ශුද්ධ වූ ජෝන් ෆිෂර් මුනිඳුන්

අද දින සුදුවර චරිතයෙන් ජූනි 22 වන දිනට මංගල්‍යය යෙදෙන ශුද්ධ වූ ජෝන් ෆිෂර් මුනිඳුන් ගැන කතා කරමු.
ශුද්ධ වූ ජෝන් ෆිෂර් මුනිඳුන් උපත ලැබූවේ 1469 ඔක්තෝබර් 19 වන දින එංගලන්තයේ යෝක්ෂර් ප්‍රාන්තයේ බෙවර්ලි නගරයේ ය. ඔහුගේ පියා බෙවර්ලි හි ඉතා නිහතමානී සමෘද්ධිමත් ව්‍යාපාරිකයකු වූ රොබට් ෆිෂර් වූ අතර මව ඇග්නස් නම් විය. දරුවන් හතර දෙනෙක් ගෙන් යුත් පවුලේ වැඩිමහල්ලා වූයේ ජෝන් ෆිෂර් මුනිදුන් ය. ඔහුට වයස අවුරුදු අටේදී ඔහුගේ පියා මිය යන අතර ඔහුගේ මව නැවත විවාහ වූවාය. දෙවැනි සැමියා වූ විලියම් වයිට් ට දාව තවත් දරුවන් පස් දෙනෙක් පවුලට එකතු වූහ.
ජෝන් මුනිදුන් මුල් අධ්‍යාපනය ලැබූයේ ඔහුගේ උපන් නගරයේ කතෝලික පාසලකය. 1484 දී තම උසස් අධ්‍යාපනය කේම්බ්‍රිජ් විශ්ව විද්‍යාලයෙන් ආරම්භ කරන මෙතුමන් 1487 දී ශාස්ත්‍රවේදී උපාධියක් ලබා ගන්නා අතර 1491 දී ශාස්ත්‍රපති උපාධිය ලබා ගත්තේය.
පූජකවරය ට ඇතුළු වීම සඳහා විශේෂ ශුද්ධාසනීය අවසරයක් ලැබූ එතුමන් 1491 දෙසැම්බර් 17 වන දින පූජකවරය ලැබීය. තම දේශීය සභාවේ සහ විශ්ව විද්‍යාලයේ නොයෙකුත් පදවි තනතුරු එතුමන් විසින් දරන ලදී. එලෙසම කේම්බ්‍රිජ් හි විද්‍යාලයන් කිහිපයක්ම පිහිටුවීම සඳහා මූලිකත්වය ගෙන කටයුතු කළේ මෙතුමන් විය.
මෙතුමන් පෞද්ගලික සැප සම්පත් සියල්ල කැප කර දුරදක්නා දැක්මකින් කටයුතු කළ කෙනෙකි. තම උගත්කම හෝ විශාරද බව නොතකා නිහතමානීව ද තම හෘදසාක්ෂියට එකඟව ද නිරතුරුවම කටයුතු කළේය.
එංගලන්ත සභාවේ උත්තරීතර නිලය පිළිගැනීම ප්‍රතික්ෂේප කිරීම සහ කතෝලික සභාවේ පාප්තුමාගේ ආධිපත්‍ය පිළිගැනීම හේතුවෙන් අටවන හෙන්රි රජු විසින් 1535 ජුනි 22 දින මරණයට පත් කරන ලදී.
භාග්‍යවරයට එසවීම 1886 දෙසැම්බර් 29 දහතුන්වන ලියෝ ශුද්ධෝත්තම හිමිපාණන් විසින්.
ශුද්ධවරයට එසවීම 1935 මැයි 19 දසවන පියුස් ශුද්ධෝත්තම හිමිපාණන් විසින්

#StJohnFisher #Saintoftheday
#RVASinhala 

'RVASinhala' Facebook, Instagram, Twitter පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!