FABC මහා සමුළුව සංගමනශීලී සභාවක් සඳහා ආසියාවට එඬේරික මාර්ගෝපදේශයක් සකස් කරයි.
ජකාර්තා, ඉන්දුනීසියාව – ආසියානු රදගුරු සමුළු සම්මේලනයේ (FABC) 12 වැනි මහා සමුළුව තුළ දින කිහිපයක් පුරා සංගමනශීලී සභාව පිළිබඳ ගැඹුරු ආධ්යාත්මික හා දේවධර්මීය මෙනෙහි කිරීමෙන් අනතුරුව, සහභාගි වූ රදගුරුවරුන් හා නියෝජිතයන් ආසියාවේ ප්රාදේශීය සභාවන් සඳහා සංගමනශීලීත්වය පිළිබඳ ප්රායෝගික එඬේරික මාර්ගෝපදේශයක් (Vademecum for Synodality in Asia) සකස් කිරීමේ වැදගත් කාර්යය සාර්ථකව නිම කළහ.
මෙම මාර්ගෝපදේශය, සංගමනශීලී සභාව පිළිබඳ සභා සමුළුවේ (Synod on Synodality) දැක්ම ආසියාවේ ප්රාදේශීය සභාවන් තුළ ක්රියාත්මක කිරීම සඳහා ප්රායෝගික සහායක ග්රන්ථයක් ලෙස භාවිත කිරීමට නියමිතය.
දවසේ වැඩසටහන ආරම්භ කරමින්, බංග්ලාදේශයේ ඩකා අගරදගුරු අගරදගුරු බෙජෝයි එන්. ඩී'කෲස් OMI හිමිපාණන්, පෙර දින රදගුරු සංගමනශීලී සභාවේ මහලේකම් කාදිනල් මාරියෝ ග්රෙක් හිමිපාණන් සහ ගරු කොස්තා පියතුමා (SJ) ඉදිරිපත් කළ මෙනෙහි කිරීම් සිහිපත් කරමින් අවධාරණය කළේ, සංගමනශීලී සභාවක් ගොඩනැගීමේ මූලික පියවර වන්නේ පෞද්ගලික සිත් හැරීම බවයි.
"සංගමනශීලී සභාවක් ගොඩනඟමින් පාලම් තනන්නන් වීමට නම්, අපගේම සිත් හැරීම අත්යවශ්යයි," යැයි අගරදගුරු බෙජෝයි හිමිපාණන් පැවසූහ.
කාදිනල් ග්රෙක් හිමිපාණන්ගේ අදහස් උපුටා දක්වමින් උන්වහන්සේ වැඩිදුරටත් සඳහන් කළේ, සංගමනශීලීත්වය යනු ව්යුහයන් හෝ ක්රියාපටිපාටි පමණක් නොව, සභාවේ දෛනික ජීවිතය තුළ එකමුතුකම සහ සහභාගිත්වය ජීවමාන කිරීම බවයි.
"දෙවියන් වහන්සේ ප්රේමය නම්, එකමුතුකම සහ සමගියද ශුද්ධාත්මයාණන්ගේ ක්රියාකාරිත්වය බව අපට පැවසිය හැකිය."
මෙම මහා සමුළුවේ සංවිධායකයන් පැවසුවේ, ආසියාවේ සභාවන්ට ශුද්ධාත්මයාණන් වහන්සේ පවසන දේට සවන් දෙමින්, එය ලේඛන දෙකක් බවට පත් කිරීම මෙම වැඩසටහනේ අරමුණ වූ බවයි. ඉන් එකක් ආසියාවේ දෙවියන් වහන්සේගේ ජනතාව වෙත නිකුත් කරන අවසන් පණිවිඩය වන අතර, අනෙක ප්රාදේශීය සභාවන් වඩාත් සංගමනශීලී, ධර්මදූත හා දයාවන්ත සභාවන් බවට පත් වීමට උපකාරී වන ප්රායෝගික Vademecum මාර්ගෝපදේශයයි.
මෙම ලේඛනය සකස් කිරීම එම්මාවුස් අත්දැකීම ආදර්ශයට ගනිමින් ආරම්භ විය. නැවත නැඟිටුණු ක්රිස්තුස් වහන්සේ තමන් සමඟ ගමන් කළ බව එම්මාවුස් ගෝලයන් පසුව මෙනෙහි කිරීමෙන් හඳුනාගත් ආකාරයටම, සහභාගිවූවන්ටද තම අත්දැකීම් යාච්ඤාත්මකව මෙනෙහි කිරීමට ආරාධනා කෙරිණි.
