මූලික මට්ටමේ සිට පාලම් තැනීම ඇරඹිය යුතුයි. – පාකිස්තාන ඩොමිනිකන් පියතුමෙක් පවසයි.

මූලික මට්ටමේ සිට පාලම් තැනීම ඇරඹිය යුතුයි. – පාකිස්තාන ඩොමිනිකන් පියතුමෙක් පවසයි.

ඉන්දුනීසියාවේ ජකාර්තා නුවර ජූලි 20 සිට 26 දක්වා "සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර" යන තේමාව යටතේ පැවැත්වෙන ආසියානු රදගුරු සමුළු සම්මේලනයේ (FABC) 12 වැනි මහා සමුළුව අභිමුවේ, සැබෑ පාලම් තැනීම ආරම්භ විය යුත්තේ විවිධ ආගම්වල ජනතාව දෛනික ජීවිතයේදී එකිනෙකා හමුවන මූලික මට්ටමෙන් බව පාකිස්තානයේ ඩොමිනිකන් පූජකවරයෙක් අවධාරණය කරයි.

ගරු ජේම්ස් චන්නන් පියතුමා, OP, පාකිස්තානයේ අන්තර්ආගමික සංවාදය සහ සාමය ගොඩනැගීමේ ප්‍රමුඛ පුරෝගාමියෙකු ලෙස පුළුල් ලෙස පිළිගැනේ. වසර 40කට වැඩි කාලයක් පුරා උන්වහන්සේ මුස්ලිම් බහුතරයක් වෙසෙන පාකිස්තානයේ ක්‍රිස්තියානි–මුස්ලිම් සබඳතා ශක්තිමත් කරමින් සාමය ප්‍රවර්ධනය කිරීමට කැපවී සිටිති.

උන්වහන්සේ වසර හතක් ආසියානු රදගුරු සමුළු සම්මේලනයේ අන්තර්සභා හා අන්තර්ආගමික කටයුතු පිළිබඳ කාර්යාලයේ (FABC-OEIA) විධායක ලේකම්වරයා ලෙස සේවය කළ අතර, වසර 17ක් පාකිස්තාන කතෝලික රදගුරු සමුළුවේ ක්‍රිස්තියානි–මුස්ලිම් සබඳතා පිළිබඳ ජාතික කොමිසමේ විධායක ලේකම්වරයා ලෙසද කටයුතු කළහ. එමෙන්ම වතිකානයේ හිටපු අන්තර්ආගමික සංවාදය පිළිබඳ පාප්තුමාගේ මණ්ඩලයේ උපදේශකවරයෙකු ලෙසද සේවය කළහ.

උන්වහන්සේ වසර හතරකට වැඩි අත්දැකීම් ඇසුරින් Radio Veritas Asia සමඟ පැවති සම්මුඛ සාකච්ඡාවකදී සිය අදහස් බෙදාහදා ගත්හ.

ඔබගේ දෛනික මෙහෙවර තුළ "පාලම් තැනීම" යනු කුමක්ද?

"මූලික මට්ටමේදී පාලම් තැනීම යනු පැමිණ සිටීම, ඉවසීම සහ ක්‍රියාකාරීව සම්බන්ධ වීමේ දෛනික මෙහෙවරකි. වසර හතක් ආසියානු රදගුරු සමුළු සම්මේලනයේ අන්තර්සභා හා අන්තර්ආගමික කටයුතු පිළිබඳ කාර්යාලයේ සේවය කළ නිසා, ඉදිරි මහා සමුළුවේ තේමාව මට ඉතා සමීපය. ලාහෝර් නුවර අපගේ සාම මධ්‍යස්ථානය තුළ මුස්ලිම්, ක්‍රිස්තියානි, හින්දු සහ තරුණ නායකයන් එක්ව අන්‍යෝන්‍ය ගෞරවය ගොඩනඟති. ප්‍රාදේශීය ආතතීන් ඇති වූ විට, අපගේ අන්තර්ආගමික ජාලයන් හරහා ඉමාම්වරුන් සහ ප්‍රජා නායකයන් සමඟ එක්ව ගැටුම් උත්සන්න වීමට පෙර ඒවා සමනය කිරීමට අපට හැකි වේ."

සාමය ගොඩනැගීම සඳහා ඔබගේ ජීවිතය කැප කිරීමට ඔබව පෙළඹවූයේ කුමක්ද?

"1977දී තරුණ ශාස්ත්‍රාර්ථියෙකු ලෙස සිටියදී, මුස්ලිම් බහුතරයක් වෙසෙන පාකිස්තානයේ මගේ ජනතාවට සේවය කළ යුතු බවට ගැඹුරු කැඳවීමක් මට දැනුණා. සැබෑ පාලම් තැනීම සඳහා මම වසර හයක් ඉස්ලාම් ආගම හැදෑරුවා. උපවාසය සහ මක්කම වන්දනාව පිළිබඳ පර්යේෂණ ද කළා. පසුව රෝමයේ අරාබි හා ඉස්ලාම් අධ්‍යයන සඳහා වූ පාප්තුමාගේ ආයතනයෙන් අරාබි සහ ඉස්ලාම් අධ්‍යයනය පිළිබඳ උසස් උපාධියක් ලබාගත්තා."

