FABC ඥානකාන්තියේදී ‘ආත්මයාණන් තුළ සංවාදය’ සංගමනශීලී පිළිවෙතක් ලෙස අත්දකියි.
ජූලි 22 වැනිදා ආසියානු රදගුරු සමුළු සම්මේලනයේ (FABC) XII මහ සමුළුවට සමගාමීව කාදිනල් ලුයිස් අන්තෝනියෝ ටැග්ලේ හිමිපාණන් විසින් මෙහෙයවන ලද එක්දින ආධ්යාත්මික මෙනෙහි කිරීම, සාම්ප්රදායික ආධ්යාත්මික දේශනයකින් ඔබ්බට ගොස් “ආත්මයාණන් තුළ සංවාදය” (Conversation in the Spirit) නම් සංගමනශීලී ක්රමවේදය ප්රායෝගිකව අත්විඳීමේ අවස්ථාවක් බවට පත්විය.
ජකර්තාහි හෝටල් මුලියා හි වන්ඩා ශාලාවේ පැවති මෙම පැයකුත් අඩක පමණ වූ සැසිය, දෙවියන් වහන්සේගේ වචනයෙන් ගොඩනැඟුණු ගෝලයන් ලෙසත්, සභාවේ මෙහෙවර හා එක්සත්කම වෙනුවෙන් "පාලම්" වීමට කැඳවනු ලැබූවන් ලෙසත් ජීවත් වීමට කාදිනල් ටාග්ලේ හිමිපාණන් කළ ආරාධනයෙන් අනතුරුව ආරම්භ විය.
මෙම "ආත්මයාණන් තුළ සංවාදය" සැසිය මෙහෙයවනු ලැබුවේ FABC සංගමනශීලීත්වය පිළිබඳ කොමිසමේ සාමාජිකාවක් වන ආචාර්ය ක්රිස්ටිනා කෙන්ග් විසිනි. ඇය එය සාකච්ඡාවක් හෝ විවාදයක් නොව, "ප්රජාත්මක යාච්ඤාවක්" ලෙස හැඳින්වූවාය.
සැසිය ආරම්භයේ සිටම සහභාගිවූවෝ නිශ්ශබ්දතාවයට පිවිසියහ. මෝසෙස් ගිනිගෙන දැල්වෙන කටු පඳුර අසල දෙවියන් වහන්සේ හමු වූ අවස්ථාව සිහිපත් කරමින්, දෙවියන් වහන්සේ ඉදිරියෙහි සහ එකිනෙකා ඉදිරියෙහි "සපත්තු ගලවා තැබීමට" ආත්මිකව ආරාධනා කළ ආචාර්ය කෙන්ග්, එමඟින් ශුද්ධ භූමියකට පිවිසීමත්, සභාව තුළත්, එකිනෙකාගේ ජීවිත අත්දැකීම් තුළත් දෙවියන් වහන්සේගේ වැඩසිටීම හඳුනාගැනීමත් සංකේතවත් වන බව පැහැදිලි කළාය.
ඇය පැවසුවේ, "ආත්මයාණන් තුළ සංවාදය" යනු කලින් තීරණය කළ නිගමන රැගෙන නොඑන, ශුද්ධාත්මයාණන්ගේ මඟපෙන්වීමට සවන්දීම, යාච්ඤාව සහ මෙනෙහි කිරීම තුළින් විවෘත වන හවුල් ගමනක් බවයි.
කාදිනල් ටාග්ලේ හිමිපාණන්ගේ දේශනය මත පදනම් වූ මෙම ක්රියාවලියේදී සහභාගිවූවන්ගෙන් ප්රශ්න දෙකක් පිළිබඳ මෙනෙහි කිරීමට ඉල්ලා සිටියේය. "පාලම්" වීමට යන ගමනේදී තමන් මුහුණ දුන් අභියෝග සහ අවස්ථා මොනවාද? මෙහෙවර සහ එක්සත්කම සඳහා පාලම් වීම පිළිබඳ යේසුස් වහන්සේගෙන් ඉගෙන ගැනීමට ඔවුන් අපේක්ෂා කරන්නේ කුමක්ද?
මෙම ක්රියාවලිය අදියර තුනකින් සමන්විත විය.
පළමු වටයේදී සෑම සහභාගිවූවකුම තම පෞද්ගලික යාච්ඤාවේ පල බෙදාගත් අතර, අනෙක් අය කිසිදු බාධාවකින්, අදහස් දැක්වීමකින් හෝ ප්රතිචාරයකින් තොරව සවන් දුන්හ. මෙහි අවධානය යොමු වූයේ තර්ක ඉදිරිපත් කිරීම නොව, යාච්ඤාවේදී හදවතට ලැබුණු අත්දැකීම් අවංකව බෙදාගැනීමයි.
