රදගුරුවරයෙකු නොමැතිව සභාවක් නැත: රදගුරු අධිකාරිය පිළිබඳ කාදිනල් මාරියෝ ග්රෙක් හිමිපාණන්ගේ අවධාරණය
රදගුරුවරයෙකු නොමැතිව සභාවක් නැත: රදගුරු අධිකාරිය පිළිබඳ කාදිනල් මාරියෝ ග්රෙක් හිමිපාණන්ගේ අවධාරණය
ජකාර්තා, ඉන්දුනීසියාව – සංගමනශීලීත්වය රදගුරුවරුන්ගේ අධිකාරිය දුර්වල නොකරන අතර, සවන්දීම, විචාර බුද්ධිය සහ සහසම්බන්ධතාවය තුළින් ඔවුන්ගේ එඬේර මෙහෙවර වඩාත් විශ්වාසවන්තව ඉටු කිරීමට කැඳවන බව සංගමනශීලීත්වය පිළිබඳ රදගුරු සම්මේලනයේ මහලේකම් කාදිනල් මාරියෝ ග්රෙක් හිමිපාණන් පැවසූහ.
ජූලි 24 දින ජකාර්තාවේ හෝටල් මුලියාහි වන්ඩා ශාලාවේ පැවති ආසියානු රදගුරු සමුළු සම්මේලනයේ (FABC) 12 වන මහා සමුළුව අමතමින්, "සංගමනශීලීත්වය පිළිබඳ සම්මේලනය ක්රියාත්මක කිරීමේ මාර්ග" යන මාතෘකාව යටතේ අදහස් දැක්වූ කාදිනල් ග්රෙක් හිමිපාණන්, සංගමනශීලී ගමන හේතුවෙන් රදගුරුවරුන්ගේ කාර්යභාරය අඩු වනු ඇතැයි පළවන සැකයන්ට පිළිතුරු ලබා දුන්හ.
පූජකවරුන්, ආගමිකවරුන් සහ ගිහි විශ්වාසිකයන්ගේ සහභාගිත්වය හා අදහස් විමසීම වැඩි වීම නිසා රදගුරුවරුන්ගේ සුවිශේෂී වගකීම හෝ අධිකාරිය දුර්වල වන බවට පවතින අදහස ප්රතික්ෂේප කළ උන්වහන්සේ, සංගමනශීලීත්වය රදගුරු සේවය දුර්වල නොකර, එය තවදුරටත් ශක්තිමත් කරන බව අවධාරණය කළහ.
"රදගුරුවරයෙකු නොමැතිව සභාවක් නැත. එහෙත් ජනතාව නොමැතිව රදගුරුවරයෙකුද නැත."
මෙම ප්රකාශය උන්වහන්සේගේ දේශනයේදී විශාල අවධානයක් දිනාගත් අවස්ථාවක් විය.
රෝමයේ පැවති සංගමනශීලීත්වය පිළිබඳ රදගුරු සම්මේලනය අවසන් වීමෙන් පසු, කතෝලික සභාව එහි ක්රියාත්මක කිරීමේ අදියරට පිවිස ඇති අතර, ලොව පුරා සභාවේ ඇතැමුන් සංගමනශීලීත්වය හේතුවෙන් රදගුරුවරුන්ගේ කාර්යභාරය අඩු විය හැකි බවට කනස්සල්ල පළ කර තිබේ.
එහෙත් කාදිනල් ග්රෙක් හිමිපාණන් පැහැදිලි කළේ, සංගමනශීලීත්වය යනු පාර්ලිමේන්තු ක්රමයක් හෝ සභා අධිකාරිය යළි බෙදාහැරීමක් නොවන බවයි.
"රදගුරුවරයා තවදුරටත් ප්රාදේශීය සභාවේ එඬේරාමයි."
සංගමනශීලීත්වය රදගුරුවරුන්ට ජනතාවගේ හඬට සවන් දෙමින්, ශුද්ධාත්මයාණන්ගේ ක්රියාකාරිත්වය විචාර බුද්ධියෙන් හඳුනාගනිමින්, වඩාත් සුභාරංචිමය ආකාරයකින් නායකත්වය ලබාදීමට ආරාධනා කරන බව උන්වහන්සේ පැවසූහ.
