FABC දේවධර්ම කාර්යාලය: ආසියානු දේවධර්මය සංවාදයෙන් සහ ජනතාවගේ දෛනික ජීවිතයෙන් බිහි විය යුතුයි.

FABC දේවධර්ම කාර්යාලය: ආසියානු දේවධර්මය සංවාදයෙන් සහ ජනතාවගේ දෛනික ජීවිතයෙන් බිහි විය යුතුයි.

ජකර්තා, ඉන්දුනීසියාව – ආසියාවේ දේවධර්මය පන්තිකාමරවලට සහ ශාස්ත්‍රීය විවාදවලට පමණක් සීමා නොවී, ජනතාවගේ සැබෑ ජීවිත අත්දැකීම් තුළින් වර්ධනය විය යුතු බව ආසියානු රදගුරු සමුළු සම්මේලනයේ (FABC) දේවධර්ම කටයුතු කාර්යාලය (Office of Theological Concerns – OTC) ජූලි 21 වැනිදා ජකර්තාහි හෝටල් මුලියාහි පැවති FABC XII මහ සමුළුවේදී අවධාරණය කළේය.

කාර්යාලයේ වාර්තාව ඉදිරිපත් කළ ඉන්දුනීසියාවේ පංකල් පිනැං රදගුරු ඇඩ්‍රියානුස් සුනාර්කෝ, OFM හිමිපාණන්, FABC දේවධර්ම කටයුතු කාර්යාලයේ සභාපතිවරයා ලෙස පැවසුවේ, දේවධර්මය සභාවේ මෙහෙවරට සහාය විය යුත්තේ ජනතාවට සවන් දීම, දේශීය සංස්කෘතීන් සමඟ සංවාදයට පිවිසීම සහ ආසියාවේ කාලයේ සලකුණු හඳුනා ගැනීම තුළින් බවයි.

ඔහු දේවධර්මවේදීන් හුදෙක් ශාස්ත්‍රඥයන් ලෙස නොව, "එකට ගමන් කරන සහචරයන්" ලෙස විස්තර කළේය. එනම්, ආගමික විවිධත්වයෙන්, පුරාණ සංස්කෘතීන්ගෙන්, වේගවත් නවීකරණයෙන් සහ සංකීර්ණ සමාජ අභියෝගවලින් පිරුණු ආසියාවේ යථාර්ථයන් තුළ ශුභාරංචිය කෙසේ කතා කරන්නේද යන්න සභාවට තේරුම් ගැනීමට උපකාර කරන අය ලෙසය.

මෙම ඉදිරිපත් කිරීම මගින් FABC ආරම්භ කළ දා සිට වසර 50කට අධික කාලයක් පුරා පවත්වාගෙන ආ මූලික දැක්ම යළිත් තහවුරු කෙරිණි. එනම්, ආසියාවේ සභාව සිය ජනතාව, සංස්කෘතීන් සහ ආගමික සම්ප්‍රදායන් සමඟ සංවාදය තුළින් තමන්ගේම දේවධර්මීය හඬ ගොඩනඟා ගත යුතු බවයි.

වෙනත් කලාපවල නිර්මාණය වූ දේවධර්මීය අදහස් හුදෙක් ආනයනය කරනවා වෙනුවට, සැබෑ ආසියානු දේවධර්මයක් බිහි විය යුත්තේ ප්‍රාදේශීය සභාවන්ගේ ජීවිත අත්දැකීම් තුළින් බවත්, එය කතෝලික සභාවේ විශ්වීය සම්ප්‍රදායට විශ්වාසවන්තව පැවතිය යුතු බවත් කාර්යාලය සඳහන් කළේය. දෙවන වතිකානු කවුන්සිලයේ Ad Gentes ලේඛනයෙන් ආභාෂය ලැබූ OTC කාර්යාලය, තම තමන්ගේ දේවගැති හා සංස්කෘතික පසුබිම්වලට ගැළපෙන දේවධර්ම සංවර්ධනය කිරීමට ආසියාවේ රදගුරු සමුළුවලට අඛණ්ඩව දිරිගන්වයි.

වාර්තාවෙන් කාර්යාලයේ සහයෝගීතාමක ස්වභාවයද ඉස්මතු කෙරිණි. ඉන්දුනීසියාව, ඉන්දියාව, ජපානය, මැලේසියාව, පිලිපීනය, දකුණු කොරියාව, ශ්‍රී ලංකාව, තායිවානය, තායිලන්තය, වියට්නාමය සහ හොංකොං යන රටවල දේවධර්මවේදීන් එකට එක්කරමින් OTC ආසියානු මට්ටමේ දේවධර්මීය මෙනෙහි කිරීමේ සහ විචාර බුද්ධියේ ජාලයක් බවට පත්ව තිබේ.

