සංගමනශීලීත්වය ආරම්භ වන්නේ නව නීතිවලින් නොව, හදවත් පරිවර්තනයෙන් – කාදිනල් මාරියෝ ග්රෙක් හිමිපාණන්
සංගමනශීලීත්වය ආරම්භ වන්නේ නව නීතිවලින් නොව, හදවත් පරිවර්තනයෙන් – කාදිනල් මාරියෝ ග්රෙක් හිමිපාණන්
ජකාර්තා, ඉන්දුනීසියාව – කතෝලික සභාවේ සංගමනශීලීත්වයේ අනාගතය තීරණය වන්නේ නව කැනෝන නීති හෝ ව්යුහාත්මක වෙනස්කම් මගින් නොව, මනුෂ්ය හදවත් පරිවර්තනය වීම මගින් බව සංගමනශීලීත්වය පිළිබඳ රදගුරු සමුළුවේ මහලේකම් කාදිනල් මාරියෝ ග්රෙක් හිමිපාණන් අවධාරණය කළහ.
උන්වහන්සේ මෙම අදහස් පළ කළේ ජූලි 24 දින ජකාර්තාහි Hotel Mulia හි මාධ්ය මධ්යස්ථානයේ පැවති ආසියානු රදගුරු සමුළු සම්මේලනයේ (FABC) 12 වන මහා සමුළුවේ දෙවන මාධ්ය හමුවේදීය. සංගමනශීලීත්වය පිළිබඳ සභාවේ ගමනේ ප්රතිඵල අනාගතයේදී කැනෝන නීතියට ඇතුළත් වේදැයි මාධ්යවේදියෙකු නැඟූ ප්රශ්නයකට පිළිතුරු දෙමින් උන්වහන්සේ මෙම අදහස් ප්රකාශ කළහ.
කාදිනල් ග්රෙක් හිමිපාණන් පිළිගත්තේ සංගමනශීලී ගමනේ ප්රතිඵලයක් ලෙස අනාගතයේදී කැනෝන නීති සංශෝධන සිදුවිය හැකි බවයි. එහෙත් සැබෑ අලුත් වීම ආරම්භ වන්නේ සුභාරංචියෙන් සහ හදවතේ පරිවර්තනයෙන් බව උන්වහන්සේ අවධාරණය කළහ.
"අවශ්ය වන්නේ ආකල්පවල පරිවර්තනයක් නොව, හදවතේ පරිවර්තනයකි. මෙය ලේඛන පිළිබඳ ප්රශ්නයක් නොවේ. අපට අවශ්ය මූලික ලේඛනය දැනටමත් තිබේ. එය සුභාරංචියයි," යැයි කාදිනල් ග්රෙක් හිමිපාණන් පැවසූහ.
මෙම අදහස, 2021 වසරේ ශුද්ධෝත්තම ෆ්රැන්සිස් පියතුමා ආරම්භ කළ සංගමනශීලී ගමනේ මූලික තේමාවක් නැවතත් අවධාරණය කරන බව දක්නට ලැබුණි. ලොව පුරා ප්රාදේශීය සභාවන්ට එකමුතුකම, සහභාගිත්වය සහ මෙහෙවර ගැඹුරු කරමින් සවන්දීම, විචාරය සහ හවුල් වගකීම තුළින් ඉදිරියට ගමන් කිරීමට මෙම ගමන ආරාධනා කරයි.
සංගමනශීලීත්වය සහ සභා නීතිය අතර ඇති සම්බන්ධය පිළිබඳව අදහස් දක්වමින් කාදිනල් ග්රෙක් හිමිපාණන් පැහැදිලි කළේ, ආත්මීය අලුත් වීම සහ ව්යුහාත්මක ප්රතිසංස්කරණය එකම දෙයක් නොවන බවයි.
සභාවේ ජීවිතය තුළ ව්යුහයන් සහ නීතිවලට වැදගත් ස්ථානයක් තිබුණද, ඒවා සභාවේ අලුත් වීමේ ආරම්භක ස්ථානය නොවිය යුතු බව උන්වහන්සේ අවධාරණය කළහ.
"පළමුව පැමිණෙන්නේ සුභාරංචියයි. හදවත් පරිවර්තනය වූ විට පමණක් ව්යුහයන්ට සංගමනශීලී ජීවිතයක් සඳහා සැබෑ සේවයක් කළ හැකිය," යැයි උන්වහන්සේ පැවසූහ.
