සුබාරංචිය ප්රකාශ කිරීමට පෙර ‘පස සූදානම් කරන්න’ – කාදිනල් ඩේවිඩ් හිමිපාණන්
ඉන්දුනීසියාවේ ජකර්තා – සුබාරංචිය ප්රකාශ කිරීම ආරම්භ විය යුත්තේ කතා කිරීමෙන් නොව, සවන් දීමෙන් බව ආසියානු රදගුරු සමුළු සම්මේලනයේ (FABC) උපසභාපති කාදිනල් පැබ්ලෝ වර්ජිලියෝ ඩේවිඩ් හිමිපාණන් අවධාරණය කළහ.
එතුමා මේ බව ප්රකාශ කළේ ජූලි 24 වැනිදා ජකර්තාවේ පැවති 12 වැනි ආසියානු රදගුරු සමුළු සම්මේලන මහා සමුළුවේ දිව්ය පූජාව අතරතුර දේශනා කරමිනි.
රදගුරුවරුන්, පූජකවරුන්, අභිෂේකලත් ජීවිතයේ සාමාජිකයන් සහ ගිහි නියෝජිතයන් අමතමින් කාදිනල් ඩේවිඩ් හිමිපාණන් ජෙරමියා ග්රන්ථයේ පාඨය සහ වපුරන්නාගේ උපමාව ඇසුරින් ආසියාවේ සභාවේ සුබාරංචි මෙහෙවර සංගමනශීලී පරිවර්තනයේ ආලෝකයෙන් යළි සලකා බැලිය යුතු බව පෙන්වා දුන්හ.
දෙවියන් වහන්සේගේ සිතට එකඟ එඬේරුන් පිළිබඳ ජෙරමියාගේ දර්ශනය සිහිපත් කළ එතුමා, සභාව ප්රඥාවන්ත වපුරන්නෙකුගේ රූපයද වැළඳගත යුතු බව පැවසූහ. සැබෑ අස්වැන්න ලැබෙන්නේ බීජ වැපිරීමට පෙර සිදුකරන සූදානම මත බව එවැනි වපුරන්නෙක් හොඳින් දන්නා බවද එතුමා සඳහන් කළහ.
වපුරන්නාගේ උපමාව සාමාන්යයෙන් දෙවියන් වහන්සේගේ වචනය බීජයටත්, මිනිස් හදවත් පසටත් සමාන කරමින් විග්රහ කෙරුණද, තම අවධානය යොමු වූයේ පසෙහි තත්ත්වය පිළිබඳ බව කාදිනල් ඩේවිඩ් හිමිපාණන් පැවසූහ.
පිලිපීනයේ මූලික සභා ප්රජාවක් සමඟ බයිබල් බෙදාගැනීමකදී වයෝවෘද්ධ ගොවියෙකු කළ අදහසක් එතුමා සිහිපත් කළහ.
"එම ගොවියා මට ගෞරවයෙන් පැවසුවේ, උපමාවේ සිටින වපුරන්නා හොඳ ගොවියෙකු නොවන බවයි. මාර්ගය මතත්, ගල් සහිත බිමකත්, කටු අතරත් බීජ වැපිරූ නිසා එසේ කීවා."
එම අදහස තමන්ට සභාවේ දේව මෙහෙවර පිළිබඳ ගැඹුරු අවබෝධයක් ලබාදුන් බව එතුමා පැවසූහ.
"හොඳ ගොවියෙකු දන්නේ වගා කිරීමේ වැඩි කොටස සිදුවන්නේ බීජ වැපිරීමට පෙර බවයි. ඔහු පස සූදානම් කරයි."
අද ලෝකයේ සුබාරංචි ප්රකාශනයේ හදවත වන්නේ මෙය බව කාදිනල් ඩේවිඩ් හිමිපාණන් පෙන්වා දුන්හ. ජේසුස් වහන්සේගේ සුබාරංචිය ප්රකාශ කිරීමට පෙර මිනිසුන්ගේ හදවත් එය පිළිගැනීමට සූදානම් කළ යුතු බවද එතුමා අවධාරණය කළහ.
එම "පස සූදානම් කිරීම" යනු සංගමනශීලී ජීවිතයේ මූලික ආකල්ප වර්ධනය කිරීම බව පැහැදිලි කළ එතුමා,
"කතා කිරීමට පෙර සවන් දීම, වාද කිරීමට පෙර සංවාදය ආරම්භ කිරීම, ඒත්තු ගැන්වීමට පෙර මිත්රත්වය ගොඩනැගීම සහ කැපවීමක් ඉල්ලා සිටීමට පෙර විශ්වාසය ගොඩනැගීම – පස සූදානම් කිරීම යනු එයයි," යනුවෙන් සඳහන් කළහ.
