ආසියානු ඩිජිටල් ධර්මදූතයන් පළමු සමුළුවේදී සහයෝගීතාව සහ නව දැනුම සොයා එක්වෙති
ආසියාවේ විවිධ රටවලින් පැමිණි කතෝලික ඩිජිටල් ධර්මදූතයන් සහ සන්නිවේදකයන්, ඩිජිටල් ධර්මදූත මෙහෙවර පිළිබඳ අත්දැකීම් හුවමාරු කර ගනිමින් සහ එකිනෙකාගෙන් ඉගෙන ගනිමින් ක්වෙසොන් නගරයේ රේඩියෝ වෙරිටාස් ආසියා පරිශ්රයේදී පැවැති පළමු ආසියානු කතෝලික ඩිජිටල් ධර්මදූත සමුළුවට එක්වූහ.
සැප්තැම්බර් 10 සිට 13 දක්වා දින හතරක් පුරා රේඩියෝ වෙරිටාස් ආසියා විසින් සත්කාරකත්වය දැරූ මෙම සමුළුව සඳහා ආසියාවේ විවිධ රටවලින් ඩිජිටල් ධර්මදූතයන් සහ කතෝලික සන්නිවේදකයන් එක්ව සිටියහ.
“බලපෑම්කරුවන්ගේ සිට සාක්ෂිකරුවන් දක්වා: ආසියාවේ ඩිජිටල් ධර්මදූත මෙහෙවර සඳහා සංගමනශීලී මාර්ගයක්” යන තේමාව යටතේ පැවැති මෙම සමුළුවේදී, සමාජ මාධ්ය ඔස්සේ හුදෙක් බලපෑම් කරන්නන් වීමෙන් ඔබ්බට ගොස් ඩිජිටල් පරිසරය තුළ විශ්වාසයේ අව්යාජ සාක්ෂිකරුවන් බවට පත්වීමට කතෝලික ඩිජිටල් සන්නිවේදකයන්ට ඇති කැඳවීම පිළිබඳව අවධානය යොමු කෙරිණි.
ඉන්දියාවේ මදුරාසි සහ මයිලාපූර් අගරදගුරු පදවිය නියෝජනය කරමින් සහභාගී වූ ගරු රිචී වින්සන්ට් පියතුමා පැවසුවේ, වතිකානුවේ පැවැති ජාත්යන්තර ඩිජිටල් ධර්මදූත හමුවකට සහභාගී වීමෙන් පසුව මෙම ආසියානු සමුළුව කෙරෙහි තම උනන්දුව වඩාත් වර්ධනය වූ බවයි.
වතිකානුවේ පැවැති එම හමුවට ආසියාවෙන් සහභාගී වී සිටියේ ඉතා සුළු පිරිසක් බව සඳහන් කළ ගරු රිචී පියතුමා, “ආසියානු ඩිජිටල් ධර්මදූතයන් කොහේද?” යන ප්රශ්නය තමන් තුළ මතු වූ බව පැවසීය.
“එය මා තුළ දැඩි ආශාවක් බවට පත්වුණා,” යැයි ඔහු පැවසීය.
ආසියානු ඩිජිටල් ධර්මදූතයන්ට එකිනෙකා හමුවීමට, සහයෝගයෙන් කටයුතු කිරීමට සහ තම අත්දැකීම් හුවමාරු කර ගනිමින් එකිනෙකාගෙන් ඉගෙන ගැනීමට මෙම සමුළුව වැදගත් අවස්ථාවක් වූ බවද ගරු රිචී පියතුමා සඳහන් කළේය.
ඔහු මේ වන විට ඉන්දියාවේ ඩිජිටල් ධර්මදූත ප්රජාවක් සමඟ කටයුතු කරමින් සිටින අතර, කතෝලික ඩිජිටල් බලපෑම්කරුවන් සඳහා වන පුහුණු හා සැකසුම් වැඩසටහන් මෙන්ම ගැඹුරු කතෝලික අධ්යයනයන්හි නිරත ඩිජිටල් ධර්මදූතයන් සමඟද සේවය කරමින් සිටියි.
තම ධර්මදූත සේවය ඉන්දියාව තුළ තවදුරටත් ශක්තිමත් කර ගැනීමට උපකාර වන නව තාක්ෂණික ක්රම, තාක්ෂණයන් සහ අදහස් පිළිබඳව ඉගෙන ගැනීමට තමන් බලාපොරොත්තු වූ බවද ඔහු පැවසීය.
පිලිපීනය නියෝජනය කරමින් සහභාගී වූ ගී රියා ජඩුල්කෝ පැවසුවේ, ආසියාවේ අනෙකුත් රටවල සමාජ මාධ්ය සහ සමාජ සන්නිවේදනය ධර්මදූත මෙහෙවර සඳහා භාවිත වන ආකාරය පිළිබඳව ඉගෙන ගැනීමට මෙම සමුළුව අවස්ථාවක් වූ බවයි.
