ආසියාවේ අභියෝග මධ්යයේ සංවාදයේ මෙහෙවර ශක්තිමත් කළ යුතුයි. – කාදිනල් ෆිලිප් නේරි ෆෙරාවෝ හිමිපාණන්
ආසියාවේ අභියෝග මධ්යයේ සංවාදයේ මෙහෙවර ශක්තිමත් කළ යුතුයි. – කාදිනල් ෆිලිප් නේරි ෆෙරාවෝ හිමිපාණන්
ආසියාවේ ක්රිස්තියානි ප්රජාවන් මුහුණ දෙන අභියෝග හේතුවෙන් සභාව සංවාදය හා ප්රතිසන්ධානය පිළිබඳ සිය කැපවීම අඩු නොකර, තවදුරටත් ශක්තිමත් කළ යුතු බව ආසියානු රදගුරු සමුළු සම්මේලනයේ (FABC) සභාපති, ගෝවා හා දමන් අගරදගුරු කාදිනල් ෆිලිප් නේරි ෆෙරාවෝ හිමිපාණන් පැවසූහ.
එතුමා මේ අදහස් පළ කළේ ජූලි 20 වැනිදා ජකර්තාහි ආරම්භ වූ ආසියානු රදගුරු සමුළු සම්මේලනයේ 12 වැනි මහා සභා රැස්වීමේ ආරම්භක මාධ්ය හමුවේදීය.
ආසියාවේ රටවල් කිහිපයක සුළුතරයක් ලෙස ජීවත් වන ක්රිස්තියානීන් මුහුණ දෙන දුෂ්කරතා පිළිබඳ මාධ්යවේදියකු නැඟූ ප්රශ්නයකට පිළිතුරු දෙමින් කාදිනල් ෆෙරාවෝ හිමිපාණන් සඳහන් කළේ සභාව ඉතිහාසය පුරාම සිය මෙහෙවර ඉටු කර ඇත්තේ අභියෝගාත්මක තත්ත්වයන් මධ්යයේ බවයි.
"සභාව සිය ඉතිහාසය පුරාම අභියෝගාත්මක තත්ත්වයන්ට මුහුණ දී තිබෙනවා. ආසියාවේ බොහෝ ප්රදේශවල සභාව තවමත් ජීවත් වන්නේ දුෂ්කර තත්ත්වයන් යටතේ බව සැබෑවක්," යැයි කාදිනල් ෆිලිප් නේරි ෆෙරාවෝ හිමිපාණන් පැවසූහ.
බිය හෝ හුදෙකලාවීම තෝරා ගැනීම වෙනුවට, සබඳතා ගොඩනැගීම, සංවාදය ප්රවර්ධනය කිරීම සහ ප්රතිසන්ධානය වර්ධනය කිරීම සඳහා සභාව අඛණ්ඩව කැපවිය යුතු බවද එතුමා අවධාරණය කළහ.
"ඒ නිසාම සබඳතා ගොඩනැගීම, සංවාදය ප්රවර්ධනය කිරීම සහ ප්රතිසන්ධානය ඇති කිරීම සභාවට පැවරී ඇති වගකීමක්," යැයි එතුමා පැවසූහ.
ආගමික, සංස්කෘතික, භාෂාමය හා ජනවාර්ගික විවිධත්වයෙන් පිරි ආසියාවේ මෙම මෙහෙවර විශේෂයෙන්ම වැදගත් බවද කාදිනල් ෆෙරාවෝ හිමිපාණන් සඳහන් කළහ. වෙනත් ආගම් හා සංස්කෘතීන්ට අයත් පුද්ගලයන් සමඟ මෙන්ම සභාව දෙස සැකයෙන් බලන අය සමඟද හමුවීම් සඳහා අවකාශ නිර්මාණය කිරීමට සභාව කැඳවා ඇති බව එතුමා පැවසූහ.
"අපි පිටතට යන සභාවක් වීමේ කැපවීම යළිත් තහවුරු කරනවා. අපගේ ඇදහිල්ල බෙදා නොගන්නා අය සමඟත්, අප දෙස සැකයෙන් බලන අය සමඟත් අවබෝධයේ පාලම් තැනිය යුතුයි," යැයි එතුමා ප්රකාශ කළහ.
කාදිනල් ෆෙරාවෝ හිමිපාණන්ගේ මෙම අදහස් පිළිබිඹු කරන්නේ මෙවර ආසියානු රදගුරු සමුළු සම්මේලනයේ 12 වැනි මහා සභා රැස්වීමේ තේමාව වන "සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර" යන්නයි.
ජූලි 20 සිට 26 දක්වා ජකර්තාහි පැවැත්වෙන මෙම සතියපුරා මහා සභා රැස්වීමට ආසියානු රදගුරු සමුළු සම්මේලනයට අයත් රදගුරු සමුළු සහ සභා ප්රදේශ 22ක් නියෝජනය කරමින් කාදිනල්වරුන් සහ රදගුරුවරුන් 120කට අධික පිරිසක් එක්ව සිටිති.
මෙම මාධ්ය හමුවේ ප්රශ්නෝත්තර සැසියේදී ආසියාවේ සුළුතර ක්රිස්තියානි ප්රජාවන් මුහුණ දෙන යථාර්ථයන්ට සභාව එඬේර මෙහෙවර තුළින් ප්රතිචාර දැක්විය යුතු ආකාරය පිළිබඳවද අවධානය යොමු කෙරිණි. එම යථාර්ථයන් හේතුවෙන් සභාව අධෛර්යයට පත් නොවී, සුබාරංචිය සංවාදය, අන්යෝන්ය අවබෝධය සහ ප්රතිසන්ධානය තුළින් සාක්ෂි දැරීමේ සිය කැඳවීම යළිත් තහවුරු කළ යුතු බව කාදිනල් ෆෙරාවෝ හිමිපාණන් පැවසූහ.
මෙම මහා සභා රැස්වීම පුරාම සහභාගිවන්නන් යාච්ඤාව, ශුද්ධාත්මයාණන් තුළ සංවාද, කලාපීය හමුවීම් සහ පොදු විමසුම් ඔස්සේ ආසියාවේ සභාවේ සංගමනශීලී ගමන සහ මෙහෙවර ශක්තිමත් කිරීම සඳහා ප්රායෝගික මඟපෙන්වීම් සොයා බලනු ඇත.
අවසානයේ කාදිනල් ෆිලිප් නේරි ෆෙරාවෝ හිමිපාණන් සඳහන් කළේ, ආසියාවේ සභාවේ විශ්වසනීයත්වය රඳා පවතින්නේ දුෂ්කර අවස්ථාවලින් ඉවත්වීම මත නොව, ජනතාව අතර රැඳී සිටිමින් අවබෝධය ප්රවර්ධනය කිරීම සහ විවිධත්වයෙන් හා බෙදීම්වලින් යුත් සමාජයන් තුළ බලාපොරොත්තුවේ පාලමක් වීම මත බවයි.
කර්තෘ පිළිබඳව
ගේබ්රියෙල් අබ්ඩි සුසන්ටෝ ඉන්දුනීසියාවේ ප්රවීණ මාධ්යවේදියෙකි. ඔහු වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සේවය කරයි.
#XIIFABCPlenary #FABC #FABC2026 #CardinalFilipeNeriFerrao #ChurchMissionOfDialogue #FederationOfAsianBishopsConferences #Jakarta2026 #RadioVeritasAsia #RVASinhala