ආගමික, සංස්කෘතික සහ ජනවාර්ගික විවිධත්වයෙන් පිරි ආසියාවේ මෙම ප්රවේශය විශේෂයෙන් වැදගත් බව එතුමා පෙන්වා දුන්හ. ඇතැම් ස්ථානවල සුබාරංචිය උණුසුම් ලෙස පිළිගන්නා අතර තවත් තැන්වල එය සැකයෙන් හෝ පසුබැසීමෙන් යුතුව පිළිගන්නා බවද එතුමා සඳහන් කළහ.
එවැනි පසුබිමක සභාව ප්රථමයෙන් තම පැවැත්ම, සේවය සහ ප්රේමය තුළින් ජනතාවගේ විශ්වාසය දිනාගත යුතු බවත්, ඉන් අනතුරුව සුබාරංචිය ඵල දරන බවත් එතුමා පැවසූහ.
මේ සඳහා උදාහරණයක් ලෙස කාදිනල් ජෝර්ජියෝ මරෙන්ගෝ හිමිපාණන්ගේ නායකත්වය යටතේ මොංගෝලියාවේ කතෝලික සභාව ගෙනහැර දැක්වූ කාදිනල් ඩේවිඩ් හිමිපාණන්, එහි සභාව ප්රකට වී ඇත්තේ දේශනා කිරීමෙන් පමණක් නොව, අධ්යාපනය, දානපති සේවාව සහ ජනතාව සමඟ ගොඩනඟාගත් සැබෑ මිත්රත්වය තුළින් බව පැවසූහ.
ප්රේමයේ සහ දයාවේ ක්රියා බොහෝවිට සුබාරංචිය ප්රකාශ කිරීමටත් පෙර මිනිසුන්ගේ හදවත් සූදානම් කරන බව එම අත්දැකීමෙන් පැහැදිලි වන බවද එතුමා කියා සිටියහ.
මෙය ආසියානු රදගුරු සමුළු සම්මේලනය ප්රවර්ධනය කරන සංගමනශීලී පරිවර්තනයේ හදවත බව කාදිනල් ඩේවිඩ් හිමිපාණන් අවධාරණය කළහ. සංගමනශීලීත්වය යනු සභාව තුළ එකට ගමන් කිරීම පමණක් නොව, ගෞරවය, සංවාදය සහ සේවය තුළින් මිනිසුන්ට ක්රිස්තුස් වහන්සේ හමුවීමට අවකාශ සලසා දීම බවද එතුමා පැවසූහ.
දේශනාව අවසන් කරමින් එතුමා සිහිපත් කළේ ආසියාවේ සුබාරංචි ප්රකාශනයේ අනාගතය රඳා පවතින්නේ බීජය විශ්වාසවන්තව වැපිරීම මත පමණක් නොව, එය වැවෙන පස ඉවසීමෙන් සූදානම් කිරීම මත බවයි.
"ආසියාවේ සුබාරංචි ප්රකාශනයේ අනාගතය තීරණය වන්නේ අප බීජය කෙතරම් විශ්වාසවන්තව වපුරනවාද යන්නෙන් පමණක් නොව, එය වැවෙන පස කෙතරම් ඉවසීමෙන් සූදානම් කරනවාද යන්නෙනි."
අවසානයේදී දෙවියන් වහන්සේ තම සේවකයන්ව තම සිතට එකඟ එඬේරුන් පමණක් නොව, ඇදහිල්ලේ, බලාපොරොත්තුවේ සහ ප්රේමයේ බීජ ආසියාව පුරා ඵල දරන පරිදි පස සූදානම් කරන ප්රඥාවන්ත වපුරන්නන් බවටද පත් කරන ලෙස එතුමා යාච්ඤා කළහ.
කර්තෘ පිළිබඳව
අමාදේයා ප්රනාස්තිති සමාජ සන්නිවේදන ක්ෂේත්රයේ ක්රියාකාරිනියක වන අතර, වර්තමානයේ ඉන්දුනීසියානු රදගුරු සමුළුවේ ලේඛන හා තොරතුරු දෙපාර්තමේන්තුවේ නිදහස් දායක මාධ්යවේදිනියක ලෙස කටයුතු කරයි.
#FABCXII #FABC #FederationOfAsianBishopsConferences #CardinalPabloVirgilioDavid #Evangelization #Synodality #ChurchInAsia #BridgeBuilders #Mission #CatholicChurch #RVASinhala #RadioVeritasAsia
