FABC නියෝජිතයෝ අවසන් පණිවිඩය සහ සංගමනශීලීත්ව මාර්ගෝපදේශ රාමුව සමාලෝචනය කරති
ජකාර්තා, ඉන්දුනීසියාව – ආසියානු රදගුරු සමුළු සම්මේලනයේ (FABC) 12 වන මහා සමුළුවේ නියෝජිතයෝ ජූලි 25 දින පැවති අවසන් වැඩසටහන් සැසියේදී, මහා සමුළුවේ උරුමය හැඩගස්වන ප්රධාන ලේඛන දෙකක් සමාලෝචනය කළහ. එනම් ආසියාවේ ජනතාව වෙත නිකුත් කිරීමට නියමිත පණිවිඩය සහ සංගමනශීලීත්වය සඳහා වන Vademecum මාර්ගෝපදේශයේ රාමුව යන ලේඛන දෙකයි.
මෙම ලේඛන දෙකම සතියක් පුරා පැවති මහා සමුළුවේ මෙනෙහි කිරීම් සහ සංවාද තුළින් බිහි වූ නමුත්, ඒවායේ අරමුණු වෙනස් වේ.
ආසියාවේ ජනතාව වෙත පණිවිඩය යනු මහා සමුළුවෙන් පසු රදගුරුවරුන්ගේ මෙනෙහි කිරීම්, කැපවීම් සහ එඬේරික ආරාධනාව ප්රකාශ කරන ලේඛනයක් වන අතර, සංගමනශීලීත්වය සඳහා වන Vademecum යනු ආසියාවේ ප්රාදේශීය සභාවන්ට සංගමනශීලී සභා ජීවිතය ක්රියාත්මක කිරීමට උපකාර වන ප්රායෝගික මාර්ගෝපදේශයක් ලෙස සැලසුම් කර ඇත.
ජූලි 26 වන දින පැවැත්වීමට නියමිත අවසන් දිනයේ නිල වශයෙන් ප්රකාශයට පත් කිරීමට පෙර, නියෝජිතයෝ මෙම ලේඛන දෙක පිළිබඳව සාකච්ඡා කර යෝජනා සහ සංශෝධන ඉදිරිපත් කළහ.
සංගමනශීලීත්වය සඳහා Vademecum මාර්ගෝපදේශය
ආසියානු රදගුරු සමුළු සම්මේලනයේ සහකාර මහ ලේකම් සහ සංගමනශීලීත්ව කාර්යාලයේ විධායක ලේකම් ගරු ක්ලැරන්ස් දෙවදාස් පියතුමා Vademecum මාර්ගෝපදේශයේ යෝජිත රාමුව ඉදිරිපත් කළේය.
උන්වහන්සේ අවධාරණය කළේ මෙය සම්පූර්ණ වූ අවසන් ලේඛනයක් නොව, තවදුරටත් ඉදිරියට ගෙන යා යුතු දිගු ක්රියාවලියක ආරම්භයක් බවයි.
මෙම Vademecum මාර්ගෝපදේශය මහා සමුළුවේ දැක්ම එඬේරික ක්රියාමාර්ග බවට පරිවර්තනය කිරීමට ප්රාදේශීය සභාවන්ට උපකාර වන ප්රායෝගික සම්පතක් වනු ඇතැයි ගරු ක්ලැරන්ස් දෙවදාස් පියතුමා පැවසූහ.
එය තවත් දේවධර්ම ලේඛනයක් ලෙස නොව, තම තමන්ගේ ප්රාදේශීය යථාර්ථයන් තුළ සංගමනශීලී සභා ජීවිතය ගොඩනඟා ගැනීමට උත්සාහ කරන රදගුරුවරුන්, පූජකවරුන්, ආගමිකවරුන් සහ ගිහි විශ්වාසිකයන් සඳහා ක්රියාකාරී මාර්ගෝපදේශයක් වීමට අපේක්ෂා කෙරේ.
ජකාර්තා මහා සමුළුවෙන් පසුවද සම්මේලනය පුරා තවදුරටත් උපදේශන සහ සංවාද හරහා මෙම ලේඛනය සංවර්ධනය කෙරෙන බවත්, සම්පූර්ණ Vademecum මාර්ගෝපදේශය ලබන වසරේ අවසන් කිරීමට අපේක්ෂා කරන බවත් උන්වහන්සේ සඳහන් කළහ.
ආසියාවේ ජනතාව වෙත පණිවිඩය
ඉන් අනතුරුව නියෝජිතයෝ ආසියාවේ ජනතාව වෙත නිකුත් කිරීමට නියමිත පණිවිඩය පිළිබඳව අවධානය යොමු කළහ.
