FABC ජන සන්නිවේදන කාර්යාලය ඩිජිටල් සුබාරංචි ප්රකාශනයේ ප්රගතිය ඉදිරිපත් කරයි.
ආසියානු රදගුරු සමුළු සම්මේලනයේ (FABC) 12 වැනි මහා සමුළුවේ පළමු දිනයේදී සමුළුවේ කටයුතු මෙහෙයවන ප්රධාන කමිටු සහ නිලධාරීන් තෝරා පත්කර ගැනීම සඳහා ප්රථම වරට ඉලෙක්ට්රොනික ඡන්ද ක්රමයක් භාවිතයට ගනිමින් FABC ඉතිහාසයේ නව පියවරක් තැබීය.
ජූලි 21 වැනිදා ඉන්දුනීසියාවේ ජකර්තා නුවර Hotel Mulia Jakarta හි පැවති මෙම ඡන්ද විමසීමේදී, අවසන් ලේඛනය සකස් කිරීමේ කමිටුව, අවසන් පණිවිඩය සකස් කිරීමේ කමිටුව සහ සමුළුවේ සභාපති මණ්ඩලය (Presiding Officers) මාර්ගගත ඡන්ද ක්රමයක් ඔස්සේ තෝරා පත්කර ගනු ලැබීය. FABC මහා සමුළුවකදී මෙම ක්රමය භාවිත කළ පළමු අවස්ථාව මෙයයි.
මෙම ඉලෙක්ට්රොනික ඡන්ද ක්රමය ඉන්දුනීසියානු රදගුරු සමුළුවේ (KWI) සන්නිවේදන කාර්යාලය සහ Radio Veritas Asia (RVA) මාධ්ය අංශයේ සහාය ඇතිව සමුළුවේ මාධ්ය කණ්ඩායම විසින් සංවර්ධනය කර මෙහෙයවනු ලැබීය.
Google Forms පද්ධතිය ඔස්සේ රදගුරු හිමිවරුන් සිය ජංගම දුරකථන භාවිතයෙන් ඡන්දය ප්රකාශ කළ අතර, ඡන්දය ආරම්භ කිරීමට පෙර ප්රධාන තිරයේ ප්රදර්ශනය කළ QR කේතයක් ස්කෑන් කර ලියාපදිංචි විය. පද්ධතිය භාවිත කිරීමේදී ගැටලු ඇති වූ නියෝජිතයන්ට සන්නිවේදන කණ්ඩායමේ ස්වේච්ඡා සේවකයන් සහාය ලබා දුන්හ.
ඡන්ද විමසීමේ නිලධාරියා ලෙස කටයුතු කළේ FABC උප සභාපති කාදිනල් පබ්ලෝ වර්ජිලියෝ ඩේවිඩ් හිමිපාණන් ය. එක් එක් ඡන්ද වටයට පෙර තෝරා පත්කරන කමිටුව පිළිබඳ පැහැදිලි කිරීමක් සිදු කළ එතුමා, අපේක්ෂකයන් සහ ඡන්දය ප්රකාශ කිරීමට හිමිකම් ඇති නියෝජිතයන් හඳුන්වා දී, ඡන්දය අවසන් වූ වහාම ප්රතිඵල ප්රකාශයට පත් කළේය.
සම්පූර්ණ ඡන්ද විමසීම මිනිත්තු 30ක පමණ කාලයක් තුළ අවසන් වූ අතර, සාම්ප්රදායික කඩදාසි ඡන්ද ක්රමයකට හෝ අත් ඔසවා ඡන්දය ප්රකාශ කිරීමේ ක්රමයකට වඩා මෙය කාර්යක්ෂම බව සංවිධායකයෝ සඳහන් කළහ.
කෙසේ වෙතත්, ඡන්ද විමසීම ආරම්භ වීමට පෙර ක්රියාපටිපාටිය සම්බන්ධ ප්රශ්නයක් මතු විය.
පිලිපීනයේ Caceres අගරදගුරු පදවියේ රෙක්ස් ඇන්ඩෲ ක්ලෙමන්ට් ඇලර්කොන් අගරදගුරු හිමිපාණන් පෙන්වා දුන්නේ FABC ව්යවස්ථාව අනුව ඡන්දය කඩදාසි පත්රිකාවක් මගින් හෝ අත් ඔසවා ප්රකාශ කළ හැකි බව පමණක් සඳහන් වන අතර, ඉලෙක්ට්රොනික ඡන්ද ක්රමය පිළිබඳ විශේෂ සඳහනක් නොමැති බවයි. එබැවින් එම ක්රමය භාවිතයට ගැනීමට පෙර සමුළුවේ අනුමැතිය ලබාගත යුතු බව එතුමා ප්රකාශ කළේය.
