"රෝමය ප්රාදේශීය සභාව ප්රතිස්ථාපනය නොකරයි" – රදගුරු සංගමනශීලීත්වය පිළිබඳ මහා සභාවේ නිලධාරියෙක්
"රෝමය ප්රාදේශීය සභාව ප්රතිස්ථාපනය නොකරයි" – රදගුරු සංගමනශීලීත්වය පිළිබඳ මහා සභාවේ නිලධාරියෙක් FABC නියෝජිතයන්ට පවසයි
ජකාර්තා, ඉන්දුනීසියාව – සංගමනශීලීත්වය පිළිබඳ රදගුරු සමුළුව ක්රියාත්මක කිරීම යනු රෝමය මධ්යස්ථානයේ සිට ප්රාදේශීය සභාවන්ට උපදෙස් දීම නොව, විශ්ව සභාව සමඟ එකමුතුවෙන් තමන්ගේම ගමන්මඟ විචාර බුද්ධියෙන් හඳුනා ගැනීමට ඒවා ශක්තිමත් කිරීම බව රදගුරු සමුළුවේ මහලේකම් කාර්යාලයේ උපදේශක ගරු ජියාකෝමෝ කොස්තා SJ පියතුමා පැවසූහ.
ආසියානු රදගුරු සමුළු සම්මේලනයේ (FABC) 12 වැනි මහා සමුළුව අතරතුර ජූලි 24 දින ජකාර්තාවේ හෝටල් මුලියාහි වන්ඩා ශාලාවේ පැවති "සංගමනශීලීත්වය ක්රියාත්මක කිරීමේ මාර්ග" (Pathways for the Implementation of the Synod) යන දේශනයේදී උන්වහන්සේ මේ බව සඳහන් කළහ.
ලොව පුරා සංගමනශීලී ගමනේ ප්රධාන සහයෝගිතාකරුවෙකු වන ගරු කොස්තා පියතුමා ආසියාව පුරා සිටි රදගුරුවරුන් සහ සභා නායකයන් අමතමින් කියා සිටියේ, සංගමනශීලීත්වයේ මීළඟ අදියර සාර්ථක වන්නේ වතිකානයෙන් දැඩි පාලනයක් සිදු කිරීමෙන් නොව, ශුද්ධාත්මයාණන් තමන්ගේම සමාජ හා එඬේර යථාර්ථයන් තුළ සුභාරංචිය ජීවත් කිරීමට ආරාධනා කරන ආකාරය විචාර බුද්ධියෙන් හඳුනා ගැනීමේ වගකීම ප්රාදේශීය සභාවන් භාර ගැනීමෙන් බවයි.
"රෝමය ප්රාදේශීය සභාවන්ගේ වගකීම ප්රතිස්ථාපනය නොකරයි," යැයි ගරු ජියාකෝමෝ කොස්තා SJ පියතුමා පැවසූහ.
ඒ වෙනුවට, රදගුරු සමුළුවේ මහලේකම් කාර්යාලයේ කාර්යභාරය වන්නේ රදගුරු පදවි සංගමනශීලී ගමන ඉදිරියට ගෙන යන අතර ඒවාට සහාය වීම, මඟපෙන්වීම සහ අවශ්ය සම්පත් ලබාදීම බව උන්වහන්සේ පැහැදිලි කළහ.
සිය අදහස් පැහැදිලි කරමින් ගරු කොස්තා පියතුමා, XIV ලියෝ ශුද්ධෝත්තම පියතුමා විසින් මෑතකදී කාදිනල්වරුන්ගේ මණ්ඩලයට යොමු කළ පණිවිඩය උපුටා දැක්වූ අතර, එය සංගමනශීලීත්වය ක්රියාත්මක කිරීමේ අදියර තේරුම් ගැනීමට ප්රධාන යතුර බව සඳහන් කළහ.
