විශ්ව සභාව සාරවත් වන්නේ ප්රාදේශීය සභාවන්ගේ සුවිශේෂී දීමනාවලින්ය. - කාදිනල් මාරියෝ ග්රෙක් හිමිපාණන් පවසයි.
විශ්ව සභාව සාරවත් වන්නේ ප්රාදේශීය සභාවන්ගේ සුවිශේෂී දීමනාවලින්ය. - කාදිනල් මාරියෝ ග්රෙක් හිමිපාණන් පවසයි.
ජකාර්තා, ඉන්දුනීසියාව – සෑම ප්රාදේශීය සභාවකටම විශ්ව සභාවට අත්යවශ්ය වූ සුවිශේෂී දීමනාවක් ඇති අතර, එය කිසිසේත් අහිමි කර නොගත යුතු බව සංගමනශීලීත්වය පිළිබඳ රදගුරු සම්මේලනයේ මහලේකම් කාදිනල් මාරියෝ ග්රෙක් හිමිපාණන් පැවසූහ.
ජූලි 24 වන දින ජකාර්තාවේ හෝටල් මුලියාහි වන්ඩා ශාලාවේ පැවති ආසියානු රදගුරු සමුළු සම්මේලනයේ (FABC) 12 වන මහා සමුළුව අමතමින්, "සංගමනශීලීත්වය පිළිබඳ සම්මේලනය ක්රියාත්මක කිරීමේ මාර්ග" යන මාතෘකාව යටතේ අදහස් දැක්වූ කාදිනල් ග්රෙක් හිමිපාණන්, සංගමනශීලීත්වය පිළිබඳ සම්මේලනය ක්රියාත්මක කිරීම පරිපාලනමය ව්යායාමයක් ලෙස නොව, ප්රාදේශීය සභාවන් එකිනෙකා සාරවත් කරගන්නා "දීමනා හුවමාරුවක්" ලෙස දැකිය යුතු බව අවධාරණය කළහ.
"සියලු දීමනා හිමි එකම සභාවක් නැත. එසේම, අන් අයට ලබාදීමට කිසිදු දීමනාවක් නොමැති සභාවක්ද නැත."
කාදිනල් ග්රෙක් හිමිපාණන්ට අනුව, මෙම අවබෝධය සංගමනශීලී ගමනේ හරයයි. සෑම රදගුරු පදවියක්ම එකම එඬේර ක්රියාමාර්ග අනුගමනය කළ යුතු යැයි අපේක්ෂා කරනවා වෙනුවට, ශුද්ධාත්මයාණන් සෑම ප්රාදේශීය සභාවකටම පිරිනමා ඇති සුවිශේෂී වරප්රසාද, ධර්මදූත අත්දැකීම්, සංස්කෘතික සම්ප්රදායන් සහ ආධ්යාත්මික ප්රඥාව හඳුනාගෙන එකිනෙකා සමඟ බෙදාගැනීමට සභාව කැඳවනු ලබන බව උන්වහන්සේ පැවසූහ.
සංගමනශීලීත්වය පිළිබඳ සම්මේලනයේ සාර්ථකත්වය නව වාර්තා, එඬේර සැලසුම් හෝ ලේඛන ගණනින් මැනීමෙන් වැළකිය යුතු බවද කාදිනල් ග්රෙක් හිමිපාණන් අවධාරණය කළහ.
"අපගේ අරමුණ තවත් ලේඛනයක් සකස් කිරීම නොවේ. ක්රියාත්මක කිරීමේ අදියරේ ප්රධාන ඉලක්කය වන්නේ සභාවන් අතර සැබෑ දීමනා හුවමාරුවක් වර්ධනය කිරීමයි."
සංගමනශීලීත්වය පිළිබඳ සම්මේලනයේ අවසන් ලේඛනය ප්රකාශයට පත් කිරීමෙන් එම ක්රියාවලිය අවසන් නොවූ බවත්, එය නව ගමනක ආරම්භයක් පමණක් බවත් උන්වහන්සේ පැහැදිලි කළහ. දැන් එහි වගකීම ඇත්තේ ප්රාදේශීය සභාවන් සහ රදගුරු පදවි වෙත වන අතර, සංගමනශීලීත්වයේ දැක්ම තම තමන්ගේ එඬේර යථාර්ථයන් තුළ ක්රියාත්මක කරන්නේ කෙසේදැයි විමසා බැලීමට ඔවුන් කැඳවා ඇති බවද පැවසූහ.
