ලෝක සභා නායකයෝ ආසියාවේ රදගුරුවරුන්ට සංගමනශීලීත්වය තුළින් පාලම් තනන්නැයි ආරාධනා කරති.

ලෝක සභා නායකයෝ ආසියාවේ රදගුරුවරුන්ට සංගමනශීලීත්වය තුළින් පාලම් තනන්නැයි ආරාධනා කරති.

වතිකානය, අප්‍රිකාව, යුරෝපය, මැදපෙරදිග, ඕෂනියාව, එක්සත් ජනපදය සහ පුළුල් කිතුනු ඒකාබද්ධ ප්‍රජාව නියෝජනය කරන සභා නායකයෝ ආසියානු රදගුරු සමුළු සම්මේලනයේ (FABC) 12 වැනි මහා සමුළුවට එක්වෙමින්, සංගමනශීලී ගමන වැඩි වැඩියෙන් බෙදී යන ලෝකයක සංහිඳියාවට මඟ පෙන්වන මාර්ගයක් බව අවධාරණය කළහ.

ජූලි 21 දින ජකාර්තා නුවර හෝටල් මුලියාහි පැවති සමාරම්භක උත්සවයෙන් අනතුරුව නියෝජිතයන් අමතමින්, FABC කලාපයෙන් පිටත සිට පැමිණි සභා නියෝජිතයන් තම තමන්ගේ කලාපවල සභාව මුහුණ දෙන අභියෝග පිළිබඳ අදහස් දැක්වූහ. විවිධ පසුබිම්වලින් පැමිණියද ඔවුන්ගේ පොදු පණිවිඩය වූයේ සංගමනශීලීත්වය ජීවන රටාවක් විය යුතුය යන්නයි.

ශුද්ධෝත්තම අසුන නියෝජනය කරමින් රදගුරු සභාවේ මහලේකම් කාදිනල් මාරියෝ ග්‍රෙක් හිමිපාණන් පැවසුවේ තමන් මෙම මහා සමුළුවට පැමිණියේ "සවන් දීමට, බෙදාගැනීමට සහ ඉගෙන ගැනීමට" බවයි.

වේගයෙන් වෙනස් වන ලෝකය තුළ ශුද්ධාත්මයාණන් වහන්සේ ප්‍රාදේශීය සභාවන්ට පවසන්නේ කුමක්දැයි විමසා බැලීම අද සභාව ඉදිරියේ ඇති ප්‍රධාන අභියෝගය බවත්, සංගමනශීලී ගමන කතෝලිකයන්ව වඩාත් ගැඹුරු එකමුතුකමකට සහ මිෂනාරි කැපවීමකට කැඳවන බවත් ඔහු පැවසීය.

අප්‍රිකාව නියෝජනය කරමින් අප්‍රිකාවේ සහ මැඩගස්කරයේ රදගුරු සමුළු සංගමයේ (SECAM) සභාපති කාදිනල් ෆ්‍රිඩොලින් අම්බොන්ගෝ බෙසුන්ගු හිමිපාණන්, අප්‍රිකාව සහ ආසියාව "සහෝදර මහාද්වීප දෙකක්" ලෙස හඳුන්වමින් දරිද්‍රතාව, අසමානතාව, සංක්‍රමණය, සන්නද්ධ ගැටුම් සහ දේශගුණික විපර්යාස වැනි එකම අභියෝග රැසකට මුහුණ දෙන බව පැවසීය.

සංගමනශීලීත්වය "සභාවක් ලෙස ජීවත් වීමේ ක්‍රමයක්" ලෙස හැඳින්වූ ඔහු, සුබාරංචි ප්‍රකාශනය, අන්තර් ආගමික සංවාදය, තරුණ සේවය, යුක්තිය, සාමය සහ මැවිල්ල රැකගැනීම සඳහා ආසියාවේ සහ අප්‍රිකාවේ සභාවන් අතර සහයෝගිතාව තවදුරටත් වර්ධනය කළ යුතු බව අවධාරණය කළේය.

යුරෝපීය රදගුරු සමුළු කවුන්සිලය (CCEE) නියෝජනය කළ අගරදගුරු ගින්ටාරස් ලිනාස් ගෘෂස් හිමිපාණන් පැවසුවේ රෝමයේ පැවති සංගමනශීලීත්වය පිළිබඳ සභා සමුළුවෙන් පැහැදිලි වූයේ විවිධත්වය සභාව දුර්වල නොකර, ශක්තිමත් කරන බවයි.

බෙදීම්වලින් පිරුණු ලෝකයක තාප්ප ගොඩනැගීමේ පරීක්ෂාවට ක්‍රිස්තියානීන් යටත් නොවිය යුතු බවත්, "දෙවියන් වහන්සේ සහ මනුෂ්‍යයා අතරත්, මිනිසුන් එකිනෙකා අතරත් සංහිඳියාව ගොඩනඟන පාලමක් වීමට සභාව කැඳවනු ලැබ ඇත" යැයිද ඔහු පැවසීය.

නැගෙනහිර කතෝලික පීතෘමූලිකයන්ගේ කවුන්සිලය නියෝජනය කළ පීතෘමූලික රෆායෙල් බෙඩ්‍රොස් XXI මිනස්සියන් හිමිපාණන් සංගමනශීලීත්වය පිළිබඳ අවසන් ලේඛනයෙන් උපුටාගත් ප්‍රමුඛතා තුනක් ඉදිරිපත් කළේය. ඒවා නම් විමසා බැලීම තුළින් සිදුවන ආධ්‍යාත්මික පරිවර්තනය, සභා ව්‍යුහයන් තුළ වැඩි විනිවිදභාවය සහ වගකීම, සහ විවිධ සම්ප්‍රදායන් හා සංස්කෘතීන් වැළඳගන්නා එකමුතුකමයි.

