සංගමනශීලීභාවය ලොවට සභාව දෙන ශ්රේෂ්ඨ දායාදයක් - කාදිනල් ග්රේසියස් හිමිපාණන්
ශුද්ධෝත්තම ලියෝ 14 වැනි ශුද්ධෝත්තම පියතුමාගේ විශේෂ නියෝජිතයා වන කාදිනල් ඔස්වල්ඩ් ග්රේසියස් හිමිපාණන්, ජූලි 21 වැනිදා ආසියානු රදගුරු සමුළු සම්මේලනයේ (FABC) 12 වැනි මහා සමුළුව විවෘත කරමින්, සංගමනශීලීභාවය "සභාව ලොවට පිරිනමන ශ්රේෂ්ඨතම දායාදයන්ගෙන් එකක්" බවත්, ආසියාවේ ප්රාදේශීය සභාවන් සංවාදය, ප්රතිසන්ධානය සහ සහෝදරත්වය තුළින් සාමය ගොඩනඟන පාලම් තනන්නන් විය යුතු බවත් අවධාරණය කළහ.
ජකාර්තා මුලියා හෝටලයේ Ballroom 2 සහ 3 ශාලාවල පෙරවරු 9.00ට පැවති ආරම්භක දිව්ය පූජාවට මුලසුන හොබවමින් කාදිනල් ග්රේසියස් හිමිපාණන් පැවසුවේ, සභාවේ මෙහෙවර වන්නේ මිනිසුන් එකට එක් කිරීම, ප්රතිසන්ධානය වර්ධනය කිරීම සහ සාමයේ මෙවලමක් බවට පත්වීම බවයි.
"අපගේ මෙහෙවර වන්නේ පාලම් තනන්නන් වීමයි. සභාව කැඳවනු ලබන්නේ පාලම් තැනීමටයි," යැයි එතුමා සිය ධර්මෝපදේශයේදී පැවසූහ.
ආරම්භක දිව්ය පූජාව ඉන්දුනීසියාවේ විවිධ සංස්කෘතික සම්ප්රදායන් සහ ආසියාව නියෝජනය කරන යැදුම් එක් කරමින්, මහාද්වීපයේ සංස්කෘතික විවිධත්වය මනාව පිළිබිඹු කළේය.
මෙම දිව්ය පූජාවේ ප්රධාන සහපූජකවරුන් ලෙස හොංකොංහි කාදිනල් ස්ටීවන් චව් සෝ-යන් හිමිපාණන් සහ ටිමෝර්-ලෙස්ටේහි කාදිනල් වර්ජිලියෝ දෝ කාර්මෝ ද සිල්වා හිමිපාණන් එක් වූ අතර, ආසියාව පුරා සිට පැමිණි කාදිනල්වරුන්, රදගුරුවරුන්, පූජකවරුන්, පැවිදිවරුන් සහ නියෝජිතයන් 100කට අධික පිරිසක් ද ඊට සහභාගී වූහ.
දිව්ය පූජාවේ ආරම්භක පෙරහැරේදී උතුරු සුමාත්රා ප්රදේශයේ නියාස්, බටක් සහ මිනන්ග්කාබාවු ජනවර්ග නියෝජනය කරන සම්ප්රදායික ඇඳුමින් සැරසුණු පිරිමින් හා කාන්තාවන් රදගුරුවරුන් සහ නියෝජිතයන් පිළිගත්හ. එම සංස්කෘතික පිළිගැනීම, ඉන්දුනීසියාවේ ජනවාර්ගික උරුමය මෙන්ම සත්කාරක සභාවේ ආගන්තුක සත්කාරයද විදහා දැක්වීය.
විශ්වාසීන්ගේ යැදුම්ද ආසියාවේ විවිධත්වය පිළිබිඹු කරමින් ජාවා, මෙන්ටාවායි, මැන්ඩරින් චීන, බෝර්නියෝහි බෙනාවාස් ඩයාක් සහ නැගෙනහිර නුසා තෙංගාරාහි සුම්බානීස් යන භාෂාවලින් ඉදිරිපත් කෙරිණි. මෙම බහුභාෂා යැදුම් තුළින් විවිධ ජනවර්ග, සංස්කෘතික සහ භාෂා අතර සභාවේ එකමුතුකම අවධාරණය කෙරිණි.
