FABC 2026: ජකාර්තාහිදී ආසියානු සභාවේ අනාගත මෙහෙවර පිළිබඳ විමසුමට රදගුරුවරු එක්වෙති

FABC 2026: ජකාර්තාහිදී ආසියානු සභාවේ අනාගත මෙහෙවර පිළිබඳ විමසුමට රදගුරුවරු එක්වෙති

ජකාර්තා, ඉන්දුනීසියාව – ආසියානු රදගුරු සම්මේලනයේ (FABC) 12 වන මහා සමුළුව ජූලි 20 සිට 26 දක්වා ඉන්දුනීසියාවේ ජකාර්තා නුවරදී පැවැත්වෙන අතර, ආසියාව පුරා රදගුරුවරුන්, රදගුරු සම්මේලන නියෝජිතයන්, වතිකානු නිලධාරීන්, FABC කාර්යාලවල විධායක ලේකම්වරුන්, දේවධර්මවේදීන් සහ එඬේර සේවා විශේෂඥයන් ඇතුළු 120කට අධික පිරිසක් ඊට සහභාගි වීමට නියමිතය.

ජකාර්තා අගරදගුරු පදවිය විසින් Hotel Mulia Senayan හි සත්කාරකත්වයෙන් පැවැත්වෙන මෙම සතිය පුරා දිවෙන මහා සමුළුවේ තේමාව වන්නේ “සංගමනශීලී පරිවර්තනයට කැඳවීම සහ ආසියාවේ පාලම් හා පාලම් තනන්නන් වීමේ මෙහෙවර” යන්නයි. එහි බයිබලීය ආදර්ශ පාඨය ලෙස තෝරාගෙන ඇත්තේ “ඔබ මීටත් වඩා මහත් දේ දකින්නෙහිය” (යොහන් 1:50) යන ශුද්ධ ලියවිලි වදනයි.

මහා සමුළුව ජූලි 21 වන දින දිව්‍ය පූජාවකින් ආරම්භ වන අතර, එය මුලසුන ගනු ලබන්නේ බටහිර ඉන්දියාවේ බොම්බායේ විශ්‍රාමික අගරදගුරු කාදිනල් ඔස්වල්ඩ් ග්‍රේසියස් හිමිපාණන් විසිනි. උන්වහන්සේ මෙම සමුළුව සඳහා ශුද්ධෝත්තම පියතුමාගේ විශේෂ නියෝජිතයා ලෙස සහභාගි වෙති.

ජූලි 22 වන දින යාච්ඤාව හා ආධ්‍යාත්මික මෙනෙහි කිරීම සඳහා වෙන්කර ඇති අතර, එය ශුභාරංචි ප්‍රකාශනය සඳහා වන ඩිකැස්ටරියේ උප ප්‍රධානී කාදිනල් ලුයිස් අන්තෝනියෝ ටැග්ලේ හිමිපාණන් විසින් මෙහෙයවනු ලබයි. සංගමනශීලී ආධ්‍යාත්මිකත්වය, පාලම් ගොඩනැඟීම සහ ආසියාවේ සභා නායකයන්ට අවශ්‍ය එඬේර පරිවර්තනය පිළිබඳව උන්වහන්සේ සිය මෙනෙහි කිරීම් ඉදිරිපත් කරනු ඇත.

ඉදිරි දිනවලදී ආසියාවේ වෙනස් වෙමින් පවතින සමාජීය හා භූ-දේශපාලනික යථාර්ථයන් පිළිබඳ දේශන සහ සාකච්ඡා පැවැත්වේ. සංගමනශීලී සාක්ෂිය, වෙනස් වන ආසියාවේ සභාවේ කාර්යභාරය සහ පාලම් තනන්නන් ලෙස සභාවේ මෙහෙවර ශක්තිමත් කළ හැකි ක්‍රම පිළිබඳව එහිදී අවධානය යොමු කෙරේ.

