ලෝක තරුණ දින සංවිධායකයෝ FABC නියෝජිතයන්ට ආරක්ෂිත හා තිරසාර වන්දනා අත්දැකීමක් පිළිබඳ සහතික වෙති.

ලෝක තරුණ දින සංවිධායකයෝ FABC නියෝජිතයන්ට ආරක්ෂිත හා තිරසාර වන්දනා අත්දැකීමක් පිළිබඳ සහතික වෙති.

2027 ලෝක තරුණ දින (World Youth Day - WYD) සැමරුම සඳහා දකුණු කොරියාවේ සෝල් නුවර සිදු කෙරෙන සූදානම් කටයුතු හුදෙක් ප්‍රවාහන හා නවාතැන් පහසුකම්වලට පමණක් සීමා නොවී, තරුණ වන්දනාකරුවන්ට ආරක්ෂිත, පිළිගැනීමෙන් පිරි සහ අධ්‍යාත්මික වශයෙන් සාරවත් අත්දැකීමක් ලබාදීම ඉලක්ක කරගෙන සිදුකරන බව සංවිධායකයෝ ආසියානු රදගුරු සමුළු සම්මේලනයේ (FABC) XII වන මහා සමුළුවේ නියෝජිතයන්ට සහතික වූහ.

ජූලි 23 වැනිදා ජකර්තා හි හෝටල් මුලියා (Hotel Mulia) හි වන්ඩා ශාලාවේ (Vanda Room) රාත්‍රී භෝජනයෙන් අනතුරුව පැවති මෙම දැනුවත් කිරීමේ සැසියේදී, රදගුරු හිමිවරුන් සහ නියෝජිතයන්ට සූදානම් කටයුතු පිළිබඳ සවිස්තරාත්මක පැහැදිලි කිරීමක් සිදුකෙරුණු අතර, නවාතැන්, ප්‍රවාහනය, ආරක්ෂණ ප්‍රතිපත්ති (Safeguarding) සහ අනෙකුත් ප්‍රායෝගික කරුණු පිළිබඳ ප්‍රශ්න යොමු කිරීමටද අවස්ථාව ලැබිණි.

මෙම සැසිය මෙහෙයවනු ලැබුවේ සෝල් සහායක රදගුරු පෝල් කියුං සාං ලී හිමිපාණන් විසිනි. උන්වහන්සේ WYD Seoul 2027 හි ප්‍රධාන සම්බන්ධීකාරකවරයා ලෙසද කටයුතු කරති.

වැඩසටහන හඳුන්වා දෙමින් රදගුරු ලී හිමිපාණන් කොරියානු කතෝලික සභාවේ ඉතිහාසය සිහිපත් කළ අතර, පීඩාවන්, යුද්ධ සහ සාමය හා ප්‍රජාතන්ත්‍රවාදය කරා වූ දිගු ගමන තුළින් එම සභාව ගොඩනැගුණු ආකාරය පැහැදිලි කළහ.

"කොරියාවේ සභාව වර්ධනය වූයේ සැප පහසුව මත නොව, දුක් වේදනාවන්ගේ පස මතයි," යැයි උන්වහන්සේ සඳහන් කළහ.

එම ඉතිහාසය සිහිපත් කරමින් රදගුරු ලී හිමිපාණන් පැවසුවේ WYD Seoul 2027 හුදෙක් ජාත්‍යන්තර තරුණ හමුවක් නොව, ඉතිහාසයේ තුවාල මධ්‍යයේ පවා බලාපොරොත්තුව උපදින්නේ කෙසේද සහ දුෂ්කරතා මධ්‍යයේ ඇදහිල්ල වර්ධනය වන්නේ කෙසේද යන්න තරුණයන්ට අත්විඳීමට ඉඩ සලසන අවස්ථාවක් බවයි.

WYD Seoul 2027 2027 අගෝස්තු 3 සිට 8 දක්වා පැවැත්වෙන අතර, ඊට පෙර ජූලි 29 සිට අගෝස්තු 2 දක්වා "Days in the Dioceses" වැඩසටහන පැවැත්වීමට නියමිතය.

සංවිධායකයෝ ලියාපදිංචි කිරීමේ ක්‍රියාවලිය පැහැදිලි කළ අතර, සෝල් නගරයේ දියුණු පොදු ප්‍රවාහන පද්ධතිය වන්දනාකරුවන්ගේ ප්‍රධාන ගමනාගමන මාධ්‍යය වනු ඇති බව දැනුම් දුන්හ. සෑම සහභාගිවන්නෙකුටම උමං දුම්රිය හා බස් රථ සේවාවන් භාවිත කළ හැකි ප්‍රවාහන කාඩ්පතක් ලබාදීමටද කටයුතු යොදා ඇත.

