FABC ගිහි හා පවුල් අපෝස්තලික කාර්යාලය: සංගමනශීලී සභාවක පදනම ගිහි නායකත්වය යි.
ආසියානු රදගුරු සමුළු සම්මේලනයේ (FABC) ගිහි හා පවුල් අපෝස්තලික කාර්යාලය (Office of Laity and the Family – OLF) සභාවේ මෙහෙවර තුළ පවුල්, කාන්තාවන්, තරුණයන් සහ ගිහි විශ්වාසීන්ගේ වඩාත් ක්රියාකාරී සහභාගිත්වය අත්යවශ්ය බව අවධාරණය කළේය.
මෙම වාර්තාව ජූලි 21 වැනිදා ජකර්තාවේ හෝටල් මුලියා හි පැවති ආසියානු රදගුරු සමුළු සම්මේලනයේ 12 වන මහා සමුළුව වෙත ඉදිරිපත් කෙරිණි.
වාර්තාව ඉදිරිපත් කරමින් බංග්ලාදේශයේ බරිසාල් රදගුරු පදවියේ රදගුරු එම්මානුවෙල් කේ. රොසාරියෝ හිමිපාණන්, ගිහි හා පවුල් අපෝස්තලික කාර්යාලයේ සභාපතිවරයා ලෙසත්, එහි විධායක ලේකම් මොමෝකෝ නිෂිමුරා සහෝදරිය ලෙසත්, ආසියාව පුරා පවුල් ශක්තිමත් කිරීම, ගිහි නායකත්වය වර්ධනය කිරීම සහ සංගමනශීලීත්වය ප්රවර්ධනය කිරීම සඳහා ක්රියාත්මක වන එඬේර වැඩසටහන් පිළිබඳව පැහැදිලි කළහ.
සංගමනශීලී පරිවර්තනය ආරම්භ වන්නේ ව්යුහමය වෙනස්කම්වලින් නොව, ඇදහිල්ල තුළ එකට ගමන් කරන ජනතාවගෙන් බව මෙම වාර්තාවෙන් යළිත් අවධාරණය කෙරිණි.
ආසියාවේ සභාවේ අනාගතය රඳා පවතින්නේ රදගුරුවරුන්, පූජකවරුන් සහ පැවිද්දන් මත පමණක් නොව, තම නිවෙස්වල, පරිසම්වල සහ ප්රජාවන් තුළ ශුභාරංචිය ජීවිතයෙන් සාක්ෂි දරන ගිහි කතෝලිකයන්ගේ ක්රියාකාරී සහභාගිත්වය මතද බව වාර්තාව අවධාරණය කළේය.
ගිහි හා පවුල් අපෝස්තලික කාර්යාලය සිය එඬේර දැක්ම පුළුල් කරමින් පවුල්, කාන්තාවන්, තරුණයන්, ගිහි විශ්වාසීන් සහ මූලික සභා ප්රජාවන් (Basic Ecclesial Communities – BECs) දෙවියන් වහන්සේගේ ජනතාවගේ එකිනෙකට සම්බන්ධ ප්රකාශනයන් ලෙස සලකා, සභාවේ මෙහෙවර තුළ ඔවුන්ගේ සුවිශේෂී දායකත්වය ශක්තිමත් කිරීමට කටයුතු කර ඇත.
කාර්යාලයේ ප්රධාන වැඩසටහන් අතරින් එකක් වන්නේ 2023 FABC බැංකොක් ලේඛනය පදනම් කරගත් විවාහ ජීවිතය සඳහා වූ කැටිකුමෙනාත් මාර්ගෝපදේශ පිළිබඳ සම්මන්ත්රණ-වැඩමුළුවයි. විවාහයට පෙර ලබාදෙන මූලික උපදේශනවලට පමණක් සීමා නොවී, විවාහක යුවළයන්ට අඛණ්ඩ ආධ්යාත්මික සහයෝගය ලබාදීම තුළින් වේගයෙන් වෙනස් වන සමාජය තුළ ශුභාරංචියේ ජීවමාන සාක්ෂිකරුවන් බවට ඔවුන් පත් කිරීම එහි අරමුණයි.
