ආසියාවේ විවිධ රටවලින් පැමිණි කතෝලික ඩිජිටල් මිෂනාරිවරුන් සහ සන්නිවේදකයන්, සැප්තැම්බර් 10 සිට 13 දක්වා පිලිපීනයේ ක්වෙසොන් නගරයේ Fairview Park හි පිහිටි Radio Veritas Asia (RVA) මූලස්ථානයේ පැවැත්වෙන පළමු ආසියානු කතෝලික ඩිජිටල් මිෂනාරි එකමුතුව සඳහා එක්ව සිටිති.
Radio Veritas Asia විසින් සත්කාරකත්වය දරන මෙම සිව්දින එකමුතුවේදී, ආසියාවේ විවිධ රටවල නියෝජිතයන් කතෝලික පල්ලියේ සුභාරංචි ප්රකාශනය සහ සන්නිවේදන මෙහෙවර තුළ ඩිජිටල් මාධ්යයේ වර්ධනය වන භූමිකාව පිළිබඳව සාකච්ඡා කරමින් අත්දැකීම් හුවමාරු කර ගනිති.
“Influencers to Witnesses: Synodal Way for Digital Mission in Asia” යන තේමාව යටතේ පැවැත්වෙන මෙම එකමුතුව, සමාජ මාධ්ය බලපෑමෙන් ඔබ්බට ගොස් ඩිජිටල් ලෝකය තුළ ඇදහිල්ලේ අව්යාජ සාක්ෂිකරුවන් බවට පත්වන ලෙස කතෝලික ඩිජිටල් සන්නිවේදකයන්ට කරන ආරාධනය අවධාරණය කරයි.
ඉන්දියාවේ මද්රාස් සහ මයිලපූර් අගරදගුරු පදවියේ ගරු රිචී වින්සන්ට් පියතුමා මෙම එකමුතුවට එක්ව සිටින සහභාගිවන්නන් අතර සිටියි. ඔහු පැවසුවේ වතිකානයේ පැවති ජාත්යන්තර ඩිජිටල් මිෂනාරි එකමුතුවකට සහභාගි වීමෙන් පසු මෙම ආසියානු එකමුතුව පිළිබඳ තම උනන්දුව වර්ධනය වූ බවයි.
එහිදී ආසියාවෙන් සහභාගි වූ පිරිස ඉතා අඩු බව දැක, “ආසියානු ඩිජිටල් මිෂනාරිවරු කොහේද?” යන ප්රශ්නය තම සිත තුළ දැඩි ආශාවක් ලෙස මතු වූ බව ඔහු සඳහන් කළේය.
මැනිලාහි මෙම එකමුතුව ආසියාවේ ඩිජිටල් මිෂනාරිවරුන්ට හමුවීමට, සහයෝගයෙන් කටයුතු කිරීමට සහ එකිනෙකාගෙන් ඉගෙන ගැනීමට සුවිශේෂී අවස්ථාවක් සලසා දෙන බවද ඔහු පැවසීය.
ඉන්දියාවේ ඩිජිටල් මිෂනාරි ප්රජාවක් සමඟ කටයුතු කරන ගරු රිචී වින්සන්ට් පියතුමා, කතෝලික ඩිජිටල් බලපෑම්කරුවන් සඳහා ගොඩනැගීමේ වැඩසටහන් සහ ගැඹුරු කතෝලික අධ්යයනයන්හි නිරත මිෂනාරිවරුන් සමඟ සේවය කරන බවද සඳහන් කළේය.
මෙම එකමුතුව තුළින් නව තාක්ෂණික ක්රමවේද සහ අදහස් ඉගෙන ගනිමින්, ඉන්දියාවේ තම සේවාව තවදුරටත් ශක්තිමත් කර ගැනීමට බලාපොරොත්තු වන බවද ඔහු පැවසීය.
පිලිපීනයේ ජී රියා ජඩුල්කෝ පැවසුවේ, ආසියාවේ අනෙකුත් රටවල සමාජ මාධ්ය සහ සමාජ සන්නිවේදනය භාවිත වන ආකාරය ඉගෙන ගැනීමට මෙම එකමුතුව අවස්ථාවක් බවයි.