"සභාවේ එකමුතුකම යනු එකම ආකාරයක් නොව, විවිධත්වයේ සුසංවාදයයි," යැයි ඔහු පැවසීය.

ඕෂනියාවේ කතෝලික රදගුරු සමුළු සම්මේලනයේ (FCBCO) මහලේකම් ගරු ක්‍රිස්ටෝපර් ද සූසා පියතුමා පැවසුවේ ඕෂනියාව FABC මහා සමුළුවකට සහභාගි වූ ප්‍රථම අවස්ථාව මෙය බවයි.

"අප පැමිණියේ සවන් දීමටත් ඉගෙන ගැනීමටත්ය," යැයි පැවසූ ඔහු, ආදිවාසී ප්‍රජාවන් දිගු කලක සිට එකට විමසා බැලීමේ සම්ප්‍රදායන් අනුගමනය කළද, සංගමනශීලීත්වය පිළිබඳ ආසියාවේ අත්දැකීම්වලින් ඕෂනියාවට බොහෝ දේ ඉගෙන ගත හැකි බව සඳහන් කළේය.

මෙම මහා සමුළුවට ඒකාබද්ධ කිතුනු සහභාගිත්වයද හිමි විය.

ආසියානු ක්‍රිස්තියානි සමුළුව (CCA) නියෝජනය කරමින් මහලේකම් ජුන්ග් යුන් ග්‍රේස් මූන් මහත්මිය, කලාපය පුරා සංවාදය සහ සහයෝගිතාව ප්‍රවර්ධනය කිරීම සඳහා CCA සහ FABC අතර දිගුකාලීන හවුල්කාරිත්වය සිහිපත් කළාය.

යාච්ඤාව, සවන් දීම සහ විමසා බැලීම මත පදනම් වූ ආධ්‍යාත්මිකත්වයක් ලෙස සංගමනශීලීත්වය වැළඳගැනීම පිළිබඳව ඇය FABC වෙත ප්‍රශංසාව පළ කළාය. සංගමනශීලී ක්‍රමවේදය ආසියාවේ මෙනෙහි කිරීමේ සම්ප්‍රදායන් සමඟ ඒකාබද්ධ කිරීම විශ්ව සභාවට සුවිශේෂී දායකත්වයක් බවද ඇය පැවසුවාය.

"ආසියාව තරම් විවිධත්වයෙන්, සංකීර්ණත්වයෙන් සහ අභියෝගවලින් පිරුණු කලාපයක සංගමනශීලී ක්‍රියාවලිය අදාළ පමණක් නොව, අත්‍යවශ්‍ය දෙයකි," යැයි ඇය පැවසූ අතර, පුළුල් ඒකාබද්ධ කිතුනු ප්‍රජාවේ යාච්ඤාද මහා සමුළුවට පිරිනැමුවාය.

එක්සත් ජනපද කතෝලික රදගුරු සමුළුව (USCCB) නියෝජනය කළ සැක්‍රමෙන්ටෝ සහායක රදගුරු රේනාල්ඩෝ බර්සබල් හිමිපාණන් පැවසුවේ තමන් "සහෝදර වන්දනාකරුවෙකු ලෙස" ආසියාවේ සභාවන්ගෙන් ඉගෙන ගැනීමට පැමිණි බවයි.

සැබෑ සභා අලුත් වීම ව්‍යුහාත්මක ප්‍රතිසංස්කරණවලින් පමණක් නොව, නිහතමානීව එකට ගමන් කරන, සවන් දෙන සහ ශුද්ධාත්මයාණන් වහන්සේ කෙරෙහි විශ්වාසය තබන සභාවක් තුළින් සිදුවන බව ඔහු සඳහන් කළේය. එක්සත් ජනපදයේ සභා ජීවිතයට සහ මෙහෙවරට ආසියානු කතෝලිකයන් ලබා දෙන විශාල දායකත්වයද ඔහු ඇගයීමට ලක් කළේය.

විවිධ මහාද්වීප සහ සභා සම්ප්‍රදායන් නියෝජනය කළද, පැමිණි සියලු නියෝජිතයන්ගේ පොදු විශ්වාසය වූයේ බිඳී ගිය ලෝකයක සභාව පාලම් තනන්නියක් විය යුතුය යන්නයි.

ඔවුන්ගේ අදහස් මගින් සංගමනශීලී පරිවර්තනය සහ පාලම් තැනීම පිළිබඳ මහා සමුළුවේ තේමාව තවදුරටත් ශක්තිමත් වූ අතර, ආසියාවේ අත්දැකීම කලාපයට පමණක් නොව සමස්ත විශ්ව සභාවටම වටිනා දායාදයක් බවද අවධාරණය කෙරිණි.

කතුවරයා පිළිබඳව

ගේබ්‍රියෙල් අබ්ඩි සුසන්තෝ ඉන්දුනීසියාවේ ප්‍රවීණ මාධ්‍යවේදියෙකු වන අතර, වර්තමානයේ Vatican News ඉන්දුනීසියානු කර්තෘ මණ්ඩලයේ සේවය කරයි.

#XIIFABCPlenary #FABC #Synodality #GlobalChurchLeaders #RadioVeritasAsia #RVASinhala