FABC මහා සමුළුව ප්රායෝගික සිතියමකින් ආසියාවේ සංගමනශීලීත්වය කරා... - මාරලිට් රදගුරු හිමිපාණන්
FABC මහා සමුළුව ප්රායෝගික සිතියමකින් ආසියාවේ සංගමනශීලීත්වය කරා... - මාරලිට් රදගුරු හිමිපාණන්
ආසියානු රදගුරු සමුළු සම්මේලනයේ (FABC) 12 වැනි මහා සමුළුව හුදෙක් සාකච්ඡාවකට සීමා නොවී, ආසියාව පුරා සංගමනශීලීත්වය ක්රියාවට නැංවීම සඳහා ප්රායෝගික මාර්ගෝපදේශයක් සැපයීම අරමුණු කරගෙන සිටින බව පිලිපීනයේ මාර්සෙලිනෝ ඇන්ටෝනියෝ ජූනි මාරලිට් හිමිපාණන් ප්රකාශ කළහ.
"සංගමනශීලී පරිවර්තනයට කැඳවීම සහ ආසියාවේ පාලම් තැනීමේ හා පාලම් තනන්නන් වීමේ මෙහෙවර" යන තේමාව යටතේ ජූලි 20 සිට 26 දක්වා ජකර්තාවේ පැවැත්වෙන සතියක මෙම මහා සමුළුව සඳහා ආසියාව පුරා සිටින කාදිනල්වරුන් සහ රදගුරුවරුන් 120කට අධික පිරිසක් එක්ව සිටිති.
ජූලි 20 වැනිදා පැවති සමාරම්භක මාධ්ය හමුවේදී සමුළුවේ නිල ප්රකාශක මාර්සෙලිනෝ ඇන්ටෝනියෝ ජූනි මාරලිට් හිමිපාණන් සඳහන් කළේ මෙම හමුව "රදගුරුවරුන්ගේ සාමාන්ය රැස්වීමකට වඩා බොහෝ වැඩි වැදගත්කමක් ඇති අවස්ථාවක්" බවයි.
"මෙය ආසියාවේ සභාවට එක්ව යාච්ඤා කිරීමටත්, එකිනෙකාට සවන් දීමටත්, කාලයේ සලකුණු විමසා බැලීමටත්, ලෝකයේ වඩාත්ම සජීවී සහ විවිධත්වයෙන් පිරි කලාපයක ශුභාරංචිය ප්රකාශ කිරීම සඳහා නව මාර්ග සෙවීමටත් ලැබුණු වැදගත් අවස්ථාවකි," යැයි එතුමා පැවසූහ.
මාරලිට් හිමිපාණන් පෙන්වා දුන්නේ FABC 50 මහා සමුළුව, 2023 බැංකොක් ලේඛනය, 2024 සංගමනශීලීත්වය පිළිබඳ ලෝක රදගුරු සභාවේ අවසාන ලේඛනය, 2025 බලාපොරොත්තුවේ ජුබිලි වසර සහ XIV ලියෝ ශුද්ධෝත්තම පියතුමාගේ ධුර කාලයේ ආරම්භයෙන් අනතුරුව මෙම සමුළුව සභාවේ ගමනේ තීරණාත්මක මොහොතක පැවැත්වෙන බවයි.
මෙම සතිය "සැබෑ සංගමනශීලී අත්දැකීමක්" ලෙස සැලසුම් කර ඇති බවත්, එය සංගමනශීලීත්වය සංකල්පයක් ලෙස සාකච්ඡා කිරීමට වඩා යාච්ඤාව, සවන් දීම සහ පොදු විමර්ශනය කේන්ද්ර කරගත් එකක් බවත් එතුමා අවධාරණය කළහ.
සහභාගිවන්නෝ දිව්ය පූජා සැමරුම්, ආධ්යාත්මික මෙනෙහි කිරීම්, "Spirit තුළ සංවාද" (Conversations in the Spirit), කලාපීය සැසි සහ වටමේස සාකච්ඡාවලට එක්වෙති. සංස්කෘතික හා ආගමික විවිධත්වය, දරිද්රතාව, සංක්රමණය, ගැටුම්, පාරිසරික අභියෝග සහ වේගවත් සමාජ වෙනස්කම්වලින් සලකුණු වන ආසියාවේ, සභාව සංගමනශීලී පරිවර්තනය ගැඹුරු කරමින් පාලම් තනන්නෙකු විය හැක්කේ කෙසේද යන්න පිළිබඳ ඔවුන්ගේ විමර්ශනය යොමු වනු ඇත.