“වෙනත් සංස්කෘතීන්ගෙන් සහ ආසියාවේ අනෙකුත් රටවල සමාජ මාධ්ය සහ සමාජ සන්නිවේදනය භාවිත වන ආකාරයෙන් ඉගෙන ගැනීමට මට අවශ්ය වුණා,” යැයි ඇය පැවසුවාය.
විවිධ රටවලින් පැමිණි සහභාගිවන්නන් හමුවී නව මිත්රත්වයන් ගොඩනඟා ගැනීමටද තමන් බලාපොරොත්තු වූ බව ඇය සඳහන් කළාය.
පිලිපීනයේම තවත් සහභාගිවන්නියක වන මිකා එලා එල්. ටබාඩා පැවසුවේ, සමුළුවේ පැවැති සාකච්ඡා සඳහා සහභාගී වීමටත්, ආසියාවේ විවිධ රටවලින් පැමිණි සෙසු ඩිජිටල් ධර්මදූතයන් හමුවීමටත් තමන් බලාපොරොත්තු වූ බවයි.
ආසියානුවන් ලෙස සියලු දෙනා එකම කලාපයකට අයත් වුවද, සංස්කෘතීන්, භාවිත කරන ඩිජිටල් වේදිකා සහ ක්රියාකාරීත්වයන් එකිනෙකට වෙනස් බව ඇය පෙන්වා දුන්නාය.
“අපි සියලු දෙනා ආසියානුවන් වුණත්, අපට වෙනස් සංස්කෘතීන් තිබෙනවා. වෙනස් වේදිකා තිබෙනවා. වෙනස් භාවිතයන් තිබෙනවා,” යැයි ඇය පැවසුවාය.
පිලිපීන ජනතාව සතු ආගන්තුක සත්කාරය සහ නිර්මාණශීලීත්වය අනෙකුත් නියෝජිතයන් සමඟ බෙදාගත හැකි සුවිශේෂී ගුණාංග ලෙසද ටබාඩා සඳහන් කළාය.
ඉන්දුනීසියාව නියෝජනය කරමින් සහභාගී වූ ජෙනිෆර් ඔඩෙලියා මෙරිඩිත් පැවසුවේ, සෙසු සහභාගිවන්නන් හමුවීමට සහ තම තමන්ගේ රටවල ඩිජිටල් ධර්මදූත මෙහෙවර තවදුරටත් ශක්තිමත් කළ හැකි ආකාරය පිළිබඳව සාකච්ඡා කිරීමට තමන් බලාපොරොත්තු වූ බවයි.
තම ප්රජාවන් වෙනුවෙන් නව මාධ්ය සහ අන්තර්ගතයන් නිර්මාණය කිරීමේ ක්රම පිළිබඳව ඉගෙන ගැනීමටද මෙම හමුව අවස්ථාවක් වූ බව ඇය පැවසුවාය.
ඉන්දුනීසියාවෙන් මෙම සමුළුවට රැගෙන ආ දේ පිළිබඳව විමසූ විට, මෙරිඩිත් අවධාරණය කළේ “එකිනෙකා වෙනුවෙන් යාච්ඤා කිරීමේ” වැදගත්කමයි.
සමුළුව පුරා පැවැති සාකච්ඡා, සැකසුම් වැඩසටහන් සහ අත්දැකීම් හුවමාරු තුළින් ආසියාවේ ඩිජිටල් ධර්මදූතයන් අතර ඩිජිටල් සුභාරංචිකරණය, සන්නිවේදන ක්රමවේද සහ සහයෝගීතාව පිළිබඳව අවධානය යොමු කෙරිණි.
සැප්තැම්බර් 10 වනදා පැවැති ශුද්ධ වූ දිව්ය පූජාවකින් සමුළුවේ පළමු දිනය ආරම්භ වූ අතර, විවිධ ආසියානු රටවල් නියෝජනය කළ නියෝජිතයන් සිය රටවල සාම්ප්රදායික සංස්කෘතික ඇඳුම්වලින් සැරසී එයට එක්වීම, ආසියානු කතෝලික සභාවේ පොහොසත් සංස්කෘතික විවිධත්වය මෙන්ම එකමුතුකමද ප්රකාශ කළ සුවිශේෂී අවස්ථාවක් විය.
#RVA #RadioVeritasAsia #RVASinhala #ACDMA2026 #DigitalMission #DigitalMissionaries #CatholicMedia #CatholicCommunicators #Asia #SynodalChurch #MissionaryChurch #InfluencersToWitness #Witnesses #Christ #DigitalEvangelization
