අද දින සුදුවර චරිතයෙන් ජනවාරි 14වන දිනට මංගල්‍යය යෙදෙන නෝලා හී ශුද්ධ වූ ෆීලික්ස් මුනිඳුන් ගැන කතා කරමු.
ෆිලික්ස් වනාහී ඉතාලියේ නෝලා නගරයට සංක්‍රමණය වූ සිරියානු ශතාධිපතියකුගේ වැඩිමහල් පුතණුවන්ය. තම පියාගේ අභාවයෙන් පසුව තමන් හට උරුම වූ සියල්ල විකුණා දිළිඳුන් හට පරිත්‍යාග කළ ඔහු පැවිදි දිවියට ඇතුළු විය. එවකට නෝලා හී රදගුරුතුමන් වූ ශුද්ධ වූ මැක්සිමස් මුනිඳුන් අතින් පූජකවරය ලැබූ ඔහු සේවය කළේ ද එතුමන් සමග ය.
රෝම අධිරාජයා වූ ඩෙසියුස්ගේ පීඩන හමුවේ මැක්සිමස් රදගුරුතුමන් කඳුකරයට පලා යන අතර ෆිලික්ස් අත්අඩංගුවට පත්වී ඔහුගේ ඇදහිල්ල නිසා බොහෝ සේ හිංසාවට පත් විය. පුරාවෘත්තයට අනුව දේව දූතයකු විසින් ඔහුව සිරගෙයින් නිදහස් කරන ලදී. සිරගෙයින් පලා යන ඔහු සැඟවී රෝගාතුරව සහ අසරණව සිටි මැක්සිමස් රදගුරුතුමන් ගොඩනැගිල්ලකට ගෙනැවිත් සොල්දාදුවන් ගෙන් සගවා සාත්තු සප්පායම් කළේය. ක්‍රිස්තු වර්ෂ 251 දී සිදු වූ ඩෙසියුස් අධිරාජ්‍යයාගේ මරණයත් සමග පීඩාවන් අවසාන වන තෙක් මොවුන් දෙදෙනා සැඟවී සිටියහ.
මැක්සිමස් රදගුරු තුමන්ගේ මරණයෙන් පසු නෝලා හී ජනතාව හට ෆිලික්ස් පියතුමා මීළඟ රදගුරුතුමා ලෙස පත් කිරීමට අවශ්‍ය වුවද එම අදහස ඔහු විසින් ප්‍රතික්ෂේප කළේය. එතුමන් මුළු ජීවිත කාලය පුරා පූජකතුමකු ලෙස රැඳී සිටි අතර පුරාවෘත්තයකට අනුව ක්‍රිස්තු වර්ෂ 255 දී වැලේරියන් අධිරාජ්‍යයට යටතේ ප්‍රාණපරිත්‍යාගී වු බවත් තවත් ලියවිල්ලකට අනුව එතුමන් මහලු වියට පත් ව මිය ගිය බවත් සඳහන් වේ.
උරුම වූ සියල්ල විකුණා දිළිඳුන් හට පරිත්‍යාග කළ, නෝලා හී ශුද්ධ වූ ෆීලික්ස් මුනිඳුනි, අප නිසා යාච්ඤා කළ මැනව.
#StFelixofNola #Prayforus
#Saintoftheday #RVASinhala