පසුගිය දශක දෙක තුළ මෙම කාර්යාලය ආගමික නිදහස, ජීවිතයේ ගෞරවය, පරිසරය සහ කොවිඩ්-19 වසංගතයට සභාවේ ප්‍රතිචාරය වැනි මාතෘකා පිළිබඳ අධ්‍යයන ග්‍රන්ථ රැසක් ප්‍රකාශයට පත් කර ඇත. එහි නවතම ප්‍රකාශනය වන The Asian Face of Synodality (FABC Papers 191) ග්‍රන්ථය, සංගමනශීලී ගමන ආසියාවේ සංස්කෘතික, සමාජීය සහ ආගමික යථාර්ථයන් මගින් හැඩගැසෙන ආකාරය විමර්ශනය කරයි.

මෙම ප්‍රකාශන පිටුපස ඇති ක්‍රියාවලියද සංගමනශීලී බව වාර්තාව අවධාරණය කළේය. දේවධර්මවේදීන් පර්යේෂණ ආරම්භ කිරීමට පෙර යාච්ඤාව, නිශ්ශබ්දතාව සහ පොදු විචාර බුද්ධියෙන් ආරම්භ කර, ඉන් අනතුරුව කෙටුම්පත් හුවමාරු කරමින් සහ එක්ව සංශෝධනය කරමින් කටයුතු කරන බවත්, එය "සංගමනශීලී දේවධර්මකරණය" ලෙස හඳුන්වන බවත් සඳහන් විය.

වාර්තාවේ ප්‍රබලතම රූපකයක් වූයේ The Asian Face of Synodality ග්‍රන්ථයේ එම්මාවුස් මාර්ගයේ ගිය ගෝලයන්ගේ ශුභාරංචි කථාවයි. එමගින් සභාවට ආරාධනා කරන්නේ "සීතල වූ හදවත්, සීතල බැල්ම සහ සීතල පාද" වලින්, ක්‍රිස්තුස් වහන්සේ නිසා ගිනිගත් හදවත්, හමුවීම තුළින් විවෘත වූ දෑස් සහ මෙහෙවර සඳහා සූදානම් වූ පාද කරා ගමන් කරන ලෙසයි.

OTC කාර්යාලයට අනුව, සංගමනශීලී බව යනු සභා පාලනයේ නව ආකෘතියක් පමණක් නොව, ක්‍රිස්තුස් වහන්සේ සමඟ එකට ගමන් කරන ප්‍රජාවක් බවට සභාව පරිවර්තනය කරන ආධ්‍යාත්මික හැරීමකි.

දේවධර්මය හැඩගැසෙන්නේ පර්යේෂණවලින් පමණක් නොව, පොදු යාච්ඤාවෙන්, දිව්‍ය පූජාවෙන්, සහෝදරත්වයෙන් සහ එකිනෙකාට සවන් දීමෙන් බවද වාර්තාව අවධාරණය කළේය. සැබෑ දේවධර්මීය මෙනෙහි කිරීම සඳහා මෙම අත්දැකීම් අත්‍යවශ්‍ය පදනම් බව එහි සඳහන් විය.

“ඔබ මීටත් වඩා මහත් දේ දකින්නෙහිය” (ජොහාන් 1:50): සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර යන තේමාව යටතේ FABC XII මහ සමුළුව ඉදිරියට යද්දී, දේවධර්ම කටයුතු කාර්යාලය යළිත් තහවුරු කළේ, කතා කිරීමට පෙර සවන් දෙන, ඉගැන්වීමට පෙර ඉගෙන ගන්නා සහ ආසියාවේ ජනතාව සමඟ එක්ව ශුභාරංචිය ප්‍රකාශ කරන, සැබෑ ආසියානු දේවධර්මයක් ගොඩනැගීමට තම කැපවීමයි.

කර්තෘ ගැන:
ගේබ්‍රියෙල් අබ්ඩි සුසන්තෝ ඉන්දුනීසියාවේ ප්‍රවීණ මාධ්‍යවේදියෙකි. ඔහු දැනට Vatican News ඉන්දුනීසියානු කර්තෘ මණ්ඩලයේ සේවය කරයි.

#XIIFABCPlenary #FederationOfAsianBishopsConferences #FABCOTC #BishopAdrianusSunarko #AsianTheology #Synodality #TheologicalConcerns #ChurchInAsia #RVASinhala #RadioVeritasAsia