නව සභා වැඩසටහනක් ආරම්භ කරනවා වෙනුවට, ශුද්ධෝත්තම පියතුමා රදගුරුවරුන්ගෙන් ඉල්ලා සිටියේ තමන්ට භාර දී ඇති ප්රාදේශීය සභාවන් තුළ "ස්ථිර විශ්වාසයෙන්" සංගමනශීලීත්වය ක්රියාත්මක කිරීමට සහ දෙවියන් වහන්සේගේ ජනතාව "වඩාත් සුභාරංචිමය ජීවන රටාවක්" කරා වර්ධනය කිරීමට මඟ පෙන්වන ලෙස බවද උන්වහන්සේ සිහිපත් කළහ.
ගරු කොස්තා පියතුමාට අනුව, මෙම දැක්ම සභාවේ නව මානසිකත්වයකට මඟ පෙන්වයි.
"මෙම ක්රියාත්මක කිරීමේ අදියර යනු වතිකානයේ උපදෙස් පරිපාලන නියෝග මෙන් ක්රියාත්මක කිරීම නොවේ. එය සෑම ප්රාදේශීය සභාවකටම තමන්ගේ ඉතිහාසය, සංස්කෘතිය සහ එඬේර යථාර්ථය තුළ ශුද්ධාත්මයාණන් තම ජනතාවට මඟ පෙන්වන ආකාරය විචාර බුද්ධියෙන් හඳුනා ගැනීමට හැකි කිරීමයි," යැයි උන්වහන්සේ පැවසූහ.
රදගුරු සමුළුවේ මහලේකම් කාර්යාලය නිකුත් කර ඇති අවසාන ලේඛනය, ක්රියාත්මක කිරීමේ මාර්ගෝපදේශ සහ අනෙකුත් ප්රායෝගික උපදෙස් සභාවේ ප්රධාන අවධානය බවට පත් නොවිය යුතු බවද උන්වහන්සේ අවධාරණය කළහ.
"සැබෑ කේන්ද්රය වන්නේ සභාවේ ජීවිතය සහ මෙහෙවරයි," යැයි උන්වහන්සේ පැවසූහ.
එම ලේඛන ප්රාදේශීය සභාවන්ගේ විචාර බුද්ධිය වෙනුවට ආදේශ කිරීමට නොව, ඒවාට සේවය කිරීමට බවත්, එම නිසා ඒවා යාන්ත්රිකව ක්රියාත්මක කිරීම වෙනුවට ප්රාදේශීය අවශ්යතාවන්ට අනුව යොදා ගත යුතු බවත් ගරු කොස්තා පියතුමා පැහැදිලි කළහ.
සංගමනශීලී ගමනේ විශාලතම ජයග්රහණවලින් එකක් වන්නේ, සුභාරංචිය ප්රකාශ කරනු ලබන, විශ්වාසය ජීවත් වන සහ ධර්මදූත ශ්රාවකයන් බිහිවන මූලික ස්ථානය ලෙස ප්රාදේශීය සභාව පිළිබඳ විශ්වාසය නැවත තහවුරු කිරීම බවද උන්වහන්සේ පැවසූහ.
එහෙත් ප්රාදේශීය සභාවට වැඩි වැදගත්කමක් ලබාදීමෙන් එය ස්වාධීනත්වයට හෝ හුදෙකලා වීමට කැඳවීමක් නොවන බවද උන්වහන්සේ අවධාරණය කළහ.
"සභාව යනු ප්රාදේශීය සභාවන්ගේ එකමුතුවකි," යැයි පැවසූ ගරු කොස්තා පියතුමා, ප්රාදේශීය සභාවන් එකිනෙකාගේ අත්දැකීම් බෙදා ගනිමින්, සංවාදය හා සහයෝගීතාව තුළින් වර්ධනය වන බව සඳහන් කළහ.
එම නිසාම සංගමනශීලීත්වය, රදගුරු පදවි, රදගුරු සමුළු, මහාද්වීපීය සමුළු සහ විශ්ව සභාව අතර අඛණ්ඩ සහයෝගීතාව ප්රවර්ධනය කරන බවද උන්වහන්සේ පැහැදිලි කළහ.