මෙම සමුළුවේ ප්රධාන ප්රතිඵල දෙකක් ලෙස වැදගත් ලේඛන දෙකක් සකස් කෙරෙන බවද මාරලිට් හිමිපාණන් සඳහන් කළහ. පළමුවැන්න ආසියාවේ ප්රාදේශීය සභාවන්ට සංගමනශීලී ක්රියාවලිය ක්රියාත්මක කිරීම සඳහා ප්රායෝගික Vademecum මාර්ගෝපදේශයක් ලෙස භාවිත කළ හැකි අවසාන ලේඛනයයි. දෙවැන්න ආසියාවේ කතෝලිකයන්ට සංගමනශීලී අලුත් වීමේ ගමන ඉදිරියට ගෙන යාමට දිරිගන්වන පණිවිඩයකි.
සමුළුවේ විශේෂ අවස්ථා අතර XIV ලියෝ ශුද්ධෝත්තම පියතුමාගේ විශේෂ නියෝජිතයා ලෙස ඔස්වල්ඩ් ග්රේෂස් කාදිනල් හිමිපාණන්ගේ සහභාගිත්වය, ලුයිස් ඇන්ටෝනියෝ ටාග්ලේ කාදිනල් හිමිපාණන් විසින් මෙහෙයවන ආධ්යාත්මික මෙනෙහි කිරීමේ දිනය, සංගමනශීලීත්වය පිළිබඳ ලෝක රදගුරු සභාවේ ක්රියාත්මක කිරීම සම්බන්ධයෙන් මාරියෝ ග්රෙක් කාදිනල් හිමිපාණන්ගේ ප්රධාන දේශනය සහ XIV ලියෝ ශුද්ධෝත්තම පියතුමාගේ වීඩියෝ පණිවිඩය ද ඇතුළත් වේ.
සමුළුව ජකර්තාවේ අප ස්වාමිදූගේ ස්වර්ගාරෝහණ ආසන දෙව්මැදුරේ පැවැත්වෙන දිව්ය පූජාවකින් අවසන් වන අතර, ඉන් අනතුරුව සහභාගිවන්නෝ යාබද ඉස්තික්ලාල් මුස්ලිම් දේවස්ථානය වෙත පිවිසෙති. ඔවුන් ආසන දෙව්මැදුර සහ මුස්ලිම් දේවස්ථානය සම්බන්ධ කරන මිත්රත්ව උමං මාර්ගය හරහා ගමන් කරනු ලබන්නේ ඉන්දුනීසියාවේ අන්තර් ආගමික සහජීවනය පිළිබඳ කැපවීම සහ ආසියාවේ පාලම් තනන්නෙකු වීමට සභාවට ලැබී ඇති කැඳවීමේ සංකේතයක් ලෙසයි.
"මෙම හමුව සභාවේ සහභාගිත්වය, සහභාගීත්වය සහ මෙහෙවර පිළිබඳ සාක්ෂිය තවදුරටත් ශක්තිමත් කරමින්, ආසියාව පුරා සිටින කතෝලිකයන්ට තම පවුල්වල, ප්රජාවන්හි, රටවල සහ විවිධ සංස්කෘති හා ආගම් අතර පාලම් තනන්නන් වීමට ආශ්වාදයක් ලබාදෙනු ඇතැයි අපි බලාපොරොත්තු වෙමු." යැයි මාර්සෙලිනෝ ඇන්ටෝනියෝ ජූනි මාරලිට් හිමිපාණන් පැවසූහ.
කර්තෘ පිළිබඳව
ඔලිවර් සැම්සන් පිලිපීනයේ පදනම් වූ මාධ්යවේදියෙකු සහ ලේඛකයෙකි. ඔහුගේ ලිපි Radio Veritas Asia, Global Sisters Report, World Mission, CBCP News, BusinessMirror, Manila Bulletin සහ Manila Standard යන මාධ්යවල පළ වී ඇත.
#XIIFABCPlenary #FABC2026 #FABC #FederationOfAsianBishopsConferences #BishopMarcelinoAntonioMaralitJr #Synodality #BridgeBuilders #ChurchInAsia #Jakarta2026 #CatholicChurch #RadioVeritasAsia #RVASinhala
