ශුද්ධ වූ දෙවන ජුවාම් පාවුළු පාප්තුමා

අද දින සුදුවර චරිතයෙන් ඔක්තොම්බර් 22වන දිනට මංගල්‍යය යෙදෙන ශුද්ධ වූ දෙවන ජුවාම් පාවුළු පාප්තුමා ගැන කතා කරමු.
කැරොල් ජුසෙෆ් වොජ්ටිලා නමින් 1920 මැයි 18 වන දින දකුණු පෝලන්තයේ වදොවිට්සා නම් නගරයේ උපත ලැබූ මොහුට වයස අවුරුදු 09 දී තම මව අහිමි වන අතර ඔහුගේ වැඩිමහල් සොහොයුරා වූ එඩ්මන්ඩ් වයස 12 දී අහිමි විය. යොවුන් වියෙහි සිට මළල ක්‍රිඩාවට සහ පිහිනීමට ප්‍රිය කළ ඔහු 1938 වසරේ දී ක්‍රාකෝව් හී යගියේලෝනියානු විශ්වවිද්‍යාලයට ඇතුළු වන අතර එහිදී ඔහු නාට්‍ය කලාව හා සාහිත්‍ය කාව්‍ය පිළිබඳ උනන්දුවක් දක්වනු ලැබීය.
පෝලන්තය අත් පත් කර ගැනිම සඳහා ජර්මනියේ නාසි හමුදාවගේ බලපෑම විශ්ව විද්‍යාලය වසා දමන්නට සිදුවිය. පූජකතුමකුගේ කැමැත්ත මත ක්‍රාකෝව් හී අගරදගුරු තුමාගේ මෙහෙයවීමෙන් ඔහුව රහසිගතව දෙව්සත්හලක අධ්‍යාපනය සඳහා යොමු කරන ලදී. දෙවන ලෝක සංග්‍රාමය අවසන් වීමෙන් පසු සිය දෙව්සත්හල් අධ්‍යාපනය නිම කළ ඔහු 1946 නොවැම්බර් 01 දින පූජකවරය ලබා ගත්තේය.
තම පූජකවරයෙක් පසුව වසර දෙකක කාලයක් රෝමයේ දේව ධර්ම ශාස්ත්‍රය පිළිබඳ ආචාර්ය උපාධිය අවසන් කළ එතුමන් 1948 දී නැවත පෝලන්තයට පැමිණ ක්‍රොකොව් හා ඒ අවට පිහිටි දේවස්ථාන කිහිපයක සේවය කළේය. කැරොල් ජුසෙෆ් පියතුමා 1958 සැප්තැම්බර් 28 වන දින ඔම්බි නම් පදවියේ රදගුරුතුමා ලෙස අභිසෙස් ලබන අතර ඉන් වසර හයකට පසු ක්‍රොකෝව් හී අගරදගුරුතුමන් ලෙස පත් විය. කතෝලික සභාව තුළ ශ්‍රේෂ්ඨ චින්තකයකු ලෙස සලකනු ලැබූ මෙතුමන් දෙවන වතිකානු මන්ත්‍රණ සභාවට ද සහභාගී විය. එහිදී වර්තමාන ලෝකය තුළ ශුද්ධ වූ සභාවේ ස්ථාවරත්වය පිළිබඳව විමසා බැලීමට එතුමන් දැක්වූ දායකත්වය ඉතා ප්‍රබල ය.
ශුද්ධවූ සභාව වෙත දැක්වූ දායකත්වය නිසාම 1967 ජුනි 26 වන දින අති උතුම් හයවන පාවුළු ශුද්ධෝත්තම හිමිපාණන් විසින් එතුමන් හට කාදිනල් ධූරය ප්‍රදානය කරන ලදී. අති උතුම් පළමුවන ජුවාම් පාවුලු ශුද්ධෝත්තම හිමිපාණන්ගේ ස්වර්ගස්ථ වීමෙන් පසුව 1978 ඔක්තෝබර් 16 වන දින දෙවන ජුවාම් පාවුලු