මෙම ක්රියාවලියේ හදවත වූයේ සවන්දීමයි. වචනවලට පමණක් නොව, ඒවා පිටුපස තිබූ හැඟීම් සහ ආත්මික චලනයන්ටද සවන් දීමට සහභාගිවූවන් දිරිමත් කෙරිණි. අදහස්වල වෙනස්කම් හේතුවෙන් ආතතීන් ඇති වූවත්, විවෘතභාවයෙන්, ප්රේමයෙන්, කුතුහලයෙන් සහ ඉගෙන ගැනීමට ඇති කැමැත්තෙන් ඒවා පිළිගැනීමට ඔවුන්ට ආරාධනා කෙරිණි.
සෑම බෙදාගැනීමක් අවසානයේම නිශ්ශබ්ද මෙනෙහි කිරීමක් පැවැත්විණි. එහිදී තම හදවත ස්පර්ශ කළ දේ, අභියෝගයට ලක් කළ දේ සහ තමන් සැබවින්ම සවන් දුන්නේද යන්න පිළිබඳව සහභාගිවූවෝ මෙනෙහි කළහ.
දෙවන වටයේදී ඔවුන් තම අදහස් නැවත නොකීහ. ඒ වෙනුවට, අනෙක් අයට සවන් දීම තුළ තමන්ගේ හදවත කෙසේ ස්පර්ශ වූයේද යන්න බෙදාගත්හ. මෙහි අවධානය යොමු වූයේ පෞද්ගලික අදහස් ප්රකාශ කිරීම නොව, ශුද්ධාත්මයාණන් අනෙක් අයගේ අත්දැකීම් තුළින් ක්රියා කරන ආකාරය හඳුනාගැනීමයි.
තවත් නිශ්ශබ්ද මෙනෙහි කිරීමකින් අනතුරුව, තෙවන හා අවසන් වටයේදී කණ්ඩායම තුළ ශුද්ධාත්මයාණන් හෙළිදරව් කළ බව ඔවුන් විශ්වාස කළ ආත්මික චලනයන් හඳුනාගත් අතර, එක්ව අත්දැකීම සමාලෝචනය කර පොදු අවබෝධයන් ඉස්මතු කළහ.
මෙම ක්රමවේදයේ අරමුණ වන්නේ සංගමනශීලී සභාවක මූලික ලක්ෂණයක් වන සවන්දීමේ සංස්කෘතිය වර්ධනය කිරීමයි. විවාදයකින් හෝ බහුතර ඡන්දයකින් එකඟතාවයකට පැමිණීම වෙනුවට, යාච්ඤාව, නිශ්ශබ්දතාව, අවධානයෙන් සවන්දීම සහ අන්යෝන්ය ගෞරවය තුළින් දෙවියන් වහන්සේගේ කැමැත්ත එක්ව විචාර බුද්ධියෙන් හඳුනාගැනීම මෙහි අරමුණ විය.
කාදිනල් ටාග්ලේ හිමිපාණන්ගේ ඥානකාන්තියෙන් අනතුරුව මෙම "ආත්මයාණන් තුළ සංවාදය" පැවැත්වීම තුළින්, උදෑසන ලැබුණු පණිවිඩය ප්රායෝගිකව ජීවත් කරවීමට සංවිධායකයෝ නියෝජිතයන්ට අවස්ථාව ලබාදුන්හ. මෙහෙවර හා එක්සත්කම සඳහා පාලම් වීමට ලැබුණු කැඳවීම පිළිබඳ මෙනෙහි කළ රදගුරු හිමිවරුන්, පූජකවරුන්, දේව කැපවූවන් සහ ගිහි නියෝජිතයන්, එකිනෙකාට ගැඹුරින් සවන් දෙමින්, ශුද්ධාත්මයාණන්ගේ මඟපෙන්වීම යටතේ සිය හවුල් විචාර බුද්ධිය ගැඹුරු කරමින් එම කැඳවීම ජීවිතයට නැංවූහ.
කර්තෘ ගැන
ගේබ්රියෙල් අබ්ඩි සුසන්තෝ ඉන්දුනීසියාවේ ප්රවීණ මාධ්යවේදියෙකු වන අතර, වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සාමාජිකයෙකු ලෙස සේවය කරයි.
#XIIFABCPlenary #FABC #CardinalLuisAntonioTagle #Recollection #ConversationInTheSpirit #SynodalListening #Synodality #BridgeBuilders #ChurchInAsia #RVASinhala #RadioVeritasAsia
