මිත්රත්වයේ උමං මාර්ගය FABC මහා සමුළුවේ සංගමනශීලීත්වයේ ජීවමාන සංකේතයක් බවට පත්වෙයි
මිත්රත්වයේ උමං මාර්ගය FABC මහා සමුළුවේ සංගමනශීලීත්වයේ ජීවමාන සංකේතයක් බවට පත්වෙයි
ජකාර්තා, ඉන්දුනීසියාව – ආසියානු රදගුරු සමුළු සම්මේලනයේ (FABC) 12 වන මහා සමුළුවේ අවසන් අත්දැකීම සිදු වූයේ දේවස්ථානයක් තුළ පමණක් නොව, ජකාර්තා නගරයේ වීදි යටින් ගමන් කරන මිත්රත්වයේ උමං මාර්ගය (Friendship Tunnel) තුළදීය.
ජූලි 26 වන දින ජකාර්තාහි අප ස්වාමිදූගේ ස්වර්ගාරෝහණ ආසන දෙව්මැදුරේ පැවති අවසන් දිව්ය පූජාවෙන් අනතුරුව, කාදිනල්වරුන්, රදගුරුවරුන්, පූජකවරුන්, ආගමිකවරුන් සහ ගිහි නියෝජිතයන් මෙම උමං මාර්ගය ඔස්සේ ඉන්දුනීසියාවේ විශාලතම මුස්ලිම් දේවස්ථානය වන ඉස්තික්ලාල් මුස්ලිම් පල්ලිය වෙත ගමන් කළහ.
මෙම කෙටි ගමන, "සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර" යන මහා සමුළුවේ තේමාවට ජීවමාන අර්ථයක් ලබාදුන් සුවිශේෂී අවස්ථාවක් බවට පත්විය.
ආගමික සමගිය සංකේතවත් කරන මාර්ගයක්
ජකාර්තා ආසන දෙව්මැදුර සහ ඉස්තික්ලාල් මුස්ලිම් පල්ලිය සම්බන්ධ කරන මිත්රත්වයේ උමං මාර්ගය, ආගමික සමගිය සහ අන්යෝන්ය ගෞරවය සංකේතවත් කරන ජාත්යන්තර අවධානයට ලක් වූ ස්ථානයකි.
මෙම ස්ථාන දෙකම ඉන්දුනීසියානු අගනුවර හදවතේ එකිනෙකට මුහුණලා පිහිටා ඇති අතර, විවිධ ආගම්වල ජනතාව සාමයෙන් සහ සහයෝගයෙන් ජීවත්වීමේ වැදගත්කම එය ප්රකාශ කරයි.
ඉස්තික්ලාල් මුස්ලිම් පල්ලියේ අල්-ෆත්තා ගේට්ටුව වෙත පැමිණි නියෝජිතයන්, මුස්ලිම් සම්ප්රදායට අනුව තම සපත්තු ඉවත් කර පල්ලියට ඇතුළු වූහ.
එහිදී ඔවුන් ඉන්දුනීසියාවේ ආගමික කටයුතු අමාත්යවරයා සහ ඉස්තික්ලාල් මුස්ලිම් පල්ලියේ ප්රධාන ඉමාම් මහාචාර්ය ආචාර්ය කේ. එච්. නසරූද්දීන් උමාර් විසින් පිළිගනු ලැබූහ.
නියෝජිතයන් පල්ලියේ ප්රධාන යාච්ඤා ශාලාව නැරඹූ අතර, එහි ඉතිහාසය සහ ගෘහ නිර්මාණ දැක්ම පිළිබඳව දැනුවත් වූහ. එමෙන්ම, දෙව්මැදුර සහ මුස්ලිම් පල්ලිය එකිනෙකට සමීපව පිහිටා ඇති ආකාරය දැකගත හැකි මහා ටෙරස් ප්රදේශය ද ඔවුහු නැරඹූහ.
ඉන්දුනීසියානු ඉස්ලාම් සම්ප්රදායේ වැදගත් කොටසක් වන විශාල බෙදුග් (සාම්ප්රදායික උත්සව බෙරය) ද නියෝජිතයන්ගේ අවධානයට ලක් විය.
විශ්වාසය බෙදීම නොව සේවයට කැඳවයි
මෙම සංචාරය අවසන් වූයේ FABC නියෝජිතයන් සහ ප්රධාන ඉමාම්වරයා අතර පැවති සංවාදයකිනි.
එහිදී නසරූද්දීන් උමාර් පැවසුවේ සැබෑ ආගමික විශ්වාසය ජනතාව අතර බෙදීම් ඇති නොකර, අනෙකාට සේවය කිරීමට මඟ පෙන්විය යුතු බවයි.
“හොඳ මුස්ලිම්වරයෙකු හෝ හොඳ කතෝලිකයෙකු වීම යනු අනෙකුත් ජනතාවට යහපත ගෙන ඒමයි,” යැයි ඔහු පැවසීය.
මානව ගරුත්වය ආරක්ෂා කිරීම, සාමය ප්රවර්ධනය කිරීම සහ අනාගත පරපුර සඳහා වඩා යහපත් ලෝකයක් ගොඩනැගීම සඳහා ආගමික ප්රජාවන් එක්ව කටයුතු කළ යුතු බවද ඔහු අවධාරණය කළේය.
වෙනස්කම් ගැටුම්වලට හේතුවක් නොව, එකිනෙකාගෙන් ඉගෙනගැනීමට සහ පොහොසත් වීමට ලැබෙන අවස්ථාවක් බවද ඔහු පැවසීය.