නමින් මෙතුමන් පාප් ධූරයට පත් විය. වසර 456 කාලයකට පසු ඉතාලි ජාතිකයෙකු නොවන කෙනෙකු පාප් ධූරයට පත්වූයේ මෙතුමන් ය. ශුද්ධ වූ සභාවේ දෘශ්‍යමාන නායකයා ලෙස තම බැටළුවන් වෙත විශ්වාසයේ, ප්‍රේමයේ සහ සාමයේ පණිවිඩය රැගෙන රටවල් සියයකට ඔහු වඩා සංචාරය කිරීමට එතුමාට හැකි විය. ඒ අතර 1995 ජනවාරි 20 වන දින එතුමන් අප ශ්‍රී ලංකා මාතා පොළෝ තලයට සැපත්වීම අප ලද භාග්‍යයකි. එම අවස්ථාවේ දී එතුමන් කොළඹ ගාලු මුවදොර පිටියේ පවත්වන ලද දේව මෙහෙය දී වන්දනීය වූ ජුසේවාස් පියතුමන් භාග්‍යවරයට ඔසවන ලදී.
1981 මැයි 09 වන දින වතිකානුවේ සාන්ත පීතර චතුරශ්‍රයේ දී සතිපතා පවත්වනු ලබන පොදුජන හමුවේ දී විසිතුන් හැවිරිදි තුර්කි ජාතික මොහොමඩ් අලි අග්කා නම් තරුණයෙක් විසින් කරන ලද වෙඩි තැබීමෙන් ඉතා බරපතළ තුවාල ලැබූ එතුමන් ප්‍රාතිහාර්යාත්මක ලෙස සුවය ලබා පසුව සිර කුටියේ දී තමන් ඝාතනය කරන්නට උත්සාහ දැරූ අය හමුවී ඔහුට සමාව ලබා දුන්නේ ය.
මානව හිමිකම් වෙනුවෙන් මහත් හඬක් ලොව තුළ නැගූ මෙතුමන් ලෝකය තුළ පවතින දුක්වේදනා ගැන බොහෝ සෙයින් කතා කළේය. මරණීය දණ්ඩනයට එරෙහිව කතා කිරීම ඒ අතර විශේෂ කාරණාවක් විය. තරුණ හදවත් තුළ මෙතුමන් කෙරෙහි තිබුණේ බොහෝ ආදරණීය බැඳියාවකි. එම නිසාම එතුමන් ලෝක තරුණ දිනයේ නාම සාන්තුවරයා ලෙස ද හඳුන්වනු ලැබේ.
වසර 2001 සිට පාකින්සන් නම් රෝගය වැළඳුණු එතුමන් ශාරීරිකව දුර්වල වන්නට පටන් ගත්තේය. ස්වසන ආබාධයක් හේතුකොටගෙන 2005 පෙබරවාරි 01 දින රෝහල්ගත කළ එතුමන් තවදුරටත් ක්‍රම ක්‍රමයෙන් ශාරීරිකව දුර්වල වන්නට පටන් ගත් අතර 2005 අප්‍රේල් 02 වන දින සග ලොව දිනා ගත්තේය.
භාග්‍යවරයට එසවීම 2011 මැයි 01 වන දින අති උතුම් 16 වන බෙනඩික් ශුද්ධෝත්තම හිමිපාණන් විසින්.
ශුද්ධවන්තභාවයට එසවීම 2014 අප්‍රේල් 27 වන දින අති උතුම් 01 වන ෆ්‍රැන්සිස් ශුද්ධෝත්තම ශුද්ධෝත්තම හිමිපාණන් විසින්.

#StJohnPaulII #Prayforus
#Saintoftheday #RVASinhala

'RVASinhala' Facebook, Instagram, X Twitter, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!