ආචාර්ය ක්රිස්ටිනා කෙන්ග්, සංගමනශීලී සංවාද ක්රියාවලිය මෙහෙයවමින්, පළමුව නිශ්ශබ්ද පෞද්ගලික මෙනෙහි කිරීම සඳහා කාලය වෙන් කළ අතර, අනතුරුව කුඩා කණ්ඩායම් තුළ තමන් ලැබූ වැදගත් අවබෝධයන් හුවමාරු කර ගැනීමට නියෝජිතයන්ට ආරාධනා කළාය.
මෙවර සංවාද පෙර සැසිවල මෙන් ප්රාදේශීය සභාවන්ගේ අත්දැකීම් හුවමාරු කිරීමකට පමණක් සීමා නොවීය. ඒ වෙනුවට, ආසියාව පුරා සභාවන්ට භාවිත කළ හැකි ප්රායෝගික එඬේර මාර්ගෝපදේශයක් සකස් කිරීමේ පොදු වගකීම කෙරෙහි සියලු දෙනාගේ අවධානය යොමු විය.
සෑම කණ්ඩායමකටම එක් ප්රධාන ප්රශ්නයක් ඉදිරිපත් කෙරිණි.
"සෑම ප්රාදේශීය සභාවක්ම වඩාත් ගැඹුරු සංගමනශීලී පරිවර්තනයක් අත්විඳීමටත්, 'ඊටත් වඩා මහත් දේවල්' දකිමින් ධර්මදූත සභාවක් ලෙස වර්ධනය වීමටත් මෙම Vademecum මාර්ගෝපදේශයට ඇතුළත් විය යුතු ප්රධාන තේමා, ප්රමුඛතා සහ ප්රායෝගික මඟපෙන්වීම් මොනවාද?"
සහභාගිවූවන්ට ආරාධනා කරනු ලැබුවේ, ආසියාවේ සියලුම රදගුරුවරුන්ට ප්රයෝජනවත් වන එඬේර අත්පොතක් සකස් කරන බව සිතා කටයුතු කරන ලෙසයි. සෑම ප්රාදේශීය සභාවකටම තමන්ගේම යථාර්ථයන් අනුව සංගමනශීලී සභාව පිළිබඳ සභා සමුළුවේ අවසන් ලේඛනය ක්රියාත්මක කළ හැකි ප්රායෝගික මඟපෙන්වීම් හඳුනාගැනීම මෙහි අරමුණ විය.
වාචික ඉදිරිපත් කිරීම් වෙනුවට සෑම කණ්ඩායමක්ම තම නිර්දේශ ලිඛිතව භාර දුන් අතර, එම යෝජනා මෙම Vademecum ලේඛනයේ පළමු කෙටුම්පත සඳහා පදනම විය.
එමෙන්ම, FABC ව්යවස්ථා සංශෝධන, කලාපීය රදගුරු සාකච්ඡා සහ ආසියාවේ දෙවියන් වහන්සේගේ ජනතාව වෙත නිකුත් කරන අවසන් පණිවිඩය සකස් කිරීම ද එදිනේ වැඩසටහනේ වැදගත් අංගයන් විය. අනතුරුව ශුද්ධෝත්තම පියතුමාගේ විශේෂ පණිවිඩයද නියෝජිතයන් වෙත ඉදිරිපත් කෙරිණි.
යාච්ඤාවෙන්, නිශ්ශබ්දතාවයෙන්, පෞද්ගලික මෙනෙහි කිරීමෙන් සහ සමුහ විචාරණයෙන් මෙම ලේඛන සකස් කිරීම ආරම්භ කිරීම තුළින්, ආසියානු රදගුරු සමුළු සම්මේලනයේ 12 වැනි මහා සමුළුව අවධාරණය කළේ සංගමනශීලීත්වය යනු ලේඛන නිෂ්පාදනය කිරීම පමණක් නොව, ශුද්ධාත්මයාණන් වහන්සේට එකට සවන් දී, එම විචාරණය සභාවේ දෛනික ජීවිතයට හා මෙහෙවරට පරිවර්තනය කිරීම බවයි.
කතුවරිය පිළිබඳව
අමාදේයා ප්රනාස්තිති සමාජ සන්නිවේදන ක්ෂේත්රයේ ක්රියාකාරිනියක් වන අතර, වර්තමානයේ ඉන්දුනීසියානු රදගුරු සමුළුවේ ලේඛන හා තොරතුරු දෙපාර්තමේන්තුවේ නිදහස් දායක ලේඛිකාවක් ලෙස කටයුතු කරයි.
#FABCXII #FABC2026 #SynodalChurch #Synodality #BridgeBuilders #ChurchInAsia #FABC #Vademecum #RadioVeritasAsia #RVA #RVASinhala