මෙම දිව්ය පූජාවේ තවත් සුවිශේෂී අංගයක් වූයේ ශුද්ධවරයන්ගේ ආයාචනය (Litany of the Saints) ය. එහිදී චීනය, ඉන්දියාව, ජපානය, කොරියාව, මැලේසියාව, පිලිපීනය, ශ්රී ලංකාව, හොංකොං, තායිලන්තය, මියන්මාරය, කසකස්තානය, ඉන්දුනීසියාව, ලාඕසය සහ ඇෆ්ගනිස්ථානය යන රටවල ශුද්ධවරුන්ගේ මැදිහත් වීම ඉල්ලා යාච්ඤා කළ අතර, එමගින් ආසියාවේ පොහොසත් කිතුනු උරුමය සිහිපත් කෙරිණි.
සිය ධර්මෝපදේශයේදී කාදිනල් ග්රේසියස් හිමිපාණන් අවධාරණය කළේ, මෙම මහා සමුළුව හුදෙක් පරිපාලන රැස්වීමක් නොවන බවයි. එය ආසියාවේ ප්රාදේශීය සභාවන්ට කාලයේ සලකුණු හඳුනාගෙන සුබාරංචිය ප්රකාශ කිරීමේ කැඳවීම අලුතින් තහවුරු කරගැනීමට ලැබෙන අවස්ථාවක් බව එතුමා සඳහන් කළහ.
දශක පහකට අධික ආසියානු රදගුරු සමුළු සම්මේලනයේ ගමන්මඟ සිහිපත් කළ එතුමා, පසුගිය වසරවල සභාව මුහුණදුන් ප්රධානතම අභියෝගයක් ලෙස කොවිඩ්-19 වසංගතය පෙන්වා දුන්හ. එම අර්බුදය මහාද්වීපය පුරා දුක් වේදනා ගෙන ආවත්, ආසියාවේ සභාවන්ගේ ඔරොත්තු දීමේ හැකියාව, සහයෝගීතාව සහ සහෝදරත්වයද එමගින් මැනවින් ප්රකාශ වූ බව එතුමා පැවසූහ.
යුද්ධය සහ ප්රචණ්ඩත්වය අද මානව වර්ගයා මුහුණ දෙන බරපතළම අභියෝග අතර වන බවද කාදිනල් ග්රේසියස් හිමිපාණන් සඳහන් කළහ. එහිදී ෆ්රැන්සිස් ශුද්ධෝත්තම පියතුමා වර්තමාන ලෝක තත්ත්වය "කොටස් වශයෙන් සිදුවන තුන්වන ලෝක යුද්ධයක්" ලෙස හැඳින්වූ අයුරුද එතුමා සිහිපත් කළහ.
සංගමනශීලීභාවය සභාවට පමණක් නොව සමස්ත සමාජයටද හිමි වටිනා දායාදයක් බව පැවසූ කාදිනල් ග්රේසියස් හිමිපාණන්, එකට ගමන් කිරීමේ ආත්මය පවුල් ජීවිතය, ප්රජා වටිනාකම් සහ අන්යෝන්ය ගෞරවය තුළින් ආසියානු සංස්කෘතීන්හි බොහෝ කලක සිට පවතින බව සඳහන් කළහ. සවන්දීම, සහභාගිත්වය, විවෘතභාවය සහ හවුල් වගකීම වැනි සංගමනශීලී වටිනාකම් යහපාලනය ප්රවර්ධනය කිරීමටත්, ආසියාවේ බොහෝ රටවල පවතින දූෂණයට මුහුණ දීමටත් දායක විය හැකි බවද එතුමා පැවසූහ.
දිව්ය පූජාව අවසානයේ කාදිනල් ග්රේසියස් හිමිපාණන් නියෝජිතයන්ගෙන් ඉල්ලා සිටියේ, ආසියාව පුරා සාමය සහ සහෝදරත්වය ගොඩනැගීම සඳහා නව හා නිර්මාණශීලී මාර්ග සොයා ගන්නා ලෙසයි.
"දෙවියන් වහන්සේ ආසියානු රදගුරු සමුළු සම්මේලනයට ආශීර්වාද කළ මැනව. දෙවියන් වහන්සේ ආසියාවට ආශීර්වාද කළ මැනව," යැයි එතුමා ප්රාර්ථනා කළහ.
කර්තෘ ගැන:
ගේබ්රියෙල් අබ්ඩි සුසැන්ටෝ ඉන්දුනීසියාවේ ප්රවීණ මාධ්යවේදියෙකි. ඔහු වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සාමාජිකයෙකි.
#XIIFABCPlenary #CardinalOswaldGracias #Synodality #BridgeBuilding #FABC #Jakarta2026 #RVASinhala
