සංගමනශීලීත්වය සභාව ක්‍රිස්තුස් වහන්සේ වෙතත් ප්‍රායෝගික ක්‍රියාමාර්ග වෙතත් ගෙන යා යුතුයි – කාදිනල් ෆිලිප් නෙරි ෆෙරාඕ හිමිපාණන්

සංගමනශීලීත්වය සභාව ක්‍රිස්තුස් වහන්සේ වෙතත් ප්‍රායෝගික ක්‍රියාමාර්ග වෙතත් ගෙන යා යුතුයි – කාදිනල් ෆිලිප් නෙරි ෆෙරාඕ හිමිපාණන්

ජකාර්තා, ඉන්දුනීසියාව – සංගමනශීලීත්වය යනු ලේඛන, ව්‍යුහයන් හෝ එඬේරික වැඩසටහන් පමණක් නොව, සභාව ජේසුස් ක්‍රිස්තුස් වහන්සේ වෙත වඩාත් සමීප කරමින් ප්‍රායෝගික ක්‍රියාමාර්ග තුළින් ඵල දරන ගමනක් විය යුතු බව ආසියානු රදගුරු සමුළු සම්මේලනයේ (FABC) සභාපති කාදිනල් ෆිලිප් නෙරි ෆෙරාඕ හිමිපාණන් අවධාරණය කළහ.

ආසියානු රදගුරු සමුළු සම්මේලනයේ 12 වන මහා සමුළුවේ අවසන් දිව්‍ය පූජාවේ දේශනය පවත්වමින්, ජූලි 26 වන දින ජකාර්තා නුවර අප ස්වාමිදූගේ ස්වර්ගාරෝහණ ආසන දෙව්මැදුරේදී, කාදිනල් හිමිපාණන් රදගුරුවරුන්, පූජකවරුන්, පැවිදිවරුන් සහ ගිහි විශ්වාසිකයන්ගෙන් ඉල්ලා සිටියේ, සතියක් පුරා පැවති යාච්ඤාව, විචාරණය සහ සංවාදය ආසියාව පුරා නව ධර්මදූත කැපවීමක් බවට පරිවර්තනය කරන ලෙසයි.

ක්‍රිස්තුස් වහන්සේ – සංගමනශීලී ගමනේ සැබෑ මධ්‍යස්ථානය

මහා වටිනා මුතු ඇටය සහ මාළු දැල පිළිබඳ සුභාරංචි උපමා දෙක මෙනෙහි කරමින් කාදිනල් ෆිලිප් නෙරි ෆෙරාඕ හිමිපාණන් පැවසුවේ, සංගමනශීලී ගමනේ සැබෑ අර්ථය සම්පූර්ණ වන්නේ එය මිනිසුන් ක්‍රිස්තුස් වහන්සේ සමඟ හමුවකට ගෙන යන විට පමණක් බවයි.

"සංගමනශීලීත්වය මුතු ඇටය නොවේ. ව්‍යුහයන් මුතු ඇටය නොවේ. වැඩසටහන්, ලේඛන සහ එඬේරික උපායමාර්ගද මුතු ඇටය නොවේ. ඒවායේ වටිනාකම ඇත්තේ ඒවා අපව ක්‍රිස්තුස් වහන්සේ වෙත ගෙන යන විටත්, උන්වහන්සේව අනෙකුත් අය වෙත ගෙන යාමට උපකාර කරන විටත් පමණයි," යැයි උන්වහන්සේ පැවසූහ.

වටිනා මුතු ඇටය සොයන වෙළෙන්දාගේ උපමාව සභාව දෙවියන් වහන්සේගේ කැමැත්ත අඛණ්ඩව සොයන ගමන සංකේතවත් කරන බව පැවසූ කාදිනල් හිමිපාණන්, එම සෙවීමේ අවසාන සම්පූර්ණත්වය වන්නේ පියාණන් වහන්සේගේ කරුණාවේ මුහුණත වන ජේසුස් ක්‍රිස්තුස් වහන්සේ තුළ බව අවධාරණය කළහ.

සවන් දෙන සභාවක් වීමේ කැඳවීම

පළමු කියවීමේ සලමොන් රජු දෙවියන් වහන්සේගෙන් විචාරශීලී හදවතක් ඉල්ලා සිටීම මෙනෙහි කරමින් කාදිනල් හිමිපාණන් පැවසුවේ, අද ආසියාවේ සභාවද එම යාච්ඤාවම කළ යුතු බවයි.

"ස්වාමීනි, සවන් දීමට කැමති හදවත් අපට ලබා දුන මැනව. සංගමනශීලී සභාවක් යනු පළමුවෙන්ම සවන් දෙන සභාවකි," යැයි උන්වහන්සේ පැවසූහ.

සවන්දීම ශුද්ධ ලියවිල්ලට පමණක් සීමා නොවිය යුතු බවත්, බොහෝ විට නොසලකා හරින ලද ජනතාවගේ හඬටද සවන් දිය යුතු බවත් උන්වහන්සේ අවධාරණය කළහ.

විශේෂයෙන් දුප්පතුන්, තරුණයන්, සංක්‍රමණිකයන් සහ සමාජයේ අන්තයට තල්ලු වූ ජනතාවගේ අත්දැකීම් සභාවේ විචාරණයට ඇතුළත් විය යුතු බවද සඳහන් කළහ.