සභාව තුළ සංගමනශීලීත්වය ප්රවර්ධනය කළ හැකි ව්යුහයන් දැනටමත් බොහොමයක් පවතින බවද කාදිනල් ග්රෙක් හිමිපාණන් සිහිපත් කළහ. දේවස්ථාන සහ රදගුරු පදවි එඬේර මණ්ඩල, පූජක මණ්ඩල, උපදේශක මණ්ඩල, රදගුරු පදවි සමුළු සහ රදගුරු සමුළු වැනි ආයතන ඒ අතර වේ.
එබැවින් සම්පූර්ණයෙන්ම නව ව්යුහයන් බිහි කිරීම නොව, දැනට පවතින ව්යුහයන් එකමුතුකම, සහභාගිත්වය සහ මෙහෙවරේ ආත්මයෙන් සජීවී කිරීම සැබෑ අභියෝගය බව උන්වහන්සේ පැවසූහ.
එසේ වුවද, සංගමනශීලී ගමන හේතුවෙන් කැනෝන නීතියේ ඇතැම් සංශෝධන පිළිබඳව ගැඹුරු අධ්යයනයක් සිදුවෙමින් පවතින බවද උන්වහන්සේ අනාවරණය කළහ.
ශුද්ධෝත්තම පියතුමාගේ අනුමැතිය ඇතිව, ලතින් සභාව සඳහා එක් කැනෝන නීති විශේෂඥ කමිටුවක් සහ පෙරදිග කතෝලික සභාවන් සඳහා තවත් කමිටුවක් පත්කර ඇති බව කාදිනල් ග්රෙක් හිමිපාණන් පැවසූහ.
ලතින් සභාව සම්බන්ධ කමිටුව සිය කටයුතු අවසන් කර ඇති අතර, පෙරදිග සභාවන් පිළිබඳ කමිටුව ද සිය වාර්තාව අවසන් කිරීමට ආසන්න බවද උන්වහන්සේ සඳහන් කළහ.
"එම ලේඛන සම්පූර්ණ වූ පසු ඒවා අදාළ ඩිකැස්ටරීන්වලටත් ශුද්ධෝත්තම පියතුමාටත් ඉදිරිපත් කෙරෙනු ඇත. ඉන් අනතුරුව සිදුවන වෙනස්කම් අපට දැකගත හැකි වනු ඇත," යැයි කාදිනල් ග්රෙක් හිමිපාණන් පැවසූහ.
කෙසේ වෙතත්, අනාගතයේ සිදුවිය හැකි නීතිමය සංශෝධන සභාවේ ගැඹුරු ආත්මීය අලුත් වීමට සේවය කළ යුතු අතර, එය ප්රතිස්ථාපනය නොකළ යුතු බව උන්වහන්සේ යළිත් අවධාරණය කළහ.
සංගමනශීලී ගමන පුරාම කාදිනල් ග්රෙක් හිමිපාණන් නිරන්තරයෙන් පෙන්වා දී ඇත්තේ, සභා රැස්වීම්, මණ්ඩල හෝ නීති පමණක් මගින් සංගමනශීලී සභාවක් ගොඩනැගිය නොහැකි බවයි. එවැනි ව්යුහයන් ඵලදායී වන්නේ, සුභාරංචියෙන් පරිවර්තනය වූ හදවත් ඇති, එකට ගමන් කිරීමට කැපවූ විශ්වාසිකයන් විසින් ඒවා ජීවමාන කළ විට පමණි.
අවසානයේ කාදිනල් ග්රෙක් හිමිපාණන් අවධාරණය කළේ, කතෝලික සභාවේ සැබෑ අලුත් වීම පැමිණෙන්නේ නව නීතිවලින් නොව, ක්රිස්තුස් වහන්සේ විසින් පරිවර්තනය කරන ලද හදවත් තුළින් බවයි. එවිට පමණක් නීති සහ ව්යුහයන්ට සභාවේ එකමුතුකම, සහභාගිත්වය සහ සුභාරංචි ප්රකාශනය ශක්තිමත් කිරීමට හැකි වනු ඇත.
කතුවරයා පිළිබඳව
ගාබ්රියෙල් අබ්ඩි සුසන්තෝ ඉන්දුනීසියාවේ ප්රවීණ මාධ්යවේදියෙකු වන අතර, වර්තමානයේ Vatican News ඉන්දුනීසි සංස්කරණයේ කර්තෘ මණ්ඩලයේ සාමාජිකයෙකු ලෙස සේවය කරයි.
#FABCXII #FABC2026 #CardinalMarioGrech #Synodality #ChurchInAsia #CatholicChurch #Synod #ConversionOfHeart #Gospel #Communion #Participation #Mission #RadioVeritasAsia