“අනෙකුත් සංස්කෘතීන්ගෙන් ඉගෙන ගන්නත්, ආසියාවේ වෙනත් රටවල සමාජ මාධ්ය සහ සමාජ සන්නිවේදනය ක්රියාත්මක වන ආකාරය දැනගන්නත් මට අවශ්යයි.”
විවිධ රටවලින් පැමිණි නියෝජිතයන් හමුවී නව මිත්රත්වයන් ගොඩනඟා ගැනීමට ද තමන් අපේක්ෂා කරන බව ඇය පැවසුවාය.
පිලිපීනයේම මිකා එලා එල්. ටබාඩා ද සඳහන් කළේ, ආසියාව පුරා සිටින ඩිජිටල් මිෂනාරිවරුන් හමුවීම සහ සාකච්ඡාවලට එක්වීම පිළිබඳව තමන් බලාපොරොත්තුවෙන් සිටින බවයි.
සංස්කෘතික පසුබිම්, භාවිත කරන වේදිකා සහ සේවා ක්රමවේද වෙනස් වුවද, එකිනෙකාගෙන් ඉගෙන ගනිමින් සහයෝගීත්වය වර්ධනය කර ගැනීමට මෙම එකමුතුව අවස්ථාවක් සලසන බව ඇය පැවසුවාය.
“අපි හැමෝම ආසියානුවන් වුණත්, අපිට වෙනස් සංස්කෘතීන් තියෙනවා, වෙනස් වේදිකා තියෙනවා, වෙනස් ක්රමවේද තියෙනවා.”
පිලිපීන ජනතාවගේ ආගන්තුක සත්කාරය සහ නිර්මාණශීලීත්වය අනෙකුත් නියෝජිතයන් සමඟ බෙදාගත හැකි වටිනා දායකත්වයන් බවද ඇය සඳහන් කළාය.
ඉන්දුනීසියාවේ ජෙනිෆර් ඔඩෙලියා මෙරඩිත් පැවසුවේ, අනෙකුත් නියෝජිතයන් හමුවී තම තමන්ගේ රටවල ඩිජිටල් සුභාරංචි සේවය තවදුරටත් ශක්තිමත් කළ හැකි ආකාරය පිළිබඳ අදහස් හුවමාරු කර ගැනීමට තමන් බලාපොරොත්තු වන බවයි.
මෙම එකමුතුව තුළින් තම ප්රජාවන් සඳහා මාධ්ය සහ අන්තර්ගත නිර්මාණය කිරීමේ නව ක්රම ඉගෙන ගැනීමට හැකි වනු ඇතැයි ද ඇය විශ්වාසය පළ කළාය.
ඉන්දුනීසියාවෙන් තමන් රැගෙන එන වැදගත්ම පණිවිඩය කුමක්දැයි විමසූ විට ඇය පිළිතුරු දුන්නේ, “එකිනෙකා වෙනුවෙන් යාච්ඤා කිරීම” යන්නයි.
මෙම එකමුතුව තුළ සහභාගිවන්නන් ඩිජිටල් සුභාරංචි සේවය, සන්නිවේදන ක්රමවේද, ඇදහිලි ගොඩනැගීම සහ ආසියාවේ කතෝලික ඩිජිටල් මිෂනාරිවරුන් අතර සහයෝගීත්වය වර්ධනය කිරීම පිළිබඳ සාකච්ඡා, පුහුණු සැසි සහ අත්දැකීම් හුවමාරු සඳහා එක්වීමට නියමිතය.
එකමුතුවේ පළමු දිනය ශුද්ධවූ දිව්ය පූජාවකින් ආරම්භ වූ අතර, විවිධ රටවල නියෝජිතයන් තම සාම්ප්රදායික සංස්කෘතික ඇඳුම්වලින් සැරසී ඊට සහභාගි වූහ. එමඟින් ආසියාව පුරා විහිදී ඇති කතෝලික පල්ලියේ සංස්කෘතික විවිධත්වය සහ එකමුතුකම අලංකාර ලෙස පිළිබිඹු විය.
#AsianDigitalMissionaries #DigitalMission #FABCOSC #RadioVeritasAsia #RVA #FullyPresent #Catholic #DigitalEvangelization #ChurchInAsia #CatholicMedia #Synodality
