්ගේ ගීතාවලෝකනයේ "ගම්මානේ අපි", "සමනල කන්ද", "සංසාරේ ගී යාතිකා", "බුදු අමා වැස්ස" හා "සංසාර චාරිකා" යන කැසට් පට සහ සංයුක්ත තැටිත්, "සසර දනව්ව" වැනි සම්මානනීය ගේය පද සංග්රහත් විරාජමානය.
#VenRambukanaSiddharthaThero
#RVASinhala #VeritasSinhala #RadioVeritasAsia
