FABC පූජක කාර්යාලය ආසියාව පුරා සංගමනශීලී පූජක අභිවෘද්ධියට ප්රමුඛත්වය දෙයි.
ආසියානු රදගුරු සමුළු සම්මේලනයේ (FABC) පූජක කාර්යාලය ආසියාවේ වඩාත් සංගමනශීලී හා ධර්මදූත මෙහෙවරක නියැලෙන සභාවක් සඳහා පූජකවරුන් සූදානම් කිරීමේ තම කැපවීම යළි අවධාරණය කළේය. එම කාර්යාලය වසර විස්සකට අධික කාලයක් පුරා ක්රියාත්මක කළ පූජක අභිවෘද්ධි වැඩසටහන් පිළිබඳ වාර්තාව FABC 12 වන මහා සමුළුවේදී ඉදිරිපත් කළේය.
2026 ජූලි 21 වැනිදා ජකර්තාහි හෝටල් මුලියාහි පැවති සැසියේදී FABC පූජක කාර්යාලයේ සභාපති අගරදගුරු උදුමාල බාලා ෂෝරෙඩ්ඩි හිමිපාණන් මෙම වාර්තාව ඉදිරිපත් කරමින්, ආසියානු සභාව මුහුණ දෙන වෙනස්වන දේවගැති අභියෝගයන්ට ප්රතිචාර වශයෙන් පූජක අභිවෘද්ධිය ශක්තිමත් කිරීම සඳහා කාර්යාලය ගෙන ඇති පියවර පැහැදිලි කළහ.
"යහපත් එඬේරාණන් වන ජේසුස් ක්රිස්තුස් වහන්සේගේ නාමයෙන් ඔබ සැමට සුබ පැතුම්," යැයි අගරදගුරු බාලා ෂෝරෙඩ්ඩි හිමිපාණන් සිය ඉදිරිපත් කිරීම ආරම්භ කළහ.
2004 ජූනි මාසයේදී පිහිටුවන ලද FABC පූජක කාර්යාලය, සම්මන්ත්රණ, උපදේශන වැඩසටහන් සහ පුහුණු සැසි මඟින් ආසියාව පුරා සිටින රදගුරු හිමිවරුන්ට, පූජකවරුන්ට සහ අධ්යාපනික ආයතනවල පූජක අභිවෘද්ධි වගකීම් දරන්නන්ට සහාය ලබාදෙයි. එහි අරමුණ වන්නේ ගැඹුරු ආධ්යාත්මික ජීවිතයක්, ධර්මදූත දැක්මක් සහ සේවක නායකත්වය ඇති පූජකවරුන් බිහිකිරීමයි.
අගරදගුරු බාලා ෂෝරෙඩ්ඩි හිමිපාණන් පැවසුවේ, පූජකවරුන් තම රදගුරු හිමිවරුන් සමඟ සමීපව සහයෝගයෙන් කටයුතු කරමින්, දුප්පතුන්, වෙනත් ආගම් අදහන්නන් සහ දේශීය සංස්කෘතීන් සමඟ ඇති ත්රිත්ව සංවාදය මත පදනම් වූ, ආසියානු සංස්කෘතීන්ට මුල් බැසගත් සහභාගිත්ව සභාවක් ගොඩනැගීමට කැපවිය යුතු බවයි.
"ආසියාවේ සභාව අපි දකින්නේ 'කුඩා රැළක්' ලෙසයි. එහෙත් එය ජීවමාන, පරිවර්තනය ඇති කරන සහ බලාපොරොත්තුවෙන් පිරුණු සභාවකි. එබැවින් පූජකවරුන් සංගමනශීලී ආත්මය මත පදනම් වූ දේවගැති හා ධර්මදූත අලුත්කරණයක් සඳහා නිරන්තරයෙන් දිරිගැන්විය යුතුය," යනුවෙන් ඔහු පැවසීය.
පසුගිය වසර 22 තුළ පූජක අභිවෘද්ධිය සඳහා ක්රියාත්මක කළ වැඩසටහන් පිළිබඳවද වාර්තාවෙන් සමාලෝචනය කෙරිණි. එහි ආරම්භය 2006 වසරේ තායිලන්තයේ හුවා හින්හි පැවති ආසියානු සන්දර්භය තුළ පූජකවරුන්ගේ මානවීය අභිවෘද්ධිය පිළිබඳ සම්මන්ත්රණයයි.