මෙම ලේඛනය ආසියාවේ කතෝලික විශ්වාසිකයන්ට සහ යහපත් කැමැත්තක් ඇති සියලු ජනතාවට මහා සමුළුවේ ආධ්යාත්මික මෙනෙහි කිරීම් සහ එඬේරික කැපවීම් සන්නිවේදනය කිරීම සඳහා සකස් කර ඇත.
කෙටුම්පත් කමිටුවේ සභාපති ගිල්බට් ගාර්සෙරා අගරදගුරු හිමිපාණන් එහි කෙටුම්පත ඉදිරිපත් කරමින් සඳහන් කළේ, එය ඡේද දහයකින් සමන්විත සංක්ෂිප්ත ලේඛනයක් ලෙස සැලසුම් කර ඇති බවයි.
මෙම පණිවිඩය ආසියාවේ ජනතාවට බලාපොරොත්තුවක් ලබාදීමටත්, රදගුරුවරුන් තම ප්රාදේශීය සභාවන් වෙත රැගෙන යන කැපවීම් ප්රකාශ කිරීමටත් අරමුණු කර ඇති බව උන්වහන්සේ පැවසූහ.
එමෙන්ම මෙම පණිවිඩය විවිධ භාෂාවලට පරිවර්තනය කරමින්, වීඩියෝ, පොඩ්කාස්ට්, තොරතුරු රූප (infographics) සහ අනෙකුත් ඩිජිටල් මාධ්ය ඔස්සේ පුළුල්ව බෙදා හැරීමටද අපේක්ෂා කෙරේ.
සංගමනශීලීත්වය, එකමුතුකම සහ මෙහෙවර අවධාරණය කරමින්
නියෝජිතයෝ කෙටුම්පත් පණිවිඩය ඡේදයෙන් ඡේදය සමාලෝචනය කරමින් භාෂාමය සංශෝධන, දේවධර්මීය පැහැදිලි කිරීම් සහ ශුද්ධ ලියවිලිමය යොමු කිරීම් ශක්තිමත් කිරීම සඳහා යෝජනා ඉදිරිපත් කළහ.
සංවාදය තුළ විශේෂයෙන් අවධානය යොමු වූයේ සංගමනශීලීත්වය, එකමුතුකම, සහභාගිත්වය සහ මෙහෙවර යන මහා සමුළුවේ ප්රධාන තේමාවන් ලේඛනය තුළ නිසි ලෙස පිළිබිඹු වන බව සහතික කිරීමයි.
එමෙන්ම සංවාදය, සාමය ගොඩනැඟීම, මැවිල්ල රැකබලා ගැනීම, තරුණයන්, සහ සමාජයේ පරිධියේ ජීවත් වන ජනතාව සමඟ සභාවේ ගමන් කිරීම පිළිබඳ යොමු කිරීම් තවදුරටත් ශක්තිමත් කළ යුතු බව රදගුරුවරු කිහිප දෙනෙක් යෝජනා කළහ.
"ඔබ මහත් දේ දකින්නෙහිය" (ජොහාන් 1:50) යන තේමාව යටතේ සකස් කෙරෙන මෙම පණිවිඩය, බෙදීම්, ගැටුම්, අසමානතාව, පාරිසරික අභියෝග සහ වේගවත් තාක්ෂණික වෙනස්කම් හමුවේ ආසියාවේ සභාව පාලම් තනන්නෙකු ලෙස ඉදිරිපත් කරයි.
මෙම ලේඛන දෙක එක්ව ආසියානු රදගුරු සමුළු සම්මේලනයේ 12 වන මහා සමුළුවේ කෙටි කාලීන සහ දිගු කාලීන අරමුණු පිළිබිඹු කරයි. ආසියාවේ ජනතාව වෙත පණිවිඩය සභාවේ එඬේරික දැක්ම ප්රකාශ කරන අතර, සංගමනශීලීත්වය සඳහා වන Vademecum මාර්ගෝපදේශය ජකාර්තා මහා සමුළුවෙන් පසුවද ප්රාදේශීය සභාවන්ට සංගමනශීලී ගමන ඉදිරියට ගෙන යාම සඳහා ප්රායෝගික මඟපෙන්වීමක් ලබාදෙනු ඇත.
කතුවරයා පිළිබඳව
ගේබ්රියෙල් අබ්ඩි සුසන්තෝ ඉන්දුනීසියාවේ ප්රවීණ මාධ්යවේදියෙකු වන අතර, වර්තමානයේ Vatican News හි ඉන්දුනීසියානු සංස්කරණයේ කර්තෘ මණ්ඩල සාමාජිකයෙකු ලෙස සේවය කරයි.
#FABCXII #FABC2026 #AsianChurch #FederationOfAsianBishopsConferences #SynodalChurch #Synodality #Vademecum #ChurchInAsia #BridgeBuilders #Communion #Mission #ClosingMass #RVASinhala #RadioVeritasAsia
