FABC 2026: ආසියාවේ දූෂණය සහ පූජකවාදය ජය ගැනීමට 'සංගමනශීලී ආධ්යාත්මිකත්වය' අවශ්යයි.
FABC 2026: ආසියාවේ දූෂණය සහ පූජකවාදය ජය ගැනීමට 'සංගමනශීලී ආධ්යාත්මිකත්වය' අවශ්යයි.
ආසියානු රදගුරු සමුළු සම්මේලනය (FABC) පෙන්වා දෙන්නේ ආසියාවේ දූෂණය සහ පූජකවාදය (Clericalism) වැනි අභියෝගවලට මුහුණ දීම සඳහා සංගමනශීලී ආධ්යාත්මිකත්වය ප්රවර්ධනය කිරීම අත්යවශ්ය බවයි.
ජූලි 20 වැනිදා ඉන්දුනීසියාවේ ජකාර්තා නුවරදී ආරම්භ වූ ආසියානු රදගුරු සමුළු සම්මේලනයේ 12 වැනි මහා සමුළුවට සමගාමීව පැවති මාධ්ය හමුවේදී, ආසියානු රදගුරුවරුන් ප්රකාශ කළේ අද ආසියානු රටවල් රැසක දැඩිව පවතින මෙම ගැටලු පිළිබඳව ගැඹුරින් මෙනෙහි කර, ආත්ම විමර්ශනයක යෙදෙන බවයි.
ආසියානු රදගුරු සමුළු සම්මේලනයේ උපසභාපති සහ සංගමනශීලීභාවය පිළිබඳ කොමිසමේ සභාපති වන කාදිනල් පැබ්ලෝ වර්ජිලියෝ ඩේවිඩ් හිමිපාණන් සඳහන් කළේ සභාවේ මෙහෙවර ඵලදායී වීමට නම් පූජකවරුන් සහ ගිහියන් අතර "හවුල් වගකීම" (Co-responsibility) අත්යවශ්ය බවයි.
"මෙහෙවර සඳහා වූ හවුල් වගකීම නිසා පැවිදි සේවකයන් ශුද්ධාත්මයාණන්ගේ අනෙකුත් දීමනා ගිහියන්ටත්, පැවිදි ජීවිතය ගතකරන්නන්ටත් ලබාදී ඇති බව පිළිගැනීමට යොමු වනු ඇත," යැයි කාදිනල් ඩේවිඩ් හිමිපාණන් පැවසීය.
ආසියාව සම්බන්ධයෙන් සංගමනශීලී සභා රැස්වීමේ අවසන් ලේඛනය පෙන්වා දෙන්නේ, පූජකවාදය ආසියාවේ සංගමනශීලීභාවය නොමැති වීමට හේතු වන ප්රධාන සාධකවලින් එකක් වන අතර, එය විශේෂයෙන්ම බලධාරීන් තුළ දක්නට ලැබෙන "හිමිකම් ඇතැයි සිතන ආකල්පය" තුළින් ප්රකාශ වන බවයි.
කාදිනල් ඩේවිඩ් හිමිපාණන් තවදුරටත් අවධාරණය කළේ, පූජකවරුන් ගිහියන්ට වඩා "උසස් කිතුනුවන්" නොවන අතර, බව්තීස්මය තුළින් සියලුදෙනාම එක හා සමාන ගෞරවයට හිමිකම් ඇති බවයි.
මේ අතර, ආසියානු රදගුරු සමුළු සම්මේලනයේ සභාපති කාදිනල් ෆිලිප් නේරි ෆෙරාඔ හිමිපාණන් පැවසුවේ ඉන්දියාවේ බව්තීස්මයේ සක්රමේන්තුව මත පදනම් වූ සහභාගිත්ව ව්යුහයන් සහ සහභාගිත්වය ශක්තිමත් කිරීම සඳහා නව එඬේරාගේ සැලැස්මක් සකස් කර ඇති බවයි.
"සංගමනශීලීභාවය යනු හුදෙක් උපායමාර්ගයක් නොව ක්රමවේදයකි. එය බව්තීස්මය මත පදනම් වූ ආධ්යාත්මිකත්වයක්. එහිදී අප සියලුදෙනාම සමානය. එහෙත් මේ ගමනේ අප සැමට තව බොහෝ දුර යාමට තිබේ," යැයි කාදිනල් ෆෙරාඔ හිමිපාණන් පැවසීය.
කාදිනල් ඩේවිඩ් හිමිපාණන් වැඩිදුරටත් පෙන්වා දුන්නේ, ඇදහිල්ලේ ප්රකාශනය සහ සමාජ වගකීම අතර සැබෑ සම්බන්ධතාවයක් ගොඩනැගීම තුළින් පද්ධතිගත දූෂණය බිඳ දැමීම ආසියානු රදගුරු සමුළු සම්මේලනයේ වැදගත් මෙහෙවරක් බවයි.
"ඇදහිල්ල ක්රියාවට නැංවීම සහ සමාජය තුළ අපගේ ක්රියාකාරකම් අතර විශාල පරතරයක් පවතී. එම සම්බන්ධතාවය ගොඩනැගීම අපගේ සදාචාරාත්මක හා ආධ්යාත්මික නායකත්වයේ වැදගත් කොටසකි," යැයි ඔහු පැවසීය.
Transparency International ආයතනය නිකුත් කළ 2025 දූෂණ සංජානන දර්ශකය (Corruption Perceptions Index - CPI) අනුව, පසුගිය දශකය පුරා ආසියාවේ බොහෝ රටවල ඉහළ මට්ටමේ දූෂණය පවතින අතර, එයට ප්රමාණවත් විසඳුම් ලැබී නොමැත.
එම වාර්තාවට අනුව ආසියානු රටවල් 31න් 21ක්ම ගෝලීය සාමාන්ය CPI ලකුණු 42ට වඩා පහළ අගයක් ලබා ඇති අතර, ඉන්දියාව, බංග්ලාදේශය සහ ඉන්දුනීසියාව ද ඒ අතර වේ.
මෙවර ආසියානු රදගුරු සමුළු සම්මේලනයේ 12 වැනි මහා සමුළුවේ තේමාව වන්නේ "සංගමනශීලී පරිවර්තනය සඳහා වූ කැඳවීම සහ ආසියාවේ පාලම් හා පාලම් තනන්නන් වීමේ මෙහෙවර" යන්නයි.
සතියක් පුරා පැවැත්වෙන මෙම සමුළුවේදී, ලොව විවිධත්වයෙන් අනූන කලාපයක් වන ආසියාව තුළ සුබාරංචිය ප්රකාශ කිරීම සඳහා නව මංපෙත් සොයා බැලීමට රදගුරුවරුන් අපේක්ෂා කරති.
මෙම මහා සමුළුවේ අවසානයේදී, ආසියාව තුළ සංගමනශීලීභාවය ක්රියාවට නැංවීම සඳහා ප්රායෝගික මාර්ගෝපදේශයක් ලෙස භාවිත කළ හැකි අවසන් ලේඛනයක් නිකුත් කිරීමට ද ආසියානු රදගුරු සමුළු සම්මේලනය සැලසුම් කර ඇත.
#XIIFABCPlenary #CardinalPabloVirgilioDavid #CardinalFilipeNeriFerrao #SynodalSpirit
#Jakarta2026 #RadioVeritasAsia #RVASinhala
