FABC XII මහා සමුළුවෙන් ආසියාවේ සභාවට නව දිශානතියක්
ජකර්තා, ඉන්දුනීසියාව – ආසියානු රදගුරු සමුළු සම්මේලනයේ (FABC) 12 වැනි මහා සමුළුව ජූලි 26 දින ජකර්තාවේදී සාර්ථකව අවසන් වූයේ, සංගමනශීලීත්වය සභාවේ ජීවන රටාවක් ලෙස වැලඳගෙන, ආසියාව පුරා සහයෝගීතාව, සංවාදය සහ ධර්මදූත මෙහෙවර තවදුරටත් ශක්තිමත් කරන ලෙස කතෝලික සභාවට නව කැඳවීමක් කරමිනි.
2026 ජූලි 20 සිට 26 දක්වා පැවති මෙම සතියක මහා සමුළුව සඳහා ආසියාව පුරා සිටි කාදිනල්වරුන්, රදගුරුවරුන්, පූජකවරුන්, ආගමිකවරුන්, දේවධර්මවේදීන්, එඬේරික විශේෂඥයන් සහ ගිහි නියෝජිතයන් 120කට අධික පිරිසක් එක් වූහ.
මෙවර මහා සමුළුවේ තේමාව වූයේ,
"ඔබ මහත් දේ ඔබ දකින්නෙහි ය." (ජොහාන් 1:50) – සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර යන්නයි.
වසර හතරකට වරක් පැවැත්වෙන මෙම මහා සමුළුව, දුප්පත්කම, සංක්රමණය, ගැටුම්, භූදේශපාලනික අර්බුද, ඩිජිටල් පරිවර්තනය සහ අන්තර්ආගමික සබඳතාවල අභියෝග වැනි ආසියාවේ වෙනස් වන යථාර්ථයන් හමුවේ සභාවේ මෙහෙවර පිළිබඳ ගැඹුරු විචාර බුද්ධියක නිරත වූ සුවිශේෂී අවස්ථාවක් බවට පත්විය.
යාච්ඤාවෙන් හා ශුද්ධාත්මයාණන් තුළ සංවාදයෙන් ගොඩනැගුණු සමුළුවක්
යෝජනා සහ තීරණවලට පමණක් සීමා වූ සාම්ප්රදායික සමුළු ආකෘතියෙන් වෙනස්ව, ජකර්තා මහා සමුළුවේ කේන්ද්රස්ථානය වූයේ යාච්ඤාව, ආධ්යාත්මික මෙනෙහි කිරීම, ශුද්ධාත්මයාණන් තුළ සංවාද සහ වට මේස සාකච්ඡා ය.
ආසියාවේ විවිධ ප්රාදේශීය සභාවන්ගේ අත්දැකීම්වලට එකිනෙකා සවන් දෙමින්, ඒවා තුළින් ශුද්ධාත්මයාණන්ගේ මඟපෙන්වීම හඳුනා ගැනීමට නියෝජිතයන් දිරිමත් කරනු ලැබීය.
මහා සමුළුව පුරා නැවත නැවතත් අවධාරණය වූයේ, සංගමනශීලීත්වය යනු නව ව්යුහයන් හෝ වැඩසටහන් නිර්මාණය කිරීමක් නොව, සභාව සවන් දෙන ආකාරය, ජනතාව සමඟ ගමන් කරන ආකාරය සහ මෙහෙවර ඉටු කරන ආකාරය තුළ සිදුවිය යුතු ගැඹුරු පරිවර්තනයක් බවයි.
ක්රිස්තුස් වහන්සේ – සැබෑ පාලම
යාච්ඤා සහ ආධ්යාත්මික මෙනෙහි කිරීමේ දිනයේදී කාදිනල් ලුයිස් අන්තෝනියෝ තාග්ලේ හිමිපාණන් සිහිපත් කළේ, පාලම් තනන්නන් වීමේ කැඳවීම ආරම්භ වන්නේ දෙවියන් වහන්සේ සහ මනුෂ්යත්වය අතර සැබෑ පාලම වන ජේසුස් වහන්සේගෙන් බවයි.
එම මෙහෙවර සඳහා නිහතමානිකම, අවදානම් භාරගැනීම සහ කැපවීම අත්යවශ්ය බවද, බෙදීම් සහ ගැටුම්වලින් පිරුණු ලෝකයක එය වඩාත් වැදගත් බවද උන්වහන්සේ අවධාරණය කළහ.
මිත්රත්ව උමං මාර්ගය – සමුළුවේ ජීවමාන සංකේතය
මහා සමුළුවේ තේමාව ප්රායෝගිකව ජීවමාන වූ අවස්ථාවක් වූයේ, නියෝජිතයන් ජකර්තා ආසන දෙව්මැදුර සහ ඉස්තික්ලාල් මුස්ලිම් දේවස්ථානය සම්බන්ධ කරන මිත්රත්ව උමං මාර්ගය හරහා සිදු කළ සංකේතාත්මක ගමනයි.
අග්නිදිග ආසියාවේ විශාලතම මුස්ලිම් දේවස්ථානය සහ කතෝලික ආසන දෙව්මැදුර සම්බන්ධ කරන මෙම උමං මාර්ගය, ආගමික සංහිඳියාව, සංවාදය සහ සහයෝගීතාවයේ ජාත්යන්තර සංකේතයක් ලෙස මහා සමුළුවේ ප්රධාන පණිවිඩය ජීවමාන කළේය.
