අද ජේසු තුමන්ගේ දිව්ය හෘදයේ මංගල්යය යි.
![](/sites/default/files/styles/max_width_770px/public/2024-06/sacred_heart_feast_02.png?itok=dzC5_Pov)
අද ජේසු තුමන්ගේ දිව්ය හෘදයේ මංගල්යය යි.
ජනවන්දනා වසරේ ජේසුස් වහන්සේගේ දිව්ය හෘදයේ මංගල්ලය පවත්වනු ලබන්නේ ශුද්ධාත්ම ගමන මංගල්යයෙන් දින 19 කින් එසේ නොහොත් දිව්ය සත්ප්රසාද මංගල්ලයෙන් පසු එන පළමු සිකුරාදා දිනයි.
අපගේ ශරීරයේ බොහෝ අවයව ඇත. ඒ අතරින් අත උපයෝගී කරගෙන යමක් ලිවීමේ දී යම් කාර්යයක් කිරීමේ දී එය දිගින් දිගටම කිරීමෙන් යම් වෙහෙසක් අපට දැනේ. පාද උපයෝගී කරගනිමින් ගමනක් යෑමේ දී හෝ මුව උපයෝගී කරගෙන යම් කතාවක් කිරීමේ දී වැඩි වෙලාවක් යාමට මත්තෙන් අපට වේදනාවක් දැනේ. එහෙත් අපගේ ශරීරයේ ඇති හදවත නැමැති අවයවය කිසිදා වෙහෙසට පත් නොවේ. හදවතට සම්බන්ධ මාංශ පේශීය වෙහෙසට පත් නොවේ. යම් හෙයකින් හදවත ක්රියා කිරීම නතර වූවොත් අපගේ ජීවිතය එතනින් නතර වේ. ඒ අනුව හදවත දිගින් දිගටම අපිරිසුදු රුධිරය පිරිසුදු කර දී ශරීරයට මුදාහරි. එය දිගින් දිගටම සිදු කරයි. මේ අනුව අපට අද සමිදාණන් වහන්සේ ආරාධනා කරන්නේ දිගින් දිගටම අන් අයට ප්රේම කිරීමටයි. අන් අය අපට කෙනෙහිලිකම් කරන විට, අප හෙළා දකින විට, අපගේ වැරදි තැනින් තැන කියමින් අපව සමච්චලයට පත් කරන විට ඔවුන්ට පෙම් කිරීමට උන්වහන්සේට ආරාධනා කරයි. එය ලෙහෙසි පහසු කාර්යයක් නො වන්නට පුළුවන. එහෙත් ස්වාමීන් වහන්සේ අද අපට දෙන පොරොන්දුවනම් උන්වහන්සේ ගුණවත්, මෘදු, නිහතමානී කෙනෙකු බැවින් ඔවුන් වහන්සේගේ වියගහ කරට ගෙන උන්වහන්සේගෙන් ඉගෙනගන්නටයි. එසේ නම් අද අපි අපගේ වේදනාවන්, අන් අය අපට දුන් පීඩා ඉවසීමෙන් විඳ දරාගෙන නොනවත්වාම අන් අයට ප්රේම කිරීමට අවශ්ය වරම් ජේසුස් වහන්සේගේ ඉල්ලා සිටිමු.
හෘදයෙන් සාන්ත දාන්ත වූ ද
බැහැපත් වූ ද ජේසුනී
අපගේ හෘදයන් ඔබගේ දිව්ය හෘදෙට
සමාන කළ මැනව.
#SacredHeart | #DailyReflection
#RVASinhala