පාලම් තනන්නන් වීමේ කැඳවීම
ශුද්ධෝත්තම XIV ලියෝ පියතුමාගේ විශේෂ නියෝජිතයා ලෙස මහා සමුළුවට එක් වූ කාදිනල් ඔස්වල්ඩ් ග්රේෂස් හිමිපාණන් ප්රධාන ඉමාම්වරයාට උණුසුම් පිළිගැනීම පිළිබඳ ස්තුතිය පළ කළ අතර, මෙම සංචාරය විවෘතභාවය සහ මිත්රත්වය පිළිබඳ වටිනා පාඩමක් බව පැවසූහ.
“ඔබගේ ත්යාගශීලීත්වයෙන්, විවෘතභාවයෙන් සහ සේවයෙන් අපි ඉගෙන ගත්තෙමු,” යැයි කාදිනල් ග්රේෂස් හිමිපාණන් පැවසූහ.
ක්රිස්තියානි සහ ඉස්ලාම් ආගම්වල ඇති පොදු ආධ්යාත්මික පදනම් සිහිපත් කරමින් උන්වහන්සේ පැවසුවේ, ශුද්ධ බයිබලය සහ කුරානය යන දෙකම මිනිසා දෙවියන් වහන්සේ වෙතට යොමු කරන අතර සාමයේ මෙවලම් බවට පත්වීමට ආරාධනා කරන බවයි.
“අපගේ කාර්යය වන්නේ සමගිය ගොඩනැගීම සහ වඩා යහපත් ලෝකයක් සඳහා එක්ව කටයුතු කිරීමයි,” යැයි උන්වහන්සේ පැවසූහ.
මිත්රත්වයේ උමං මාර්ගය ආගමික ස්ථාන දෙකක් සම්බන්ධ කරන ගෘහ නිර්මාණයක් පමණක් නොවන බව කාදිනල් ග්රේෂස් හිමිපාණන් අවධාරණය කළහ.
“ආගමික නායකයන්ට එක්ව ගමන් කිරීමට, සහයෝගයෙන් කටයුතු කිරීමට සහ වඩා සාමකාමී ලෝකයක් ගොඩනැගීමට එකිනෙකා ශක්තිමත් කිරීමට හැකි බවට මෙය ජීවමාන සාක්ෂියකි. මෙය අපගේ කැඳවීම, අපගේ කැපවීම සහ අද අප ඉදිරියේ ඇති අභියෝගයයි,” යැයි උන්වහන්සේ පැවසූහ.
සංගමනශීලීත්වය ජීවිතයෙන් අත්දැකීම
බොහෝ නියෝජිතයන් සඳහා මෙම සංචාරය සංගමනශීලී සභාව පිළිබඳ සතියක් පුරා පැවති මෙනෙහි කිරීම් සැබෑ අත්දැකීමක් බවට පත් කළේය.
සවන්දීම, සංවාදය සහ එකමුතුකම පිළිබඳව සාකච්ඡා කළ මහා සමුළුව අවසන් වූයේ, ආගමික ප්රජාවන් දෙකක් එකට සම්බන්ධ කරන මාර්ගයක් ඔස්සේ ගමන් කිරීමෙනි.
දෙව්මැදුරේ සිට මුස්ලිම් පල්ලිය දක්වා වූ මෙම සංකේතාත්මක ගමන, ආසියාවේ සභාවේ මෙහෙවර සුභාරංචිය ප්රකාශ කිරීමෙන් පමණක් සීමා නොවන බවත්, විවිධ ආගම් සහ සංස්කෘතීන් අතර මිත්රත්වය, සංවාදය සහ සහයෝගිතාව වර්ධනය කිරීමද එහි කොටසක් බවත් සිහිපත් කළේය.
ආසියාව පුරා තම ප්රාදේශීය සභාවන් වෙත ආපසු යන නියෝජිතයන් මෙම මහා සමුළුවේ මතකයන් පමණක් නොව, තවත් වැදගත් පණිවිඩයක්ද රැගෙන ගියහ.
එනම්, සංගමනශීලීත්වය සභාව තුළ පමණක් ජීවත් වන දෙයක් නොව, අනෙකුත් ආගම්වල සහෝදර ජනතාව සමඟ ගෞරවයෙන් හා විවෘතභාවයෙන් හමුවීම තුළින්ද ජීවමාන වන බවයි.
ආගමික විවිධත්වයෙන් පොහොසත් ආසියාව තුළ මෙම සාක්ෂිය විශේෂ වැදගත්කමක් දරයි.
කතුවරයා පිළිබඳව
ගේබ්රියෙල් අබ්ඩි සුසන්තෝ ඉන්දුනීසියාවේ ප්රවීණ කතෝලික මාධ්යවේදියෙකි. ඔහු වර්තමානයේ Vatican News ඉන්දුනීසියානු සංස්කරණයේ කර්තෘ මණ්ඩලයේ සේවය කරයි.
#FABC2026 #FABCXII #XIIAFABCPlenary #ChurchInAsia #SynodalChurch #සංගමනශීලීසභාව #SynodalConversion #BridgeBuilders #BuildingBridges #InterreligiousDialogue #ReligiousHarmony #FriendshipTunnel #IstiqlalMosque #JakartaCathedral #FaithAndDialogue #PeaceBuilding #Communion #MissionInAsia #CatholicChurchAsia #RVASinhala #RadioVeritasAsia