සවන්දීම අධිකාරිය අත්හැරීමක් ලෙස නොසැලකිය යුතු බවද කාදිනල් ග්රෙක් හිමිපාණන් අවධාරණය කළහ. එය රදගුරු සේවයේ ස්වභාවික අංගයක් බවත්, රදගුරුවරයෙකු ජනතාවට සවන් දෙන්නේ තමන්ට අධිකාරියක් නොමැති නිසා නොව, ශුද්ධාත්මයාණන් විශ්වාසිකයන් අතර ක්රියා කරන ආකාරය හඳුනා ගැනීම සඳහා බවත් උන්වහන්සේ පැහැදිලි කළහ.
සභාව සත්යය තීරණය කරන්නේ මහජන මත විමසුම් හෝ බහුතර ඡන්ද මගින් නොවන බවද උන්වහන්සේ සඳහන් කළහ. ඒ වෙනුවට, බව්තීස්ම ලැබූ ජනතාව තුළ ක්රියා කරන විශ්වාසයේ අධිස්වාභාවික හැඟීම (Sensus Fidei) ට සවන් දීමෙන් පසු, ඉගැන්වීම, පාලනය සහ ශුද්ධ කිරීම යන තම වගකීම් ඉටු කිරීමට රදගුරුවරුන් කැඳවනු ලබන බව උන්වහන්සේ පැවසූහ.
"රදගුරුවරයා ප්රාදේශීය සභාවේ එඬේරා ලෙසම සිටියි."
මෙම සංගමනශීලී ගමන වෙනස් කරන්නේ නායකත්වයේ ස්වභාවය නොව, එය ක්රියාත්මක කරන ආකාරය බවද කාදිනල් ග්රෙක් හිමිපාණන් නැවත අවධාරණය කළහ.
රදගුරුවරුන් පරිපාලකයන් ලෙස පමණක් නොව, ජනතාවගේ අත්දැකීම් හා හඬ එකතු කර, ශුද්ධ ලියවිල්ල සහ සම්ප්රදාය ආලෝකයෙන් ඒවා යාච්ඤාත්මකව විමසා බලා, විශ්ව සභාව සමඟ සහසම්බන්ධතාවයෙන් යුතුව විචාර බුද්ධියෙන් තීරණ ගැනීමට කැඳවනු ලබන බව උන්වහන්සේ පැවසූහ.
මෙම පණිවිඩය, ආගමික හා සංස්කෘතික විවිධත්වයෙන් යුත් රටවල සුළුතර සභාවන්ට නායකත්වය දෙන ආසියාවේ රදගුරුවරුන්ට විශේෂ වැදගත්කමක් ගෙන දුන්නේය.
එවැනි පසුබිමක එඬේර නායකත්වය යනු, සුභාරංචිය තුළ ස්ථිරව සිටිමින් ජනතාව සමඟ ගමන් කිරීම, විශ්වාසය ගොඩනැගීම සහ සහසම්බන්ධතාවය වර්ධනය කිරීම බව කාදිනල් ග්රෙක් හිමිපාණන් පැහැදිලි කළහ.
සිය දේශනය අවසන් කරමින් උන්වහන්සේ අවධාරණය කළේ, සංගමනශීලී ගමනේ අරමුණ රදගුරු සේවය දුර්වල කිරීම නොව, යහපත් එඬේරාණන් වූ ජේසුස් වහන්සේගේ ආදර්ශය අනුව ජනතාව සමඟ ගමන් කරමින්, ඔවුන්ට සවන් දෙමින් සහ සත්යය කරා මඟ පෙන්වමින් එම සේවය තවදුරටත් ශක්තිමත් කිරීම බවයි.
කර්තෘ පිළිබඳව
ගැබ්රියෙල් අබ්දි සුසන්තෝ ඉන්දුනීසියාවේ ජ්යෙෂ්ඨ මාධ්යවේදියෙකි. ඔහු වර්තමානයේ වතිකානු ප්රවෘත්ති (Vatican News) හි ඉන්දුනීසියානු භාෂා සංස්කරණයේ කර්තෘ මණ්ඩලයේ සාමාජිකයෙකු ලෙස සේවය කරයි.
#FABCXII #FABC2026 #CardinalMarioGrech #Synodality #ChurchInAsia #EpiscopalMinistry #Bishops #CatholicChurch #BridgeBuilders #RVASinhala #RadioVeritasAsia
