සාමය වෙනුවෙන් ජපමාලය යදින දරුවන් මිලියනයක් – ලොව පුරා යාච්ඤාවෙන් එක්වන ආරාධනයක් 2026 ඔක්තෝබර් 1–7

සාමය වෙනුවෙන් ජපමාලය යදින දරුවන් මිලියනයක් – ලොව පුරා යාච්ඤාවෙන් එක්වන ආරාධනයක්
2026 ඔක්තෝබර් 1–7

“අවසානයේදී මාගේ නිර්මල හෘදය ජයගනු ඇත.” — ෆාතිමා අප ස්වාමිදූ

ලොව පුරා දරුවන්ට සාමය වෙනුවෙන් යාච්ඤාවෙන් එක්වීමට ආධාර වන “ජපමාලය යදින දරුවන් මිලියනයක්” නම් වාර්ෂික වැඩසටහන ඔක්තෝබර් 1 සිට 7 දක්වා පැවැත්වේ. ACN ජාත්‍යන්තර සංවිධානය (Aid to the Church in Need) මගින් සංවිධානය කරනු ලබන මෙම වැඩසටහන, මෙවර ප්‍රථම වරට සම්පූර්ණ සතියක් පුරා පැවැත්වීම විශේෂත්වයකි. ඒ අනුව, දරුවන්ට, පවුල්වලට, පාසල්වලට, මීසම්වලට සහ පැවිදි ප්‍රජාවන්ට තමන්ට වඩාත් සුදුසු දිනයක මෙම යාච්ඤා මෙහෙවරට එක්වීමට අවස්ථාව සැලසේ.

ෆාතිමා අප ස්වාමිදූගේ පණිවුඩයෙන් සහ පියෙත්‍රෙල්චිනාහි ශුද්ධ වූ පද්‍රේ පියෝ මුනිඳුන්ට සාම්ප්‍රදායිකව ආරෝපණය කෙරෙන “දරුවන් මිලියනයක් ජපමාලය යදින විට ලෝකය වෙනස් වනු ඇත” යන ප්‍රකාශයෙන් ආභාසය ලබන මෙම වැඩසටහන, භාග්‍යවන්ත කන්‍යා මරියෝත්තමාවන්ගේ මැදිහත්කාරිත්වය තුළින් ජේසුස් ක්‍රිස්තුස් වහන්සේ වෙත ළං වෙමින් සාමය, සමගිය සහ බලාපොරොත්තුව උදෙසා යාච්ඤා කිරීමට දරුවන්ට ආරාධනා කරයි.

යුද්ධය, ප්‍රචණ්ඩත්වය, පීඩා, දරිද්‍රතාව සහ බෙදීම් හේතුවෙන් තුවාල ලැබූ ලෝකයක් වෙනුවෙන් එක්සිත්ව යාච්ඤා කිරීම මෙහි මූලික අරමුණයි.

වතිකානයේදී ශුද්ධෝත්තම පාප් වහන්සේ දරුවන් සමඟ ජපමාලය යදිති
මෙම යාච්ඤා වැඩසටහන ඔක්තෝබර් 1 වැනිදා වතිකාන උද්‍යානවල පැවැත්වෙන විශේෂ හමුවකින් ආරම්භ වේ. රෝමයේ පාසල් සහ මීසම් නියෝජනය කරමින් දරුවන් 700ත් 1,000ත් අතර පිරිසක් ශුද්ධෝත්තම පාප් වහන්සේ සමඟ මෙම අවස්ථාවට එක්වීමට නියමිතය.

එදින සවස 5.00ට වතිකාන උද්‍යානයේ පිහිටි ලූර්දු ගුහාව අසලදී ශුද්ධෝත්තම පියතුමන් සහ දරුවන් එක්ව ජපමාලය යදිනු ඇත. එම අවස්ථාවේදී ලොව පුරා සිටින දරුවන්, පවුල්, පාසල් සහ කිතුනු ප්‍රජාවන් සමඟ අධ්‍යාත්මිකව එක්වීමට ඔවුහු අපේක්ෂා කරති.

විවිධ රටවලින්, සංස්කෘතීන්ගෙන් සහ භාෂා පසුබිම්වලින් පැමිණෙන දරුවන් සාමය පිළිබඳ පොදු බලාපොරොත්තුවකින් යාච්ඤාවෙන් එක්වන මෙම හමුව, සතියක් පුරා පැවැත්වෙන යාච්ඤා මෙහෙවරේ ආරම්භය සනිතුහන් කරයි.

ඔක්තෝබර් 7 වැනිදාට යෙදෙන ජපමාලයේ අප ස්වාමිදූගේ මංගල්‍යය මෙම යාච්ඤා සතියේ උච්චතම අවස්ථාව වනු ඇත.