සහභාගිවන්නන් කණ්ඩායම් සංවාද, කලාපීය සාකච්ඡා සහ මණ්ඩල සාකච්ඡා හරහා සංගමනශීලී නායකත්වය, එඬේර සේවා සහ දේශීය සභාවන් අතර සහයෝගීතාව පිළිබඳව අදහස් හුවමාරු කරගනු ඇත. ජූලි 25 වන දින XIV ලියෝ ශුද්ධෝත්තම පියතුමාගේ විශේෂ පණිවිඩයක් ද සමුළුවට ඉදිරිපත් කිරීමට නියමිතය.

ජූලි 26 වන දින ජකාර්තාහි අප ස්වාමිදූගේ ස්වර්ගාරෝපණ ආසන දෙව්මැදුරේ පැවැත්වෙන අවසන් දිව්‍ය පූජාවෙන් අනතුරුව, සහභාගිවන්නන් ඉන්දුනීසියාවේ අන්තර්ආගමික සහජීවනයේ සංකේතයක් වන මිත්‍රත්ව උමං මාර්ගය (Friendship Tunnel) ඔස්සේ ඉස්තික්ලාල් මුස්ලිම් දේවස්ථානය වෙත සංචාරයක ද නිරත වනු ඇත.

මෙවර මහා සමුළුව පිළිබඳ අදහස් දක්වමින් FABC සමාජ සන්නිවේදන කාර්යාලයේ විධායක ලේකම් ජෝන් මි ෂෙන් පියතුමා පැවසුවේ, මෙම හමුව සභාමය උත්සවයකට පමණක් සීමා නොවන බවයි.

"මෙය ආසියාවේ සභාවන් එකිනෙකාට සවන් දීමටත්, එක්ව විමසා බැලීමටත්, අපගේ පොදු ධර්මදූත මෙහෙවර යළි අලුත් කර ගැනීමටත් ලැබෙන සුවිශේෂී අවස්ථාවක්. සන්නිවේදන සේවාව තුළින් මෙම ඇදහිලි ගමන සමඟ එක්ව සිටිමින් එහි ඵල ආසියාව පුරා සහ ඉන් ඔබ්බට සිටින කතෝලික ජනතාව වෙත ගෙන යාම අපගේ බලාපොරොත්තුවයි."

රේඩියෝ වෙරිටාස් ආසියා (RVA) වැඩසටහන් අධ්‍යක්ෂවරයා ලෙසද කටයුතු කරන ජෝන් මි ෂෙන් පියතුමා, ජකාර්තා අගරදගුරු පදවියේ සහ ඉන්දුනීසියානු කතෝලික රදගුරු සම්මේලනයේ (KWI) සන්නිවේදන කණ්ඩායම් සමඟ එක්ව මෙම මහා සමුළුවේ මාධ්‍ය ආවරණය සම්බන්ධීකරණය කිරීමට නියමිතය.

මේ අතර, පාකිස්තාන කතෝලික රදගුරු සම්මේලනයේ සභාපති සැම්සන් ශුකර්ඩින් රදගුරුතුමා සිය බලාපොරොත්තුව පළ කරමින් කියා සිටියේ, මෙම මහා සමුළුවෙන් ප්‍රකාශවලට පමණක් සීමා නොවන, ප්‍රායෝගිකව ක්‍රියාත්මක කළ හැකි ආසියාව සඳහා ඒකාබද්ධ එඬේර සැලැස්මක් බිහිවිය යුතු බවයි.

එමෙන්ම, රදගුරු සම්මේලන අතර ශක්තිමත් සහයෝගීතා ජාල, තරුණ හා නායකත්ව සංවර්ධනය සඳහා කලාපීය වැඩසටහන් සහ මානව හිමිකම් හා ආගමික නිදහස වෙනුවෙන් හඬ නගන ශක්තිමත් ආසියානු කතෝලික හඬක් තවදුරටත් වර්ධනය වනු ඇතැයි තමන් අපේක්ෂා කරන බවද උන්වහන්සේ සඳහන් කළහ.

#FABC2026 #FABC #Jakarta #SynodalConversion #BridgeBuilders #ChurchInAsia #CatholicChurch #AsianBishops #RVA #RVASinhala #RadioVeritasAsia #CatholicNews #Asia