එම යෝජනාව විධිමත් යෝජනාවක් ලෙස භාරගත් කාදිනල් පබ්ලෝ වර්ජිලියෝ ඩේවිඩ් හිමිපාණන්, එය ස්ථිර කිරීමෙන් අනතුරුව කිසිදු විරෝධයක් නොලැබූ බැවින් සමුළුවේ ඒකමතික අනුමැතියෙන් ඉලෙක්ට්රොනික ඡන්ද ක්රමය භාවිතයට ගැනීමට අවසර ලබා දුන්නේය.
ඊට පෙර, FABC සහකාර මහලේකම් ගරු ක්ලැරන්ස් දේවදාස් පියතුමා තේරී පත්වන කමිටු තුනේ වගකීම් පිළිබඳ පැහැදිලි කළේය. සමුළුවේ ප්රධාන ප්රතිඵල ලෙස ආසියාවේ සංගමනශීලීත්වය සඳහා වන Vademecum මාර්ගෝපදේශය සහ FABC 12 වැනි මහා සමුළුවේ අවසන් පණිවිඩය සකස් කිරීමට නියමිත බව එතුමා සඳහන් කළේය.
අවසන් ලේඛනය සකස් කිරීමේ කමිටුව සඳහා තේරී පත්වූයේ කාදිනල් තාර්සිසියෝ ඉසාවෝ කිකුචි හිමිපාණන්, කාදිනල් ෆිලිපේ නේරි ෆෙරාඕ හිමිපාණන්, කාදිනල් පබ්ලෝ වර්ජිලියෝ ඩේවිඩ් හිමිපාණන් සහ ඇන්තනි ජේම්ස් කෝකොරන් රදගුරු හිමිපාණන් ය.
අවසන් පණිවිඩය සකස් කිරීමේ කමිටුව සඳහා කාදිනල් ස්ටීවන් චව් සෝ-යන් හිමිපාණන්, කාදිනල් ඇන්තනි පූලා හිමිපාණන්, ජූලියන් ලියෝ බෙන්ග් කිම් අගරදගුරු හිමිපාණන් සහ ගිල්බට් ඒ. ගාර්සෙරා අගරදගුරු හිමිපාණන් තේරී පත් වූහ.
එමෙන්ම සොක්රටීස් බී. විලේගස් අගරදගුරු හිමිපාණන්, බෙජෝයි නයිසෙෆොරස් ඩී'ක්රූස් අගරදගුරු හිමිපාණන් සහ ඇන්ටෝනියස් සුබියාන්ටෝ බුන්ජමින් රදගුරු හිමිපාණන් Presiding Officers ලෙස තේරී පත් වූහ. ඔවුන් FABC සභාපති, උප සභාපති සහ මහලේකම් සමඟ එක්ව සමුළුවේ දෛනික කටයුතු මෙහෙයවන Steering Committee හි සාමාජිකයන් ලෙස කටයුතු කරනු ඇත.
මෙම මැතිවරණයත් සමඟ "සංගමනශීලී පරිවර්තනය සහ ආසියාවේ පාලම් තැනීමේ මෙහෙවර" යන තේමාව යටතේ පැවැත්වෙන 12 වැනි FABC මහා සමුළුවේ මූලික සාකච්ඡා නිල වශයෙන් ආරම්භ විය.
ඒ සමඟම, ඉලෙක්ට්රොනික ඡන්ද ක්රමය හඳුන්වාදීම මගින් සංගමනශීලීත්වයේ මූලික වටිනාකම් වන සහභාගීත්වය, විනිවිදභාවය සහ පොදු විචාරණය ආරක්ෂා කර ගනිමින් නව තාක්ෂණය භාවිතයට ගැනීමට FABC දක්වන සූදානම ද ප්රදර්ශනය විය.
කර්තෘ ගැන:
Amadea Pranastiti ඉන්දුනීසියානු රදගුරු සමුළුවේ ලේඛන හා තොරතුරු අංශයේ නිදහස් දායකයෙකු ලෙස කටයුතු කරන සමාජ සන්නිවේදන ක්රියාකාරිනියකි.
#XIIFABCPlenary #FederationOfAsianBishopsConferences #HotelMuliaJakarta #SynodCommittees #RVASinhala #RadioVeritasAsia #FABC2026