යාච්ඤාවෙන් එක්වන ලෝක ව්‍යාප්ත ප්‍රජාවක්
2005 වසරේ වෙනිසියුලාවේ කරකාස් නුවරින් ආරම්භ වූ “ජපමාලය යදින දරුවන් මිලියනයක්” වැඩසටහන අද වන විට සෑම මහද්වීපයකම දරුවන්, පවුල්, පාසල්, මීසම් සහ සභා ප්‍රජාවන් සම්බන්ධ කරගත් ලෝක ව්‍යාප්ත යාච්ඤා ව්‍යාපාරයක් බවට පත්ව තිබේ.

මෙවර වැඩසටහන ඔස්සේ ලෝකයේ විවිධ ප්‍රදේශවල ජනතාව යාච්ඤාවෙන් එක්වන අතර, ගැටුම්, දරිද්‍රතාව සහ අස්ථාවරත්වය හේතුවෙන් පීඩාවට පත් ප්‍රදේශවල ප්‍රජාවන්ගේ සහභාගිත්වය ද විශේෂත්වයකි.

සුඩානයේ මීසම් සහ පාසල් කිහිපයක් මෙම වැඩසටහනට එක්වීමට නියමිතය. බොලිවියානු ඇමසන් වනාන්තර ප්‍රදේශයේ ජීවත් වන සිමානේ ආදිවාසී ප්‍රජාවේ දරුවන් දැනටමත් තම මව්භාෂාව වන සිමානේ භාෂාවෙන් සහ ස්පාඤ්ඤ භාෂාවෙන් ජපමාලය යැදීම ආරම්භ කර ඇත.

සිම්බාබ්වේ බුලවායෝ අගරදගුරු පදවියට අයත් ශාන්ත ක්‍රිස්ටෝෆර් මීසම ඔක්තෝබර් 4 වැනිදා දරුවන් එක්රැස් කරමින් සාමය වෙනුවෙන් යාච්ඤා කිරීමට සැලසුම් කර තිබේ. පැරගුවේ රාජ්‍යයේ සැන් ඉයුජිනියෝ ද මසෙනොඩ් මීසමේදී දරුවන් ජපමාලය යදින අවස්ථාව රේඩියෝ පායි පුකු ඔස්සේ සජීවීව විකාශය කිරීමට නියමිතය.

මෙම දේශීය යාච්ඤා වැඩසටහන් මඟින් මෙම මෙහෙවරේ විශ්වීය ස්වභාවය මැනවින් පිළිබිඹු වේ. භූගෝලීය සීමා, සංස්කෘතික වෙනස්කම් සහ භාෂා බාධක ඉක්මවා දරුවන් එක්සත් කිරීමට ජපමාලයේ සරල යාච්ඤාවට ඇති හැකියාව ඒ තුළින් ප්‍රකාශ වේ.

සාමය අහිමි වූ ලෝකයක් වෙනුවෙන් යාච්ඤා කරමු
මෙවර වැඩසටහනට විශේෂ ආභාසයක් ලබා දෙන්නේ ෆාතිමා අප ස්වාමිදූ විසින් ප්‍රකාශ කළ මෙම පණිවුඩයයි:

“අවසානයේදී මාගේ නිර්මල හෘදය ජයගනු ඇත.”

ACN ජාත්‍යන්තර සංවිධානයේ සභාපති සහ කිතුනු එක්සත්කම ප්‍රවර්ධනය කිරීමේ ශුද්ධාසනීය මණ්ඩලයේ ප්‍රධානී කාදිනල් කර්ට් කොක් හිමිපාණන් මෙම යාච්ඤා මෙහෙවරට එක්වන ලෙස කළ ආරාධනයේදී, මරියාවන්ගේ නිර්මල හෘදය ශුද්ධාත්මයාණන් වහන්සේට මුළුමනින්ම විවෘත වූ ජීවිතයක සංකේතයක් බව අවධාරණය කළහ. එසේම, විශ්වාසය, යාච්ඤාව සහ ප්‍රේමය පිළිබඳ ආදර්ශයක් ලෙස භාග්‍යවන්ත කන්‍යා මරියෝත්තමාවන් පෙන්වා දුන්හ.

අද ලෝකයේ බොහෝ ජනතාව ප්‍රචණ්ඩත්වයට, පීඩාවට, දරිද්‍රතාවට සහ අවිනිශ්චිතතාවට මුහුණ දෙමින් සිටින මොහොතක, මෙම වැඩසටහන යාච්ඤාව තුළින් සාමයේ මෙවලම් බවට පත්වීමට දරුවන්ට අවස්ථාව සලසයි.

විවිධ භාෂාවලින් සහ විවිධ සංස්කෘතීන් තුළින් නැඟෙන දරුවන්ගේ ඒකාබද්ධ යාච්ඤා හඬ, පොදු විශ්වාසයකත්, සාමය, සංහිඳියාව සහ සහජීවනය පිරුණු ලෝකයක් පිළිබඳ පොදු අපේක්ෂාවකත් ප්‍රකාශනයකි.