මෙම සම්බන්ධතාවය පාලනයක් නොව සහායකත්වයක් ලෙස හැඳින්වූ ගරු කොස්තා පියතුමා පැවසුවේ, මහලේකම් කාර්යාලය ප්රාදේශීය සභාවන්ට එකට මෙනෙහි කිරීමට, ශුද්ධාත්මයාණන්ගේ ක්රියාකාරිත්වය සැමරීමට සහ අනාගත එඬේර ප්රමුඛතා පිළිබඳ එක්ව විචාර බුද්ධියෙන් කටයුතු කිරීමට උපකාර කරන බවයි.
සිය දේශනයේදී උන්වහන්සේ සංගමනශීලී සභාවක රදගුරුවරුන්ගේ නව කාර්යභාරය පිළිබඳවද අවධානය යොමු කළහ. පරිපාලන නියෝග ක්රියාත්මක කරන නිලධාරීන් ලෙස නොව, එකමුතුකම වර්ධනය කරන, සහභාගිත්වය දිරිගන්වන සහ දෙවියන් වහන්සේගේ ජනතාවට ශුද්ධාත්මයාණන්ගේ හඬ එක්ව විචාර බුද්ධියෙන් හඳුනා ගැනීමට අවකාශ සලසන එඬේරුන් ලෙස රදගුරුවරුන් කටයුතු කළ යුතු බව උන්වහන්සේ පැවසූහ.
ආසියාවේ විවිධ ආගමික හා සංස්කෘතික පසුබිම් තුළ සුළුතර කතෝලික ප්රජාවන්ට සේවය කරන රදගුරුවරුන් සඳහා මෙම පණිවිඩය විශේෂ වැදගත්කමක් ගෙන දෙන බවද උන්වහන්සේ සඳහන් කළහ.
ආසියාවේ විවිධත්වය හේතුවෙන් සියලුම ප්රාදේශීය සභාවන්ට එකම එඬේර ආකෘතියක් නොතිබිය හැකි බව පෙන්වා දුන් ගරු කොස්තා පියතුමා පැවසුවේ, සෑම ප්රාදේශීය සභාවක්ම විශ්ව සභාව සමඟ පූර්ණ එකමුතුවෙන් සිටියද තමන්ගේම යථාර්ථයන් තුළ සංගමනශීලීත්වය මුල් බැස ගන්නා ආකාරය සොයා ගත යුතු බවයි.
සිය දේශනය අවසන් කරමින් උන්වහන්සේ අවධාරණය කළේ, සංගමනශීලීත්වයේ අනාගතය තීරණය වන්නේ නව ව්යුහයන් හෝ අමතර ලේඛන මගින් නොව, තම මෙහෙවර විශ්වාසයෙන් භාරගෙන, එක්ව විචාර බුද්ධියෙන් කටයුතු කරමින්, විශ්ව සභාව සමඟ එකමුතුවෙන් සුභාරංචිය ජීවත් කරන ප්රාදේශීය සභාවන් තුළින් බවයි.
කතුවරයා පිළිබඳව
ගැබ්රියෙල් අබ්දි සුසන්තෝ ඉන්දුනීසියාවේ ජ්යෙෂ්ඨ මාධ්යවේදියෙකි. ඔහු වර්තමානයේ වතිකානු ප්රවෘත්ති (Vatican News) හි ඉන්දුනීසියානු භාෂා සංස්කරණයේ කර්තෘ මණ්ඩලයේ සාමාජිකයෙකු ලෙස සේවය කරයි.
#FABCXII #FABC2026 #SynodOnSynodality #Synodality #FrGiacomoCosta #ChurchInAsia #LocalChurch #CatholicChurch #FederationOfAsianBishopsConferences #Vatican #BridgeBuilders #RadioVeritasAsia #RVASinhala
