අද දින සුදුවර චරිතයෙන් ඔක්තොම්බර් 06වන දිනට මංගල්‍යය යෙදෙන ශුද්ධ වූ බෲනෝ මුනිඳුන් ගැන කතා කරමු.
බෲනෝ වර්ෂ 1030 දී පමණ ජර්මනියේ කොලෝන් හි උපත ලැබීය. ඔහු යුරෝපයේ වඩාත්ම පිළිගත් විශ්ව විද්‍යාලයක් වන ප්‍රංශයේ රයිම්ස් හී පිහිටි විශ්ව විද්‍යාලයක අධ්‍යාපනය ලැබූ අතර අධ්‍යාපනය අවසන් කිරීමෙන් පසු ඔහු එම විශ්ව විද්‍යාලයේ ම ඉගැන්වීම ආරම්භ කළේය.
නැවත තම නගරයට පැමිණෙන ඔහු 1055 වසරේදී පමණ පූජකවරය ලබා ගත්තේය.
1056 දී ගර්වායිස් අගරදගුරුතුමන් ඔහුව රයිම්ස්හි රදගුරු විද්‍යාලයේ අධ්‍යක්ෂක ලෙස තෝරා ගත්තේය. ඔහු වසර 20 ක පමණ කාලයක් අධ්‍යාපන අංශයේ අධ්‍යක්ෂක ධුරය හෙබවීය.
1076 අගභාගයේදී, බෲනෝ තමන් දැරු සියලුම තනතුරු අතහැර යාමට තීරණය කළේ නගරයේ වැදගත් ආයතන කිහිපයක් අතර ඇතිව තිබූ ගැටුම් හේතුවෙනි. 1080 දෙසැම්බර් 27 වන දින VII වන ග්‍රෙගරි පාප්තුමාන් විසින් මෙම ගැටුම් වලට මුල් වූ අගරදගුරුවරයා පහ කොට නව අයෙකු තෝරා පත් කර ගන්නා ලෙස රයිම්ස්හි පූජකවරුන්ගෙන් ඉල්ලා සිටියේය. ප්‍රංශයේ ඉහළම කතෝලික සභා තනතුරක් වන මෙම ඉහළ වගකීම සහ බලය සහිත තනතුර සඳහා බෲනෝ තෝරා ගන්නා ලදී. නමුත් ඔහුට වෙනත් සැලසුම් තිබුණි.
තම ජීවිතය මුළුමනින්ම ක්‍රිස්තුස් වහන්සේ වෙනුවෙන් කැප කරමින් පාලුකර ජීවිතයකට ඇතුළුවීමට ඔහු තීරණය කර තිබුණි. ග්‍රෙනොබල් හි හියු රදගුරුතුමන් ගේ මඟ පෙන්වීම යටතේ ඔහු සහ තවත් සගයන් හයදෙනකු චාර්ට්රූස් කාන්තාරයේ කෙළවරට ළඟා වූයේ දළ වශයෙන් ජුනි 24 වන ශුද්ධ වූ ස්නාවක ජුවාම් මුනිඳුන් ගේ මංගල්‍යය දින ය.
අවුරුදු හයක පමණ කාලයක් පුරා ඔහු තම සහෝදරයන් සමඟ එම තෝරාගත් ජීවිතය ගත කරන අතරතුර 1090 මුල් මාසවලදී, ඔහුගේ හිටපු ශිෂ්‍යයෙකු වූ II වන උර්බානි පාප්තුමන් සභාවේ සේවයට උදව් කිරීම සඳහා ඔහුව රෝමයට කැඳවූ නමුත්, මාස කිහිපයකට පසු, බෲනෝ තම තාපස ජීවිතයට නැවත යාමට පාප්තුමාගේ අවසර ලබා ගත්තේය.
ඔහු තම තාපසාරාමය දකුණු ඉතාලියේ විශාල කාන්තාරයක පිහිටුවා ලීමට කටයුතු කළේය. වර්ෂ 1101 ඔක්තෝබර් 06 වන දින එතුමන් සග ලොව දිනා ගත්තේය.
භාග්‍යවරයට එසවීම 1514 අති උතුම් දස වන ලියෝ ශුද්ධෝත්තම හිමිපාණන් විසින්.
ශුද්ධවන්ත භාවයට එසවීම 1623 පෙබරවාරි 17 වන දින අති උතුම් පහලොස්වන ග්‍රෙගරි ශුද්ධෝත්තම හිමිපාණන් විසින්.
ගීතාවලිය සහ පාවුළු තුමන්ගේ සංදේශ පිළිබඳව විවරණ රචනා කළ, ශුද්ධ වූ බෲනෝ මුනිඳුනි, අප නිසා යාච්ඤා කළ මැනව
#StBruno #Prayforus #Saintoftheday #RVASinhala