සංගමනශීලීත්වය සඳහා ප්රායෝගික මාර්ගෝපදේශයක්
මහා සමුළුවේ තවත් වැදගත් ප්රතිඵලයක් වූයේ, ආසියාව සඳහා සංගමනශීලීත්ව මාර්ගෝපදේශයක් (Vademecum) සකස් කිරීමේ මූලික රාමුව සම්පාදනය කිරීමයි.
මෙම මාර්ගෝපදේශය මඟින්, ආසියාවේ රදගුරු පදවි, දේවස්ථාන සහ සභා ප්රජාවන්ට සංගමනශීලීත්වය දෛනික සභා ජීවිතයට ප්රායෝගිකව එක්කර ගැනීමට උපකාරී වන එඬේරික මාර්ගෝපදේශයක් ලබාදීමට අපේක්ෂා කෙරේ.
එමෙන්ම සංගමනශීලී සභාවක් ගොඩනැගීමට රදගුරුවරුන්, පූජකවරුන්, ආගමිකවරුන් සහ ගිහි විශ්වාසිකයන්ගේ හවුල් වගකීම අත්යවශ්ය බවද නියෝජිතයන් අවධාරණය කළහ.
FABC ව්යවස්ථාවන් සංශෝධනය කරයි
මහා සමුළුවේ තවත් වැදගත් තීරණයක් වූයේ ආසියානු රදගුරු සමුළු සම්මේලනයේ ව්යවස්ථාවන් සංශෝධනය කිරීම ය.
නව සංශෝධන මඟින් සම්මේලනයේ පරිපාලන ව්යුහය තවදුරටත් ශක්තිමත් කිරීම, විවිධ කාර්යාලවල වගකීම් පැහැදිලි කිරීම සහ ආසියාවේ රදගුරු සමුළු අතර මෙන්ම විශ්ව සභාව සමඟද සහයෝගීතාව වැඩිදියුණු කිරීම අපේක්ෂා කෙරේ.
කෘත්රිම බුද්ධිය පිළිබඳ සභාවේ අවධානය
මහා සමුළුවේ අවසන් මාධ්ය හමුවේදී සභා නායකයන් කෘත්රිම බුද්ධිය (AI) පිළිබඳවද අවධානය යොමු කළහ.
ධර්මදූත සේවය, අධ්යාපනය, සෞඛ්ය සේවය සහ සන්නිවේදනය සඳහා AI මඟින් විශාල අවස්ථා උදා වුවද, එය මානව ගරුත්වයට සේවය කළ යුතු අතර, මිනිසාගේ හෘදය සාක්ෂිය, දයාව, යාච්ඤාව සහ පුද්ගලික සබඳතා කිසිවිටෙකත් ප්රතිස්ථාපනය නොකළ යුතු බව ඔවුහු අවධාරණය කළහ.
AI මඟින් නිර්මාණය වන වැරදි තොරතුරු සහ ජනමත හැසිරවීමේ අවදානම් පිළිබඳවද අනතුරු ඇඟවූ ඔවුහු, විශේෂයෙන්ම තරුණ පරපුර අතර මෙම තාක්ෂණය වගකීමෙන් යුතුව භාවිත කිරීමේ වැදගත්කම පෙන්වා දුන්හ.
බලාපොරොත්තුවේ සභාවක් ලෙස ඉදිරියට
අවසන් පණිවිඩය මඟින් ආසියානු රදගුරු සමුළු සම්මේලනය, බෙදීම් වැඩිවෙමින් පවතින ආසියානු සමාජයන් තුළ සංහිඳියාවේ, සංවාදයේ සහ සහයෝගීතාවයේ සාක්ෂිකරුවන් ලෙස එක්ව ගමන් කරන ලෙස සභාවට ආරාධනා කළේය.
බියෙන් හෝ හුදෙකලාවෙන් ප්රතිචාර නොදක්වා, ජනතාව අතර පාලම් තනන ක්රිස්තුස් වහන්සේගේ මෙහෙවර නව කැපවීමකින් ඉදිරියට ගෙන යන ලෙසද රදගුරුවරුන් ප්රාදේශීය සභාවන්ගෙන් ඉල්ලා සිටියහ.
ජකර්තාවෙන් නික්ම ගිය නියෝජිතයන් රැගෙන ගියේ ලේඛන සහ යෝජනා පමණක් නොව, සංගමනශීලීත්වය ජීවිතයේ යථාර්ථයක් බවට පත් කළ යුතුය යන පොදු විශ්වාසයද සමඟිනි.
ආසියානු රදගුරු සමුළු සම්මේලනයේ 12 වැනි මහා සමුළුව නැවත වරක් තහවුරු කළේ, ආසියාවේ සභාවේ අනාගත මෙහෙවර රඳා පවතින්නේ එක්ව ගමන් කිරීම, ගැඹුරින් සවන් දීම සහ වේගයෙන් වෙනස් වන ලෝකය තුළ දෙවියන් වහන්සේගේ ප්රේමයේ පාලම් බවට පත්වීම මත බවයි.
කර්තෘ ගැන
ගේබ්රියෙල් අබ්ඩි සුසන්තෝ ඉන්දුනීසියාවේ ප්රවීණ කතෝලික මාධ්යවේදියෙකි. ඔහු වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සේවය කරයි.
#FABC2026 #XIIFABCPlenary #FABC #Synodality #BridgeBuilders #ChurchInAsia #Mission #Dialogue #Communion #Vademecum #ArtificialIntelligence #RVASinhala #RadioVeritasAsia