එමෙන්ම "අද ආසියාවේ ක්රිස්තියානි පවුලේ මෙහෙවර" යන තේමාව යටතේ සංගමනශීලී සමුළුවක් ද සංවිධානය කර තිබුණි. සංක්රමණය, ආර්ථික අවිනිශ්චිතතාව, සංස්කෘතික වෙනස්කම් සහ අන්තර් ආගමික යථාර්ථයන්ට මුහුණ දෙන පවුල්වල ජීවිත අත්දැකීම්වලට සවන් දීමට එමඟින් ප්රාදේශීය සභාවන් දිරිමත් කෙරිණි. පවුල් එඬේර සේවයේ ලබන්නන් පමණක් නොව, ශුභාරංචිය ප්රකාශ කරන ක්රියාකාරී ධර්මදූතයන් බවට පත්විය යුතු බවද එහිදී අවධාරණය කෙරිණි.
සභාව තුළ කාන්තාවන්ගේ දායකත්වය ශක්තිමත් කිරීමද ගිහි හා පවුල් අපෝස්තලික කාර්යාලයේ තවත් ප්රමුඛ අවධානයක් විය. FABC ස්වර්ණ ජුබිලිය සහ ආසියානු මහද්වීපික සමුළුවේ පරාවර්තන පදනම් කරගනිමින්, සභා නායකත්වය, එඬේර සේවය සහ තීරණ ගැනීමේ ක්රියාවලිය තුළ කාන්තාවන්ගේ සහභාගිත්වය වර්ධනය කිරීමේ මාර්ග පිළිබඳව සොයා බැලීය.
තරුණයන් ද කාර්යාලයේ මෙහෙවරේ කේන්ද්රීය ස්ථානයක් හිමි කර ගනී. වාර්තාවේ සඳහන් වූයේ වියට්නාමයේ ටාපාඔ හි පැවති FABC තරුණ සම්මන්ත්රණය පිළිබඳවයි. ගෝලකම, නායකත්වය සහ ධර්මදූත සාක්ෂිය කෙරෙහි අවධානය යොමු කළ එම වැඩසටහන මඟින් පාසල්වල, සේවා ස්ථානවල සහ ඩිජිටල් ලෝකය තුළ ශුභාරංචිය ජීවමාන කිරීමට තරුණ කතෝලිකයන් දිරිමත් කෙරිණි.
පවුල් ජීවිතය සහ මැවිල්ල රැකබලා ගැනීම අතර ඇති සම්බන්ධතාවයද වාර්තාවේ අවධාරණය විය. සභාවේ සමස්ත පරිසරවේදය පිළිබඳ ඉගැන්වීම්වලින් ආභාෂය ලැබූ ගිහි හා පවුල් අපෝස්තලික කාර්යාලය, සරලත්වය, සහයෝගීතාව සහ පරිසර භාරකාරත්වය මත පදනම් වූ ජීවන රටාවක් අනුගමනය කිරීමට පවුල් දිරිමත් කර ඇත.
වාර්තාව අවසානයේ, ආසියාවේ ප්රාදේශීය සභාවන්ගෙන් ඉල්ලා සිටියේ ගිහි ජනතාව සහයෝගිතාකරුවන් ලෙස පමණක් නොව, සභාවේ මෙහෙවර සඳහා සමවගකීම් දරන හවුල්කරුවන් ලෙස පිළිගන්නා ප්රජාවන් ගොඩනඟන ලෙසයි.
"සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර" යන තේමාව යටතේ පැවැත්වෙන මෙම මහා සමුළුවේදී ඉදිරිපත් වූ මෙම වාර්තාව අවධාරණය කළේ, සභාවේ අනාගතය හැඩගැසෙන්නේ රදගුරු පදවි සහ ආයතන තුළ පමණක් නොව, පවුල්වල, මූලික සභා ප්රජාවන්හි සහ දිනපතා ශුභාරංචිය ජීවත්වන පරිසම් ප්රජාවන් තුළ බවයි.
කර්තෘ ගැන
ගේබ්රියෙල් අබ්ඩි සුසන්තෝ ඉන්දුනීසියාවේ ප්රවීණ මාධ්යවේදියෙකි. ඔහු දැනට Vatican News හි ඉන්දුනීසියානු කර්තෘ මණ්ඩලයේ සාමාජිකයෙකු ලෙස සේවය කරයි.
#XIIFABCPlenary #FABC #BishopEmmanuelKRozario #FABCOfficeOfLaityAndFamily #SrMomokoNishimura #LayLeadership #Synodality #ChurchInAsia #RadioVeritasAsia #RVASinhala