"එම පදනම මත මගේ දශක ගණනාවක මෙහෙවර ගොඩනැගුණා. වතිකානයේ අන්තර්ආගමික සංවාදය පිළිබඳ උපදේශකවරයෙකු ලෙසත්, පාකිස්තානයේ ජාතික ක්‍රිස්තියානි–මුස්ලිම් සබඳතා කොමිසමේ වසර 17ක සේවයක්ද එහි ප්‍රතිඵලයක්."

ගැඹුරු බෙදීම් සහ නැවත නැවතත් සිදුවන ප්‍රචණ්ඩත්වය මධ්‍යයේ ඔබ සාමය ගොඩනඟන්නේ කෙසේද?

"ආගමික අන්තවාදය, නිවාසවලට එල්ල වන ප්‍රහාර, ක්‍රිස්තියානි තරුණියන්ට එරෙහි ප්‍රචණ්ඩත්වය සහ යුක්තිය අහිමි වීම වැනි දැවැන්ත අභියෝග අපට තිබෙනවා. එහෙත් අපි තවමත් සාමයේ මාර්ගය තෝරා ගන්නවා. වෛරයේ බිත්තිවලට ප්‍රතිචාර වශයෙන් අපි සාම මධ්‍යස්ථාන පිහිටුවමින්, අන්තර්ආගමික කොමිෂන් සභා ශක්තිමත් කරමින්, ප්‍රාදේශීය බලධාරීන් සමඟ එක්ව විශ්වාසයේ පාලම් තනනවා. අඳුරට ශාප කරනවා වෙනුවට බලාපොරොත්තුවේ පහනක් දැල්විය යුතු බව මම ඉගෙනගෙන තිබෙනවා."

ප්‍රජාවන් අතර සැබෑ විශ්වාසය ගොඩනැගීමට වඩාත්ම හදිසි පියවර කුමක්ද?

"ආගමික නිදහසට ඇති සීමා, ජනකාය ප්‍රචණ්ඩත්වය, බලහත්කාරයෙන් ආගම මාරු කිරීම, බලහත්කාර විවාහ සහ අපහාස නීති අනිසි ලෙස භාවිත කිරීම වැනි සුළුතර ප්‍රජාවන් මුහුණ දෙන පද්ධතිමය ගැටලු විසඳිය යුතුයි. නමුත් එය නායකයන්ගේ ප්‍රකාශවලින් පමණක් සිදු නොවේ. මූලික මට්ටමේ සංවිධානාත්මක සංවාද සහ නිතිපතා හමුවීම් අවශ්‍යයි. මිනිසුන් මුහුණට මුහුණ හමුවන විට වැරදි වැටහීම් අඩුවෙනවා, අන්‍යෝන්‍ය ගෞරවය වර්ධනය වෙනවා."

ඊළඟ පරපුරේ පාලම් තනන්නන් ඔබ සූදානම් කරන්නේ කෙසේද?

"මගේ ප්‍රමුඛතාවය පාකිස්තානයේ තරුණයන් පුහුණු කිරීමයි. සම්මන්ත්‍රණ, ජාතික සමුළු සහ වෙනත් ආගම්වල නායකයන් හමුවන වැඩසටහන් හරහා ඔවුන් සූදානම් කරනවා. මගේ ලේඛන හරහාත් ඔවුන් සමඟ සම්බන්ධ වෙනවා. සංවාදය සැබෑ වෙනසක් ඇති කළ හැකි බව මගේ ජීවිතයෙන් පෙන්වීමෙන් ඔවුන් මේ මෙහෙවර ඉදිරියට ගෙන යනු ඇතැයි මම බලාපොරොත්තු වෙනවා."

ආසියානු රදගුරු සමුළු සම්මේලනයේ අනාගතය පිළිබඳ ඔබගේ බලාපොරොත්තු මොනවාද?

"ආසියාව පුරා අන්තර්ආගමික සංවාදය තවදුරටත් ප්‍රවර්ධනය කළ යුතුයි. ක්‍රිස්තියානීන් සුළුතරයක් වන රටවල සංවාදය විකල්පයක් නොව, සාමකාමී සහජීවනය සඳහා වූ එඬේර මෙහෙවරේ අත්‍යවශ්‍ය කොටසකි. තරුණයන් වඩාත් ක්‍රියාකාරීව සාමය ගොඩනැගීමට සම්බන්ධ කර ගනිමින්, හෙට දවසේ පාලම් තනන්නන් ලෙස ඔවුන් සවිබල ගැන්විය යුතුයි."

"අවසානයේ, මානව ගරුත්වය, යුක්තිය සහ පොදු යහපත පිළිබඳ සභාවේ ඉගැන්වීම් අපගේ සමාජවල ජීවමාන යථාර්ථයක් බවට පත් වන පරිදි ඒවා තවදුරටත් බෙදාහදා ගත යුතුයි."

කතුවරයා පිළිබඳව

යූසෆ් බෙන්ජමින් පාකිස්තානයේ වෙසෙන නිදහස් මාධ්‍යවේදියෙකි. ඔහු කතෝලික සඟරා සහ විවිධ මාධ්‍ය වේදිකා සඳහා නිතිපතා ලිපි සපයයි.

#FrJamesChannanOP #PakistaniDominican #PakistaniDominicanPriest #FABC #XIIFABCPlenary #FABC2026 #Jakarta2026 
#RadioVeritasAsia #RVASinhala