ශුද්ධවූ ජෝන් යූඩ්ස් මුනිඳුන්

අද දින සුදුවර චරිතයෙන් අගෝස්තු 19වන දිනට මංගල්‍යය යෙදෙන ශුද්ධවූ ජෝන් යූඩ්ස් මුනිඳුන් ගැන කතා කරමු.

ජෝන් යූඩ්ස් 1601 නොවැම්බර් 14 වන දින ප්‍රංශයේ නොර්මැන්දි ප්‍රදේශයේ රී නැමැති ගම්මානයට යාබද ගොවිපලක අයිසැක් යූඩ්ස් (උපත 1566 දී) සහ මාර්තා කෝබින්ට දාව උපත ලැබීය. ඔහුට සහෝදරියන් සිව්දෙනෙකු සහ සහෝදරයන් දෙදෙනෙකු සිටියේය. ඔහුට සහෝදරියන් සිව්දෙනෙකු සහ සහෝදරයන් දෙදෙනෙකු සිටියේය. 1613 මැයි 26 වන පෙන්තකොස්ත දින ඔහු ප්‍රථම වතාවට දිව්‍ය සත්ප්‍රසාද වහන්සේ ලබා ගත් අතර වයස අවුරුදු 14 දී නිර්මල ජීවිතයක් ගත කිරීමට පෞද්ගලික පොරොන්දුවක් ගත්තේය.

1623 මාර්තු 25 වන දින ඔරතෝරියානු නිකායට ඇතුළත් වීමට තීරණය කිරීමට පෙර යූඩ්ස් කේන්හි ජේසු නිකාය යටතේ අධ්‍යාපනය ලැබීය. ඔහුගේ අධ්‍යාත්මික ජීවිතයේ ආදර්ශයන් බවට වූයේ ඔහුව නිකායට පිළිගත් පියරේ ඩි බෙරුල් සහ තාපස චාල්ස් ඩි කොන්ඩ්‍රන් ය.

1625 දෙසැම්බර් 20 වන දින එතුමන් පූජකවරය ලබන අතර තම කුළුඳුල් දිව්‍ය යාගය නත්තල් දින සැමරීය. පූජකවරය ලැබූ අවදියේ පටන් ඔහු 1626 වන තෙක් රෝගාතුරව සිටියේය. තම දේවධර්ම අධ්‍යයන කටයුතු අවසන් කරන එතුමන් 1631 දී ඇති වූ දරුණු වසංගත වලදී, තම රදගුරු පදවියේ පීඩාවට පත්වූවන් රැකබලා ගැනීමට ස්වේච්ඡාවෙන් ඉදිරිපත් විය. ඔහු මෙය කළේ ඔහුගේ ඔරතෝරියානු ජේෂ්ඨයන්ගේ අවසරයෙනි. මේ කාලය තුළ තම සගයන්ට මෙම වසංගත රෝගය ආසාදනය වීම වළක්වා ගැනීම සඳහා ඔහු ජීවත් වූයේ කුඹුරක් මැද විශාල කර බැරලයක් තුළ ය.

1633 දී එතුමන් ධර්මය දේශනා කිරීමේ දූත කාර්ය ආරම්භ කළ අතර, ප්‍රබල දේශකයෙකු හා පාපොච්චාරණය අසන්නකු බවට පත් විය. පූජකවරුන්ගේ අධ්‍යාත්මික දියුණුව ගැන ද ඔහු බෙහෙවින් සැලකිලිමත් වූ අතර වඩා යහපත් පුහුණුවක් සඳහා දෙව්සත්හල් කිහිපයක් ආරම්භ කර දිව්‍ය හෘදයට කැප කළේය.

ගණිකා වෘත්තියෙන් මිදෙන්නට උත්සාහ දරන කාන්තාවන් සඳහා නවාතැන් පහසුකම් ප්‍රමාණවත් නොවන බව දුටු එතුමන් 1641 දී සරණාගතයින්ගේ දයාවේ අප ස්වාමි දූගේ පැවිදි පංතිය ආරම්භ කළේය. පැවිදි සොහොයුරියන් තිදෙනෙක් කෙටි කාලයක් සඳහා ඔහුගේ ආධාරයට පැමිණි අතර 1644 දී කේන් හි නිවහනක් විවෘත කරන ලදී. 1666 ජනවාරි 02 දින අති උතුම් හත්වන ඇලෙක්සැන්ඩර් ශුද්ධෝත්තම හිමිපාණන් විසින් ශුද්ධාසනීය අවසරය මෙම පැවිදි පංතිය වෙත පිරිනමන ලදී.

ජේසු සමිදාණන්ගේ දිව්‍ය හෘදයට සහ දේව මාතාවන්ගේ නිර්මල හෘදයට එතුමන් තුළ වූයේ මහත් වූ භක්තියකි. 1680 අගෝස්තු 19 දින මෙතුමන් සග ලොව දිනා ගත්තේය. භාග්‍යවරයට එසවීම 1909 අප්‍රේල් 25 දින අති උතුම් දසවන පියුස් ශුද්ධෝත්තම හිමිපාණන් විසිනි. ශුද්ධවරභාවයට එසවීම 1925 මැයි 31 දින අති උතුම් එකොළොස් වන පියුස් ශුද්ධෝත්තම හිමිපාණන් විසිනි. මෙතුමන් ධර්මදූතවරුන්ගේ නාම සාන්තුවරයා ලෙස හඳුන්වනු ලැබේ.

#StJohnEudes #Prayforus
#Saintoftheday #RVASinhala

'RVASinhala' Facebook, Instagram, X Twitter, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!