ජපමාලයේ යාච්ඤාවේ බලය
ජපමාලය යනු භාග්‍යවන්ත කන්‍යා මරියෝත්තමාවන්ගේ මැදිහත්කාරිත්වය තුළින් විශ්වාසිකයන් ජේසුස් ක්‍රිස්තුස් වහන්සේ වෙත වඩාත් සමීප කරවන, කතෝලික සභාවේ ගෞරවනීය යාච්ඤාවකි.

දරුවන්ට ජපමාලය යැදීම, මරියාවන් කෙරෙහි ඇති විශ්වාසය සහ ප්‍රේමය ප්‍රකාශ කිරීමටත්, උන්වහන්සේ සමඟ ඇති අධ්‍යාත්මික සබඳතාව වර්ධනය කරගැනීමටත් අර්ථවත් අවස්ථාවක් වේ.

ක්‍රිස්තුස් වහන්සේගේ ජීවිතයේ අභිරහස් මෙනෙහි කිරීම තුළින් ශුභාරංචිය පිළිබඳ ගැඹුරින් සිතා බැලීමටත්, ජේසුස් වහන්සේ වඩාත් සමීපව අනුගමනය කිරීමටත් ජපමාලය විශ්වාසිකයන්ට මඟ පෙන්වයි.

“ජපමාලය යදින දරුවන් මිලියනයක්” යන වැඩසටහන දරුවන්ට පමණක් සීමා වූවක් නොවන බව ද සිහිපත් කරයි. දෙමාපියන්, ගුරුවරුන්, පූජකවරුන්, පැවිදිවරුන්, ධර්මෝපදේශකවරුන් ඇතුළු සියලු දෙනාටම මෙම ලෝක ව්‍යාප්ත යාච්ඤා දාමයට එක්වන ලෙස ආරාධනා කෙරේ.

සම්පූර්ණ ජපමාලය යැදීමට නොහැකි අයෙකුට වුවද, එක් දශකයක් (දසකය) පමණක් වුවත් විශ්වාසයෙන් හා භක්තියෙන් යාච්ඤා කරමින් මෙම මෙහෙවරට එක්විය හැකිය.

සෑම පවුලකටම, පාසලකටම සහ මීසමකටම ආරාධනයක්
2026 ඔක්තෝබර් 1 සිට 7 දක්වා පැවැත්වෙන මෙම ලෝක ව්‍යාප්ත යාච්ඤා මෙහෙවරට එක්වන ලෙස ACN ජාත්‍යන්තර සංවිධානය සියලු දෙනාට ආරාධනා කරයි.

පවුල්වලට තම නිවෙස්වලදී එක්ව යාච්ඤා කළ හැකිය. පාසල්වලට විශේෂ යාච්ඤා අවස්ථා සංවිධානය කළ හැකි අතර, මීසම් සහ පැවිදි ප්‍රජාවන්ට දරුවන් එක්රැස් කරමින් සාමය වෙනුවෙන් ජපමාලය යැදීමට කටයුතු කළ හැකිය.

ලොව කොතැනක සිටියත්, කුමන භාෂාවක් කතා කළත්, මෙම මෙහෙවරට එක්වන සෑම කෙනෙකුම විශ්වාසයෙන් එක්සත් වූ ලෝක ව්‍යාප්ත ප්‍රජාවක කොටස්කරුවෙකු බවට පත්වේ.

භාග්‍යවන්ත කන්‍යා මරියෝත්තමාවන්ගේ ආදරණීය මැදිහත්කාරිත්වයට තම යාච්ඤා භාර කරන දරුවන්ට, තම පවුල්වල, ප්‍රජාවන්ගේ සහ සමස්ත ලෝකයේ බලාපොරොත්තුවේ සාක්ෂිකරුවන් හා සාමයේ මෙවලම් බවට පත්වීමට මෙම වැඩසටහන ආරාධනා කරයි.

දරුවන් මිලියනයක්. ලොව පුරා විහිදුණු එකම විශ්වාසයේ පවුලක්. සාමය වෙනුවෙන් එකම යාච්ඤාවක්.

“ජපමාලය යදින දරුවන් මිලියනයක්” යන මෙම මෙහෙවරට එක්වන්න. ලොව පුරා දරුවන් සමඟ ඔබේ යාච්ඤාව ද එක් කරමින්, සියලු ජනතාව තම පුත්‍රයාණන් වන ජේසුස් ක්‍රිස්තුස් වහන්සේ වෙත ළං කිරීමටත්, තුවාල ලැබූ අප ලෝකයට සාමය උදා කර දෙන ලෙසත් අප ස්වාමිදූගේ මැදිහත්කාරිත්වය අයැදිමු.

'RVASinhala' Facebook, Instagram, X, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!