කාලයත් සමඟ දේවගැති අභියෝග වෙනස් වූ බැවින්, පෞද්ගලික හා සේවාමය දුෂ්කරතාවලට මුහුණ දෙන පූජකවරුන්ට සහාය වීම කෙරෙහිද කාර්යාලය අවධානය යොමු කළේය. 2008 වසරේදී අර්බුදවලට මුහුණ දෙන පූජකවරුන්ගේ රැකවරණය පිළිබඳ සම්මන්ත්රණයක් පැවැත්වූ අතර, තවත් වැඩසටහනක් පූජක අනන්යතාවය සහ කැඳවීමේ ප්රීතිය පිළිබඳව කැපවිය.
ඉන් අනතුරුව පූජක ආරක්ෂාව, බ්රහ්මචර්යාව, සමස්ත පූජක අභිවෘද්ධිය සහ ධර්මදූත සේවාව පිළිබඳ වැඩසටහන් රැසක් සංවිධානය කෙරිණි. COVID-19 වසංගතයෙන් පසුව, විශේෂයෙන්ම ආරක්ෂණය, සංගමනශීලීත්වය සහ පූජක අධ්යාපන ආයතන අලුත්කිරීම කෙරෙහි වැඩි අවධානයක් යොමු විය. 2022 වසරේදී Catholic Safeguarding Institute Manila සමඟ එක්ව දරුවන් සහ අවදානමට ලක්වූ පුද්ගලයන්ගේ ආරක්ෂාව ශක්තිමත් කිරීම සඳහා කටයුතු කළ අතර, 2023 සහ 2024 වසරවලදී පූජකවරුන් සහ පූජක අභිවෘද්ධි වගකීම් දරන්නන් සඳහා සංගමනශීලීත්වය පිළිබඳ පුහුණු වැඩසටහන් පවත්වන ලදී.
අගරදගුරු බාලා ෂෝරෙඩ්ඩි හිමිපාණන් සඳහන් කළේ, වර්තමානයේ කාර්යාලයේ සියලුම අභිවෘද්ධි කටයුතු සඳහා මූලික මඟපෙන්වීම සංගමනශීලීත්වය බවයි. 2025 වසරේදී ආසියාව පුරා ප්රධාන පූජක අධ්යාපන ආයතනවල ප්රධානීන් එක්කර FABC 50 ලේඛනය ආශ්රයෙන් පොදු අභිවෘද්ධි සම්පත් සකස් කළ අතර, අනාගත පූජකවරුන්ට සංගමනශීලීත්වය ජීවන රටාවක් මෙන්ම සේවා ආදර්ශයක් ලෙස වැළඳ ගැනීමට එය උපකාරී විය.
ඉදිරියේදී FABC දේව කැපවූ ජීවිත කාර්යාලය, ගිහි හා පවුල් අපෝස්තලික කාර්යාලය, අධ්යාපන හා ඇදහිලි ගොඩනැඟීමේ කාර්යාලය සහ සංගමනශීලීත්වය පිළිබඳ කොමිසම සමඟ සහයෝගීතාව තවදුරටත් ශක්තිමත් කිරීමට කාර්යාලය සැලසුම් කරයි. පරිසරය, කෘත්රිම බුද්ධිය සහ ඩිජිටල් සංස්කෘතිය වැනි නව අභියෝගවලට ප්රතිචාර දක්වන දේවධර්ම සම්පත්, දේවගැති මාර්ගෝපදේශ සහ අභිවෘද්ධි වැඩසටහන් සංවර්ධනය කිරීම එහි අරමුණ වේ.
වාර්තාව අවසන් කරමින් අවධාරණය කෙරුණේ, පූජක අභිවෘද්ධිය පූජක ජීවිතය පුරාවටම අඛණ්ඩව සිදුවිය යුතු ක්රියාවලියක් බවත්, එමඟින් දෙවියන් වහන්සේගේ ජනතාව සමඟ සමීපව ගමන් කරන, සංගමනශීලී හා ධර්මදූත සභාවකට නායකත්වය දෙන දේවගැතිවරුන් බිහිකළ හැකි බවත්ය.
කර්තෘ ගැන
අමාඩියා ප්රනාස්ටිටි සමාජ සන්නිවේදන ක්ෂේත්රයේ ක්රියාකාරිනියක් වන අතර, වර්තමානයේ ඉන්දුනීසියානු රදගුරු සමුළුවේ ලේඛන හා තොරතුරු අංශයේ ස්වාධීන දායක ලේඛිකාවක් ලෙස කටයුතු කරයි.
#XIIFABCPlenary #FABC #OfficeOfClergy #ArchbishopUdumalaBalaShowreddy #Synodality #PriestlyFormation #ChurchInAsia #BridgeBuilders #RVASinhala #RadioVeritasAsia
