අද දින සුදුවර චරිතයෙන් ජූලි 05 වන දිනට මංගල්‍යය යෙදෙන ශුද්ධ වූ අන්තෝනි මාරි සෙකරියා මුනිඳුන් ගැන කතා කරමු.
අන්තෝනි සෙකරායා උපත ලබන්නේ 1502 වසරේ ඉතාලියේ ක්‍රොමෝනො නගරයේ ලස්සරෝ සහ අන්තෝනියා යන යුවලට දාව ය. වයස අවුරුදු දෙකේදී ඔහුට තම පියා අහිමි විය. ඔහුගේ පවුල රදළ පෙළපතකින් පැවත එන අතර දුප්පතුන් කෙරෙහි අනුකම්පාව දැක්විය යුතු බව ඉගැන්වීමට ඔහුගේ මව විසින් කුඩා අන්තෝනි අසරණ වූවන්ට උපකාරයන් කිරීම සඳහා යොමු කරන ලදී.
එතුමන් පාවියා විශ්වවිද්‍යාලයේ දී දර්ශනවාදය හැදෑරූ අතර වෛද්‍ය විද්‍යාව පාදුවා විශ්ව විද්‍යාලයේ දී හදාරන ලදී. 1524 දී සරසවි අධ්‍යාපනය අවසන් කරන මෙතුමන් ක්‍රොමෝනා හිදී වෛද්‍යවරයෙකු ලෙස සේවය කළේය.
1527 දී පූජකවරය සඳහා පුහුණුව ආරම්භ කර 1529 පෙබරවාරි මාසයේ පූජකවරය සක්‍රමේන්තුව ලබා ගත්තේය. පූජක ජීවිතයේ ආරම්භයේ දී ම රෝහල්වල සහ දුප්පතුන් සඳහා වෙන්වූ ආයතන වල මෙතුමන් සේවය කළේය. ක්‍රිස්තු දූක්ප්‍රාප්තිය, දිව්‍ය පූජාව, පැවිදි ජීවිතයේ නවතාවයක් ඇති කිරීම කෙරෙහි මහත් වූ භක්තියක් ජනතාව අතර ප්‍රචලිත කිරීම සඳහා මහත් සේ කටයුතු කළේය.
1539 දී ඉතාලියේ ගුස්තල්ලා ප්‍රදේශයේ ධර්මදූත කාර්යයක නියැලී සිටින අතරතුර මෙතුමන් ට උණ රෝගය වැළඳිණි. එම රෝගී තත්ත්වය හේතුකොටගෙන 1539 ජූලි 05 දින එතුමන් වයස 36 දි සගලොව දිනුවේය.
භාග්‍යවරයට එසවීම 1890 ජනවාරි 03 අති උතුම් දහතුන්වන ලියෝ ශුද්ධෝත්තම හිමිපාණන් විසින්
ශුද්ධවරයට එසවීම 1897 මැයි 27 අති උතුම් දහතුන්වන ලියෝ ශුද්ධෝත්තම හිමිපාණන් විසින්
#StAnthonyMaryZaccaria #Prayforus
#Saintoftheday #RVASinhala