සභා නායකයන් හඳුනාගත යුත්තේ පරිපාලන හැකියාවන් මත පමණක් නොව, සවන් දීමට, එකට විචාරණය කිරීමට සහ එකමුතුකමේ ආත්මයෙන් නායකත්වය දීමට ඇති හැකියාව මත බව කාදිනල් හිමිපාණන් පැවසූහ.

පරම්පරා අතර සම්බන්ධතාවයේ වැදගත්කම

එදිනට යෙදී තිබූ ලෝක ආච්චිලා සීයලා සහ වැඩිහිටියන්ගේ දිනය පිළිබඳවද කාදිනල් හිමිපාණන් මෙනෙහි කළහ.

සාන්ත ජෝකිම් සහ සාන්ත ආනා මුනිවරුන්ගේ මංගල්‍යය සමඟ යෙදුණු මෙම දිනයේදී වැඩිහිටියන් සභාවේ "ජීවමාන නිධානයන්" ලෙස විස්තර කළ උන්වහන්සේ, ඔවුන් කිතුනු ප්‍රජාවන් පෝෂණය කරන ප්‍රඥාව, විශ්වාසය සහ කැපවීම රැගෙන යන බව පැවසූහ.

එමෙන්ම වැඩිහිටියන්ගේ අත්දැකීම් සහ තරුණයන්ගේ නිර්මාණශීලීත්වය හා බලාපොරොත්තුව එකට එක් කිරීම සභාවේ අනාගතයට අත්‍යවශ්‍ය බවද උන්වහන්සේ අවධාරණය කළහ.

සංවාදයෙන් පරිවර්තනයට

අවසන් දේශනයේදී කාදිනල් ෆිලිප් නෙරි ෆෙරාඕ හිමිපාණන් නියෝජිතයන්ගෙන් ඉල්ලා සිටියේ, මහා සමුළුවේ ඵල තම ප්‍රාදේශීය සභාවන් වෙත රැගෙන යන ලෙසයි.

මාළු දැලට සියලු වර්ගයේ මසුන් එකතු වීමේ සුභාරංචි රූපකය භාවිත කරමින් උන්වහන්සේ පැවසුවේ, ආසියාවේ සංස්කෘතික, භාෂාමය සහ ආගමික විවිධත්වය වැළඳගනිමින් ක්‍රිස්තුස් වහන්සේ තුළ එකමුතුව ගොඩනැගීමට සභාව කැඳවනු ලබන බවයි.

සැබෑ එකමුතුකම සඳහා අඛණ්ඩ ආධ්‍යාත්මික විචාරණයක් අවශ්‍ය බවත්, සෑම එඬේරික තීරණයක්ම එකමුතුකම, සහභාගිත්වය, මෙහෙවර, මානව ගරුත්වය, සාමය සහ අවශ්‍යතා ඇති අය වෙනුවෙන් සැලකිල්ල ප්‍රවර්ධනය කරන්නේද යන්න විමසිය යුතු බවත් උන්වහන්සේ පැවසූහ.

"අද අප මෙම මහා සමුළුවෙන් පිටත්වන්නේ සංවාදයෙන් පරිවර්තනය වෙතත්, ලේඛනවලින් තීරණ වෙතත්, දැක්මෙන් ක්‍රියාත්මක කිරීම වෙතත් ගමන් කිරීමටයි," යැයි කාදිනල් හිමිපාණන් පැවසූහ.

දිව්‍ය පූජාවෙන් පසු ජකාර්තාහි මිත්‍රත්ව උමඟ හරහා ඉස්තික්ලාල් මුස්ලිම් පල්ලිය වෙත කළ වන්දනා ගමන පිළිබඳව සඳහන් කරමින් උන්වහන්සේ පැවසුවේ, එය මහා සමුළුව පුරා පැවති පාලම් ගොඩනැගීමේ මෙහෙවර සංකේතවත් කළ බවයි.

සභාව පාලම් පිළිබඳව කතා කිරීම පමණක් නොව, හමුවීමේ සහ සංවාදයේ මාර්ගයේ ගමන් කළ යුතු බවද උන්වහන්සේ අවධාරණය කළහ.

ආසියානු රදගුරු සමුළු සම්මේලනයේ 12 වන මහා සමුළුව අවසන් කරමින් කාදිනල් ෆිලිප් නෙරි ෆෙරාඕ හිමිපාණන් නියෝජිතයන්ගෙන් ඉල්ලා සිටියේ, සෑම එඬේරික ක්‍රියාවකම මධ්‍යයේ ක්‍රිස්තුස් වහන්සේ තබමින්, සවන්දීම, සේවය සහ ප්‍රායෝගික සාක්ෂිය තුළින් සංගමනශීලීත්වය ජීවමාන යථාර්ථයක් බවට පත් කරන ලෙසයි.

කතුවරයා පිළිබඳව
අමේඩා ප්‍රනාස්තිති ඉන්දුනීසියාවේ සමාජ සන්නිවේදන ක්‍රියාකාරිනියක වන අතර, වර්තමානයේ ඉන්දුනීසියානු රදගුරු සමුළුවේ ලේඛන හා තොරතුරු අංශයට නිදහස් දායකවරියක ලෙස සේවය කරයි.

#FABCXII #FABC2026 #FABCPlenary #CardinalFilipeNeriFerrao #SynodalChurch #සංගමනශීලීසභාව #SynodalConversion #ChurchInAsia #BridgeBuilders #BuildingBridges #MissionInAsia #CatholicChurchAsia #ListeningChurch #Communion #Evangelization #RVASinhala #RadioVeritasAsia #RVAAsia