මෙම ක්රියාවලිය මූලික වශයෙන් පරිපාලනමය නොව, ආධ්යාත්මික එකක් බවද කාදිනල් ග්රෙක් හිමිපාණන් අවධාරණය කළහ.
ලේඛන වැදගත් වුවද, ඒවා පවතින්නේ සභාවේ ජීවිතයට සේවය කිරීමට මිස එය ප්රතිස්ථාපනය කිරීමට නොවන බවත්, සැබෑ සංගමනශීලී අලුත්කිරීම වර්ධනය වන්නේ යාච්ඤාව, සවන්දීම, සංවාදය, විචාර බුද්ධිය සහ සහසම්බන්ධතාවය තුළින් බවත් උන්වහන්සේ සඳහන් කළහ.
සිය දේශනය පුරාවටම කාදිනල් ග්රෙක් හිමිපාණන්, "සභාවන්ගේ සහසම්බන්ධතාවයක්" ලෙස සභාව හඳුන්වා දෙමින්, සෑම ප්රාදේශීය සභාවක්ම සමස්ත විශ්ව සභාවේ ජීවිතයට අත්යවශ්ය දායකත්වයක් සපයන බව නැවත නැවතත් අවධාරණය කළහ.
ආසියාවේ සුළුතර සභාවන්ගේ ධර්මදූත ස්ථාවරත්වය සහ අභියෝග මධ්යයේ ක්රියා කිරීමේ අත්දැකීම්, ලෞකිකත්වය සහ වෙනත් එඬේර අභියෝගවලට මුහුණ දෙන ලෝකයේ අනෙකුත් සභාවන්ටද වටිනා පාඩම් ලබාදෙන බව උන්වහන්සේ සඳහන් කළහ. එලෙසම, අප්රිකාව, ලතින් ඇමරිකාව, යුරෝපය සහ ඕෂනියාවේ සභාවන්ගේ අත්දැකීම්වලින්ද ආසියානු සභාවන්ට ඉගෙන ගැනීමට බොහෝ දේ ඇති බවද පැවසූහ.
"මෙය අන්යෝන්ය සම්බන්ධතාවයකි. සෑම සභාවක්ම ගුරුවරයෙකු මෙන්ම ශිෂ්යයෙකි."
මෙම අන්යෝන්ය සාරවත්භාවය විශ්ව සභාවේ කතෝලිකත්වය වඩාත් පැහැදිලිව ප්රකාශ කරන ලක්ෂණයක් බවද කාදිනල් ග්රෙක් හිමිපාණන් පෙන්වා දුන්හ.
2028 වසරේ පැවැත්වීමට නියමිත සභා රැස්වීම (Ecclesial Assembly) පිළිබඳද අදහස් දැක්වූ උන්වහන්සේ, ඉදිරි වසර කිහිපය පිළිගැනීම, විචාර බුද්ධිය සහ අන්යෝන්ය ඉගෙනීමේ කාලයක් වනු ඇති බව පැවසූහ. ලොව පුරා ප්රාදේශීය සභාවන්ගේ අත්දැකීම් සහ අවබෝධයන් එක්රැස් කරමින්, සභාවේ සහසම්බන්ධතාවය සහ ධර්මදූත මෙහෙවර තවදුරටත් ශක්තිමත් කිරීම එම සභා රැස්වීමේ අරමුණ බවද උන්වහන්සේ පැහැදිලි කළහ.
සිය දේශනය අවසන් කරමින්, සභාව වර්ධනය වන්නේ ව්යුහයන් තුළින් පමණක් නොව, සුභාරංචියෙන් හැඩගැසුණු සබඳතා තුළින් බව කාදිනල් මාරියෝ ග්රෙක් හිමිපාණන් සිහිපත් කළහ.
#FABCXII #FABC2026 #FABC #CardinalMarioGrech #Synodality #LocalChurch #UniversalChurch #ChurchInAsia #BridgeBuilders #CatholicChurch #RVASinhala #RadioVeritasAsia