සෞඛ්‍ය හා ආරක්ෂාව සම්බන්ධයෙන් කතෝලික රෝහල් අටක සහයෝගය, පැය 24 පුරා හදිසි වෛද්‍ය සේවා, වීසා පහසුකම් සඳහා දකුණු කොරියානු රජය සමඟ සම්බන්ධීකරණය සහ එක්වර භාවිත කරන ප්ලාස්ටික් භාවිතය අවම කිරීම සඳහා නැවත පිරවිය හැකි ජල බෝතල් හා ජල පිරවුම් මධ්‍යස්ථාන පිහිටුවීම වැනි පාරිසරික වැඩපිළිවෙළ ද මෙහිදී ඉදිරිපත් කෙරිණි.

විවෘත සංවාදය අතරතුර නියෝජිතයන් පෙර පැවති ලෝක තරුණ දිනවල අත්දැකීම් බෙදාහදා ගත් අතර, ප්‍රායෝගික ගැටලු රැසක් පිළිබඳ අවධානය යොමු කළහ.

එක් නියෝජිතයෙකු සඳහන් කළේ ලිස්බන්හි පැවති WYD උත්සවයේදී තරුණයන් මුහුණ දුන් ප්‍රධාන ගැටලුව වැඩසටහන නොව, ජංගම දුරකථන ආරෝපණ ස්ථාන ප්‍රමාණවත් නොවීම බවයි.

ඊට පිළිතුරු දෙමින් ලී පියතුමා පැවසුවේ එම කරුණ පිළිබඳ දැනටමත් සංවිධායකයන්ගේ අවධානය යොමුවී ඇති බවයි.

"ප්‍රමාණවත් වැසිකිළි පහසුකම්, අතේ ගෙන යා හැකි වැසිකිළි සහ ජංගම දුරකථන ආරෝපණ මධ්‍යස්ථාන පිළිබඳ අපි විශේෂ අවධානය යොමු කර තිබෙනවා," යැයි උන්වහන්සේ සඳහන් කළහ.

නවාතැන් පහසුකම් ද ප්‍රධාන සාකච්ඡා මාතෘකාවක් විය. පෙර ජාත්‍යන්තර සභා වැඩසටහන්වලදී ඇති වූ නවාතැන් ගැටලු මෙවර වළක්වා ගන්නේ කෙසේදැයි නියෝජිතයෝ විමසූහ.

ඊට පිළිතුරු ලෙස සංවිධායක කමිටුව පැවසුවේ කලින් සැලසුම් කළ කාලසටහන් අනුව නවාතැන් වෙන්කිරීම් සිදුකරන බැවින්, සෑම වන්දනාකරුවෙකුටම තම ලියාපදිංචි කාලය පුරා නවාතැන් සහතික වන අතර, ඊළඟ කණ්ඩායම් සඳහා පහසුකම් සූදානම් කිරීමටද ප්‍රමාණවත් කාලයක් ලැබෙන බවයි.

ශුද්ධාසනය සමඟ සම්බන්ධීකරණයෙන් ලැබෙන අවසන් ලියාපදිංචි සංඛ්‍යාව අනුව වෙනස් විය හැකි වුවද, ජාත්‍යන්තර වන්දනාකරුවන් ලක්ෂ පහක් (500,000) පමණ සහභාගි වනු ඇතැයි සංවිධායකයෝ අපේක්ෂා කරති.

සැසිය අවසානයේ රදගුරු ලී හිමිපාණන් ආසියාවේ ප්‍රාදේශීය සභාවන්ට තම තරුණයන් මේ ජාත්‍යන්තර හමුව සඳහා මේ වනවිට සිටම සූදානම් කරන ලෙස ආරාධනා කළහ.

"ඔබගේ තරුණයන් පිළිගැනීමට සෝල් නගරය සූදානම්. ඔබ සැම සෝල්හිදී හමුවීමට මම බලාපොරොත්තු වෙනවා," යැයි උන්වහන්සේ පැවසූහ.

මෙම දැනුවත් කිරීමේ සැසියෙන් පැහැදිලි වූයේ WYD Seoul 2027 සංවිධායකයන්ගේ අරමුණ හුදෙක් විධිමත් සංවිධානයක් සිදුකිරීම පමණක් නොව, ප්‍රාදේශීය සභාවන්ගේ අදහස්වලට සවන් දෙමින් ලොව පුරා සිටින තරුණ කතෝලිකයන්ට ආරක්ෂිත, ක්‍රමවත් සහ අධ්‍යාත්මික වශයෙන් සාරවත් වන්දනා අත්දැකීමක් ලබාදීම බවයි.

කර්තෘ ගැන
ඉන්දුනීසියානු රදගුරු සම්මේලනයේ ලේඛන හා තොරතුරු දෙපාර්තමේන්තුවේ නිදහස් මාධ්‍ය දායකයෙකු ලෙස කටයුතු කරන සමාජ සන්නිවේදන ක්‍රියාකාරිනියක වන අමඩියා ප්‍රනාස්තිති විසින් මෙම ලිපිය සම්පාදනය කර ඇත.

#FABCXII #FABC #WYDSeoul2027 #WorldYouthDay #Seoul2027 #AsianChurch #SynodalChurch #BridgeBuilders #RVASinhala #RadioVeritasAsia