අද දින සුදුවර චරිතයෙන් ජූලි 19වන දිනට මංගල්‍යය යෙදෙන ශුද්ධ වූ මහා අර්සේනියුස් මුනිඳුන් ගැන කතා කරමු.
මෙතුමන් උපත ලබන්නේ ක්‍රිස්තු වර්ෂ 350 දී ඉතාලියේ රෝම නගරයේ ය. මෙතුමන්ගේ පියා කිතුනු සෙනෙට් සභිකයකු විය. දෙමවුපියන්ගේ වියෝවීමෙන් පසුව තම සොහොයුරිය වූ අෆ්රොසිටි කන්‍යාවන්ගේ සංඝයකට ඇතුළත් කරන ලද අතර, ඔහු සියලු ධනය දුප්පතුන්ට පරිත්‍යාග කර හුදකලා ජීවිතයක් ගත කළේය. එතුමන්ගේ ධර්මිෂ්ඨකම සහ ප්‍රඥාව එවකට මිනිසුන් අතර ප්‍රසිද්ධ කරුණක් විය.
පළමුවන ඩැමසස් පාප්තුමා විසින් අර්සෙනියුස් තේවාචාර්යවරයකු ලෙස පත් කරනු ලැබු බව ද කියැවේ. ග්‍රීක සාහිත්‍යය පිළිබඳ හසළ දැනුමක් එතුමන්ට තිබුණේය. එම නිසාම ඔහු ක්‍රි.ව. 383 දී කොන්ස්තන්තිනෝපල් වෙත ළඟා වූ අතර, වසර එකොළහක් අධිරාජ්‍ය පවුලේ පුතුන් හට ආචාර්යවරයෙකු ලෙස කටයුතු කළේය. අධිරාජ්‍ය පවුලේ එමෙන්ම බොහෝ දෙනාගේ ගෞරවයට සහ ආදරයට මෙතුමන් පත්විය.
මාලිගයක ජීවත්වීමට අවස්ථාව ලැබුණ ද ලෞකිකත්වයෙන් මිදුණු සරල ජීවිතයක් එතුමන් ගත කළේය.
දිනක් එතුමන් යාඥා කරමින් සිටියදී , "අහෝ දෙවියනි ගැලවීම සදහා මට ඉගැන්නුව මැනව යි" කී කල්හි දේව අනාවරණයක් තුළින් “මිනිසෙකු මුළු ලෝකයම ලබාගෙන තමාගේ ආත්මය නැති කරගන්නේ නම් ඔහුට ලැබෙන්නේ කුමක්ද?” (මතෙව් 16:26) යන සුවිශේෂ පාඨය සිහි ගැන්වීය.
කොන්ස්තන්තිනෝපලයෙන් නික්මුණු එතුමන් ඇලෙක්සැන්ඩ්‍රියාවට පැමිණ වන ගත විය. ක්‍රි.ව. 400 දී පමණ එතුමන් ඉජිප්තුවේ කාන්තාර තාපසයන් සමග එක් විය. වසර 55ක් පමණ කාන්තාරයේ සැරිසරමින් එතුමන් ශුද්ධවත් ජීවිතයක් ගත කළේය. ක්‍රිස්තු වර්ෂ 445 දී ඊජිප්තුවේ ට්‍රොඊ නම් ප්‍රදේශීය දී තම හුස්ම හෙළීය.
#StArseniustheGreat #Prayforus
#Saintoftheday #RVASinhala
'RVASinhala' Facebook, Instagram, Twitter පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!
